Aaj Ka Suvichaar

January 9, 2026

Om Namaha Shivaya
Aaj Ka Suvichaar 🙏🏻🙏🏻

#2882

       Guruji Ke Aanchal Mein Palee

Guruji ke aanchal mein palee
Jeeti hai ik manchali
Guruji kee dhun mein mastt magan
Dharti par rehkar chhooti hai gagan
Guruji ke pyaar mein bhar kar ruhaani udaan
Gungunaati hui apni ruhaani dastaan.

Baanvri hokar karti hai Guruji kee preet
Jab se usey Guruji mein miley Hain meet
Jaani ki vo kabhi nahin akeli
Ho gayi aur bhi albeli
Khushmizaj aur nirbhay
Mann hee mann kiya usne tayy
Ki vo jeeyegi jeevan
Kar har kaaraj Guru charan mein arpan.

Manchali thi murjhaayi kali
Guruji ne liya usey sharan mein
Toh parivartan hua uske jeevan mein
Guruji ke liye itna pyaar umda uske mann mein
Ki abb Guruji kee hee yaad mein rehti hai
Unhee ke liye aasakti bhaav mein behti hai
Duniyadari mein jeeti hui swayam ko nahin uljhaati hai
Zyada se zyada samaa Guruji kee yaadon mein guzaarti hai
Ek pal bhi na chaahe vo hona Guruji ke pyaar se juda
Shukraguzaar hai vo ki usne Guruji mein paa liya Khuda.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ke Aanchal Mein Palee (01/09/2026)

January 8, 2026

Om Namaha Shivaya
Aaj Ka Suvichaar 🙏🏻🙏🏻

#2881

                       Kripa Keejiye

Param poojya Guruji Maharaj,

Aapne hee kiya hai vidhaan is srishti ka
Aapka har bachcha hai ichchuk Aapki drishti ka
Aapke ashirwaad par hee sabka kalyaan hai nirbhar
Aap hee srijanhaar, aur Aap hee Hain paalanhaar, Guruvar.

Aapke hukm mein hai prakriti bhi
Aapke hukm mein chaand taare hain sabhi
Aap kaaran karta Hain har praani kee zindagaani ke
Aap prerak aur poorak Hain har jeevan kee kahaani ke.

Gin-na bhi chaahoon toh nahin sakti gin
Kuch bhi toh nahin ho sakta safal Aapki kripa ke bin
Aapse hai jadd chetan sampoorna
Aapse hee ho sabki jholi kalyaan se paripoorna.

Jee chaahe Aapki mahima ka gungaan karti rahoon har shwaas se
Jee chaahe dekh paaoon Aapko bilkul paas se
Phir hansi aati hai khud par ye soch kar
Ki Aapki maujoodagi toh hai mere bheetar.

Apne bheetar jitna mai jaaoongi
Aapko apne kareeb mai paaoongi
Bakhshiye aisa simran aur dhyan
Bakhshiye nek prayaas aur gyan
Ki hota rahe atma-saakshaatkaar
Ki Aapse hota rahe deedar
Kyunki sabse badi saza hai Aapse duuri
Kripa keejiye aur bakhshte rahiye shraddha aur saboori
Shwaas shwaas se karti rahoon Aapki ji huzoori
Kripa keejiye ki Aapse milan kee aas ho poori.

🌹🌹🌹🌹🌹🌹🌹

Jai Guruji 🙏🙏
Dhirja

Kripa Keejiye (01/08/2026)

January 7, 2026

Om Namaha Shivaya
Aaj Ka Suvichaar 🙏🏻🙏🏻

#2880

   Teri Sadgati Ke liye

Tu jis daur se raha hai guzar
Vo Guruji ko hai pataa
Vo jaante nahin teri haalat
Na kar aisa sochne kee khataa.

Arey, Unhe tujhse kaheen zyada fikr hai teri
Phir bhi agar haalaat sudharne mein lagg rahi hai deri
Toh is vilamb mein chhipa hoga vo shubh aarambh
Jo Guruji swayam tere bhavishya ke liye kar rahe Hain tayy
Isliye tyaag tu sanshay aur bhayy
Aur jagaa kar apna ullaas
Abb chod de hona udaas.

Ye toh hai bilkul tayy
Ki rukta nahin hai samay
Sakaraatmak soch ke sangg
Bharta chal ummeed ke rangg
Apne jeevan kee tasveer mein
Apne nikharte huey zameer mein.

