Aaj Ka Suvichaar

January 28, 2026

Om Namaha Shivaya
Aaj Ka Suvichaar 🙏🏻🙏🏻

#2901

    Tumhaara Bhalaa

Guruji ne kiya hai tumhaare liye jis raaste ka faisala
Uss faisale mein hee hai tumhaara bhalaa
Kuch nahin ho sakta Unke faisale se shreshth aur oopar
Ye toh tum jaan chuke ho bhatak kar dar dar.

Sabse uttam jageh par pahunche ho tum
Guruji ke kamal charan mein
SadaShiv swayam dikha rahe Hain raasta
Tumhe tumhaare jeevan mein.

Unse judey rehne ka yatna karo
Raho nirantar Unkee yaad mein
Karunanidhaan Hain Ve, meharbaan Hain
Koi kasar na chodenge ashirwaad mein.

Tumhaari jaisi kismat ke liye
Taraste hongei devi devta bhi
Tumhaare jeevan mein jo bhi hoga
Vo Guruji kee kripa se hoga sahi.

Sarvapratham maanyata dete Hain Guruji
Apne har bhakt ke kalyaan ko
Natmastak hokar sees jhukaao
Unmein basey Bhagwaan ko.

Guruji ke faisale kee karo kadar
Unke nirdhaarit raaste par karo safar
Sweekaaro Unkee rehmaton ka asar
Aur jeevan ke path par ho jaao agrasar.

🌹🌹🌹🌹🌹🌹🌹

Jai Guruji 🙏🙏
Dhirja

Tumhaara Bhalaa (01/28/2026)

January 27, 2026

Om Namaha Shivaya
Aaj Ka Suvichaar 🙏🏻🙏🏻

#2900

Khojo Apne Gireban Mein

Khojo apne girebaan mein
Mil jaayega tumhaara soya zameer
Jitnee jaldi tum usey jagaaoge
Utnee jaldi sanvar jaayegi tumhaari asal taqdeer.

Tum dho rahe ho atma par abhi takk
Pichhle janmon ke karmon ka bhaar
Jaane anjaane mein is janam mein bhi
Ho hee rahe hongei aise karam baar baar
Jo badhaayenge is bhaar ko
Isliye abb toh apna jeevan lo tum sudhaar.

Guruji ne bakhsha hai Gurbani ka shravan
Shravan ke sangg kar uspar manan
Gireban mein jhaank kar apna soya zameer jagaao
Kshama aur Shukrana mein Guruji ke samaksh jhuk jaao.

Guruji ne sainkdon ko hai taara
Kitnon ne Guruji ko hai pukaara
Tum bhi prem bhaav se Unhe pukaaro
Aur apna janam maran sudhaaro.

🌹🌹🌹🌹🌹🌹🌹

Jai Guruji 🙏🙏
Dhirja

Khojo Apne Gireban Mein (01/27/2026)

January 26, 2026

Om Namaha Shivaya
Aaj Ka Suvichaar 🙏🏻🙏🏻

#2899

               Surakshit Hai Jeevan

Jiska imtehaan hota hai
Usee ko dena padta hai
Jiska sangraam hota hai
Usey hee ladna padta hai
Har rooh kee apni kahaani hai
Har deh kee apni zindagaani hai
Har kahaani aur zindagaani par Guruji kee nigraani hai
Sabhi ne apni poonji kamaani ya gavaani hai.

Phir vo poonji shubh karmon kee ho ya apakarmon kee
Vo poonji ho na jaane kitne janmon kee
Guruji jaante Hain sabka satya poora
Chaahe poori duniya ko dikhey vo adhoora.

Guruji ke samaksh sabka har rahasya hai khuli kitaab
Guruji ke darbar mein hota hai har imtehaan ka nirnay
Ve hee banaate Hain bhakt ko imtehaan ke liye nirbhay
Har sangraam, har safar Ve hee karaate Hain tayy.

