Aaj Ka Suvichaar

May 23, 2024

Om Namaha Shivaya
Aaj Ka Suvichaar 🙏🏻🙏🏻

#2286

                      Na Ghabraa

Na ghabraa tu saver aane kee der se
Na ghabraa tu raat ke andher se
Tera sir jhuka hai Guruji ke dar par
Ve ujaala laane mein na chodenge koi bhi kasar.

Ve toh Surya Dev ke swami Hain swayam
Sabke jeevan ko ujjwal karna hai Unka dharam
Tu rakh shraddha, tu rakh sanyam
Tujhe bhool nahin gayi hai Unke prakash kee kiran.

Jabb bhi tujhe lagey ki Unkee tujh par nahin hai nazar
Toh apni saanson par dena dhyan
Ve swayam mein hee hain pramaan
Ki teri raksha kar rahe Hain Ve karunanidhaan.

Aksar paudhe ke poshan ke liye
Chhaaon bhi hoti hai zaroori
Isliye andher ko chhaaon jaan
Usey bhi Guruji kee mamta ka hissa le maan.

Andher mein bhi koshish karte rehne ka
Tu chod na dena prayaas
Guruji ko paayega tu apne paas
Jabb bhi Unke saanidhya kee hogi tujhe pyaas.

Guruji toh Hain Shivji ke swaroop
Unkee leela hai anokhi aur anoop
Isliye chaahe chhaaon ho ya ho dhoop
Unkee meher se sajaa rahega tere jeevan ka roop.

Vishwaas kar tu, aur chalta chal
Tu Guruji ke aanchal mein raha hai pal
Aaj nahin toh kal tere kasht jaayenge tal
Guruji kee raza mein raazi reh kar tera safar ho jaayega safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Ghabraa (05/23/2024)

May 22, 2024

Om Namaha Shivaya
Aaj Ka Suvichaar 🙏🏻🙏🏻

#2285

                  Guruji Kee Nadar

Surakshit hai tere jeevan kee doar
Tu na sochna kabhi jaane ka kaheen aur
Guruji ne liya hai tere jeevan kee doar ko pyaar se pakad
Aur tere jeevan ke har pehlu par baras rahi hai Unkee nadar.

Guruji kee nadar
Ka ho raha hai asar
Beshak tu jaane ya na jaane
Beshak tu maane ya na maane.

Varna tu abb takk toot jaata
Tu saamna na kar paata
Itnee kathinaayiyon ka
Itnee beemaariyon ka.

Arey, mumkin hai ki Guruji ne tujhe diya ho jeevan daan
Aur tujhe is baat ka ho hee na gyan
Tu har haalaat ko Unkee meharbaani hee jaan
Kyunki Ve karva rahe Hain tere praarabdh karmon ka bhugtaan.

Kewal maya aur mal nahin, balki ye karma bhi hain paash tere
Jo na jaane kitne janmon se huey hain tujhe ghere
Abb jo tu aaya hai pooran Guru kee sharan mein
Toh Ve tujhe sambhaale rahenge Apne kamal charan mein.

Guruji Maharaj Hain Pashupati Nath Shivji ke avatar
Teri khushkismati hai ki Unhonei tujhe kiya hai sweekaar
Har pal, har ghadi, har peher, har din ho raha hai tera uddhaar
Guruji kee nadar se zyada kalyaanmayi nahin hai brahmand mein koi bhi uphaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Nadar (05/22/2024)

May 21, 2024

Om Namaha Shivaya
Aaj Ka Suvichaar 🙏🏻🙏🏻

#2284

Zaroor Laut Kar Aati Hai Bahaar

Guruji ko hai maalum
Tere dukh aur dard ka kaaran
Aur uska prayojan bhi hai Unhe gyat
Tu is baat kee tasalli rakh din raat.

Jo sangharsh chal raha tere bheetar
Guruji ko hai uskee poori khabar
Tu fikar na kar
Zaroor hogi tujh par Unkee nadar.

Jo kaante tujhe chubh rahe hain abhi
Jald hee chubhna chod denge ve sabhi
Tabb takk lagaata chal marham Guruji ke naam ka
Taaki anubhav ho tere zakhmon ko thode aaraam ka.

