Aaj Ka Suvichaar

June 5, 2025

Om Namaha Shivaya
Aaj Ka Suvichaar 🙏🏻🙏🏻

#2664

                    Agley Pal Takk

Koi pal agley pal takk ruk na paaya kabhi
Karmon ka itihaas bante gaye pal sabhi
Kisee ka khaata lamba sa, kisee ka chhota
Lekin khaata toh sabhi ka nishchit hai hota.

Pichhle pal bhaagya baney hain aaj ka
Kintu kora kaagaz hai har aane wala pal
Kyun na usey shuddhi aur shubhta se sajaayein
Is se pehle ki vo bhi bann jaaye beeta hua kal.

Ye nahin hoga kisee dooje par ehsaan
Ye toh hai hamaara hee imtehaan
Guruji toh rehte Hain angg sangg
Ve hee denge imtehaan ke parche par ankk.

Ankk zyaada hongei ya kumm
Unse tayy hongei bhavishya ke hamaare khushi aur gumm
Guruji kee rehmatein hain kayi hazaar
Lekin thoda toh uthaana hee hoga apne karmon ka bhaar.

Guruji kee yaad mein rehkar denge ye imtehaan
Toh satark rahenge hum insaan
Varna achet karne ke liye nahin karna padta zyaada prayaas
Is kalyuga kee hai ye kala khaas.

Pal toh rukenge nahin, lekin ik din ruk jaayenge shwaas
Har pal ka sadupyog karna kaheen reh na jaaye ye khayaal bann kar buss ik aas
Isliye, sachche dil se Guruji se karein ardaas
Ki har pal ko shuddhi aur shubhta se sajaakar banaa lein hum khaas.

🌹🌹🌹🌹🌹🌹🌹

Jai Guruji 🙏🙏
Dhirja

Agley Pal Takk (06/05/2025)

June 4, 2025

Om Namaha Shivaya
Aaj Ka Suvichaar 🙏🏻🙏🏻

#2663

                     Bin Bhaav Ke…

Bin bhaav ke gyan rahe adhoora
Bin bhaav ke adhoori hai bhakti
Bhaav sakaraatmak ho toh de anukool shakti
Jo baney gyan aur bhakti kee yukti.

Bhaav, shraddha aur pyaar ka
Bhaav, aitbaar ka
Bhaav, sakaraatmak
Bhaav, adhyatmik.

Bhaav, nirantar chintan ka
Bhaav, sarvsamarpan ka
Bhaav, neevenpann ka
Bhaav, bholepann ka.

Bin Guruji ke ashish ke
Aise bhaav bhi na aayein bheetar
Jo aise bhaav aa jaayein
Phir bakhshishon se bharaa hai Guruji ka dar.

Param poojya Guruji, Aapse hai fariyaad
Mann mein basee rahe yoon Aapki yaad
Ki jo bhi bhaav karein Aapko prasann
Unhee se bhaavuk rahe ye mann har kshan.

Kyunki Aapko kar paaoon prasann
Toh chaahiye nahin aur kuch
Aapko prasann karne ke siwa
Baaki har tamanna hai bilkul tuchh.

🌹🌹🌹🌹🌹🌹🌹

Jai Guruji 🙏🙏
Dhirja

Bin Bhaav Ke… (06/04/2025)

June 3, 2025

Om Namaha Shivaya
Aaj Ka Suvichaar 🙏🏻🙏🏻

#2662

    Guruji Kirpadhaari

Guruji se duur karne lagey jo bhi prabhaav
Uss se duur rehne ka kar lo nirantar chaav
Guruji kee kripa se Unke prati badhaao prem ka aisa bhaav
Ki Unhee kee preet ke saagar mein rahe tumhaare jeevan kee naav.

Zaroori nahin ki ye kaam ho aasaan
Aise prabhaav bahut aakarshit karte hain
Ruhaani oonchaayee se gira dete hain
Mann ka chayyn bhi chheen lete hain.

