Aaj Ka Suvichaar

March 24, 2024

Om Namaha Shivaya
Aaj Ka Suvichaar 🙏🏻🙏🏻

#2226

                   Rangon Ka Parv

Rangon ka parv bann kar Aaya hai Holi ka tyohaar
Baith Guruji ke saath karoon Unse mai apne pyaar ka izhaar
Unhonei bakhsha hai ruhaaniyat ka rangeen uphaar
Unkee mehar se Unkee bhakti ka rangg chadhta jaaye mujh par baarambaar.

Param poojya Guruvar,

Chadha deejiye mujh par aisa rangg Apne simran ka
Ki aur kuch simaraya hee na jaaye
Chadha deejiye mujh par satsang ka rangg aisa
Ki kaheen aur jaana hee nahin bhaaye.

Jaisa bhi ho mausam
Jaisa bhi chale jeevan
Chadha deejiye mujh par Apni sewa ka aisa rangg
Ki mai aathon pehar rahoon is rangg mein malang.

Jaise jaise Aap hataayenge mal mere mann ke darpan ka
Na bhooliyega chadhaana mere mann par rangg samarpan ka
Aapke prati shukrana ka rangg chadhaate rahiyega mujh par nirantar
Taaki mai gavaaoon na Aapka shukrana karne ka koi bhi avsar.

Rangg sumat ka mujh par chadhaate rahiyega
Mere kuch bhi galat sochne ya karne se pehle hee mujhe chetaavni dete rahiyega
Chadhaaiyega Apne prati prem ka itna gehra rangg
Ki koi bhi paristhiti na kar paaye is rangg kee shubhta ko bhangg.

Jaise jaise Aapki meharbaani se
Ye rangg chadhenge mujh par baarambaar
Vaise vaise ye hotey jaayenge pakke
Aur rangg jaayegi inmein veh seedhi taar
Jo Aapki kripa se meri rooh ko Aapse hai jodti
Arzi hai ki ye mera har vikaar bhi rahe todti
In rangon kee pavitra holi chale har pal mere bheetar
Taaki har pal bann jaaye Aapke aur bhi kareeb honei ka shubh avsar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rangon Ka Parv (03/24/2024)

March 23, 2024

Om Namaha Shivaya
Aaj Ka Suvichaar 🙏🏻🙏🏻

#2225

Leher Kee Har Boond Mein

Teri divya jyotirmay atma
Uskee intazaar mein Hain Paramatama
Jaldbaazi beshak na kar
Kashton se bilkul na darr.

Guruji tere kasht rahe Hain har
Guru kripa ke dwaara tarr
Paramatama se milne kee tayyaari kar
Sunn Guruji aur Paramatama kee ekta ka swar.

Isee swar mein Bindu aur Naad hai
Isee swar mein Guruji ka ashirwaad hai
Yahee swar hai Shivmayi layy ka
Isee se vinaash hoga tere har bhayy ka.

Jitna hota chalega tujh dwaara simran
Jitna karega tu Guruji ka chintan
Ekta ke is swar kee leher se tere antas ka saagar hoga aabaad
Is leher ke umadne se milne waala sukoon hoga Guruji ka ashirwaad.

Kyunki ye leher hogi adbhut
Ye leher hogi shant, sthir, aur nirmal
Isey milti rahegi Guruji kee mamta komal
Isliye shant hotey huey bhi ismein hoga aseem bal.

Ekta ke swar kee is leher ka bal hoga ruhaani
Is leher kee dheer gati hogi ati suhaani
Is leher mein sada goonjti rahegi Gurbani
Is leher kee har boond mein samaayega Guru prem ka amrit roopi paani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Leher Kee Har Boond Mein (03/23/2024)

#2224

March 22, 2024

Om Namaha Shivaya
Aaj Ka Suvichaar 🙏🏻🙏🏻

Kuch Paana Baaki Na Reh Jaayega

Kuch paana baaki na reh jaayega
Jinko paane ke baad
Ve Hain Parameshwar Parwardigaar Guruji Maharaj
Jo de rahe Hain nirantar Apna ruhaani aashirwaad.

Guruji ke roop mein tere bheetar aur aas paas hai Khuda
Na soch kabhi bhi ki tu hai Unse juda जुदा
Ye jaante huey bhi tu is satya ko bhool jaata hai aksar
Kyunki is ehsaas ko poshit honei ka tu deta nahin hai paryaapt avsar.

