Aaj Ka Suvichaar

November 12, 2025

Om Namaha Shivaya
Aaj Ka Suvichaar 🙏🏻🙏🏻

#2824

                Khoobsoorat Niwaas

‘Guruji’ is shabd ka prataap hai itna mahaan
Ki is shabd mein hee maano basaa hai kalyaan
Maano toh hai sab kuch, baat saari hai vishwaas kee
Ye naam toh abb jaise hai oorja har shwaas kee.

Aur Guruji swayam toh Hain mahaanon mein sabse mahaan
Srishti mein sabse bade karunanidhaan
Shiv avatari leeladhaari
Sambhaalte Hain Ve srishti saari.

Hai ye yug parivartan ka samay
Ismein nahin hai koi sanshay
Guruji angg sangg Hain toh ye waqt bhi jaayega guzar Unke kamal charan mein
Khushnaseeb hain hum ki Unhonei liya hai hamein Apni sharan mein.

Har haalaat mein Guruji ko karte chalein yaad
Har baat mein le aayein Guruji kee baat
Baatein karein aur sunein Guruji ke baare mein
Toh pahunchte chalenge sakaaratmakta ke dwaare mein.

Kitnon ko taara hai Guruji ne
Aur kitnon ko bhavishya mein bhi taarenge
Anginat bhakton ka jeevan Unhonei sanvaara hai
Aur aagey bhi sainkdon ka sanvaarenge.

Ye aas nahin, ye hai vishwaas
Jis se paripoorna hai har shwaas
Jis hriday mein Guruji karein vaas
Veh hriday toh sada hai khoobsoorat niwaas.

🌹🌹🌹🌹🌹🌹🌹

Jai Guruji 🙏🙏
Dhirja

Khoobsoorat Niwaas (11/12/2025)

November 11, 2025

Om Namaha Shivaya
Aaj Ka Suvichaar 🙏🏻🙏🏻

#2823

Guruji Ne Kiya Mujh Par Itna Ehsaan

Guruji ne kiya mujh par itna ehsaan
Mujhe joad kar Apne sangg
Bahut hee pyaara hai ye rishta ruhaani
Anokhe moad lene lagi abb meri zindagaani.

Ye rishta hai anokha
Yahaan nahin miley kabhi dhokha
Is rishte mein har pal hai sundar mauka…

Mauka, Guruji ke saanidhya mein rehne ka
Mauka, Guruji ke prati prem bhaav mein behne ka
Mauka, atma nireekshan seekhne ka
Mauka, darpan dekhne ka…

Darpan, apne antarmann ka
Taaki apni khaamiyan dikh jaayein
Aur Guruji ke bakhshe simran se
Ve pavitrikaran dwaara dhul jaayein.

Sewa, simran, satsang se rishta hota jaaye mazboot
Samarpan aur lagan aise hon ki apni oar se rishta na jaaye toot
Har imtehaan ko rishte kee seedhiyan maan
Unpar chadhna hoga hokar saavdhaan
Aur saath hee tyaagna hoga abhimaan
Balki ye hai shaayad sabse bada imtehaan.

Is rishte mein khila rahe niswaarth pyaar
Is rishte mein na ho koi mannat ya vyapaar
Karti rahoon har pal Guruji ka dhanyawaad
Unke sangg ye rishta hai Unka diya prasad.

Buss, Guruji Maharaj ko prasann rakhne mein vyast rehkar
Unkee mahima ke gungaan mein mastt rehkar
Is rishte ko nibhaana
Guruji ko rijhaana
Laagi rahe ismein meri aisee lagan
Ki is rishte mein mai rahoon magan.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ne Kiya Mujh Par Itna Ehsaan (11/11/2025)

November 10, 2025

Om Namaha Shivaya
Aaj Ka Suvichaar 🙏🏻🙏🏻

#2822

Har Bhakt Kee Sunvaayee

Kewal Guruji Maharaj hee
Toad sakte Hain praarabdh kee doar
Varna pratikool haalaat ke ghoont peete peete
Guruji kee sharan se vanchit ho jeete jeete
Kitne aaye aur gaye duniya ke rangg manch se
Vyakul aur dukhi hokar yahaan ke prapanch se.

