Aaj Ka Suvichaar

July 15, 2025

Om Namaha Shivaya
Aaj Ka Suvichaar 🙏🏻🙏🏻

#2704

Paawan Prabha Aapki

Param poojya Guruji Maharaj,

Paawan prabha Aapki
Divya abha Aapki
Roshan karti hai mera jeevan
Roshan karti hai mera kann kann.

Aapki dee daat hai ye tann, mann, dhan
Phir bhi gustaakhi kar baithti hoon kabhi kabhi
Jaane anjaane mein ho jaata hai inka tiraskaar
Phir pachhtava bhi hota hai baar baar.

Aap kshamasheel, Aap dayavaan
Kar dete Hain maaf
Aapke hee prataap se
Antas ho sakta hai saaf.

Mere bheetar mal anek
Mere taaranhaar Aap ek
Om bhi Aap, Aap hee Ek Onkar
Aap hee Mahadev, Aap nirankaar.

Mere buss mein toh nahin hai Guruji
Aap pavitra kar deejiye mera charitra
Aap mata, pita, bhai, Guru, aur Prabhu Hain mere
Aap hee Hain mere sabse ghanishth mitra.

🌹🌹🌹🌹🌹🌹🌹

Jai Guruji 🙏🙏
Dhirja

Paawan Prabha Aapki (07/15/2025)

July 14, 2025

Om Namaha Shivaya
Aaj Ka Suvichaar 🙏🏻🙏🏻

#2703

     Dekhkar Sooraj Ko Dhalte Huey

Dekhkar sooraj ko dhalte huey
Ruk na jaana tu chalte huey
O raahi, teri soch beshak ho nimaani
Teri dagar beshak ho anjaani
Par vaddi hai Guruji kee meharbaani
Vo dhak degi teri har naadaani.

Tu sabr mein bunta chal sehenshakti
Jo kasht ke dauran banee rahegi sahaayak yukti
Sabr mein sammilit kar le vishwaas
Ki Guruji kee marzi ke aagey khokhli hai teri har aas
Kyunki Guruji karte Hain kalyaan poora
Aur tera vichaar hai insaani aur adhoora.

Guruji se maangte huey bakhshish
Unke charnon mein jhuka kar apna sees
Sabr ke aabhooshan se shraddha ko sajaa
Aur Guruji kee dikhaayee raah par chalta jaa.

Aaj sooraj dhal gaya toh na kar fikr
Tu Guruji ka bachcha hai, rakh sabr
Sooraj dobaara hoga uday kal
Guzar jaayenge andhere ke ye pal
Guruji ke aitbaar mein
Sabr bhare intazaar mein.

🌹🌹🌹🌹🌹🌹🌹

Jai Guruji 🙏🙏
Dhirja

Dekhkar Sooraj Ko Dhalte Huey (07/14/2025)

July 13, 2025

Om Namaha Shivaya
Aaj Ka Suvichaar 🙏🏻🙏🏻

#2702

         Unka Ho Jaa

Aye mere dil
Tu hai toh nahin is kaabil
Ki tujhe Guruji ka saanidhya ho haasil
Lekin Guruji Hain itne dayavaan
Ki har pal rehte Hain tere angg sangg
Bharte huey tere jeevan mein ruhaani rangg.

Ve tere liye karte Hain sabb
Par kar ke kabhi nahin jataate
Arey, Unkee meher kee badaulat hee
Khuley hain tere karmon ke bandd khaate
Isliye tujhe lagta hai aksar
Ki jeevan mein tufaan hain idhar udhar
Kyunki Ve madad kar rahe Hain teri
Is se pehle ki ho jaaye deri.

Kyunki jitnee der lagegi tere pichhle kukarmon ke talne mein
Utna zyada hoga kasht tujhe aagey chalkar
Karmon ke ganit ko tu nahin sakta samajh
Koshish karega jitnee utna jaayega ulajh
Isliye Guruji par sabb chod
Tu buss Unkee oar rukh moad
Unmein kho jaa
Buss, Unka ho jaa.

