Aaj Ka Suvichaar

January 18, 2026

Om Namaha Shivaya
Aaj Ka Suvichaar 🙏🏻🙏🏻

#2891

Kiran Jyot Se Alag Nahin

Guruji Divya jyot Hain
Tum in jyot kee ho kiran
Kiran ansh hai jyot ka
Tum Guruji ka ho ansh
Beshak bhautik starr par ho alag Unse
Darasal tum ho Shivansh.

Maya ka prabhaav hota hai prabal
Aur saath mein agar kamzor ho manobal
Toh kaam, krodh, lobh, moh, ahankar
Karte rehte hain mann par prahaar
Ye bann jaate hain duuri ka kaaran
Aur duuri badhti rehti hai har kshan
Divya jyot se alag mehsoos karti hai kiran swayam ko
Phir shuru hota hai prayaas vash mein karne mann ko.

Shiv se jeev aur jeev se Shiv
Yahee hai jyot aur kiran kee kahaani
Guruji kee yaad mein rehte huey
Safal ho paaye zindagaani.

Guruji kee yaad hee hai Unka simran
Unkee yaad hee hai Unka chintan
Ismein magn reh paaye jo har kshan
Toh tarta jaaye rooh ke sangg tann aur mann.

Guruji hee bakhshein simran aur dhyan
Guruji kee kripa se hee ho atmabodh aur gyan
Kiran kee divya jyot se duuri hoti jaaye kumm
Kiran jaan paaye ki vo bhi hai Shivoham
Guruji Hain Shiv, Shiv Hai param satya
Kiran jyot se alag nahin, ye hai sundar tathya.

🌹🌹🌹🌹🌹🌹🌹

Jai Guruji 🙏🙏
Dhirja

Kiran Jyot Se Alag Nahin (01/18/2026)

January 17, 2026

Om Namaha Shivaya
Aaj Ka Suvichaar 🙏🏻🙏🏻

#2890

     Aapko Saump Deeya Hai Sabb

Guruji Maharaj antaryami
Aap maalik, mere swami
Aap deendayal, mai deen nimaani
Aap karunanidhaan aur daani.

Meri khushnaseebi ki Aapse milta hai daan
Aap karte rehte Hain kalyaan
Aur bakhshte Hain jaan
Toh hain is shareer mein praan.

Aapki hee rehmat se hai ye sehat
Aapki hee dee prerna se hai utsah behad
Aapse jude rehne ka har pal har din
Kyunki abb jeena gavaara nahin is judaav ke bin.

Aap daya ke dariya
Aap nirmalta kee nadiya
Mai machhli hoon Aapke aanchal mein rahi pal
Aapki mamta par nirbhar hai mera aaj aur kal
Aapki kripa se tarr jaaoongi
Aapke poshan bin marr jaaoongi.

Wajood nahin mera aur mere safar ka
Aapke rehem ke bagair
Mujhe kabhi apne se alag na karna daata
Na banaana kabhi mujhe gair.

Mere paapon ko dhakna
Mujhe sada Apna banaa kar rakhna
Aapke aanchal mein meri rooh yoon sukoon paati hai
Jaise kisee tapasvi ko tapp mein safalta mil jaati hai
Ye hai Aapki hee vadiyaayee
Aur Aapki daya aur nirmalta kee gehraayee
Varna mai kahaan is kaabil
Ki mujhe Aapka aanchal jaaye mil.

Aapki rehmaton ka shukrana
Mujh nimaani ko paar lagaana
Aapko maana hai Apna Rabb
Aapko saump deeya hai sabb.

🌹🌹🌹🌹🌹🌹🌹

Jai Guruji 🙏🙏
Dhirja

Aapko Saump Deeya Hai Sabb (01/17/2026)

January 16, 2026

Om Namaha Shivaya
Aaj Ka Suvichaar 🙏🏻🙏🏻

#2889

         Unhee Ke Charnon Mein…

Guruji mere pita Hain
Guruji hee meri maa
Mai goad mein hoon apni in maa kee
Aur ye pita mujhe chalna rahe Hain sikha
Unke naam mein kitnee shakti
Ve rahe Hain dikha.

