Aaj Ka Suvichaar

March 26, 2026

Om Namaha Shivaya
Aaj Ka Suvichaar 🙏🏻🙏🏻

#2958

                  Antarjaat Anand 

Anand toh hai antarjaat
Yaad rakhni hogi ye baat
Dukh sukh toh mehez hain aavaran
Lekin inpar yoon nirbhar ho jaata hai jeevan
Ki hum bhool jaate hain aantarik anand ko
Bhool jaate hain Satchittanand ko.

Jahaan se aaye hain
Aur jaana hai jahaan
Usey bhoole baithey hain
Kya itna pasand aaya hai ye jahaan?

Yahaan do chaar din ka hai basera
Aur apne bheetar hai anand ka savera
Ye yaad rakhein toh hoga hamaare liye achcha
Ye kewal ek vichaar nahin, ye hai tathya sachcha.

Guruji se judey rehne ka prayaas kiya jaaye
Guruji ke chintan ko samay deeya jaaye
Aur Guruji se kee jaaye fariyaad
Toh antarjaat anand rahega yaad.

Guruji toh Hain rasik bairagi swayam
Hamaare liye aaye aur jeeya Unhonei maanav ka jeevan
Unkee prerna se itna toh kar hee sakte hain hum
Ki shukrana karte huey karein Unka anusaran.

Shukrana ka ehsaas swayam mein uss anand kee yaad dilaayega
Jisey mehsoos karne kee koshish se hee dukh sukh ka aavaran hatne lagg jaayega
Apne bheetar anand ka anubhav hee hai mukti
Is se gehri nahin hai koi yukti.

Swayam ko yaad dilaana hoga baar baar
Karna hoga khud ko tayyaar
Jaa kar mann, buddhi, chitt, ahankar ke paar
Milega is param anand ka sansaar
Guruji kee kripa se bheetar chalein is param anand kee oar
Vaheen milegi divya jyot se ujjwal bhor.

🌹🌹🌹🌹🌹🌹🌹

Jai Guruji 🙏🙏
Dhirja

Antarjaat Anand (03/26/2026)

March 25, 2026

Om Namaha Shivaya
Aaj Ka Suvichaar 🙏🏻🙏🏻

#2957

Anandit Rahega Gurumukhi

Paap kee parakaashtha ko lagey jo chot
Aise mein toh mitnee hee hogi khot
Isliye kalyuga ke baad satyuga awashya aata hai
Apne sangg shubhta ka drishya laata hai.

Ye toh hui baahari yug kee baat
Adhyaatma kee yatra toh chalti hai bheetar
Har yug mein, har din, har raat
Tann aur mann se atma kee oar badhne ka hai ye safar.

Rakhna hoga khayaal tann aur mann ka bhi
Aadar karna hoga Guruji ke har vachan ka bhi
Guruji ne bakhsha hai simran
Karna hoga uske dwaara mann ka pavitrikaran
Nitya ke abhyaas se
Nishthapoorna vishwaas se.

Hotey hotey mann hoga shant aur sthir
Atma kee oar aur dhyan lagg paayega phir
Paap dhulne lagega
Dwaar khulne lagega
Jaagriti ka
Sanvari hui aakriti ka.

Prabal hota chalega Shivoham ka ehsaas
Bheetar yoon ho jaayega is ehsaas ka vaas
Ki baahya lagne lagega baaki sab
Kyunki apne bheetar hee mil jaayenge Rabb
Guruji kee divya jyot ke swaroop mein
Aur Unka noor nikhaar laayega rooh ke roop mein.

Kyunki Unka hee ansh hai ye rooh
Jisey Unka noor lega chhoo
Aur jabb roshan hoga bheetar ka sansaar
Tabb vo anand hoga har duniyavi sukh ke paar.

Jeete jee milegi mukti
Safar hoga satyugi
Na bheetar se na baahar se hona padega dukhi
Guruji kee kripa se anandit rahega Gurumukhi.

🌹🌹🌹🌹🌹🌹🌹

Jai Guruji 🙏🙏
Dhirja

Anandit Rahega Gurumukhi (03/25/2026)

March 24, 2026

Om Namaha Shivaya
Aaj Ka Suvichaar 🙏🏻🙏🏻

#2956

Abb Duur Nahin Hai Bhor

Abb Duur Nahin hai bhor
Na jaana kaheen aur
Guruji ke dar par raho sthir
Guruji kee leela dekho phir.

