Aaj Ka Suvichaar

November 11, 2023

Om Namaha Shivaya
Aaj Ka Suvichaar 🙏🏻🙏🏻

#2092

                 Deep Jalaa Kar

Deep jalaa kar pyaar ka
Bitaaoongi har pal intazaar ka
Aayenge, mere Guruji aayenge
Diwali ka deeya jalaayenge.

Deep jalaa kar aadar satkaar ka
Swaagat karoongi Guru sarkar ka
Aayenge, mere Guruji aayenge
Uss swaagat ko qubool farmaayenge.

Deep jalaa kar sachchaayee ka
Gungaan karoongi Unkee vadiyaayee ka
Aayenge, mere Guruji aayenge
Apni guruyaayee dikhaayenge.

Deep jalaakar stavan ka
Geet gaaoongi Guru vandan ka
Aayenge, mere Guruji aayenge
Stavan se Ve prasann ho jaayenge.

Deep jalaa kar kshama ka
Intazaar karoongi maafi maangne ke samaa ka
Aayenge, mere Guruji aayenge
Kshama daan ka dariya bahaayenge.

Deep jalaakar samarpan ka
Prayaas karoongi chintan ka
Aayenge, mere Guruji aayenge
Mujhe bandagi karna sikhaayenge.

Deep jalaa kar arzi ka
Intazaar karoongi Guruji kee marzi ka
Aayenge, mere Guruji aayenge
Apni marzi mujhe sunaayenge.

Deep jalaakar agyaparataa ka
Naman karoongi kaaran karta ka
Aayenge, mere Guruji aayenge
Mere liye Apna hukm sunaayenge.

Deep jalaa kar dhanyawaad ka
Intazaar karoongi Guru prasad ka
Aayenge, mere Guruji aayenge
Guru prasad Ve barsaayenge.

Deep jalaakar vaade ka
Samarthan karoongi apne nek iraade ka
Aayenge, mere Guruji aayenge
Mujhe taar kar paar lagaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deep Jalaa Kar (11/11/2023)

November 10, 2023

Om Namaha Shivaya
Aaj Ka Suvichaar 🙏🏻🙏🏻

#2091

Guruji Kee Kripa Ka Rangg

Guruji kee hoti hai kripa
Toh hee pahunch paate hain hum Unke darbar
Asambhav bhi jahaan sambhav ho jaata hai
Uske liye jisey Guru apnaata hai.

Har kisee ka anokha hai rishta Guruji ke sangg
Lekin har rishte mein Guruji bharte Hain Apni kripa ka rangg
Is rangg ko gehra honei mein kabhi kabhi lagti hai der
Lekin uss gehraayee ke aane se aati hai ruhaani jeevan mein saver.

Guruji kee kripa ka rangg hai bahut khaas
Guruji kee kripa ke rangg mein basaa hai Guruji ka ehsaas
Guruji kee kripa ka rangg pavitra kar deta hai har bhakt ka shwaas
Guruji kee kripa ka rangg protsaahit karta hai bhakt ka ruhaani prayaas.

Guruji kee kripa ke rangg se
Neerasta ka hota hai antt
Naam ke ras mein ramm jaati hai sangat
Aur praapt hota hai anand anant.

Is rangg mein hoti hai Guruji kee khushboo
Jis se gadd gadd hokar tarr jaati hai rooh
Tabhi bhi anokha hai yeh rangg
Iske saath judi hai umang kee tarang.

Guruji kee kripa ka rangg
Yoon rehne lagta hai atma ke sangg
Ki veh atma par jaata hai chadh
Aur atma aagey jaati hai badh.

Atma chadhne lagti hai adhyatmik oonchaayee par
Guruji saath hee nazar rakhte Hain bhakt kee bhakti kee gehraayee par
Har seedhi par hota hai bhakt ka imtehaan
Guruji parakhte Hain uska iraada, dhyan, aur gyan.

Aagey badhte badhte
Oonchaayee par chadhte chadhte
Guruji kee kripa ka rangg
Rangg deta hai atma ka angg angg
Atma hoti jaati hai Guruji kee guruyaayee mein malang
Aur chal deti hai Unn Paramatama ke sangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Kripa Ka Rangg (11/10/2023)

November 9, 2023

Om Namaha Shivaya
Aaj Ka Suvichaar 🙏🏻🙏🏻

#2090

Guruji Kar Rahe Hain Intazaar

Guruji kar rahe Hain intazaar
Ki tum kar lo Unse behad pyaar
Aur tum chaahte ho poora sansaar
Toh kaise hoga Guruji ka deedar?