Kabhi kumm na honei de satya ke is sundar ehsaas ko
Varna sambhaal na paayega tera mann hoga udaas jo
Is ehsaas ka kar nirantar prayaas
Bann kar Guruji ke charnon ka das.

Is ehsaas ke sangg karega tu jabb bhi Guruji se koi bhi ardaas
Toh Guruji kee maujoodagi ko atmasaat karega tera har shwaas
Sudharti jaayegi tere avachetan mann kee har aadat
Behtar ho jaayegi tere bheetar kee haalat.

Guruji kee mehar se ye ehsaas tujhe deta rahega utsaah
Jiske dwaara prerit hogi teri ruhaani raah
Prayaas se mit jaayegi Guruji ko paane ke alaawa teri baaki har chaah
Guruji ko paakar tu phir kabhi bhi na ho sakega gumraah.

Na reh jaayega aur kuch bhi paana
Poornata se prafullit hoga teri saanson ka afsaana
Jinhonei tujhe Apni praapti kee oar hai pahunchaana
Har pal karta chal tu Unn Guruji Maharaj ka shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kuch Paana Baaki Na Reh Jaayega (03/22/2024)

March 21, 2024

Om Namaha Shivaya
Aaj Ka Suvichaar 🙏🏻🙏🏻

#2223

                Atyant Ameer Fakeer

Jo nahin hai tere haath kee lakeer mein
Guruji vo khushkismati bhi daal sakte Hain teri taqdeer mein
Kuch toh baat hai tujh fakeer mein
Jo Guruji ne izaazat dee tujhe Apne dil kee tasveer mein.

Apni kismat par fakr kar, abhimaan nahin
Is raaste par sabr kar, ho pareshaan nahin
Guruji jo jaante Hain, tujhe anumaan nahin
Unkee leela ka kisee insaan ko gyan nahin.

Jitnee sakaaratmakta tu rakhega soch aur karma mein
Shuddhi utnee badhti jaayegi tere antakaran mein
Jeevan ulfat mein jee, gaflat mein nahin
Jeevan pyaar se jee, nafrat se nahin.

Maanav janam ke moolya ko na kar nazar andaaz
Guruji ke simran aur chintan mein lagaa de har shwaas
Tere kashton mein bhi chhipa hai tere kalyaan ka raaz
Guruji se seedhi taar jod kar sunn paayega tu Unkee awaaz.

Unkee awaaz mein hai tere liye maargdarshan
Isliye na ho tu aur adheer
Arey, Guruji kee sharan tujhe milee hai
Tu toh fakeer hotey huey bhi hai atyant ameer.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Atyant Ameer Fakeer (03/21/2024)

March 20, 2024

Om Namaha Shivaya
Aaj Ka Suvichaar 🙏🏻🙏🏻

#2222

     Tujhe Nawaz Kar

Khuda ko aasmaan mein dhoondhne wale
Jhaank le tu apne girebaan mein
Jitna khojega tu apne bheetar
Samaane lagega tu Bhagwaan mein.

Ishwar ka roop Hain swayam Guruvar
Ve teri madad rahe Hain kar
Bulaa kar tujhe Apne dar par
Sunvaa kar Gurbani ka divya swar
Dekar satsang sunn-ne sunaane ka avsar
Dekar tujhe niswaarth sewa ka var.

Jitne adhik kshan
Bina kisee vikarshan
Guruji ke sangg tu bitaayega
Utna Unke kareeb aa paayega
Aur aise hee aate aate Unke kareeb
Sanvarta jaayega tera naseeb.

Aakhir mein zara si bhi duuri na reh jaayegi
Teri chetna Unke sangg yoon roo-ba-roo ho jaayegi
Ki Unke tej kee har kiran
Chhoo kar tera antakaran
Kar degi tera aisa divya shringar
Ki tu bhool hee jaayega ye sansaar.