Guruji kee kripa hai
Ki Unhe mujh jaisi par aaya taras
Tabb se lekar abb takk
Mujhpar Unka sneh raha hai baras.

Dekha na thaa Rabb ka roop
Phir Guruji ne dikhaaya Apna swaroop
Deeya pyaar, bakhsha Apna ruhaani deedar
Apne noorani prataap se rahe Hain mujhe taar.

Guruji sumat dein aisee ki chetna Unkee oar rahe mudi
Guruji daya karein aisee ki mai Unse rahoon judi
Guruji ke kehne mein rehna
Guruji ke liye prem bhaav mein behna
Isee mein rahoon mastt magan
Isee mein laagi rahe lagan.

Guruji hee Rahim, Ve hee Ram
Ve hee mere Sai, Ve hee Shyam
Guruji ke naam se meri har subah har shaam
Unhee ke charnon mein hai har teerath dham.

🌹🌹🌹🌹🌹🌹🌹

Jai Guruji 🙏🙏
Dhirja

Unhee Ke Charnon Mein… (01/16/2026)

January 14, 2026

Om Namaha Shivaya
Aaj Ka Suvichaar 🙏🏻🙏🏻

#2887

          Mere Hriday Ke Saare Raaste

Param poojya Guruji Maharaj,

Mere hriday ke saare raaste
Tarsein Aapke hee vaaste
Khaaskar jabb se hui hai duniya kee pehchaan
Jee hee nahin lagta yahaan
Aapki yaad se jude rehne se jeevit rehti hoon
Abb kisee aur se kuch kehne ke bajaaye Aapse hee sabb kehti hoon
Aapse badhti jaaye kareebi
Yahee hogi meri sabse badi khushnaseebi
Duniyadari toh hai farz ke taur ik majboori
Iske beech kuch aisa na karoon ki badh jaaye Aapse meri duuri.

Mai badhaati rahoon Aapki oar kadam
Jaanti hoon Aap toh sainkdon kadam badhaate chalenge meri oar
Meri oar se beshak ho sakti hai deri
Kintu Aapke charnon mein sada hai kalyaan kee bhor.

Uss bhor ke sooraj kee ek kiran bhi kaafi hai mere liye
Jalaane ke liye mere bheetar uss ullaas ke deeye
Jiske dwaara Aapki kripa se mai Aapki lagan mein lagi rahoon
Aur Aapki bakhshi hui chetna ke sahaare mai jagee rahoon.

Vivek kee vrishti keejiye
Daya kee drishti deejiye
Deen bhaav se Aapse kehta hai mera mann
Ki Aap mujhse naaraaz na hona kisee bhi kshan
Aap jo rahenge mujh se prasann
Toh dhanya ho jaayega mera jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Mere Hriday Ke Saare Raaste (01/14/2026)

January 13, 2026

Om Namaha Shivaya
Aaj Ka Suvichaar 🙏🏻🙏🏻

#2886

                          Ye Deh….

Ye deh lagti hai ik kaidkhaana
Nahin hai ye meri rooh ka sanatan thikaana
Lekin jabb takk chal raha hai is janam ka afsaana
Tabb takk rooh ko is deh ke sangg saath hai nibhaana.

Phir se kisee deh mein kaid na ho
Uske liye mujhe karna hai jo
Vo mere liye nahin hai aasaan, Guruvar
Isliye Aap hee tayy karaayiye ye safar
Jismein karmon ka hisaab poora ho jaaye
Aur meri rooh Aapse milan kar Aap mein samaaye.