Tera yeh daur beshak bahut kathinaayi wala hai
Kintu ye na bhool ki tera Guru vaddi vadiyaayee wala hai
Ye daur aaya hai toh beet jaayega samay ke saath
Aur Guruji kabhi bhi nahin chodenge tera haath.

Guruji kee daya se zaroor khatm hoga aane wali subah ka intazaar
Teri samasyaaon ke samadhan ka sooraj aayega lekar kiranein kayi hazaar
Ye dwaar hai Shiv avatari Guruji Maharaj ka dwaar
Yahaan tufaan thamm jaane par zaroor laut kar aati hai bahaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Zaroor Laut Kar Aati Hai Bahaar (05/21/2024)

May 20, 2024

Om Namaha Shivaya
Aaj Ka Suvichaar 🙏🏻🙏🏻

#2283

          Dil Mein Karte Rehna Vaas

Dil mein karte rehna vaas, Guruji
Varna ho jaaoongi udaas, Guruji
Atoot rahe Aap par mera vishwaas, Guruji
Aapke naam se sajey mera har shwaas, Guruji.

Aapse hee antas mein hai ujaala
Aapke bin mera na hai koi rakhwaala
Apna pyaar dekar Aapne jabb se hai mujhe paala
Yakeen hai ki uss se pehle bhi Aapne hee thaa mujhe sambhaala.

Jis bhi shakti ke dwaara pahunchi mai Aapke dwaar
Unkee mai rahoongi sada shukrguzaar
Aur jo Aap MahaShiv ne mujhe bula kar kiya hai sweekaar
Mera shukrana kabhi paryaapt na ho chaahe mai karoon shukrana baarambaar.

Kripa keejiye mujh par ki mere liye shukrana shabd na rahe kewal
Apitu mai isey mehsoos karoon har anubhav mein har pal
Kyunki shukrana bin bhakti reh jaayegi adhoori
Jis bhakti ko bhawna aur kshama yachna kar denge poori.

Na aaye mujhe granthon mein likhe pooja ka upchaar
Galatiyan ho jaati hain mujh se baar baar
Kintu Aapki karuna se sahi raaste par agrasar honei kee koshish hai poori
Kripa kar mujhe vaapis kheench leejiyega jo badhne lagey meri Aapse duuri.

Mai toh poori tareh se aashrit hoon Aap par, mere swami
Aapse chhipi nahin hai meri koi bhi khaami
Maaf keejiyega meri har naadaani
Agyan ka andhera duur keejiyega, Dev sarvagyani.

Aapse baatein kar ke lagta hai itna achcha
Jaanti hoon na, ki sunn-ne wala hai poornatayaa sachcha
Kabhi naaraaz na hona mujh se, mere Parameshwar
Mai apni aakhiri saans takk jhuki rahoon Aapke charnon mein, Aapke dar par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dil Mein Karte Rehna Vaa (05/20/2024)

May 19, 2024

Om Namaha Shivaya
Aaj Ka Suvichaar 🙏🏻🙏🏻

#2282

   Shukrana Mein Dooba Hua Fakir

Guruji bulaate Hain Apni sangat ko Apne dwaar
Isee tareh se pahuncha ek fakir Guruji ke darbar
Suna thaa usne Guruji ke baare mein
Suna thaa usne ki bahut shakti hai Unke diye sahaare mein
Parantu is din se pehle mila hee nahin usey kabhi vahaan aane ka mauka
Ya phir yoon kahein ki Guruji ne hee usey vahaan aane se abb takk thaa roka.

Guruji hee jaante Hain kiska sahi waqt hota hai kabb
Aur Ve meher kar bhakt ko kisee na kisee tareeke se bula lete Hain tabb
Fakir jabb pahuncha Unke darbar mein
Toh ramm gaya Unke ruhaani pyaar mein
Veh Unke charnon mein girkar lagaa ronei
Guru kripa se uska kalyaan lagaa thaa honei.

Baandhe huey thi usey jo bhi zanjeer
Har uss zanjeer se thakk chuka thaa fakir
Paaoon mein bediyan thi agyan kee
Jinmein gaanthein thi abhimaan kee.

