Aaj Ka Suvichaar

December 26, 2024

Om Namaha Shivaya
Aaj Ka Suvichaar 🙏🏻🙏🏻

#2503

                    Vinamr Anurodh

Mere param poojya Guruvar,

Hai Aapse vinamr anurodh
Aapki goad mein ho atmabodh
Mere mann par rahe sada Aapka shaasan
Mere hriday mein sada ho Aapka aasan
Jis par Aap rahein viraajmaan
Mere param poojya Guruji karunanidhaan.

Mere naynon ko hotey rahein Aapke darshan
Mere haath Aapki sewa mein rahein vyast aur magan
Chitt kee Aapko chetne mein laagi rahe lagan
Kaan karein sada Aapki mahima ka shravan.

Labon par har kshan ho Aapka naam
Paaon pahunchna chaahein buss Aapke dhaam
Rooh seedhi taar se Aapse jud kar paaye Aapke paigaam
Astitva Aap mein kho kar ho jaaye gumnaam.

Yoon Aapki aas mein bahoon
Ki mai mai na rahoon
Aur kahoon toh kya kahoon?
Kaise is vireh mein rahoon?

Aapki meher kee hoon mohtaaj
Bakhsh deejiye aisa milan, mere sartaaj
Ki ye nacheez kabhi na bichhde Aapse
Kyunki meri rooh toh nikhre buss Aapse.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vinamr Anurodh (12/26/2024)

December 25, 2024

Om Namaha Shivaya
Aaj Ka Suvichaar 🙏🏻🙏🏻

#2502

                     Phir Se Ik Baar

Aao dekhein phir se ik baar
Deewaanon ke sheher ka dwaar
Guruji kee izaazat se karein is sheher mein pravesh
Jahaan sir aankhon par hota hai Guruji ka aadesh.

Guruji ke har hukum par hota hai amal
Poojey jaate hain Guruji ke charan kamal
Guruji kee meharbaani se sabhi ka aisa hai manobal
Ki sabhi ka mann rehta hai sthir, shaant, aur prabal.

Vahee khushboo ruhaani yahaan
Guruji ke adheen sabki zindagaani yahaan
Guruji kee meher se Unhee mein vyast hai har praani yahaan
Unke simran, dhyan, aur satsang mein mastt hai sabki kahaani yahaan.

Jo bhi rehne lagta hai is sheher mein
Vo yoon doob kar tarta hai Guruji kee meher mein
Ki usey Guruji ke naam ke alaawa kuch aur nahin soojhta
Uska jeevan paheli ho toh bhi vo usey nahin boojhta.

Kyunki yahaan kaayda hai samarpan ka
Aur yahaan reet hai shukrana mein rehne kee
Yahaan par hai Guruji ke prati prem bhaav ka nirantar chaav
Sabhi kee arzoo rehti hai iss prem bhaav mein behne kee.

Yahaan har din hai Baisakhi
Yahaan har raat Diwali hai
Yahaan ruhaani rangg se kheli jaati hai holi
Yahaan kee har Shivratri niraali hai.

Baahar beshak ho kalyug
Is sheher mein rehta hai satyug
Har ghar kee dehleez par jalte hain deep subuddhi ke
Vanaspati pashu pakshi bhi phailaate hain paigaam shuddhi ke.

Ye sheher sach mein hai sachkhand
Yahaan basta hai nirmal anand
Har praani ka vishwaas hai akhand
Yahaan sabke bheetar hai Satchittanand.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Phir Se Ik Baar (12/25/2024)

December 24, 2024

Om Namaha Shivaya
Aaj Ka Suvichaar 🙏🏻🙏🏻

#2501

            Deewaanon Ka Sheher

Ye hai deewaanon ka sheher
Yahaan deewaanapan chhaaya rehta hai aathon peher
Sabb Guruji ke deewaane hain
Unkee dhun mein sabb mastaane hain.

Koi sunta hai satsang, koi satsang hai sunaata
Koi kavita hai likhta, koi Guruji ke geet hai gaata
Koi sewa mein din raat hai bitaata
Koi Guruji kee baatein hain bataata.

Kisee ka samaa guzar jaata hai simran mein
Koi Guruji kee chhavi dekhta rehta hai mann mein
Is sheher mein rehne waala koi praani magn ho jaata hai dhyan mein
Yahaan Guruji kee meher se badhauti hoti hai hunar mein aur gyan mein.

Is sheher mein spandan hai ruhaaniyat ka
Is sheher mein spandan hai insaaniyat ka
Yahaan goonjta hai mantra Guruji ke naam ka
Yahaan anand hai har teerath dham ka.

Is sheher mein sabb hain Guruji ke shukrguzaar
Is sheher mein hai bakhshishon kee bahaar
Yahaan Guruji parakhte Hain bhakton kee neeyat
Yahaan Guruji aksar dobaara se likh dete Hain kismat.