Meri gustaakhi ko keejiye maaf
Meri neeyat aur mann rahe saaf
Aisee daya barsaayiye
Mere mann ka har bhram mitaayiye.

Atma-nireekshan aur atma-sudhaar
Sikhaayiye mujhe inke liye upchaar
Aapne mauka diya ki kumm karoon karmon ka bhaar
Isliye is deh ke liye mai hoon Aapki shukrguzaar
Kabhi na karoon is deh ka mai tiraskaar
Deejiye aisee sumat, mere bakhshanhaar.

Aapse hai mujh nimaani kee arzi
Ki vaise hee rakhiyega mujhe, jaise Aapki marzi
Aur jabb takk hota rahe dobara mera janam
Kripa kar dete rahiyega Apni sharan.

Aapki sharan mein hee hai swarg mera
Aapki sharan mein hee hai sabse shreshth uddhaar aur sahaara
Aapki sharan bin mera nahin hai guzaara
Aapki sharan mein hee hai pooran kalyaan ka dwaara.

🌹🌹🌹🌹🌹🌹🌹

Jai Guruji 🙏🙏
Dhirja

Ye Deh…. (01/13/2026)

January 12, 2026

Om Namaha Shivaya
Aaj Ka Suvichaar 🙏🏻🙏🏻

#2885

                     Bhaj Le Bande 

Bhaj le bande Guruji ko
Apne karam tu le sanvaar
Bhajte bhajte baar baar
Tere sanskaar aur swabhaav mein aayega sudhaar.

Anivaarya hai ye sudhaar
Isliye anivaarya hai bhajna baar baar
Na kar kisee shubh mahoorat ka intazaar
Zindagi ke din hain buss do chaar.

Bhajne mein jo anand hai
Vo aur kaheen na milega
Guruji ka naam bhajte bhajte
Tera hriday kamal khilega.

Sundar sa aasan jo hai vahaan
Uspar Guruji hongei viraajmaan
Hain Ve karunanidhaan
Karenge tera kalyaan.

Bhaj le, bhaj le
Bhaj le, pyaare
Tu khushnaseeb hai
Jo aaya hai Guruji ke dwaare.

Guruji kee chhavi tere mann mein hai
Unkee chhavi tere kann kann mein hai
Guruji ko bhajte huey Unkee chhavi ko pehchaan
Varna reh jaayega is chhavi kee maujoodagi se anjaan.

Jabb takk hain tujh mein praan
Bhajta chal tu Guruji ka naam
Unke charnon mein hai sachkhand ka dhaam
Karta chal is dhaam ke naam sarovar mein tu snaan.

🌹🌹🌹🌹🌹🌹🌹

Jai Guruji 🙏🙏
Dhirja

Bhat Le Bande (01/12/2026)

January 11, 2026

Om Namaha Shivaya
Aaj Ka Suvichaar 🙏🏻🙏🏻

#2884

            Koi Jaane Ya Na Jaane

Param poojya Guruvar,

Koi jaane ya na jaane
Koi maane ya na maane
Sabhi hain mohtaaj Aapki rehmat ke
Kyunki sabhi jee rahe hain uss kismat se
Jo banee unke hee karmon se
Anekon pichhle janmon se.

Aapki rehmat jo jaaye ho
Toh bhakt ke karmon ka bojh halka ho
Khul jaayein uskee kismat ke dwaar
Aapki kripa se ho uska beda paar.

Aap bhakt ke tamas ko dein hataa
Aap bhakt ke ahankar ko dein mitaa
Taaki bhakt apna adhyatmik dharma nibha paaye
Taaki vo unnat hota jaaye
Sadgati ke path par
Samarpit apni matt ko kar
Aapke kamal charan mein
Rehkar Aapki sharan mein.

Ye sab Aapki rehmat se hee hai mumkin
Jo Aapki marzi se hee barse bhakt par raat aur din
Is barsaat mein bheeg jaane ko har koi hai bekaraar
Jinpar abhi takk hui nahin ye barsaat, ve kar rahe hain iska intazaar.