Andhere mein bhi Guruji kar rahe Hain tumhaara kalyaan
Kar rahe Hain tumhaare liye Ve sundar bhor ka intazaam
Tumhe mila hai SadaShiv ka aashray
Tyaag do tum har bhay aur sanshay.

Hai ye asal sadhna ka saar
Ye le chalta hai mukti ke dwaar
Iske liye sthir karna hai mann ka sansaar
Vash mein karna hoga apna vichaar aur vyavhaar.

Bhor toh honi hee hai aaj ya kal
Guruji kee kripa se kasht aaj ya kal jaayenge tal
Ye hotey hotey vyarth na ganvaao koi bhi pal
Prayaas karo ki badhey manobal.

Guruji kee yaad mein leen raho
Guruji deendayal, tum deen raho
Guruji ne thaami hai tumhaare karmon kee doar
Ve uddhaar kar rahe Hain, abb duur nahin hai bhor.

🌹🌹🌹🌹🌹🌹🌹

Jai Guruji 🙏🙏
Dhirja

Abb Duur Nahin Hai Bhor (03/24/2026)

March 23, 2026

Om Namaha Shivaya
Aaj Ka Suvichaar 🙏🏻🙏🏻

#2955

Tum Chal Kar Dekho Toh Sahi

Guruji ke roop mein
Bholenath Hain tumhaare saath
Kalyuga kee karkash dhoop mein
Unhonei thaama hai tumhaara haath.

Tum toh ho musaafir yahaan
Aur Guruji sarv-vyapi Bhagwaan
Tum jaaoge jahaan jahaan
Guruji kee tumpar nazar hogi vahaan.

Isliye satark bhi rehna aur beparwaah bhi
Masti mein rehna par laaparwaah nahin
Laukik khwaahishon ke paar hai Guruji ka asal dham
Vahaan ke liye dene padte hain alag se imtehaan.

Saari baat bhaav kee hai
Sudharte huey swabhaav kee hai
Paripoornata ke ehsaas kee hai
Guruji par poorna vishwaas kee hai.

Guruji mein rakhte chalo aastha
Ve tayy karaayenge raasta
Unn jaisa maargdarshak koi bhi nahin
Arey, tum chal kar dekho toh sahi.

🌹🌹🌹🌹🌹🌹🌹

Jai Guruji 🙏🙏
Dhirja

Tum Chal Kar Dekho Toh Sahi (03/23/2026)

March 22, 2026

Om Namaha Shivaya
Aaj Ka Suvichaar 🙏🏻🙏🏻

#2954

                      Fateh Ka Geet

Laachaari toh padegi mitaani
Agar himmat se jeeni hai zindagaani
Aur jabb Guruji Hain sangg tumhaare
Toh kyun jeena laachaari ke sahaare?

Laachaari banaa degi tumhe apna das
Isliye duur karo laachaari ka ehsaas
Iske liye karo parishram bhara prayaas
Rakhkar Guruji par poorna vishwaas.

Guruji kee yaad mein raho har pal
Yoon badhega Unkee kripa se manobal
Ki mitt jaayega laachaari ka naam-o-nishaan
Nikhar jaayega atma-vishwaas aur swaabhimaan.

Tum Guruji kee sharan mein ho
Laachaari ka yahaan nahin koi kaam
Guruji SadaShiv Hain, Sarveshwar Hain
Srishti mein sabse uttam hai Unka dham.

Jiskee raksha kar rahe hon swayam Bhagwaan
Usey zaroorat nahin kisee aur ke sahaare kee
Beshak aa jaaye bhayankar pralay
Uskee naiya ko manzil milegi kinaare kee.

Isliye Guruji par sabb kuch chod kar
Laachaari kee salaakhon ko toad kar
Judte huey Guru sarkar se
Fateh ka geet gaate chalo pyaar se.

🌹🌹🌹🌹🌹🌹🌹

Jai Guruji 🙏🙏
Dhirja

Fateh Ka Geet (03/22/2026)

March 21, 2026

Om Namaha Shivaya
Aaj Ka Suvichaar 🙏🏻🙏🏻

#2953

       Dhanya Hui Mai, Dhanya Hui

Guruji kee panaah milee
Unkee dikhaayee raah milee
Dhanya hui mai, dhanya hui
Mann mein Unhe paane kee chaah khilee.