Is sheher ke vayumandal mein hai Guruji kee khushboo
Is khushboo se gadd gadd rehti hai har nivaasi kee rooh
Yahaan har raat hai deewaali kee raat
Is sheher kee kuch alagg si hai baat.

Guruji kee agya se hota hai is sheher mein aana jaana
Ek baar jo aa jaaye vo ho jaata hai Guruji ka deewaana
Jo imtehaan dekar bhi rehta hai naam kee shamaa ke liye parwaana
Safal ho jaata hai uska Guruji ke sheher mein aana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deewaanon Ka Sheher (12/24/2024)

December 23, 2024

Om Namaha Shivaya
Aaj Ka Suvichaar 🙏🏻🙏🏻

#2500

              Guruji Kee Phulavaari

Guruji ke pyaare pyaar mein
Ramti jaati hai sangat saari
Guruji ke poshit phool hain hum sabb
Guruji kee hai ye phulavaari.

Apni ruhaani khushboo se
Guruji mehekaate Hain phulavaari ko
Har phool ko dein Ve Apni mamta komal
Jiska maadhurya khilaata hai phulavaari saari ko.

Phulavaari mein titaliyaan mandaraati hain
Guruji kee khushboo se khush ho jaati hain
Khushboo se mehek kar dolti hain hawaayein
Akash mein tehelte baadal yahaan naman mein jhuk jaayein.

Yahaan har tareh ke phool khiley hain
Phulavaari mein ik dooje se miley hain
Lekin har phool kee Guruji se judi hai seedhi taar
Aur har phool ko Guruji rahe Hain taar.

Har phool kee zaroor aati hai baari
Guru kripa se khilee rehti hai phulavaari
Phoolon ke rangg beshak hon bhinn bhinn
Parantu Guruji ke liye sabhi hain abhinn
Guruji har phool ko dete Hain ek sa dulaar
Poori phulavaari ka Ve karte Hain uddhaar.

Guruji kee phulavaari mein har phool ka jeevan ho vyateet
Guruji ko prasann karne mein hee har phool kee zindagi jaaye beet
Har phool kee har pankhudi pulakit rahe Guruji ke ashirwaad se
Saari phulavaari tarti rahe paawan Guru prasad se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Phulavaari (12/23/2024)

December 22, 2024

Om Namaha Shivaya
Aaj Ka Suvichaar 🙏🏻🙏🏻

#2499

               Chhip Gaya Chaand 

Chhip gaya chaand
Chhip gaye taare saare ke saare
Baadalon ke peechhe
Sabhi praani so gaye
Aasmaan ke neeche.

Par Guruji na chhipe, na soye ek bhi pal
Unkee dee suraksha hai sanaatan aur atal
Bhakt chayyn kee neend soyein
Bhakt raaste par chalte huey na khoyein
Isliye bhakton par sada Guruji ka pehra rehta hai
Bhakton par Guruji ka ashish sada amrit ke roop mein behta hai.

Ye chand, ye baadal, aur taare
Guruji ke niyantran mein hain saare
Ye toh sajde mein khud jhukte hain
Guruji ke hukm se chalte aur rukte hain.

Beshak hon chand ya taare
Ya phir aasmaan ya baadal banein sahaare
Chalte huey musaafir ke liye
Ye sabb bhi apni doar Guruji ko deeye
Baney huey hain sewadaar
Aakar pyaare Guruji ke dwaar.

Koi sewa nahin badi ya chhoti
Sewa Guru kripa se hai hoti
Simran kee jugalbandi sewak ke paapon ko dhoti
Sewak kee sudh-budh Guruji mein khoti.

Sewa Guruji kee dee bakhshish hai
Jismein bhakt ke liye ashish hai
Guruji kee kripa bin sewa milnee nahin mumkin
Arzi hai ki Guruji sewa bakhshein raat aur din.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chhip Gaya Chaand (12/22/2024)

December 20, 2024

Om Namaha Shivaya
Aaj Ka Suvichaar 🙏🏻🙏🏻

#2497

               Trishna Ka Baazaar

Ye duniya hai trishna ka baazaar
Yahaan chaahatein hain aparampaar
Yoon baandh leta hai ye sansaar
Ki bhool jaata hai janam lene ka saar.

Chaahatein toh hoti nahin hain kumm
Balki badhta jaata hai gumm
Zarooraton se kaheen zyada kar lete hain jamaa
Phir lagta hai ki paryaapt na sakey kamaa.

Ye trishna ka jaal hai, strot hai asantosh ka
Is se badhaava hota hai kitne tareh ke dosh ka
Badhta hai mann par vikaaron ka aakraman
Asthir aur ashaant hota jaata hai mann.

Guruji ke manan aur chintan mein hai veh shakti
Jo banti hai trishna se duur honei kee safal yukti
Besharte pakke hon neeyat aur nishchay
Taaki mit jaaye har duvidha aur sanshay.