Apni khaamiyon par daal na paaya thaa abb takk nazar
Guruji ke darbar mein Guruji kee ruhaani maujoodagi ka uspar hua aisa asar
Ki uskee aankhon ke saamne chalchitra kee bhanti dikha usey apna beeta hua jeevan
Aur apne karma, apne rishton, apne vikaaron ko yaad kar kaamp utha uska mann.

Chalti rahi Gurbani vahaan
Uska dhyan bhatka pehle kahaan kahaan
Lekin phir thode samay ke baad
Niklee uske mann se Guruji ko fariyaad
Ki Ve usey bediyon se karein azad
Aur uske hriday mein bass kar karein uske hriday ko aabaad.

Dekhte dekhte Guruji kee tasveer ko
Apne par khoob glaani hui fakir ko
Guruji ne uske pashchataap ke bhaav ko sweekara
Uske jeevan kee naav ko dikhne lagaa abb kinaara.

Guruji ne Apne naam ke amrit se
Seencha fakir ke har vichaar ko
Agyan kee bediyan aur abhimaan kee ganthein lagin khulne
Uske paap aur vikaar lagey dhulne
Tootne lagi usey baandhne wali har zanjeer
Utsah se tejas honei lagaa abb fakir.

Guruji ke naam ke amrit kee aushadheeya shakti se
Aur Guruji kee bakhshi hui bhakti se
Fakir leen hota gaya Guruji ke simran mein
Aur sakaaratmakta chhaane lagi uske mann mein.

Guruji karte rahe fakir par upkaar
Unkee meharbaani se hota gaya uska uddhaar
Unkee rehmat se usey samajh aane lagaa parmaarth ka saar aur vistaar
Shukrana mein doobey fakir ko Guruji ne taara dekar Apna pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukrana Mein Dooba Hua Fakir (05/19/2024)

May 18, 2024

Om Namaha Shivaya
Aaj Ka Suvichaar 🙏🏻🙏🏻

#2281

                Ibadat Kee Aadat

Ibadat kee aadat
Sudhaaregi tere antas kee haalat
Bina kisee nuksaan
Sunn le, o naadaan.

Swayam hee kar ke dekh le
Na dhoondh kaheen aur tu pramaan
Mann se jhuk jaa Guruji ke charan mein
Ibadat kar le Unkee sharan mein.

Ibadat kee shakti ko tu lega pehchaan
Toh tujhe aur bhi aakarshit karenge simran aur dhyan
Guruji ke swaroop ke saamne baith kar ibadat ke dauran
Kar diya kar tu apne dil ka haal bayaan.

Sotey jaagte reh tu Guruji kee ibadat mein
Anand manaa le Unkee inaayat mein
Tere bin jaane bhi Guruji kar rahe Hain tera kalyaan
Isliye tu Unke Prabhutva ko bin sanshay ke le maan.

Shukrana ko banaa le tu ibadat ka hissa
Kyunki ibadat se juda hai tere kalyaan ka kissa
Jabb jabb ibadat mein Guruji se judegi teri seedhi taar
Tujhe mehsoos hoga ki Guruji kar rahe Hain tera uddhaar.

Beshak ibadat dheere dheere rangg laayegi
Kintu teri bhavna jabb ibadat mein behti jaayegi
Toh veh bhavna Guruji se itna kuch keh jaayegi
Ki teri jindri is safar kee har chunauti seh paayegi.

Ibadat se Guruji aur tera rishta gehra hota jaayega
Ibadat se tera antas Guruji mein yoon khota jaayega
Ki duniya ke mele mein jeete huey bhi tu dil-o-jaan se hoga Guruji ke paas
Karta chal tu Unkee ibadat, ibadat ka karishma hai bahut hee khaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ibadat Kee Aadat (05/18/2024)

May 17, 2024

Om Namaha Shivaya
Aaj Ka Suvichaar 🙏🏻🙏🏻

#2280

     Adhyaatmik Oonchaayee Ka Var

Guruji kee meher se mitt jaata hai mann ka paakhand
Guruji kee rehmatein hain be-antt
Guruji ka har ashirwaad hai akhand
Guruji ke kamal charan mein hai sachkhand.