Na rahega tera liye ye sansaar
Na hee rahega tujh mein tu
Guruji Apne nirmal noor se tujhe nawaz kar Nikhaar denge teri rooh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tujhe Nawaz Kar (03/20/2024)

March 19, 2024

Om Namaha Shivaya
Aaj Ka Suvichaar 🙏🏻🙏🏻

#2221

            Arey O Bhikshuk Bhole

Arey o bhikshuk bhole
Chalte huey hauley hauley
Tumhe anumati milee aane kee Guruji ke dwaar mein
Na rehna bhautik chamatkaar ke intazaar mein
Guruji Maharaj Hain chamatkaar ke bhi paar
Kyunki Ve toh swayam Hain Parwardigaar.

Ve karte Hain bhakton ka beda paar
Karte huey bhakton ka aisa adhyaatmik uddhaar
Jiske samaksh pheeka padd jaata hai har bhautik chamatkaar
Buss, jodni hai Unse seedhi ruhaani taar.

Isliye kewal ichchaaon kee maangon se
Na honei do apna safar bekaar
Balki Unhe saump kar tum apna sampoorna sudhaar
Unke hukm mein lo zindagi guzaar.

Dhyan rahe ki tumhaari maangon kee imaarat
Tumhe hee dabaa na de is kadar
Ki tum kar na paao imaan se ibadat
Aur adhoora reh jaaye tumhaara ye safar.

Maangon ka kya hai
Ve toh hongi na khatm
Uss se bhi kaheen zyada paaoge
Jo maanoge tum Guruji ka hukm.

Guruji pahunchaayenge tumhe jis mukaam par
Vahaan pahunch kar tumhaari rooh par hoga anokha asar
Shabdon ke oonche aasmaan ke bhi paar
Guruji tumhe dikhaayenge Sachkhand ka sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Arey O Bhikshuk Bhole (03/19/2024)

March 18, 2024

Om Namaha Shivaya
Aaj Ka Suvichaar 🙏🏻🙏🏻

#2220

Kalyaan Ke Shikhar Par

Guruji ke naam ka amrit peete peete
Dhul jaayega vish tere har vikaar ka
Guruji ke hukm mein jeete jeete
Shodhan ho jaayega tere har vichaar ka.

Guruji ka simran hotey hotey
Ho jaayega tere mann ka pavitrikaran
Guruji mein apne aap ko khotey khotey
Paa lega tu Guruji mein Bhagwan.

Guruji ke pyaar mein doobte doobte
Tere jeevan kee naav paa legi kinaara
Guruji ke bharose apni har chinta chodte chodte
Tere chintan ke bhaav ko mil jaayega Unka sahaara.

Guruji ke satsang sunte sunaate
Hota jaayega tera kalyaan
Guruji kee mahima gaate gaate
Hota jaayega teri samasyaaon ka samaadhaan.

Guruji ke sangg rishta ghanishth hotey hotey
Kamzor hoti jaayegi sansaar ke prati teri aasakti
Guruji ke samaksh apna har gunah maante maante
Tujhe aur paap karne se roak legi Unkee dee hui ruhaani shakti.

Guru kripa se tu banda bann jaayega
Tere antas ka paatr chamak jaayega
Teri rooh kee shakti jaayegi nikhar
Guru charnon mein jhuka rahega tera sir
Jitna neevan tu hota jaayega, utne khush hongei Guruji tujh par
Unkee mehar se tu pahunchega kalyaan ke shikhar par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyaan Ke Shikhar Par (03/18/2024)

March 17, 2024

Om Namaha Shivaya
Aaj Ka Suvichaar 🙏🏻🙏🏻

#2219

             Mere Antas Ka Gulzar

Mere antas ka gulzar
Karta rehta thaa intazaar
Gulzar ka har phool
Rehta thaa bekaraar
Ki baghban ke bin
Kaheen ujad na jaaye kisee din.

Kintu kismat kee kali khilee
Mujhe Guruji kee sharan milee
Unhonei itna pyaar barsaaya
Ki antas ka gulzar muskuraaya.

Seencha Apne amrit se
Guruji ne gulzar ka har kona aur hissa
Guruji ke paalan poshan dwaara
Sanvar gaya kismat ka kissa.

Pratikool paudhe vichaaron ke
Guruji lagey hataane
Gyan ke sooraj kee kiran
Guruji lagey dikhaane.

Har phool jhoomne lagaa
Ruhaaniyat kee hawaa ke sangg
Har phool par chadhne lagaa
Guru naam kee davaa ka rangg.

Mai naadaan
Mere baghban mahaan
Diya hai Unhonei mujhe aseem daya ka aisa daan
Ki mai kabhi nahin kar sakti bayaan.