🌹🌹🌹🌹🌹🌹🌹

Jai Guruji 🙏🙏
Dhirja

Unka Ho Jaa (07/13/2025)

July 12, 2025

Om Namaha Shivaya
Aaj Ka Suvichaar 🙏🏻🙏🏻

#2701

      Guruji Rabb Mere

Guruji Rabb mere
Guruji sabb mere
Ve preet Hain
Ve meet Hain
Mere geet hain
Arpit Unhe.
Bhagwaan Hain
Dayavaan Hain
Mere praan Hain
Arpit Unhe.

Ve bhor Hain
Aghor Hain
Ve doar Hain
Thaame huey.

Uss doar se
Chalti hoon mai
Kathputli hoon
Hiltee hoon mai.
Ve prerna meri
Ve chetna meri
Varna mera kya
Hoon mitti kee dheri.

Saath Unka hai
Chal rahi hoon mai
Haath Unka hai
Pal rahi hoon mai.

Ve samundar Hain
Mai nadiya neeveen
Unkee oar bahi
Ve hee kal bhi thei
Ve Hain aaj bhi
Unka sabhi
Aisa tabb bhi thaa
Aisa hee hai abhi
Aaj kal mein ye
Jaan jaayenge sabhi
Ki Ve hee Guru Hain
Hain Ve bakhshanhaar
Unke aasre hee hai
Ye saara sansaar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Rabb Mere (07/12/2025)

July 11, 2025

Om Namaha Shivaya
Aaj Ka Suvichaar 🙏🏻🙏🏻

#2700

Bann Kar Guruji Ka Deewaana

Bade pyaar se Guruji mere
Likhte rehte Hain mera lekha dobara
Shukr hai Unkee marzi chalti hai
Varna mujhe kaise milega kinaara.

Mujh rooh ko, jo lekar is deh ka bhaar
Chal padi karne bhav saagar ko paar
Shukr hai Guruji ke haathon mein hai patvaar
Varna yakeenan reh jaaoongi kaheen beech majdhaar.

Abb toh is tathya mein hai satya poorna
Ki Guruji kalyaan karenge sampoorna
Unhe jaise jaise sahi lagega jabb jabb
Ve hee mere Guru Hain, aur Ve hee Hain Rabb.

Dharti par rehte huey
Rabb ko Guru ke roop mein paana
Ho hee nahin sakta
Is se uttam koi bhi khazaana.

Isliye kehti rehti hoon apne mann se
Ki vo chod de abb ghabraana
Aur zindagi ke din guzaar le
Bann kar Guruji ka deewaana.

🌹🌹🌹🌹🌹🌹🌹

Jai Guruji 🙏🙏
Dhirja

Bann Kar Guruji Ka Deewaana (07/11/2025)

July 10, 2025

Om Namaha Shivaya
Aaj Ka Suvichaar 🙏🏻🙏🏻

#2699

                   Guru Aur Shishya

Guru aur shishya ka naata itna pavitra
Guru sudhaarein shishya ka charitra
Dein Ve shishya ko adhyatmik gyan
Karein Ve shishya ka sampoorna kalyaan.

Har din shubh hai karne ke liye Guru ka dhanyawaad
Har din paawan hai paane ke liye Guru ka ashirwaad
Kintu Gurupurnima ka utsav iske mahatva ko karta hai aur bhi roshan
Ki kitna zaroori hai shishya ka Guru ke dwaara poshan
Aur anivaarya hai shishya ka apne Guru ke prati shraddha bhaav aur aadar satkaar
Isliye aaj ke din khaas taur par vyakt karein hum Guruji ka aabhaar.

Apni saari sangat ko andhere se prakash kee oar le jaane aaye Guruji
Anginat shishyon ke soye bhaagya jagaane aaye Guruji
Aaj takk bhi rahe Hain Apni sangat ko Ve taar
Aagey bhi karte rahenge Apne bachchon ka uddhaar.

Guruji Hain Guru ke roop mein Bhagwaan
Sangat hai Unkee shishya, sewak, aur santaan
Bin Guruji ke gati nahin
Unke bin sumati nahin
Ve Hain toh niraasha mein bhi hai asha
Unke bin poorna na ho oordhvagati kee abhilasha.

Sunvaate Hain Apne saanidhya mein Gurbani
Bakhshte Hain sewa aur sadh sangat ka sangg
Sangat ke kasht lete Hain Ve swayam par
Apne shishyon ka maargdarshan karte Hain jeevan bhar.