Guruji ke liye namumkin hai kuch
Yeh soch hai bilkul tuchh
Kyunki Ve toh Hain Parameshwar Parabrahmroopi Parwardigaar
Jinke hukm par aashrit hai ye sansaar.

Na hil sakey koi patta
Na hai koi satta
Bin Guruji kee izaazat ke
Bin Guruji kee hukoomat ke.

Unke naam bin astitvaheen hai sabb
Kyunki Guruji swayam Hain Rabb
Aur Rabb se hee hai sabb
Aisa tabb bhi thaa, aur aisa hee hai abb.

Aur aisa hee aagey bhi rahega
Jabb takk srishti kee rachna paalan sanhaar ka jharna bahega
Jo ki hota rahega lagaataar
Kyunki aisa hota aaya hai baarambaar.

Is paraakram mein hee hota rehta hai praaniyon ka uddhaar
Guruji kee kripa se yoniyon ko bhog kar ek din hum bhi pahunchenge uss paar
Guruji dikhaate rehte Hain jo raasta
Vahaan nirantar rehta hai ruhaaniyat se vaasta
Guruji bulaate Hain Apne dar par
Hamein dene adhyaatmik oonchaayee ka var.

Ve toh chaahte Hain yeh var dena
Besharte hum seekh lein isey lena
Jiske liye Guruji se Guruji ko hee maangna hai zaroori
Baaki har zaroorat aur chaahat se anaasakt hokar banaani hogi ruhaani duuri.

Guruji kee imaandaar ibadat kar
Unke ashish se hum jaayein tarr
Unhee ke kamal charnon mein beete jo ye safar
Toh hum anugrahit hotei rahenge paakar Unkee meher-e-nazar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyaatmik Oonchaayee Ka Var (05/17/2024)

May 16, 2024

Om Namaha Shivaya
Aaj Ka Suvichaar 🙏🏻🙏🏻

#2279

                 Unhee Ko Rijhaao

Prerna ka prakash
Dega tumhaare mann ka akash
Guruji ke simran aur chintan dwaara
Isliye lo tum inka atoot sahaara.

Utsah se sajegi tumhaari raah
Jitnee badhegi mann mein Guruji kee chaah
Sunkar aur sunakar Unke satsang
Kyunki unmein hogi ruhaani umang.

Bhole bhaav se bheeg jaayenge tumhaare nayyn
Jabb Guru prapti kee tamanna le legi tumhaara chayyn
Guruji ke sangg waqt bitaao
Unhe apne dil ka haal bataao.

Neevanpann badhega aur paapon ka bojh ghatega
Jabb tumhaara mann aur tann sewa mein lagega
Niswaarthataa se ho jaaoge aur bhi pavitra
Chamakne lagega tumhaara charitra.

Karte rahoge Guruji ka tum jitna shukrana
Tumhaare liye utna saral hoga har din bitaana
Mushkilon ka toh laga rahega aana jaana
Kintu unke kaaran jeevan na banega neeras afsaana.

Guruji se karte rahoge jo tum ardaas
Ki Ve bhakti kee shakti se bhar dein tumhaara har shwaas
Toh is shakti se tumhe milenge atma-vishwaas aur taakat
Is shakti se tumhe milegi nirbhayta aur himmat.

Guruji ko samarpan kar dega tumhaara mann
Toh karmon ke bhaar kee vyatha hogi kumm
Is ehsaas ke saath jeena ho jaayega aasaan
Ki tumhaare angg sangg Hain swayam Bhagwaan.

Ye saari rehmatein hain, jo Guruji kee marzi bin
Kisee ke liye bhi paani nahin hain mumkin
Isliye Unhee ko rijhaao har pal, har din
Dekhna, Unkee baaki kee rehmatein bhi tum nahin paaoge gin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unhee Ko Rijhaao (05/16/2024)

May 15, 2024

Om Namaha Shivaya
Aaj Ka Suvichaar 🙏🏻🙏🏻

#2278

            Param Poojya Guruvar

Param poojya Guruvar peeron ke peer
Sabse nirmal hai Aapke naam ka neer
Nit nit kar ke is neer mein snaan
Hota jaata hai bhakton ka kalyaan.