Vishwasneeya hai kewal Unhee ka sahaara
Samay zaaya kiya jisne madad ke liye duniya ko pukaara
Nyaaya aur akhand sachchaayee hai Guruji ke darbar mein
Sahi samay sada vo jo nirdhaarit kiya Guru sarkar ne
Unhee ke charnon mein hai har uljhan kee suljhan
Unkee sharan mein yakeenan surakshit hai jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Surakshit Hai Jeevan (01/26/2026)

January 25, 2026

Om Namaha Shivaya
Aaj Ka Suvichaar 🙏🏻🙏🏻

#2898

     Bheega Hua Bhakti Ke Ras Mein

Bheega hua bhakti ke ras mein
Magn hokar Guruji ke yash mein
Baitha thaa ik das
Guruji ke paas.

Usey sudh budh na thi
Ki aur kaun kaun thaa vahaan
Usey toh Guruji ke charnon mein
Mil gaye thei zameen aasmaan.

Guruji ke divya saundarya mein magan
Sunte huye shabad kirtan
Das thaa itna bhaav vibhor
Usey maalum na chala kab ho gayi bhor.

Beet chuki thi andheri raat
Baithey huey Guruji ke saath
Usne jabb dekha aas paas
Tabb usey hua ehsaas
Ki jaa chuki thi sangat takreeban saari kee saari
Na jaane kab aayi sabki agya kee baari.

Guruji ne chai banaane ke liye kaha ik sewadaar se
Aur vo chai Guruji ne das ko pilaayee bade pyaar se
Subah subah mila usey Guruji ke haathon se chai prasad
Vo kewal chai nahin thi, usmein thaa amrit ka swad.

Itna pyaara ashirwaad dekar
Guruji ne das ko agya dee jaane kee
Aur uske jaane se pehle hee
Usey taareekh de dee phir se aane kee.

Das khushi se phoola na samaaya
Ki Guruji ne usey phir se hai bulaaya
Isee khushi mein vo dolta raha
Sabhi ko ‘Jai Guruji’ bolta raha.

Guruji bulaate rahe das ko Apne dar par
Das par hoti rahi Guruji kee meher
Guruji kee nadar se das gaya tar
Guruji ke noor se roshan hua uska ruhaani safar.

🌹🌹🌹🌹🌹🌹🌹

Jai Guruji 🙏🙏
Dhirja

Bheega Hua Bhakti Ke Ras Mein (01/25/2026)

January 24, 2026

Om Namaha Shivaya
Aaj Ka Suvichaar 🙏🏻🙏🏻

#2897

Saari Sangat Ka Mangal

Koi nahin bhaar utha sakta kisee ke karam ka
Guru roop mein Bhagwaan ke siwa
Guruji Maharaj Hain pooran Guru
Unka ashirwaad hai karam kaatne kee davaa.

Kisee bhi davaa ke sangg
Parhez zaroori hota hai aksar
Davaa dikhaaye apna rangg
Iske liye jo aaye Guruji ke dar par
Usey kewal Guruji ko hee nahin
Balki Guruji kee bhi maan-ni hai anivaarya
Phir Guruji ka ashirwaad kalyaan na karey
Aisa ho hee nahin sakta bhakt ka koi bhi kaarya.

Isliye har kaaraj ko Guruji ko kar samarpit
Apna sab kuch Unke charnon mein kar arpit
Shraddha aur saboori se dena hoga har imtehaan
Guruji ko sarvashaktimaan jaan aur maan.

Guruji ke hastakshep se
Karam sakte hain tal
Uddhaar sabhi ka mumkin hai
Sabhi ko praapt ho manobal.

Guruji kee kripa ho jaaye sab par
Kisee kee unnati na rokey kalyug ka daldal
Yakeenan Guruji kee marzi mein hee
Hai saari sangat ka mangal.

🌹🌹🌹🌹🌹🌹🌹

Jai Guruji 🙏🙏
Dhirja

Saari Sangat Ka Mangal (01/24/2026)

January 23, 2026

Om Namaha Shivaya
Aaj Ka Suvichaar 🙏🏻🙏🏻

#2896

                    Arey O Musaafir

Arey o musaafir
Tera mann nahin hai sthir
Tere jaise vo bhi idhar udhar raha hai phir
Tu kaise chayn paa sakta hai phir?
Tere mann mein hai sanshay
Tu raasta kaise karega tayy?

Tu badhaata gaya Paramatama se duuri
Isliye abb janam maran hai majboori
Ye safar tayy toh karna padega
Vikaaron se bhi ladna padega
Tu Guruji ka sahaara le
Vo khade Hain baahein pasaar
Beshak tujhe karna hoga intazaar
Kintu Ve awashya denge tujhe taar.