Pooran Guru Hain Guruji meharbaan
Apni daya barsaate Hain Ve karunanidhaan
Unkee mehar se toot paaye praarabdh kee doar
Unkee kripa nahin honei deti kamzor.

Guruji kee dee prerna ummeed kee lau jalaati hai
Guruji kee dee chetna kadam aagey badhvaati hai
Sehensheelta aur viveksheelta kee dete Hain Guruji bakhshish
Sampoorna kalyaan ka Guruji dete Hain ashish.

Guruji kee marzi ko hukm maan lene mein hai bhalaayee
Aisee hai Guruji Maharaj kee vaddi vadiyaayee
Alaukik mahima se paripoorna hai Guruji kee guruyaayee
Guruji ke darbar mein hoti hai har bhakt kee sunvaayee.

🌹🌹🌹🌹🌹🌹🌹

Jai Guruji 🙏🙏
Dhirja

Har Bhakt Kee Sunvaayee (11/10/2025)

November 9, 2025

Om Namaha Shivaya
Aaj Ka Suvichaar 🙏🏻🙏🏻

#2821

          Beshak Tum Na Jaano…..

Beshak tum na jaano ki ye raasta le jaayega kahaan
Is par chalne ka aadesh de rahe Hain Guruji mahaan
Guruji angg sangg Hain is raaste par
Isliye yahaan hoga kalyaan hee kalyaan
Tum har sanshay ko tyaag kar
Badhte chalo jahaan le chalein Guruji ke kamal charnon ke nishaan.

Guruji kee deewaanagi mein ye raasta katt jaayega
Guruji ke naam se bhayy ka asur raaste se hatt jaayega
Tum chal ke dekho toh zaraa
Raasta ashishon se hai bhara
Jo Guruji ne bichhaaye Hain tumhaare liye swayam
Jinse sudhar jaayega tumhaara jeevan.

Guruji toh dene ke liye aaye Hain
Tum seekh lo lena abb
Phir na kehna ki tumhaare kehne par
Aaye nahin thei Rabb.

Arey, Guruji toh tumhaare bin boley hee de rahe Hain tumhe prasad
Unse seedhi taar jodoge toh jaanoge tum Unke ashirwaad
Kar lee tumne bahut naadaani
Abb akal se kaho vo baney sayaani
Aur Guruji ko Rabb jaan lo
Unka hukm abb maan lo.

🌹🌹🌹🌹🌹🌹🌹

Jai Guruji 🙏🙏
Dhirja

Beshak Tum Na Jaano….. (11/09/2025)

November 8, 2025

Om Namaha Shivaya
Aaj Ka Suvichaar 🙏🏻🙏🏻

#2820

Maalik Hain Mere Guruvar Pyaare

Maalik Hain mere Guruvar pyaare
Saari kee saari srishti ke
Unke sabhi bhakt aadaata hain
Unkee kripa kee drishti ke.

Guruji kee marzi jo chalti hai
Toh kalyaan hota hai sab ka
Yoon hee thode hee na hai
Unka darja Rabb ka.

Balki Guruji toh lekh badalte Hain
Vo bhi Apni hee marzi se
Unkee daat badi hoti hai
Har sangat kee arzi se.

Guruji Hain bhole bhaav ke ichchuk
Unke samaksh hum sab hain bhikshuk
Ve hee daata, Ve hee rakshak
Ismein nahin hai koi bhi shak.

Guruvar kee daya mil jaaye jisey
Nishchit hai uska kalyaan
Guruvar hee Hain maat-pita bhi
Guruvar mein hee basey Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Maalik Hain Mere Guruvar Pyaare (11/08/2025)

November 7, 2025

Om Namaha Shivaya
Aaj Ka Suvichaar 🙏🏻🙏🏻

#2819

Aapki Rehmaton Se Aabaad….

Param poojya Guruji Maharaj,

Aapke charnon mein aayi thi toh thi mai fakir
Aapne Apni rehmat kee daulat se banaaya mujhe behad ameer
Kyunki mila Aapke ashirwaadon ka beantt khazaana
Jeevan bann-ne lagaa anokha sa afsaana.