Jo tumhe sachcha sukh dene ke liye Hain tayyaar
Na karaao Unhe itna intazaar
Unke sangg bitaao samaa
Duniyadaari ko na maano panaah.

Vish ko amrit na samjho
Moodhta mein na ulajho
Farz nibhaao duniyadaari kee oar
Lekin kewal Guruji sangg seedhi taar ko joad.

Kewal duniyadaari mein leen reh kar reh jaaoge adhoore
Kewal Guruji mein leen rehkar ho jaaoge ruhaaniyat se poore
Kund mil raha hai amrit ka, mal ke kund ko tyaag do
Guruji kee mehar se apni adhyaatmik unnati mein bhaag lo.

Guruji hee Hain param sachchaayee
Bahut vaddi hai Unkee vadiyaayee
Goonj rahi hai Guruji kee vaani
Usey suno aur sudhaaro apni zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kar Rahe Hain Intazaar (11/09/2023)

November 8, 2023

Om Namaha Shivaya
Aaj Ka Suvichaar 🙏🏻🙏🏻

#2089

 Nahin Hai Koi Antar

Param poojya Guruvar,

Nahin hai koi antar
Aap mein aur Nirankaar mein
Aapka hukm chale nirantar
Bheetar aur sansaar mein.

Sunn paayein ya nahin
Vo nirbhar hai hum par
Maanein ya na maanein
Vo bhi hum par hai nirbhar.

Aapne bulaaya hai Apne dar par
Hamein bhatakne kee zaroorat hee nahin dar dar
Har pal rehti hai hum par Aapki nazar
Toh kyun na ho jaayein hum har sanshay se bekhabar.

Bhayy ka kaaran bann jaata hai sanshay
Jo kathin karta hai nibhaana kartavya
Tabhi toh apraapya lagne lagta hai gantavya
Chhota sa tufaan bhi lagne lagta hai jaise koi pralay.

Hamein vishwaas ka aisa deejiye daan
Ki mit jaaye hamaare antas se sanshay ka naam-o-nishaan
Aisee chetna keejiye pradaan
Ki duur ho jaaye hamaara agyan.

Dhanya hain hum ki
Milee hai goad Aapki guruyaayee kee
Subuddhi bakhshiye
Taaki hamaare labon par ho vaani Aapki vadiyaayee kee
Har din jeevan kee kahaani mein judte rahein kisse
Aapke dwaara kiye kalyaan ke
Kripa kar ke hamein mauke bakhshte rahiye
Taaki hum geet gaa paayein Aapki mahima ke gungaan ke.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nahin Hai Koi Antar (11/08/2023)

November 7, 2023

Om Namaha Shivaya
Aaj Ka Suvichaar 🙏🏻🙏🏻

#2088

    Ek Anokha Praani

Ek anokha praani thaa
Veh bahut hee gyani thaa
Anginat aankhon wala
Guruji ke pyaar mein matvaala
Sabhi aankhon se Guruji ko dekhta rehta thaa
Phir naynon se kehta thaa
Ki abhi bhi bhara nahin ye dil
Jabki sabhi naynon ka sehyog gaya hai mil.

Naynon kee bhi badhti rehti thi pyaas
Har nayn se ashru ponchta thaa praani das
Itnee saari aankhein, lekin Guruji kee mahaanta dekh paane mein huin asamarth
Kintu koshish karti rahi har aankh, ki pehchaan paaye Guruji ke ishaaron ka arth.

Praani ke mukh bhi thei anek
Rasna se sampann thaa mukh pratyek
Har rasna japti rehti thi Guruji ka naam
Har ghadi, har subah aur shaam
Phir bhi tript na hota thaa praani
Toh uskee har rasna gaati thi geet ruhaani
Guruji ke pyaar mein
Uss pyaar ke ikraar mein.

Ek bhola sa dil thaa praani ka
Veh saathi thaa uskee jindri deewani ka
Dil mein Guruji ke liye har pal prem bhaav behta thaa
Guruji ke chintan mein veh nirantar ekaagra rehta thaa
Uskee har dhadkan yoon chalti thi Guruji ke naam se
Maano uska puraana rishta ho Guruji ke dhaam se.