Ye toh toone socha hai sahi
Ki tere haath mein kuch bhi nahin
Sivaaye tere karam ke
Sivaaye tere dharam ke.

Guruji se karta chal tu ardaas
Ki Ve bakhshte rahein tujhe vishwaas
Aur badhaayein simran kee teri pyaas
Vinamrata piro kar har ardaas ko banaa khaas.

Duniya toh hai rangg manch
Poora sansaar hee hai ik prapanch
Phir bhi padega jeena
Haalaat ke har ghoont ko hoga peena
Usey maan kar vish nahin, balki amrit
Kyunki Guruji karma bhog se kar rahe Hain tera hitt.

Guruji ne thaami hai tere jeevan kee doar
Tu bhi badhta chal Unkee oar
Unkee yaad mein hai tere mann kee asthirta ka sampoorna upchaar
Parantu tujhe yatna karna hoga baarambaar.

Guruji mein mann ko kar ke magan
Guruji mein lagaakar liv aur lagan
Bin dhoondhe koi kaaran ya bahaana
Tu nirantar karta chal Guruji ka shukrana.

🌹🌹🌹🌹🌹🌹🌹

Jai Guruji 🙏🙏
Dhirja

Arey O Musaafir (01/23/2026)

January 22, 2026

Om Namaha Shivaya
Aaj Ka Suvichaar 🙏🏻🙏🏻

#2895

            Bhakti Ke Sindhu Mein…

Bhakti ke sindhu mein tayr raha thaa praani
Guruji ke charnon mein samarpit kar ke zindagaani
Sindhu kee her leher ke sangg dolta hua
Utsah ke sangg ‘Jai Guruji ‘ bolta hua
Tayrta rehta thaa mausam se bekhabar
Na hota thaa sardi garmi ka uspar asar.

Sharad ritu mein tej naam aur paath ka
Greeshma ritu mein anand naam amrit ke saath ka
Barsaat mein Guruji ke naam mein hee bheegta thaa
Thakne lagta toh koi adrishya haath usey kheenchta thaa.

Tayrte huey bhakti ke sindhu mein raat din
Ek saans bhi na leta thaa vo Guruji kee yaad ke bin
Guru prasad thaa uske liye uska poora jeevan
Guruji aur Unkee sewa mein leen rehta thaa uska tann mann.

Aksar lehron mein gotey khaaye
Bhanvar ke anubhav bhi huey aksar
Kintu uske liye ye sindhu thaa vo sarovar
Jiske sahaare vo rehta thaa Guruji ke dar par.

Yoon hee tayrte tayrte Guruji ko paane ke chaav se
Praani jeevan jeeta gaya Guruji ke prati bhakti bhaav se
Guruji ne dekar usey Apna paawan pyaar
Samay aane par usey deeya taar.

Bhakti ke sindhu mein yoon tayr kar
Guruji kee kripa se mukammal hua uska safar
Safal hui uskee zindagaani
Shukrana mein nat-mastak hua praani.

🌹🌹🌹🌹🌹🌹🌹

Jai Guruji 🙏🙏
Dhirja

Bhakti Ke Sindhu Mein… (01/22/2026)

January 21, 2026

Om Namaha Shivaya
Aaj Ka Suvichaar 🙏🏻🙏🏻

#2894

                Saat Samundar Paar

Beshak kar lo saat samundar paar
Na chodega tumhe tumhaare karmon ka bhaar
Aur jo angg sangg rahega tumhaare Aradhya ka naam
Toh saath saath honei lagega tumhaara kalyaan.

Guruji Maharaj Hain Aradhya tumhaare
Ve Hain Apni sangat ke akhand sahaare
Tum jaaoge jidhar
Guruji hongei udhar
Aur tumhaare bheetar
Bilkul duur nahin Unka dar.

Tumhaare saath chalega tumhaare karmon ka bhaar
Aur angg sangg rahenge Guruji kirpadhaar
Isliye saat samundar se na daro, na hee is bhaar se
Buss, Guruji kee yaad mein raho bade pyaar se.

Guruji ka ashirwaad paawan
Karega tumhaare karmon ka nivaaran
Ve nirdhaarit karte Hain samay
Unkee marzi par na karna sanshay.