Na jaane kin kin pichhle janmon ke kaun kaunse karmon ka
Aap bhog karvaate jaa rahe Hain is ek janam mein
Apni suraksha ka kavach mujhe pehna kar
Aap mujhe aagey badhaate jaa rahe Hain jeevan mein.

Aapki meher se Aapke charnon mein rahoon jhuki
Aapki kripa se Aapke dar par rahoon ruki
Mujh mein na hai vivek na hai shuddhi
Nahin seekhni mujhe koi siddhi
Aapke charnon mein mai thi aur rahoongi fakir
Aapki daya ke bharose hai aur rahegi meri taqdeer
Apni khaamiyon ko apne prem mein piro kar
Mai Aapko shraddhaanjali arpit karoon
Jaanti hoon Aap sweekaar lenge
Phir bhi na jaane kyun mai daroon.

Jo rog hain mujhe, ve hain mere hee karam
Par ilaaj har tareh se Aapki niyaamat hai
Insaaniyat nibhaati hoon ya nahin, mai na jaanoon
Aapne Apni sangat banaaya mujhe, ye Aapki inaayat hai.

Aapke sahaare chalta rahe ye fasaana
Meetha lagta rahe mujhe Aapka bhaana
Aapki sharan milne se pehle mera jahaan thaa veeraana
Aapki rehmaton se aabaad hua vo, Aapka anantam shukrana.

🌹🌹🌹🌹🌹🌹🌹

Jai Guruji 🙏🙏
Dhirja

Aapki Rehmaton Se Aabaad…. (11/07/2025)

November 6, 2025

Om Namaha Shivaya
Aaj Ka Suvichaar 🙏🏻🙏🏻

#2818

            Guruji Mere Paalanhaare

Guruji mere paalanhaare
Meri har saans hai Unke sahaare
Na saathi koi Unsa sachcha
Na saath koi Unsa achcha
Phir kyun kaheen aur mai jaaoon
Unse ardaas karti jaaoon
Ki rakhte rahein Ve mujhe Apne charan mein
Ye jeevan beete Unkee sharan mein
Aur jitne janam hon mere
Guruji angg sangg hon shaam savere
Phir kya raat aur kya din
Koi lamha na ho Unke bin
Ye hai meri abhilaasha
Yahee toh hai asal sukh kee paribhasha.

Kyunki duniyavi sukh dukh toh aate jaate rahenge
Par Guruji ke saanidhya mein jo bhi mere aansoo bahenge
Ve Guruji kee kripa se karenge mera pavitrikaran
Guruji Apni mehar se karenge mere paapon ka haran.

Karna chaahoon toh bhi nahin kar sakti Guruji ke kiye upkaaron kee gintee
Guruji se mujh nacheez kee hai ye vinamr vintee
Ki Ve banaaye rakhein saari sangat par Apni mehar
Unhee kee mehar se hai har din, har pal, har peher.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Mere Paalanhaare (11/06/2025)

November 5, 2025

Om Namaha Shivaya
Aaj Ka Suvichaar 🙏🏻🙏🏻

#2817

Nirankar Toh Avatar Ke Roop Mein

Nirankar toh avatar ke roop mein
Aakar jeete Hain dharti kee chhaaon dhoop mein
Guru Nanak Dev Ji aur Guruji Maharaj
In jaise avataron ne sanvaare Hain sangat ke kaaj.

Aaj Ve insaani chole mein nahin Hain beshak
Kintu Unkee mahima aaj bhi hai saarthak
Jeevan daan dekar bakhshte Hain aarogyata
Gurbani se jodkar mann ko pradaan karte Hain prabalta.

Anginat praaniyon ko Ve aaj bhi taarte Hain
Na jaane kitnon ka jeevan sanvaarte Hain
Hum sangat bhi in khushnaseeb jeevon mein hain shaamil
Hum sabki zindagi Guruji ke ashirwaad se rahi hai khil
Banda bann jaane ka raasta dikhaate Hain Ve
Ruhaani azadi se jeena sikhaate Hain Ve.

Guruji Maharaj ka neevanpann aur noor
Karta hai ahankar aur andhere ko duur
Na koi bhaashan na pravachan
Buss, Gurbani ka shravan, kirtan, aur manan
Gurbani ke mahatva ko karke roshan
Guruji karte Hain Gurbani dwaara hamaari rooh ka poshan.