Guruji kee thi mehar bhari nazar
Guruji ne kee praani par nadar
Uss dil mein Guruji ne daal liya dera
Usey keh diya ki ‘tu hai mera.’

Praani ke ik kaan ko aayi Guruji kee awaaz
Usmein thaa praani kee khushi ka raaz
Koi seema na rahi uskee prasannata kee
Ye bakhshish thi saugat sampannata kee.

Sabhi aankhein aur sabhi mukh
Praani kee khushi se huey mugdh
Ve asankhya honei ke bavajood na thei kar paaye jo
Ek bhole se dil ke prem bhaav se ho paaya vo
Guruji ke daya daan se
Unkee mehar ke parinaam se.

Guruji ka ho liya jabb se veh adbhut praani
Uskee toh sanvar gayi zindagaani
Uskee rooh hui Guruji kee deewani
Taarti rahi usey Guruji kee meharbaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ek Anokha Praani (11/07/2023)

November 6, 2023

Om Namaha Shivaya
Aaj Ka Suvichaar 🙏🏻🙏🏻

#2087

Aap Sampoorna Samundar

Sakaaratmakta ke saagar, mere Guruvar
Banaa leejiye mujhe neer kee leher
Yoon samaa jaaoon Aapke vistaar mein
Ki mera astitva hee na rahe sansaar mein.

Na koi dukh mujhe haraaye
Na koi sankat mujhe daraaye
Mujh nacheez kee boond boond
Aapki gehraayee mein samaa jaaye.

Na rahoongi mai boond, na leher rahoongi
Aapke aanchal mein Aapki suraksha mein sab sahoongi
Jo bhi chinta hogi, uske baare mein Aapse hee kahoongi
Jo disha Aap dikhaayenge, usee oar Aapki hokar mai bahoongi.

Aapka ansh mai ho jaaoongi
Aapke amrit se poshit ho paaoongi
Nitya nirvighn nirantar
Mai leher, Aap sampoorna samundar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Sampoorna Samundar (11/06/2023)

November 5, 2023

Om Namaha Shivaya
Aaj Ka Suvichaar 🙏🏻🙏🏻

#2086

                    Bhakti Ka Bhaav

Param poojya Guruvar,

Aisa badh jaaye mere bheetar
Aapke prati bhakti ka bhaav
Ki meri poori zindagi ke liye
Veh bann jaaye mera swabhaav.

Aise badhta jaaye mujh mein bhakti ka chaav
Ki mujhe vikarshit na kar paaye mere dil ka koi bhi ghaav
Aap mein yoon jaaoon mai ramm
Ki na sataaye mujhe koi gumm.

Bhakti bhaav kee badhauti se hee
Mera bhavishya hoga sunehra
Isliye, mere Guruvar pyaare
Banaaye rakhiyega Aap Apna pehra.

Na daudoon baahar kee oar
Tabhi toh paaoongi aantrik bhor
Amrit ka strot hai bheetar
Mujhe yakeen hai, mere Guruvar
Isliye Aapki prerna se daudoon sahi disha mein
Taaki sudhaar hota rahe meri ruhaani dasha mein.

Dridh bhakti bhaav se mit-tee jaaye mere mann kee bhranti
Taaki mann mein badhe sthirta, spashtataa, aur shanti
Beshak iske liye vichaaron mein ho jaaye kranti
Mujhe vishwaas hai ki mere bheetar gyan deep jalaayegi Aapki kanti.

Ye is nimaani kee arzi hai
Aagey jaisi Aapki marzi hai
Kahoon Aapke dar par jhukaate huey sir
Ki Aapka hukm sada mere sir aankhon par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakti Ka Bhaav (11/05/2023)

November 4, 2023

Om Namaha Shivaya
Aaj Ka Suvichaar 🙏🏻🙏🏻

#2085

Saral, Sukhad, Aap Sarvshaktimaan

Saral, sukhad, Aap sarvshaktimaan
Kaaran karta, karein kalyaan
Dukh bhanjan, amrit kee khan
Bhole Hain Aap Bholenath Bhagwaan.

Aap Hain murshid meharbaan
Lete Hain bhakton ka imtehaan
Dete Hain himmat uss dauran
Taaki bhakt seh paaye har tufaan.