Guruji ke charnon mein hai vandan
Ki gulzar ke maalinya ka karte rahein khandan
Guruji ne sunn lee antas kee pukaar
Baghban bannkar dete Hain divya dulaar.

Mai sada rahoon Guruji kee shukraguzaar
Unkee kripa se honei lagaa hai mera uddhaar
Veeraane mein aayi hai bahaar
Mukammal hua hai mera intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mere Antas Ka Gulzar (03/17/2024)

March 16, 2024

Om Namaha Shivaya
Aaj Ka Suvichaar 🙏🏻🙏🏻

#2218

Guruji Kee Sampoornata Mein

Jud jaayein uss jyot se
Jo jalti hai bheetar swayam ke
Sunn lein goonjti awaaz
Bheetar kee divya dhvani kee.

Dekh lein jyot mein Guruji ka swaroop
Saumya, tejomayi, anoop
Antas mein basey hain jo
Unn darshan mein jaayein kho.

Guruji ke prem rass mein
Doob kar tarr jaayein
Guruji kee bandagi kar
Sudhar kar sanvar jaayein.

Mann ke aangan mein
Sayyr karein Guruji ke sangg
Kritagyata se jhuk jaayein
Vichaarte huey Unkee leela ke rangg.

Guruji ko yaad karte huey
Bhulaa dein apne saare gumm
Guruji ka chintan badhaate badhaate
Har chinta kar lein kumm.

Guruji kee saadagi ka anusaran kar
Jeeyein seedha saada jeevan
Guruji kee agya ka shravan aur manan kar
Ruhaani raees baney humm.

Guruji kee guruyaayee ka anusaran karte huey
Aadarsh swaroop ho jaaye hamaari bhakti
Nek neeyat rakhte huey koshish karein poori
Guruji koshish ko anugrahit karenge dekar hamein shakti.

Guruji ke alaawa koi aur uddeshya na ho
Ho jaayein yoon hum ekaagrachitt
Hamaara kalyaan isee mein hai
Ki Guruji kee sampoornata mein apni hasti hee jaaye mitt.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Sampoornata Mein (03/16/2024)

March 15, 2024

Om Namaha Shivaya
Aaj Ka Suvichaar 🙏🏻🙏🏻

#2217

      Guruji Mein Basey Bhagwaan

Seedha saada sa jeevan jeete jeete
Guruji ke naam ka amrit peete peete
Boond boond bator kar ekatrit kiya khazaana
Guruji ke prem mein hota gaya deewana
Veh musaafir, jo Guruji mein magan rehta thaa
Jo bhi usey milta thaa, usey veh kehta thaa….

‘Mere Guruji Hain sarv vardaata
Aur jis jiska jud jaaye Unse naata
Uska honei lagta hai uddhaar
Uska awashya hota hai beda paar.

Guruji mere Hain Shivji ke avatar
Pooran Guru Hain mere sarkar
Jagg ke swami Hain
Antaryami Hain.

Guruji jaanein ki tu bheed mein bhi hai akela
Agar tu chaahta hai ki tera har vela ho suhela
Toh Guruji kee preet ko basaa le tu dil mein
Phir kabhi na hoga akela beshak ho bhari mehfil mein.

Kyunki Guruji kee preet samaayi hogi jabb tere bheetar
Toh Unke sangg teri taar judi hogi is kadar nirantar
Ki tujhe fursat na hogi kisee aur ke liye kaheen ya kabhi
Tujhe fark nahin padega jo sochein ya karein sabhi.

Buss, maun ko dhaaran kar le swayam mein
Vyast reh Guruji ke chintan mein
Jitna khoyega Guruji ke saumya spandan mein
Utna sukoon paayega tu Unke vandan mein.

Mere Guruji jaisa koi nahin
Kehta hoon mai baat sahi
Jee kar toh dekh Unke naam ke sahaare
Tera mann, vivek, jeevan sajj jaayega, aye pyaare.’

Karte huey Guruji kee mahima ka gungaan
Beeti musaafir ke jeevan kee dastaan
Dikhne mein thaa nirdhan parantu asal mein hua bahut dhanwaan
Guruji ko itna prem kiya usne ki paaye usne Guruji mein basey Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Mein Basey Bhagwaan (03/15/2024)