Daur aaya hai toh chala bhi jaayega
Seekh le jo vo sikha kar jaayega
Guruji sikha rahe Hain tujhe teri rooh kee unnati ke liye
Seekh ko seekhna zaroori hai teri sadgati ke liye.

🌹🌹🌹🌹🌹🌹🌹

Jai Guruji 🙏🙏
Dhirja

Teri Sadgati Ke liye (01/07/2026)

January 6, 2026

Om Namaha Shivaya
Aaj Ka Suvichaar 🙏🏻🙏🏻

#2879

              Sampoorna Aadhaar

Meri khaamoshi mein mehsoos honei wala ruhaani raaz
Mere niraash lamhon mein asha jagaane wala sakaraatmakta ka andaaz
Jisey sunn-ne ke liye har pal hoon mai ichchuk, vo pyaar bhari awaaz
Aapse milta hai ye sabb, mere Rabb, mere Gareebnawaaz.

Vo Divya jyot, jo hai mere bheetar
Vo hai Aapka hee ansh
Mann mein ye khayaal aata hai aksar
Ki Aapki daya se mai hoon Shivansh.

Pyaare Guruji, nawaaza hai Aapne mujhe har uss daat se
Jismein hai mera kalyaan
Waakif Hain Aap meri har kahi aur ankahi baat se
Mai beshak hoon kitnee aisee baaton se anjaan.

Mujhe koi shikaayat nahin agar mai hoon anjaan
Shukr hai ki Aapko hai mere bheetar kee har baat ka gyan
Tabhi toh Aapse kehti bhi nahin hoon agar
Toh bhi mujhe mil jaate hain mere sawaalon ke jawaab
Shukr hai, mere maalik, mere murshid
Ki mera kann kann hai Aapke samaksh khuli kitaab.

Mere bheetar, aur mere aas paas
Mujhe mehsoos hota rahe Aapka noor
Aisee kripa keejiyega
Ki mujhe kabhi na lagey ki Aap Hain mujhse duur.

Aapki yaad, Aapki khushboo, ya phir mere dhyan mein aane wali Aapki awaaz
Aapke chintan mein Aapki chhavi ka ehsaas
Aapke satsang mein Aapki mahima ka gungaan
Aapki daya se Gurbani ka amritpaan
Aapka shubh spandan har oar
Mujhe Aapse jodti hui ruhaani doar
Aur meri rooh ko chhooti hui vo kampan
Jo jaati hai Aapka ruhaani sparsh bann
Kyunki Aap swayam toh bhautik deh ke paar Hain
Aur Aap meri bhautik deh aur rooh ka sampoorna aadhaar Hain.

🌹🌹🌹🌹🌹🌹🌹

Jai Guruji 🙏🙏
Dhirja

Sampoorna Aadhaar (01/06/2026)

January 5, 2026

Om Namaha Shivaya
Aaj Ka Suvichaar 🙏🏻🙏🏻

#2878

                     Guruji Ka Prem

Guruji ke prem ke paawan ras mein doob kar tarr jaaoge
Is prem se paavan kuch nahin kaheen
Beshak tum abhi maano nahin
Ek din tumhe zaroor ho jaayega yakeen.

Guruji ke prem mein pita ka sneh toh hai hee
Aur mamta ma kee bhi
Niswaarth nishpaksh nirmal
Saadaa aur saral
Amrit roopi hai Guruji ka prem itna pyaara
Ye prem hee hai Unke jann ke jeene ka sahaara.

Guruji ka prem Unke har swaroop se chhalakta hai
Guruji ka prem Unkee khushboo mein mehekta hai
Guruji ka prem Unke har bhakt ko milta hai bin pakshpaat
Guruji ke prem se har bhakt ka naseeb khilta hai din raat.

Guruji ka prem hai beantt
Guruji ka prem hai gehra
Guruji ka prem hai rakshak
Dete huey sangat par pehra.

Guruji ka prem hai anmol
Namumkin hai iska laukik tol तोल
Is prem ka aadar karo
Is prem se na daro
Is prem ko halke mein na lena
Is prem ka mahatva samajhna
Ye prem hai prem Paramtama ka
Ye poshan karta hai bhakt kee atma ka.