Pataa bhi nahin chalta hai aur badh jaati hai Guru se duuri
Isliye satark rehna hai bahut hee zaroori
Manobal badhaao karte huey Guruji kee ‘ji huzoori’
Taaki mann ko pratikool prabhaav ke samaksh na ho majboori.

Safar mein aandhi tufaan toh aayenge
Naav ko kayi baar hilaayenge
Par naav ko Guruji rakhenge surakshit
Karte huey tumhaara hitt.

Guruji ke kareeb aate rehne ka karte rehna tum prayaas
Ve naav ke sanchaalak, tum bann kar rehna Unke das
Unkee yaad mein rehne se hota rahega Unse kareebi ka ehsaas
Unkee preet ke saagar kee har boond bujhaayegi mamta kee tumhaari pyaas.

Safar mehekega Guruji kee preet kee khushboo se
Taar judi rahegi Guruji kee tumhaari rooh se
Guruji ke kareeb aate rehne kee koshish rakhna jaari
Tumhe sada Apne aanchal mein sanjo kar rakhenge Guruji kirpadhaari.

🌹🌹🌹🌹🌹🌹🌹

Jai Guruji 🙏🙏
Dhirja

June 2, 2025

Om Namaha Shivaya
Aaj Ka Suvichaar 🙏🏻🙏🏻

#2661

           Rooh Kee Raahat Ke Liye

Paap bhi kiye hongei
Punya bhi kiye hongei koi
Toh mrityu lok mein aaye
Phir aur karam kamaaye.

Aasaan hai rakhna ye silsila jaari
Aane jaane kee aati rahegi phir baari
Dooja vikalp bhi hai jismein Guruji Hain madadgaar
Unke vachan maankar karvaayein apna uddhaar.

Jabb takk hota rahe janam maran
Tabb takk miltee rahe Guruji kee sharan
Toh kuch nahin ho sakta is se behtar
Kyunki sadgati nishchit hai idhar.

Bheetar se saaf karne ka kaam
Apne buss kee baat kahaan?
Shukr hai Guruji karte Hain ye
Koi na hai Unke jaisa meharbaan.

Guruji chala rahein Hain toh hum paa rahe hain chal
Guruji kasht kaat rahe Hain toh hee kasht rahe hain tal
Mrityu lok mein jeete huey milee hai shehenshah-e-srishti kee sharan
Sarvashreshth mauka hai ki sanvaar lein janam maran
Rooh kee chaahat ke liye
Rooh kee raahat ke liye.

🌹🌹🌹🌹🌹🌹🌹

Jai Guruji 🙏🙏
Dhirja

Rooh Kee Raahat Ke Liye (06/02/2025)

June 1, 2025

Om Namaha Shivaya
Aaj Ka Suvichaar 🙏🏻🙏🏻

#2660

       Khushnaseebon Ko Milta Hai

Zindagi beeti jaa rahi hai
Har ghadi yaad dila rahi hai
Ki faisle kee ghadi chalti jaa rahi hai
Aur maut nazdeek aa rahi hai.

Achcha thaa ya thaa bura
Samay laut kar nahin aayega
Har tareh se guzra hua samay
Koi na koi seekh dekar jaayega.

Samay ke is vyavhaar ko
Na mai badal sakti hoon na tum
Samay kee is raftaar mein
Buss, hona nahin hai gumm.

Guruji ke chintan mein rehte huey
Samay ke bahaav sangg behte huey
Nibhaane hongei apne farz
Utaarna hoga karmon ka karz…

…Jo Guruji kee kripa bin nahin mumkin
Beshak lagey rahein raat din
Kyunki Ve Hain karmadaata karunanidhaan
Karma katvaane wale pooran Guru mahaan.

Guruji kee dee hui prerna
Guruji kee dee hui chetna
Guruji kee dee samvedana
Kumm kar sakti hai har vedana.