Suna thaa Guruji jaisa koi nahin
Maan liya aur jaan liya
Is mein shak kee koi gunjaaish hee nahin rahi
Guruji ne aisa pyaar diya.

Uthte baithte sotey jaagte
Duniya kee tez raftaar mein bhaagte
Guruji ka satsang hai dhaam
Jahaan milta hai meri rooh ko aaraam.

Ekant kee chuppi mein aksar aaye Unkee awaaz
Angg sangg hotey Hain sada Ve, aisa hai Unka andaaz
Aur koi saath na de jahaan
Satguru pyaare hotey Hain vahaan
Prerna aur protsaahan dete huey
Mera dard Apne par lete huey.

Abb toh Unke sangg hee khana peena
Unke sangg hee har pal jeena
Aisa ho chala hai rozaana jeevan ka dhangg
Yoon akarshit karta hai Unka ruhaani rangg.

Unhee ne bakhsha hai jeevan ka har pal
Shukr hai Unkee chhatra-chhaaya mein raha hai guzar
Dhanya hui mai, dhanya hui
Jabb se Guruji kee honei lagi mujhpar nadar.

🌹🌹🌹🌹🌹🌹🌹

Jai Guruji 🙏🙏
Dhirja

Dhanya Hui Mai, Dhanya Hui (03/21/2026)

March 20, 2026

Om Namaha Shivaya
Aaj Ka Suvichaar 🙏🏻🙏🏻

#2952

             Ek Meetha Sa Intazaar

Guruji ko hee dena tum pehli pukaar
Guruji ko hee pukaar aakhiri
Guruji ko hee pukaarna har baar
Unke darbar mein lagaana tum haaziri.

Aksar ek hee pukaar ke pashchaat
Unke dar par bann jaati hai baat
Aksar aati hee nahin pukaar kee naubat
Unhe bin boley mil jaata hai sab.

Guruji hee jaanein sahi kya hai aur kabb
Lekin vyakul mann maang maangne lagta hai abb
Is se behtar yahee ki zidd na karo
Apni koshish kar, Unpar chod kar shukr karo.

Zaroori hai karte rehna Guruji ko yaad
Unkee yaad mein basaa hota hai ashirwaad
Meethi meethi yaad Unkee
Sangg yaad shabad kee dhun kee
Guruji se surt judi rehti hai ruhaani taar se
Ye zyada prabal hai kisee bhi pukaar se.

Aisee hai is naate kee nirmalta
Is naate mein anivaarya hai saralta
Saath mein bhaav mein ho bholi si komalta
Toh santulan banaaye rakhein utsah kee oorja aur sehejta kee sheetalta.

Phir na ho koi bechayyni ya bebasi
Hriday mein ho tripti kee hansee
Pukaar mein maang ke bajaaye ho buss pyaar hee pyaar
Aur Guruji ko paane ke liye ek meetha sa intazaar.

🌹🌹🌹🌹🌹🌹🌹

Jai Guruji 🙏🙏
Dhirja

Ek Meetha Sa Intazaar (03/20/2026)

March 19, 2026

Om Namaha Shivaya
Aaj Ka Suvichaar 🙏🏻🙏🏻

#2951

Maa Aur Mamta Ka Spandan

Jabb jabb aati hai mujhe maa kee yaad
Guruji dete Hain Apna ashirwaad
Jabb yaad aaye maa ka banaaya bhojan swad
Guruji chhaka dete Hain langar prasad
Jabb jee chahta hai maa ke saari ke pallu se ponchhoon aansoo
Toh aksar Guruji ke phool ya chola lete hain kaheen par mujhe chhoo.

Ye nahin hai itefaaq kaheen se
Ye chamatkaar nahin gagan ya zameen se
Ye hai Guruji ka pyaar
Jo barasta hai aparampaar
Ye hai Unkee mamta
Jiskee mahaan hai kshamta
Aur jismein hai aisee samtaa
Ki har bhakt hai ismein ramta.

Guruji kee dariyadilee
Na jaane mujhe kabb se hai milee
Jabb Unkee marzi hui
Tabb dilaaya Unhonei uska ehsaas
Unhee ko gyat mai kis anubhav ke liye hoon tayyaar
Mera toh andaaza bhi lagaana hai bekaar.