Guruji ka prem ras hai ruhaani
Ye prem sanvaarta hai saari sangat kee zindagaani
Is prem mein divya jyot hai atmasaat
Ye prem hai Saakshaat SadaShiv kee saugat.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Ka Prem (01/05/2026)

January 4, 2026

Om Namaha Shivaya
Aaj Ka Suvichaar 🙏🏻🙏🏻

#2877

                Kya Raja Kya Rankk

Guruji ke darbar mein kya raja kya rankk
Guruji toh jaanein sabke asli rangg
Samdarshi Parmeshwar Hain Ve
Sundar sarvgyani Sarveshwar Hain Ve.

Yahaan jhooth fareb ka faayda nahin
Yahaan dikhaawe ka kaanoon kaayda nahin
Yahaan khulti hai karmon kee kitaab
Chaahe jo bhi ho duniyavi khitaab.

Ye toh shukr hai
Ki Guruji uthaate Hain hamaare karmon ka adhiktar bhaar aksar
Aur jabb hum bhogte hain karmon ka phal
Toh Unka haath hota hai hamaare sir par.

Raja kabb bann jaaye rankk
Aur rankk raja bann jaaye
Kismat ke khel pe hai ye nirbhar
Koi kuch bhi na kar paaye.

Lekin Guruji ke vash mein hai sabb
Aisa kal thaa, aisa hai abb
Aur aagey bhi aise hee rahega
Jabb takk samay ka jharna bahega.

Na jaane kabb miley samay se maar
Na jaane kabb samay ho jaaye dayal
Isliye rankk honei ka gumm na karna
Aur raja honei ka na karna ahankar.

🌹🌹🌹🌹🌹🌹🌹

Jai Guruji 🙏🙏
Dhirja

Kya Raja Kya Rankk (01/04/2026)

January 3, 2026

Om Namaha Shivaya
Aaj Ka Suvichaar 🙏🏻🙏🏻

#2876

     Tumhaare Uddhaar Ka Upchaar

Sooraj uday hokar laata hai savera
Phir shaam ko vo dhal jaata hai
Har roz is niyam ka paalan kar
Sooraj hamein sikhaata hai
Ki zindagi ka har lamha anmol hai
Vo laut kar nahin aata hai.

Aur bhi bahut zaroori seekh
Sooraj se hamein miltee hai
Ki niraasha kee shaam aur raat hoti hai khatm
Aur naye savere kee kalee roz khiltee hai.

Vaapis na aaye beeta kal
Par aaj ka din hai yahaan
Guruji ko yaad karne mein vilamb na karo
Beeta jaa raha hai samaa.

Kal jo yaad na kiya thaa Unhe
Aaj toh yaad kar lo
Kal jo antas Unke naam se vanchit raha
Aaj usey bhar lo.

Aaj ke din ko kar lo safal
Is se pehle ki sooraj jaaye dhal
Aur Guruji kee yaad mein rehte chalo
Jabb takk na aa jaaye kal.

Phir swaagat karna aane wale kal ke sooraj ka
Lete huey Guruji ka naam
Karte huey baaki sab kaam
Har subah har shaam.

Sooraj uday hota aur dhalta rahega
Tumhaara jeevan sangg hee chalta rahega
Tumhaare sangg Guruji ka naam yaad mein rahega
Tumhaare uddhaar ka upchaar Unke ashirwaad mein bahega.

🌹🌹🌹🌹🌹🌹🌹

Jai Guruji 🙏🙏
Dhirja

Tumhaare Uddhaar Ka Upchaar (01/03/2026)

January 2, 2026

Om Namaha Shivaya
Aaj Ka Suvichaar 🙏🏻🙏🏻

#2875

               Vo Hee Hai Swadesh 

Hamaara ateet aur vartmaan
Aur bhavishya bhi jaante Hain Bhagwaan
Jo Guruji bannkar aaye dharaa par
Bulaane hamein Apne dayalu dar par.

Har vo manushya hai kitna khushnaseeb
Jo Guru kripa se aa paaya hai Unke thoda bhi kareeb
Sach mein, ye Guruji kee kripa bin kalpana mein bhi nahin hai mumkin
Jitnee bhi koi koshish kar le, vo Guruji kee rehmatein nahin sakta gin.

Kyunki Unkee prakat rehmatein hain anginat har bhakt par
Aur Unkee adrishya rehmatein toh aati hee nahin nazar
Lekin ve hoti rehti hain hum sab par pal pal
Aur Guruji kee leela se hamaara jeevan deti hain ve badal.