Param poojya Guruvar Shehenshaah
Aap dikhaate Hain ruhaani unnati kee raah
Aap hee dete Hain uspar chalne kee shakti
Aap hee nikhaarte Hain bhakton kee bhakti.

Param poojya Guruvar meet hamaare
Mit jaata hai akelapann Aapke sahaare
Har pal rehte Hain Aap har sangat ke angg-sangg
Chadhaate Hain hum par Apne saanidhya ka suhaana rangg.

Param poojya Guruvar murshid mahaan
Lete Hain Aap Apne har shagird ka imtehaan
Aap na karein jo Apni rehmat pradaan
Toh naakaamyaab reh jaaye har shishya naadaan.

Param poojya Guruvar maa kee moorat
Har pal Aapke har bachche ko hai Aapki zaroorat
Aapki mamta bin poshit na ho paaye antas aur atma
Aapke komal aanchal kee udaarta se ho jaata hai dukhon ka khatma.

Param poojya Guruvar pita pyaare
Apne bachchon ko paalne ke Aapke tareeke hain nyaare
Niyam, nishtha, narmi ka nipun gyan dene wale nath
Sada rehte Hain Aap Apni har santaan ke saath.

Param poojya Guruvar vaid vidvaan
Dete Hain Aap hum sabhi rogiyon ko aarogyata ka daan
Hamaare shaareerik, bhaavaatmak, maaansik, ruhaani swaasthya kee oar dete Hain Aap dhyan
Srishti kee har aushadhi se zyaada prabhavshali hai Aapka paawan naam.

Param poojya Guruvar Parameshwar
Jis par padd jaaye Aapki meher-e-nazar
Uspar ho jaaye Aapke anugraha ka aisa asar
Ki vo kalyuga mein satyugi atma hokar karey jeevan basar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Param Poojya Guruvar (05/15/2024)

May 14, 2024

Om Namaha Shivaya
Aaj Ka Suvichaar 🙏🏻🙏🏻

#2277

     Dhanya Ho Jaaye Janam Maran

Jinkee jitnee bhi mahima kee jaaye, vo hai kumm
Jinke simran aur dhyan mein Unhee kee kripa se bhakt sakta hai ramm
Jo har laukik aur alaukik aseemta ke bhi paar Hain
Ve Shiv avatari Guruji Maharaj taaranhaar Hain.

Guruji Hain kaaran karta kaayinaat ke
Ve Hain daataar har daat ke
Gavaah har kahi ankahi baat ke
Swayam roop Hain Ve Pashupati nath ke.

Sampoorna srishti mein vyaapt Hain Guruji
Apni hee Shivmayi shakti se
Na dikhaawe se, na chadhaave se
Ve khush hotei Hain kewal bhaav poorna bhakti se.

Ve Hain gyaye aur agyaye
Ve Hain sada ajaye
Na Unkee sharan mein bhayy
Na hee koi sanshay.

Maano toh Ve Hain sabb
Maano toh Ve Hain Rabb
Na maane jo uske liye kuch nahin
Lekin jisne maan liya Unhe sab kuch
Phir jo Ve kahein, vahee hai sada sahi.

Varna koi kaise deh ko chod kar
Laukik kaayade ko toad kar
Aaj bhi de sakta hai bhakton ko darshan?
Aaj bhi sunn sakta hai Unka kiya vandan?

Aaj bhi har sangat kee aankhon ke aansoo
Guruji ponchte Hain Apne ruhaani haath se
Aaj bhi Ve sangat ko anugrahit karte Hain
Apne alaukik saath se.

Sada angg sangg rehne wale Param poojya Guruvar ko naman
Unkee kripa se har tareh ke paash se mukt ho ye tann mann
Unkee bakhshish se chalta rahe jeevan ka har kshan
Unka shukrana karte huey dhanya ho jaaye janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhanya Ho Jaaye Janam Maran (05/14/2024)