Isliye samay kee na rukne wali gati ko rakhte huey maddenazar
Guruji se ruhaani taar jodkar bitaayein ye safar
Guruji kee mahima jaan lein
Unkee baatein maan lein
Guruji aaye karne sangat ka uddhaar
Khushnaseebon ko milta hai aise Guru ka pyaar.

🌹🌹🌹🌹🌹🌹🌹

Jai Guruji 🙏🙏
Dhirja

Khushnaseebon Ko Milta Hai (06/01/2025)

May 31, 2025

Om Namaha Shivaya
Aaj Ka Suvichaar 🙏🏻🙏🏻

#2659

        Param Poojya Guru Sahib

Param poojya Guru Sahib,

Prerna banaa Aapka pyaar
Mann mein aaye kuch vichaar
Har vichaar mein ye jazbaat bahenge
Ki Aap thei, Aap Hain, Aap sada rahenge.

Qubool karna mere sartaaj
Is nimaani ka ye nazraana
Shukr hai Aapki yaad se sajaa hua hai
Varna mera dil reh jaata bilkul veeraana.

Chaand taare ye sabhi
Sajde mein hain jhuke
Aapke hukum pe hee ye
Hawaa chale rukey
Na jaane kal in taaron kee baaraat ho na ho….

Ashirwaad Aapka
Milta rahe sada
Bakhshishein dete rahiyega
Jabb ho koi khataa
Beshak aur kisee ka sir pe haath ho na ho…

Aap sab mein, sab Aap mein
Sach mein aur khwaab mein
Aap chaand taaron mein
Aap aaftaab mein…
Aap…ki… kirpa se hee har din har raat ho….

Aap hee buss Aap hee
Chhaaye Hain chaaron oar
Aapke siwa mujhe
Na soojhe koi aur
Ye jazbaat sada rahe, kuch aur ho na ho…..

Prem kee ye dastaan
Mere Aapke darmiyan
Aap Hain mera jahaan
Mere Guru meharbaan
Aap hon buss saath koi aur ho na ho….

Mujh par ye pyaar Aapka
Inaayat hai ye badi
Iskee badaulat aaj mai
Yahaan par hoon khadi….
Na jaane ye awaaz bhi kal saath ho na ho….

Baadal jaayenge baras
Mann jaayega taras
Paane ko Aapka daras
Beetenge ye baras
Rooh ye Aapki hai deh raakh ho na ho…..

🌹🌹🌹🌹🌹🌹🌹

Jai Guruji 🙏🙏
Dhirja

Param Poojya Guru Sahib (05/31/2025)

May 30, 2025

Om Namaha Shivaya
Aaj Ka Suvichaar 🙏🏻🙏🏻

#2658

                  Rooh Kee Pukaar

Kisee kee khushi kee vajeh bann sako toh achcha hai
Gumm dene waalon kee kamee nahin is zamaane mein
Heera vo dil hai jo sachcha hai
Pathar dil kee kamee nahin is bheed se bhare veeraane mein.

Kisee kee madad kar sako toh sochna bhi nahin dobaara
Bann jaana agar bann sako kisee ka sahaara
Lekin badle mein na rakhna uss se ummeed koi, mere pyaare
Aur anaasakti rakhte huey pyaar karna, taaki toota dil lekar na phiro maare maare.

Moh yakeenan vikaar hai
Jismein phansa adhiktar sansaar hai
Koi chaahte huey
Koi anjaane mein.

Har karam Guruji ko kar ke arpan
Guruji kee yaad mein rahe mann
Toh jeena ho jaayega pehle se aasaan
Guruji kee mahima hai aisee mahaan.

Guruji ke kahe par chalkar
Nishchit hai uddhaar
Ye koi saadhaaran si baat nahin hai
Ye toh hai tumhaari rooh kee pukaar.