Mai toh Unhe mata aur pita maanoon
Unkee rehmat ke aanchal ko maa kee goad jaanoon
Ve hee Hain mere janmadaata
Ve hee Hain sukhdaata
Itna nirmal hai Unke sangg naata
Jismein maa aur mamta ka spandan hai samaata.

🌹🌹🌹🌹🌹🌹🌹

Jai Guruji 🙏🙏
Dhirja

Ma Aur Mamta Ka Spandan (03/19/2026)

March 18, 2026

Om Namaha Shivaya
Aaj Ka Suvichaar 🙏🏻🙏🏻

#2950

        Aapki Goad Mein Rahoongi…

Apne dwaara rachi maya se
Aapne dhakh liya swayam ko
Usee maya ke khel se
Aap chalaate Hain mere jeevan ko.

Ye hai mere param saubhagya
Ki Aap baney mere Aaraadhya
Har uss divya shakti aur prataap ka dhanyawaad
Jinse jud kar mainey aakhirkaar paaya Aapka ashirwaad.

Abb yahaan se mujhe kaheen nahin jaana
Apne charnon mein rehne deejiyega mera ashiyaana
Aapke charnon mein mila hai jo alaukik khazaana
Uss se mujhe kabhi na keejiyega begaana.

Doobti rahoon mai Aapki vadiyaayee kee gehraayee mein
Sudhaar loon apna jeevan Aapki guruyaayee mein
Na samjhoon Aapka ishaara, toh kripa kar Aap samjhaa deejiyega
Na sunn paaoon Aapki ruhaani awaaz, toh daya kar Aap sunvaa deejiyega.

Gaflat kee gathri hoon mai deen
Bann kar rehna chaahti hoon Aap prataapi mahasaagar mein ik meen
Aapke aanchal mein hee ho mera jeena marna
Aapki goad mein rahoongi toh phir kyun aur kaisa darna?

🌹🌹🌹🌹🌹🌹🌹

Jai Guruji 🙏🙏
Dhirja

Aapki Goad Mein Rahoongi… (03/18/2026)

March 17, 2026

Om Namaha Shivaya
Aaj Ka Suvichaar 🙏🏻🙏🏻

#2949

       Zara Sochiye…

Ye Guruji Maharaj ka dar hai
Yahaan sabhi ka vyaktigat sa safar hai
Param poojya Guruji kee sabhi par nazar hai
Aaj ya kal ho jaati sabhi par Unkee nadar hai.

Kataare lagi hain sainkdon kee yahaan
Sachcha bhagat koi virla hai
Maangne aate hain kayi hazaar yahaan
Asal cheez maangta koi virla hai.

Koi yahaan beemari ke bahaane aata hai
Aur nirogi hokar yahaan se jaata hai
Koi khoye ko paane aata hai
Aur paakar chala jaata hai.

Koi aata hai darshan karne
Koi apni jholi bharne
Koi yoon hee hota hai pareshaan
Kisee ne suna hota hai yahaan ka gungaan.

Par ye toh hai nishchit
Ki yahaan hota hai hitt
Aur koi nahin aa sakta yahaan Guruji kee agya bin
Chaahe vo minnatein kar le raat aur din.

Hai toh sabb apne karmon ka heir pher
Aksar andhera leta hai gher
Par beshak lagey yahaan kabhi kabhi der
Kintu andher mein bhi ho jaati hai saver.

Kaaran hota hai Guruji kee oar se vilamb ka
Kabhi kabhi hota hai vo sanket naye aarambh ka
Kabhi Unkee marzi se karmon ka poora bhog karna hota hai zaroori
Ve maalik, hum nimaane, ye hai hamaari majboori.

Phir bhi aksar swayam par hamaare karmon ka bhaar lete huey
Guruji dete Hain taar
Ek baar nahin, balki baar baar
Varna hamaara jeena hota dushvaar.

Guruji Maharaj toh Hain sabse dayalu naath
Saari sangat hee maan leti ye sachchi baat
Guruji Hain parampita karunanidhaan
Par kya hum bann paaye honhaar santaan?

…Zara sochiye…

🌹🌹🌹🌹🌹🌹🌹

Jai Guruji 🙏🙏
Dhirja

Zara Sochiye… (03/17/2026)