Ye intazaar bhi hoga mukammal
Aapki hee rehmat ke sahaare
Aapki rehmat se jo pal abb takk hain guzaare
Kalyaan se paripoorna rahe hain ve saare
Aagey bhi Aapki rehmat ke aasare miltee rahegi Aapki bakhshindagi
Aur khushkismati ke anubhav mein beetegi ye zindagi
Hota rahega har bhakt ka kalyaan
Kyunki Aap Hain saari sangat ke Guru roopi Bhagwaan.

🌹🌹🌹🌹🌹🌹🌹

Jai Guruji 🙏🙏
Dhirja

Koi Jaane Ya Na Jaane (01/11/2026)

January 10, 2026

Om Namaha Shivaya
Aaj Ka Suvichaar 🙏🏻🙏🏻

#2883

   Aankhein Khuli Hon Ya Hon Bandd

Aankhein khuli hon ya hon bandd
Toh dikhtee hai chhavi Guruji kee
Kabhi chehra masoom
Kabhi roop gumsum
Kabhi chehre par muskaan khoobsoorat
Kabhi gehraayee bayaan karti hui soorat…

Har chhavi manohar
Leti hai chinta har
Guruji ko paane ka armaan
Gehra kar deta hai Unka simran aur dhyan
Jee nahin chaahta ki vo dhyan kabhi tootey
Saath hee ho praarthanaa ki mera Guru mujhse kabhi na roothey.

Kyunki Guruji se hee hai zindagi
Guruji se hee hai bandagi
Guruji kee sharan mein aane se pehle aur baad
Sab kuch hai Guruji ka diya hua ashirwaad
Fark buss yahee ki pehle mai is sundar satya se thi anjaan
Aur abb mai isey gayi hoon jaan aur maan.

Aankhein khuli hon ya ho bandd
Dhyan gehra ho ya mandd
Basee rahe Guruji kee chhavi sada mere bheetar
Bahut hee pyaare laagein Guruji aur Guruji ka dar
Yahaan jhukaate huey apna sir
Beet jaaye meri saari umar
Paakar Guruji kee meher
Ye jeevan jaaye guzar.

🌹🌹🌹🌹🌹🌹🌹

Jai Guruji 🙏🙏
Dhirja

Aankhein Khuli Hon Ya Hon Bandd (01/10/2026)

January 9, 2026

Om Namaha Shivaya
Aaj Ka Suvichaar 🙏🏻🙏🏻

#2882

       Guruji Ke Aanchal Mein Palee

Guruji ke aanchal mein palee
Jeeti hai ik manchali
Guruji kee dhun mein mastt magan
Dharti par rehkar chhooti hai gagan
Guruji ke pyaar mein bhar kar ruhaani udaan
Gungunaati hui apni ruhaani dastaan.

Baanvri hokar karti hai Guruji kee preet
Jab se usey Guruji mein miley Hain meet
Jaani ki vo kabhi nahin akeli
Ho gayi aur bhi albeli
Khushmizaj aur nirbhay
Mann hee mann kiya usne tayy
Ki vo jeeyegi jeevan
Kar har kaaraj Guru charan mein arpan.

Manchali thi murjhaayi kali
Guruji ne liya usey sharan mein
Toh parivartan hua uske jeevan mein
Guruji ke liye itna pyaar umda uske mann mein
Ki abb Guruji kee hee yaad mein rehti hai
Unhee ke liye aasakti bhaav mein behti hai
Duniyadari mein jeeti hui swayam ko nahin uljhaati hai
Zyada se zyada samaa Guruji kee yaadon mein guzaarti hai
Ek pal bhi na chaahe vo hona Guruji ke pyaar se juda
Shukraguzaar hai vo ki usne Guruji mein paa liya Khuda.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Aanchal Mein Palee (01/09/2026)