Hum toh so lete hain parantu Guruji nahin Hain sotey
Ve toh har kshan hamaari raksha mein satark Hain hotey
Hum itne pyaar se pal rahe hain Guruji ke aanchal mein rehkar surakshit
Jis bhi chunauti ka hamein saamna karna padey, Guruji nisandeh karte rahenge hamaara hitt.

Hamaari chetna ke kshetra mein kar ke pravesh
Hamaara kalyaan karte Hain Guru Sarvesh
Unhe kyun dhoondhein hum jaakar kisee aur desh
Jahaan Hain Ve hamaare bheetar virajmaan, vo hee hai swadesh.

🌹🌹🌹🌹🌹🌹🌹

Jai Guruji 🙏🙏
Dhirja

Vo Hee Hai Swadesh (01/02/2026)

January 1, 2026

Om Namaha Shivaya
Aaj Ka Suvichaar 🙏🏻🙏🏻

#2874

     Har Saal Ke Jaise

Mere Guruvar deendayal,

Har saal ke jaise
Pichhle saal ke har din bhi
Apni goad mein Aapne mujhe sambhaala
Mere jeevan ko har tareh se sanvaara
Nahin kar sakti poori tareh se, chaahe jitna bhi kar loon Aapka shukrana
Arzi hai ki is saal bhi pehle kee bhanti mujhe raasta dikha kar uspar chalaana.

Aapki daya se hee mere naynon kee nazar
Aapki kripa se hee vivek aur buddhi
Aapki rehmat se hee meri mehnat ka asar
Aapki karuna se hee ho antas kee shuddhi.

Bakhshna sumat aisee mujhe is saal bhi
Ki bann sakoon pehle se behtar insaan
Aapke har hukm ka paalan karoon
Unnat hoti rahe meri ruhaani udaan.

Aapke ashirwaad se hee sab hai mumkin
Aapki bakhshish se mai tarti jaaoon raat din
Apoorna kaaraj hon Aapki meher se sampann
Aapki sewa mein leen rahe mera tann, mann, aur dhan.

Sab kuch Aapka deeya hua hai, mere daata
Aap daat dene wale, mai lene wali, aisa hai naata
Mere paapon aur kukarmon ka bojh halka hota rahe is saal
Aur Aapke liye mera bhaav badhta rahe niswaarth pyaar ka
Har tareh se is saal mai jaaoon yoon sudhar aur sanvar
Ki Aapki inaayat se ho jaaoon agrasar
Aur badhte huey uss disha mein, Aap le jaana chaahte Hain jahaan
Har kadam par karti chaloon Aapka anantam shukrana, mere maalik meharbaan.

🌹🌹🌹🌹🌹🌹🌹

Jai Guruji 🙏🙏
Dhirja

Har Saal Ke Jaise (01/01/2026)

December 31, 2025

Om Namaha Shivaya
Aaj Ka Suvichaar 🙏🏻🙏🏻

#2873

Kabhi Socha Bhi Na Thaa

Kabhi socha bhi na thaa
Ki kismat aisa lamha degi dikha
Jo hoga sabse shubh
Jo hoga aisa shuddh
Ki pooran Guru swayam bulaayenge
Apne dar par mujhe Ve laayenge.

Guruji Maharaj, Aapne kee aisee meher
Ki mere jeevan mein aaya vo peher
Jabb Aapne bulaaya mujhe Apne dwaar par
Karne mujh nimaani par nadar.

Kya hogi khushkismati is se badi
Ki mai Aapke satsang mein thi khadi
Sunte huey Aapki leela ka gungaan
Sunte huey Aapki mahima ka bakhaan.

Aapne sharan mein liya hai mujhe jabb se
Aap bulaate Hain Apne satsang mein tabb se
Chhakaate Hain Aap chai aur langar prasad
Dete Hain har tareh se Apna ashirwaad.

Bulaakar Apne mandir ke dwaar
Karvaaya Aapne Apna divya deedar
Aapki divya khushboo se kritaarth hui meri rooh
Shuddhi ke spandan ne mere roam roam ko liya chhoo.

Meri anginat khaamiyon se mai abb bhi hoon anjaan
Kintu Aap karaa rahe Hain dhyan dwaara mujhe meri kamzoriyon kee pehchaan
Pavitrikaran dwaara kar rahe Hain kalyaan
Kar rahe Hain mujh par asankhya ehsaan
Mujhe koi sanshay hee nahin ki Aap hee Hain Bhagwaan
Jo swayam dharti par aaye bannkar Guruji karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Kabhi Socha Bhi Na Thaa (12/31/2025)