Vyasa Poornima ke mahaan naam se shuru hua ye utsav
Sabhi Guruon ka dhanyawaad karne ka hai ye avsar
Aaj ke khaas din par param poojya Guruji Maharaj ko shukrana anantam
Ki Unhonei mujhe sweekaar kar sanvaar diya hai mera jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Guru Aur Shishya (07/10/2025)

July 9, 2025

Om Namaha Shivaya
Aaj Ka Suvichaar 🙏🏻🙏🏻

#2698

             Ye Rishta

Guruji sunte Hain rooh kee har awaaz
Guruji jaanein hamaari rooh ka har raaz
Aakhirkaar ye rishta hai hee ruhaani
Rooh se rooh ke judne kee hai ye kahaani.

Ho ya nahin hamein ye gyat
Kintu hai ye bilkul pakki baat
Ki hamaari rooh Paramatama se milne ke liye utsuk hai
Veh janam maran se mukt honei kee ichchuk hai.

Lekin maya, vikaar, aur karmon ka hai jo chakkar
Ismein reh kar hum ye bhool jaate hain aksar
Aur yathaarth se hokar bekhabar
Safal nahin kar paate ye safar.

Bina kisee vikarshan ke
Guruji ke simran aur chintan se
Judi rahe Guruji se jo seedhi ruhaani taar
Toh hoti rahengi Unse baatein do chaar.

Kabhi baatein hongi zyada, kabhi kumm
Dheere dheere is marham se upchaarit hotey rahenge hamaare gumm
Duvidhaaon se bhara hai ye jeevan
Kitnee sukhdaayi hoti hai aise mein Guruji kee sharan.

Ruhaani taar kamzor na padne paaye
Guruji se rahe ye ardaas
Unkee shakti toh hai aseem
Kintu hamaari kshamta hai ksheen
Isliye anivaarya hai Guruji kee hum par meharbaani
Taaki Unse ruhaani taar joad paayein hum praani.

Is ruhaani rishte par sada hai Guruji ka pehra
Unkee kripa se ye rishta hota rahe gehra
Koi rishta nahin is rishte se zyada anmol
Is rishte ko bayaan na kar paaye koi bhi duniyavi bol.

🌹🌹🌹🌹🌹🌹🌹

Jai Guruji 🙏🙏
Dhirja

Ye Rishta (07/09/2025)

July 8, 2025

Om Namaha Shivaya
Aaj Ka Suvichaar 🙏🏻🙏🏻

#2697

                    Zindagi Mein…

Zindagi mein aksar aate hain aise pal
Jabb din mein bhi sooraj jaata hai dhal
Mann ke gagan ka
Aisa hai kissa jeevan ka.

Aise mein lekar Guruji ka naam
Sunehri ho jaati hai bin sooraj ke bhi shaam
Kyunki sooraj se kaheen zyada roshan hai Guruji ka naam
Sooraj toh Guruji ko bhi karta hai pranaam.

Asha ka pal ho ya niraasha ka
Santosh ka pal ho ya ho abhilaasha ka
Shukrana ka pal ho ya shikayat ka
Ikraar ka pal ho ya ho ibadat ka
Guruji ke saanidhya mein beete har pal
Toh prerna se paripoorna hoga aaj aur kal.

Prerna, parwardigaar kee
Suraksha, taaranhaar kee
Preet, paalanhaar kee
Hukoomat, Guru sarkar kee.

Guruji ke hukm ka paalan karein
Unhee ke naam se har shwaas bharein
Unhee ke samarpan mein beete ye zindagi
Unke charnon mein miltee rahe Unkee bakhshindagi.

🌹🌹🌹🌹🌹🌹🌹

Jai Guruji 🙏🙏
Dhirja

Zindagi Mein… (07/08/2025)

July 7, 2025

Om Namaha Shivaya
Aaj Ka Suvichaar 🙏🏻🙏🏻

#2696

       Avatar Divas Hai Guruji Ka

Avatar Divas hai Guruji ka
Sabko lakh lakh hon badhaayiyan
Aao hum sab mil kar ke
Karein Guruji kee vadiyaayiyan.