Guruji se kee hui vintee awashya laati hai rangg
Jitna joad hota chalta hai Guruji ke sangg
Utnee badhti hai chaahat rehne kee Guruji ke hee chintan mein
Utna kumm ulajhta hai mann trishna ke phailey huey bandhan mein
Guruji kee kanti prabhaavit karti hai is bhanti
Ki mann paata hai sthirta aur shanti
Jud kar Guruji mein basey Ish se
Guruji kee hee bakhshish se.

Pal do pal mein aisa nahin ho paata
Lekin jo shraddha se Guruji se hai jud jaata
Aur saboori se safar mein hai chalta jaata
Uska Guruji sangg aisa judta hai naata
Ki Guruji sambhaalte Hain usey har kshan
Besharte vo kar de mann se samarpan.

Phir toh koi bhi trishna nahin chura sakti mann ka santulan
Na hee bigaad sakti hai uss bhakt ka jeevan
Guruji kee meher ho toh aise bhi agrasar ho sakta hai uska safar
Ki veh har tareh se jeevan mukt bhi ho sakta hai jeete huey yaheen par.

Mushkil beshak lagey pahunchna aise mukaam par
Koshish toh kee hee jaa sakti hai magar
Raasta lamba aur kathin bhi lagey agar
Toh yaad rahe, Guruji swayam Hain hum safar
Unke hotey huey sab kuch ho sakta hai
Kyunki Guru toh kalyaan karte huey nahin thakta hai
Isliye, tu hichkicha kar kyun hai rukta, aye insaan
Teri madad toh kar rahe Hain swayam Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Trishna Ka Baazaar (12/20/2024)

December 19, 2024

Om Namaha Shivaya
Aaj Ka Suvichaar 🙏🏻🙏🏻

#2496

         Dhanya Bhaagya Hamaare

Param poojya Guruji Maharaj,

Dhanya bhaagya hamaare
Ki Aapne hamein bulaaya Apne dwaare
Jitne hain aasmaan mein sitaare
Aap uss se bhi zyada bhakton ke baney sahaare.

Aapki sharan mein bhed bhaav nahin jaat paat ka
Aapki sharan mein nahin rehta astitva jeevan mein raat ka
Aap itna khayaal rakhte Hain har bhakt kee har baat ka
Aapki goad mein milta hai sneh pita ka aur pyaar maat ka.

Kabhi aati hai Aapki khushboo ruhaani
Kabhi dikhtee hai moar kee chaal mastaani
Toh kabhi titlee nazar aati hai mandaraati hui deewaani
Ye sabhi bann jaate hain Aapki noorani nishaani.

Kabhi shabad mein Aap dete Hain sandesh
Kabhi Aap swapn mein darshan dekar karte Hain pravesh
Kabhi kabhi saakshaat darshan Aapke ya phir badal kar vesh
Toh kabhi Aap swaroop mein daras dikhaate Hain, priya Sarvesh.

Aapki chhupi bhi bolti hai ki Aap vyast Hain bhakton ke kalyaan mein
Aapki muskuraahat bhi kabhi der nahin karti hai vaajib vardaan ke daan mein
Aapki oar se har vilamb ka arth hota hai aane waala ek sundar praarambh
Jabb se Aapki sharan milee hai, hua hai maano ek naye janam ka aarambh.

Aapka naam liye bin abb raha na jaaye
Aapki yaad ke bin abb jeena na aaye
Dil-o-dimaag par Aapka khayaal rehta hai chhaaya
Aapki sharan paakar srishti ka sabse sundar sukoon hai paaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Bhaagya Hamaare (12/19/2024)

December 18, 2024

Om Namaha Shivaya
Aaj Ka Suvichaar 🙏🏻🙏🏻

#2495

                 Anant Kee Pyaas

Anant hoti hai is atma kee pyaas
Aur ye anant pyaas hai anant ko paane kee
Jabb takk is pyaas ko na bujhaayega swayam anant
Tabb takk atma kee is anant pyaas ka na hoga antt.

Guruji Maharaj Hain Shiv avatari Bhagwant
Guruji Maharaj hee Hain anant
Jabb Unhe paane kee pyaas hogi anant
Toh ye pyaas apne paawan prayaas se paa legi anant.

Aawashyak hai is pyaas ko mitaana
Varna milega nahin atma ko thikaana
Safar ke dauran khatm hona hoga jo vilaas hai bhog mein
Antas ko kabhi toh aarambh karna hoga jeena yog mein.

Anaasakti, samarpan, shukrana, aur simran-dhyan
Inka hoga ibadat ko sahaara
Toh Guruji hongei prasann
Unkee kripa se sanvarega bhakt ka jeevan.

Trikaal darshi Mahadev ke swaroop Hain Guruji Maharaj
Priya hai Unhe Apne bhakt ke antas kee pyaas
Ve toh har pal Hain bhakt ke bheetar aur aas paas
Bhakt koshish toh karey, Guruji poori karenge swayam mein uss anant kee praapti kee pyaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Anant Kee Pyaas (12/18/2024)