🌹🌹🌹🌹🌹🌹🌹

Jai Guruji 🙏🙏
Dhirja

Rooh Kee Pukaar (05/30/2025)

May 28, 2025

Om Namaha Shivaya
Aaj Ka Suvichaar 🙏🏻🙏🏻

#2656

       Mera To Guzaara Hee Nahin

Param poojya Guruji,

Na koi shikva Aapse
Na hee hai shikaayat, Guruji
Shukriya Aapka har pal maalik
Ki Aapne kee hai inaayat, Guruji.

Mai toh kaabil nahin uss pyaar ke
Jo Aap mujh par barsaate Hain
Khaamiyon kee khan mein gumee hoon mai
Aap mujhe raasta dikhaate Hain.

Arzi lagaane se bhi lagta hai darr
Kaheen maang na loon koi pratikool var
Vahee shreshth hai jo Aap denge daan mein
Uska shukrana karoon Aapke gungaan mein.

Aap hee jaanein mere pichhle aur aane wale janam ke baare mein
Mai toh buss jaanoon ki vartmaan mein baithi hoon Aapke dwaare mein
Yaheen par guzarti rahe zindagi
Qubool hoti rahe meri kee hui bandagi
Toh ye bhi hoga Aapka hee upkaar
Mere pyaare Parwardigaar.

Aapke haath mein hai mere jeevan kee doar
Jaise Aapki marzi, usey deejiyega moad
Buss, kabhi bhi usey na dena chod
Mera toh guzaara hee nahin kaheen aur.

🌹🌹🌹🌹🌹🌹🌹

Jai Guruji 🙏🙏
Dhirja

Mera To Guzaara Hee Nahin (05/28/2025)

May 27, 2025

Om Namaha Shivaya
Aaj Ka Suvichaar 🙏🏻🙏🏻

#2655

   Tujh Mein Sudhaar

Mere mann baavre
Na dol abb idhar udhar
Guruji bulaa rahe Hain
Taaki tu abb jaaye sudhar.

Ve bula rahe Hain tujhe Apni sharan mein
Jhuk jaa tu Unke kamal charan mein
Shuru kar de Unse bolna
Dekhna, tu chod dega idhar udhar dolna.

Beshak tu kehte huey gaya ho thakk
Phir bhi kisee ne aaj takk
Na suni hogi teri baat aise
Guruji sunenge jaise.

Guruji jaante Hain tera har vichaar
Ve jaante Hain kaisi hai teri bhavna
Guruji pehchaante Hain tera aakaar
Ve jaante Hain teri har kaamna.

Guruji tujhse zyada jaante Hain tujhe
Chaahe tere utsah ke deeye hon jaley ya hon bujhe
Isliye Unke samaksh teri koi chaalaaki na chalegi
Aur Unhee kee kripa se teri har duvidha talegi.

Mere mann baavre, bahut ho chuka bhatakna
Abb takk agar shuru nahin kiya Guruji ka naam japna
Toh abb toh kar de shuru
Swayam Rabb Hain tere Guru.

Guruji ko samajhne mein tu ho bhi jaaye naakaam
Toh bhi tere Unhe yaad karne se Ve karenge tere kaam
Lekin is silsile mein bhoolna na tu asal dhan kee arzoo karna
Tu ye maang kar toh dekh, Guruji chaahte Hain teri jholi bharna.

Baavra rehna hai toh ho jaa baavra Guruji ke pyaar mein
Is se zyada khushi kee baat ho nahin sakti sansaar mein
Kyunki jabb tu har pal Guruji ka deewaana rahega, o mann
Toh tujhe koi bhi dukh na sataa paayega kisee bhi kshan.

Deewaanagi kee hadd ko karega paar
Toh tu bhi paayega Guruji ka poora pyaar
Guruji mein leen rahega tera har vichaar
Toh nishchit hee ho jaayega tujh mein sudhaar.

🌹🌹🌹🌹🌹🌹🌹

Jai Guruji 🙏🙏
Dhirja

Tujh Mein Sudhaar (05/27/2025)