Guruji ke mahima kee gaatha
Guruji ke sangg pyaar ka naata
Sabse pyaari saugat hai
Jis se banti har bigdi baat hai.

Har pal har sangat ke angg sangg
Hotey Hain Guruji Maharaj
Har sangat ke sir par hai
Unke ashirwaad ka taj.

Shiv avatari param poojya Guruji pyaare
Jinhonei anginat lamhe tapp mein guzaare
Swayam bulaate Hain bhakt ko Apne dwaare
Hain Ve saari sangat ke akhand sahaare.

Tithi Unke maanav janam kee
Bahut mainey rakhti hai saari sangat ke liye
Kitnon ke naseeb sanvaare
Jabb takk Ve maanav roop mein jeeye
Aur maanav roop ke pashchaat bhi Unka har swaroop
Aisa hai maano Unka saakshaat roop
Jiske dwaara sangat joad paati hai Unse ruhaani taar
Ye sab hai Guruji kee rehmat aparampaar.

Jyot Hain Ve divya aur akhand
Na aadi Unka aur na koi antt
Unke charnon mein hai sachkhand
Jahaan sukh hai anant.

Guruji ka avatar divas par chetna ko jagaayein
Guruji kee prerna se banda bann-ne kee poori koshish mein lagg jaayein
Nirantar baras rahi hai Guruji kee aisee anukampa aparampaar
Ki ek boond se hee ho sakta hai hamaara sampoorna uddhaar
Neevenpann se natmastak hokar Unke charan mein
Shukrana karein ki baandha hai Unhonei hamein is nirmal bandhan mein.

Guruji ka mahaatmya badhta rahe har din
Shwaas na aaye jaaye tann se Unkee yaad ke bin
Guruji kee sharan mein aane se pehle jeevan thaa kitna adhoora
Ye ehsaas hua tabb se jabb se mila pyaara Guruvar poora.

🌹🌹🌹🌹🌹🌹🌹

Jai Guruji 🙏🙏
Dhirja

Avatar Divas Hai Guruji (07/07/2025)

July 6, 2025

Om Namaha Shivaya
Aaj Ka Suvichaar 🙏🏻🙏🏻

#2695

Mere Guruji Sundar Sundar

Mere Guruji sundar sundar
Rutba aalishaan
Aaye bannkar maanav
Insaan ke roop mein Bhagwaan.

Mata ji aur Bapu ji ko mila avsar
Ki MahaShiv janmey Unke ghar
Nanha baalak Bhagwaan swayam
Khila mata ji Bapu ji ka ghar aur upvan.

Bachpan se hee Guruji kee leela
Thi insaani soch ke daayre ke paar
Jaise jaise bade huey Ve
Ye jaan-ne lagaa Unka ghar parivaar.

Yuvavastha se hee Guruji ne
Kitnon ka kalyaan kiya shuru
Unkee sangat badhne lagi
Kitnon ko apnaane lagey Ve pooran Guru.

Jalandhar aur Chandigarh ke baad
Delhi mein Guruji aaye
Kitne sheheron aur gaaon ke vaasiyon ke
Bhaagya Unhonei jagaaye.

Bhagwaanon ke Bhagwaan Guruji
Karte rahe sabka kalyaan
Kayion ne samjha Ve karte Hain chamatkaar
Chamatkaar ko honei lagaa namaskaar
Guruji aaye dene asal ruhaani gyan
Mitaane sangat ka agyan
Kuch toh seekhe, kuch thei naadaan
Isliye rahe asal cheez se anjaan.

Sewa, satsang, simran kee daat
Bakhshi sangat ko Guruji ne din raat
Bakhsh rahe Hain aaj takk bhi
Leela Unkee hai akath aur athak bhi.

Sangat ka shuddh bhakti bhaav
Buss, iska hai Guruji ko chaav
Dayalu mein sabse dayalu Hain Ve
Kripalu mein sabse kripalu Hain Ve.

Guruji kee drishti hai srishti ke paar
Sabse paawan hai Unka pyaar
Unkee mahima mahaan aur aparampaar
Sabko Unke avatar divas kee shubhkaamnaayein kayi hazaar.

🌹🌹🌹🌹🌹🌹🌹

Jai Guruji 🙏🙏
Dhirja

Mere Guruji Sundar Sundar (07/06/2025)