Guruji swayam roop Hain Rabb ka
Unhe khayaal hai sabka
Dikhaate Hain har bhakt ko raah
Kehlaate Hain Brahmand ke shehenshah
Dukhi hotey Hain Ve dekhkar hamein dukhi
Apne par itna kuch lekar karte Hain hamein sukhi
Khoj lo beshak poora sansaar
Dhoond lo sansaar ke bhi paar
Kaheen na milenge aise Guru sarkar
Sees jhukakar Unka shukriya baarambaar.

🌹🌹🌹🌹🌹🌹🌹

Jai Guruji 🙏🙏
Dhirja

Saat Samundar Paar (01/21/2026)

January 20, 2026

Om Namaha Shivaya
Aaj Ka Suvichaar 🙏🏻🙏🏻

#2893

      Meetha Zeher

Moh hai meetha zeher
Tumhe kamzor banaata hai har peher
Is zeher ko peene se bachaao swayam ko
Abb bhi samay hai, sambhaalo apne mann ko.

Insaan ko baandhne wale paash hain anek
Aur moh yakeenan in mein se paash hai ek
Moh ko baandhne na dena apne pankh
Tum ho azad panchi, rakho yaad
Guruji kee yaad mein raho nirantar
Unke naam se rakho mann ko aabaad
Guruji kee kripa se yoon badhega manobal
Ki moh ka aakraman jaayega tal
Kintu aakraman ho sakta hai baar baar
Isliye saavdhaani rakhni hogi barkaraar.

Pyaar aur moh ke beech hai ik rekha maheen si
Jo dekh nahin sakte sabhi
Guruji kee meher se mumkin hai isey dekh paana
Guruji kee kripa se mumkin hai moh ke paar jaana.

Guruji parakhte Hain koshish aur neeyat
Guruji karte Hain poori madad
Par chod kar apna ahem
Tumhe karna hoga apna karam
Tyaagna hoga moh nibhaate huey pyaar ka dharam
Purusharth kee oar badhaane ke liye kadam.

🌹🌹🌹🌹🌹🌹🌹

Jai Guruji 🙏🙏
Dhirja

Meetha Zeher (01/20/2026)

January 19, 2026

Om Namaha Shivaya
Aaj Ka Suvichaar 🙏🏻🙏🏻

#2892

Anokha Laagey Guruji Ka Pyaar

Anokha laagey Guruji ka pyaar
Bilkul sachcha aur sabse sundar
Ek jaisa har sangat ke liye
Unka pyaar hai gehra samundar.

Miley jabb bhi jisey
Beshak ek boond bhi aaye jiske hissey
Uskee toh zindagi jaaye sanvar
Uskee kismat jaaye nikhar.

Guruji ke pyaar mein hai apaar sneh
Unke pyaar mein hai manohar mamta
Guruji ke pyaar mein hai sundar samta
Unke pyaar mein hai sampoorna marham kee kshamta
Jo gehre se gehre ghaav ko de bhar
Jo bade se bade dukh ko le har.

Niswaarth laagey Guruji ka pyaar
Unka pyaar hai aseem aur aparampaar
Unke jaise hee desh, kaal, deh kee seema ke paar
Unka pyaar deta hai saari sangat ko taar.

Bhola laagey Guruji ka pyaar
Kintu anushaasan bhi sikhaaye baar baar
Yahee pyaar de aashvaasan baarambaar
Ye pyaar bhakt ko na maan-ne de haar.

Guruji ke pyaar mein hai neevanpann
Guruji ke pyaar se harshit ho jaata hai mann
Guruji ke pyaar mein hai vo prataap
Jo bhakt ke bin boley jaan le uska dukh santaap
Guruji ka pyaar jaan le bhakt ke bheetar kee har baat
Ye pyaar bhakt ka saath de din aur raat.

Guruji ka pyaar jo mila
Mera toh naseeb khila
Vaari jaaoon mai Guruji ke pyaar par
Jo Maalik ne mujhe deeya hai bulaakar Apne dar par.

🌹🌹🌹🌹🌹🌹🌹

Jai Guruji 🙏🙏
Dhirja

Anokha Laagey Guruji Ka Pyaar (01/19/2026)