Aap Hain Vaidyanath vidvaan
Bachaate Hain anginat bhakton kee jaan
Kitnon ko dete Hain deerghaayu ka vardaan
Sainkdon ko karte Hain aarogyata pradaan.

Aap Hain mata aur pita mahaan
Saari sangat Hai Aapki santaan
Koi santaan naadaan, koi anjaan
Kintu sabhi Aapka aanchal paakar bhaagyawaan.

Aap Hain pooran Guruvar karunanidhaan
Dein Apne anokhe dhangg se goodh gyan
Poori karaate Hain andhere se roshni kee ruhaani dastaan
Shishya ko dete Hain shuddhi aur buddhi ka daan.

Aap Hain Mahapurush, prataapi, pradhaan
Aap barkaraar rakhte Hain bhakton ka swaabhimaan
Aap nasht karte Hain baaki vikaaron sangg abhimaan
Param poojya Guruji, jaisa Aap chaahein, banaa deejiye mujhe vaisa insaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saral, Sukhad, Aap Sarvshaktimaan (11/04/2023)

November 3, 2023

Om Namaha Shivaya
Aaj Ka Suvichaar 🙏🏻🙏🏻

#2084

    Beshak Guruji Na Aayein Nazar

Tumhe beshak Guruji na aayein nazar
Jabb kaheen na dikhe sukoon kee sehar
Unkee maujoodagi kee shaayad tumhe na ho khabar
Toh bhi baras rahi hoti hai Unkee mehar.

Uss samay bhi tum par hoti hai Guruji kee nazar
Uss samay bhi Unkee kripa ka hi raha hota hai asar
Tumhe maalum nahin hota magar
Aur tumhe lagta ki nahin hui Unkee nadar.

Jeevan ke safar se ho ya na ho waakif
Safar mein utaar chadhaav aane hai swaabhaavik
Guruji ka prataap hai paawan aur daivik
Ve hee Hain tumhaare jeevan kee naiya ke naavik.

Har kisee ko pichhle karmon ka hisaab hai chukaana
Phir chaahe vo ho koi raja ya koi fakir deewaana
Namumkin hai Guruji kee adalat mein peshi ka samaa na aana
Kintu rakho tasalli ki Guruji kee sharan mein mila hai tumhe thikaana.

Tum sukh mein na itraana
Aur dukh mein na ghabraana
Har haalaat mein milega Unkee kripa ka khazaana
Karte chalo tum buss Guruji ka shukrana.

Shukrana mein hai tasalli
Shukrana mein hai ashirwaad aparampaar
Shukrana mein hai santushti
Shukrana se prasann hotey Hain Guru sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Beshak Guruji Na Aayein Nazar (11/03/2023)

November 2, 2023

Om Namaha Shivaya
Aaj Ka Suvichaar 🙏🏻🙏🏻

#2083

 Jinkee Preet Mein Chalakti Hai Mamta

Jinkee preet mein chalakti hai mamta
Jinkee mamta mein har bhakt hai ramta
Jinka simran aur dhyan pradaan karey mann ko samta
Jinke paas lekha dobara likhne kee hai kshamta
Ve Hain param poojya Guruji pyaare
Jinhonei sada Apne bhakton ke kaaj Hain sanvaare.

Jinke aagey sabhi devi devta karein naman
Jinke hukm par apna sees jhukaaye gagan
Jinkee sharan mein tarr jaata hai jeevan
Jinkee marzi se badal sakta hai janam maran
Ve Hain Guruji mahaan meharbaan
Jo Hain komal karuna kee khan.

Jinkee ibadat hai kalyaankaari
Jinkee inaayat hai mangalkaari
Jinkee hifazat se khiltee hai kismat kee kyaari
Jinkee hidaayat sada hoti hai hitkaari
Ve Hain Guruvar Brahmand ke Shehenshaah
Jo ujjwal karein har bhakt kee raah.

Jinkee har leela hai lajavaab
Jinkee bakhshish hai behisaab
Jinke samaksh saari sangat hai benakaab
Jinka poori srishti mein hai sabse ooncha khitaab
Ve Hain Shiv avatari Guruji Sarkar
Jo karte Hain bhakton ka beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jinkee Preet Mein Chalakti Hai Mamta (11/02/2023)