Itna upkaar kiya hai Guruji ne
Jod kar hamein swayam ke sangg
Bakhshte rahein Ve saari sangat ko chadhdi kala
Sabhi par chadhaa kar Apna ruhaani rangg.

Jeevan ka chitr reh jaayega neeras is rangg ke bina
Guruji ke angg sangg rehne se saarthak lagne lagaa hai jeena
Aisa hai Unka maargdarshan aur Unkee guruyaayee
Aisee hai Unkee daya aur vadiyaayee.

Guru Nanak Dev ji ke Aagaman Divas ke shubh avsar par
Saari sangat ko pyaar bhari shubhkaamnaayein
Guruon ke vachan ka paalan kar ke
Hum sab sada Unkee mahima ke gunn gaayein.

🌹🌹🌹🌹🌹🌹🌹

Jai Guruji 🙏🙏
Dhirja

Nirankar Toh Avatar Ke Roop Mein (11/05/2025)

November 4, 2025

Om Namaha Shivaya
Aaj Ka Suvichaar 🙏🏻🙏🏻

#2816

Itnee Shakti, Itna is Pyaar

Itnee shakti, itna pyaar
Itnee mamta, itna dulaar
Guruji hee Hain de sakte
Aur Ve ye dete nahin thakte.

Karmakand, andhvishwaas, aur pratibandh ke bina
Guruji Maharaj sikhaa rahe Hain jeena
Har pal rehkar angg sangg
Sikhakar bhakti ka anokha dhangg
Chadha rahe Hain mujh par Ve Apna rangg
Aur niraash lamhon mein bhi bakhshte Hain Ve umang.

Guruji mithya nahin Hain, Ve Hain satya
Kitnee sangat ne Unhe maanav roop mein dekha, ye hai tathya
Is se miltee hai itnee saantvana
Ki mujhe bhi milee hai Guruji kee panaah.

Aakhirkaar har sankat ko jhelne kee himmat
Hai Guruji kee hee dee hui daat
Karma bhog ke madhya mein jeete huey
Ye saabit hoti hai anivaarya saugat.

Guruji ka mere sir par haath hai
Unka ashirwaad sada mere saath hai
Mai toh nahin hoon is kaabil
Par Guruji ka hai itna dayalu dil
Mai toh hoon Guruji kee hee rehmaton kee mohtaaj
Unhee ka hai mere har shwaas par raj.

🌹🌹🌹🌹🌹🌹🌹

Jai Guruji 🙏🙏
Dhirja

Itnee Shakti, Itna is Pyaar (11/04/2025)

November 3, 2025

Om Namaha Shivaya
Aaj Ka Suvichaar 🙏🏻🙏🏻

#2815

Roz Kee Dincharya Mein…

Roz kee dincharya mein vyast rehte ho tum
Duniyadari mein mastt rehte ho tum
Guruji tumhe na bhoolein ek bhi pal
Aur tum kehte ho Unke sangg baithoge tum kal
Kyun nahin aaj hee, balki abhi abhi
Chod kar vyarth ke kaam sabhi.

Duniyadaari nibhaate huey usmein phans na jaana
Sanatan sukh aur santosh ke liye Guruji ke charan Hain sabse uttam thikaana
Kshanbhangur aur asthaayi hai baaki har sukh
Isliye Guruji kee oar modey rakho tum apne mann ka mukh.

Guruji tumhaare paap dhotey jaayenge
Tumhaare sanskaar Gurumukhi hotey jaayenge
Guruji kee kripa bin ye mumkin nahin
Unkee daya bin ho ujjwal koi din nahin.

Baat kar lo Guruji ke sangg
Ya Unke swaroop ko dekhte raho
Jis bhi tareh se, par koshish toh karo
Guruji ke prati prem bhaav mein baho.

Kar ke Unse keh kar ya bin kahe baatein mann kee
Khoobsoorati badh jaayegi har uss kshan kee
Duniyavi baaton ke samaksh uss kshan ka nahin koi toal
Kyunki har veh kshan hoga anupam aur anmol.

🌹🌹🌹🌹🌹🌹🌹

Jai Guruji 🙏🙏
Dhirja

Roz Kee Dincharya Mein… (11/03/2025)