Aaj Ka Suvichaar

March 14, 2024

Om Namaha Shivaya
Aaj Ka Suvichaar 🙏🏻🙏🏻

#2216

   Aapki Nazar Ne…..

Param poojya Guruvar,

Aapki nazar ne yoon diya nikhaar
Ki Aapke dar par pahunchi baar baar
Shukrana Aapka ki Aapne dee iskee manzoori
Bakhshiye mujhe ki duur ho jaaye Aapse har duuri.

Aapki mehar se mann hota jaaye malang
Aapki ruhaaniyat ka chadhta jaaye meri rooh par rangg
Ye ehsaas ki Aap sada Hain angg sangg
Kabhi na dheemi ho is ehsaas kee tarang.

Kabhi na bhooloon Aapke kiye ehsaan
Kabhi na bhooloon kaise bachaayi Aapne meri jaan
Ek baar nahin, balki anekon baar
Aur kaise dete rehte Hain Aap kalyaan ka uphaar.

Raasta dikhaate rahiyega, uspar chalaayiyega bhi Aap
Akele mai raaste par bhatak na jaaoon, na kar baithoon aur koi paap
Vaise hee anjaane mein na jaane hoti hongi kitnee galatiyan
Aur Aap, deen dayal karunanidhaan kar dete Hain kshamaa.

Aapke naam ke mahasaagar kee boondon par hoon mai jeevit
Param poojya daata, Aapka protsaahan karta hai mujhe har pal prerit
Lamhe khushi ke hon ya hon gumm ke
Lamhe spashtataa ke hon ya bhram ke
Aap hee Hain mere ekmaatra sahaara
Aapke is sahaare bin mera nahin hai guzaara
Sada rakhiyega mujhe Apne aanchal kee chhaaon mein
Thodi si jageh dete rahiyega mujhe Apne paawan paaon mein
Mere liye toh Aapke charnon mein jannat aur mukti, dono ke jahaan hain
Sabhi se kehti rehti hoon ki mere Guruji kitne mahaan aur meharbaan Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Nazar Ne….. (03/14/2024)

March 13, 2024

Om Namaha Shivaya
Aaj Ka Suvichaar 🙏🏻🙏🏻

#2215

Goad Mein Prakriti Kee

Baitha thaa fakir goad mein prakriti kee
Chinta ho rahi thi usey apni atma kee aakriti kee
Mann ko na mil raha thaa chayyn ya aaraam
Shraddha bhaav se japne lagaa veh qGuruji ka naam.

Guruji kee kripa se veh kar paaya Unkee dhyan bhari pooja
Prakriti ke prakampan mein badhti gayi oorja
Guruji ke siwa fakir ko dhyan mein soojha na koi bhi dooja
Dhyan mein baithe baithe uske bheetar shabd goonja.

Bheetar mehsoos honei lagaa fakir ko anand nirmal
Guruji ke spandan se sajne lagaa uska manobal
Mann honei lagaa sthir aur shant
Usey raas aane lagaa ekant.

Akash ne geruey rangg kee chaadar odhi
Subah ne shaam par saari zimmedaari chodi
Fakir ne liv Guruji sangg yoon jodi
Ki Guruji ne uskee oar Apni nazar modi.

Antas mein hua usey Guruji ka deedar
Umad raha thaa uske bheetar Guruji ke liye pyaar
Guruji ne uska bhaagya diya nikhaar
Usko taar kar kiya uska uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Goad Mein Prakriti Kee (03/13/2024)

March 12, 2024

Om Namaha Shivaya
Aaj Ka Suvichaar 🙏🏻🙏🏻

#2214

            Rooh Se Rooh Ka Rishta

Na jaane kabb ye shareer chhoot jaaye
Yaad rahe ki rooh se rooh ka rishta na toot jaaye
Isliye koshish karta chal tu baar baar
Ki Guruji sangg joad tu seedhi taar.

Ye taar teri rooh ko Unn Paramatama se yoon jodey
Ki teri buddhi dishaheen hokar tujhe idhar udhar na modey
Balki is taar mein basee vidyut shakti tere ahankar ko todey
Aur is taar se bandh kar tu baaki har taar ko chodey.

Guruji sunte Hain bhakt ke rooh kee pukaar
Rooh se rooh ka rishta kaayam rakhegi yeh seedhi taar
Teri shraddha aur Guruji ke ashish se is rishte kee gehraayee badhegi
Guruji jabb tujhe yogya samjhenge, tabb teri atma oonchaayee chadhegi.

Shareer ka nahin koi bharosa
Kabb iske naash ka pal aa jaaye
Lekin rooh ka safar toh chalta rahega
Jabb takk vo Paramatama mein na samaa jaaye.

Paramatama ne diya hai shareer
Na kar kisee bhi tareh se uska tiraskaar
Parantu shaareerik chetna mein yoon na jaa tu kho
Ki rooh ke poshan par tera dhyan hee na ho.

Ye shareer hai isee janam ka mitr
Iske saath rooh ko bhi rakh pavitra
Guruji ke bakhshe simran ne nikhaara hai anekon ka charitra
Tu bhi simran ke paawan prayaas se sajaa le apne safar ka chalchitra.

Beeta jaa raha hai samay
Is se pehle ki aa jaaye pralay
Shareer kee nashwarta ko jaan
Rooh ke sthaayitva ko pehchaan
Guruji ne sweekaara hai tujhe, Unka ehsaan maan
Aur rooh se rooh ke rishte ka kar bhaav poorna sammaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rooh Se Rooh Ka Rishta (03/12/2024)

March 11, 2024

Om Namaha Shivaya
Aaj Ka Suvichaar 🙏🏻🙏🏻

#2213

Waqt Kee Vaadiyon Ke Beech

Waqt kee vaadiyon ke beech behti hui
Saritaayein hain hum sabb
Paani hotey huey bhi pyaasi
Leheron mein aksar udaasi.

Aksar pulakit hokar nritya karein
Lekin kabhi kabhi prakriti ke kop se darein
Swayam ko vaadiyon mein kho
Dhoondhti hui gantavya ko
Waqt ke saath behti hui
Utaar chadhaav sehti hui.

Jidhar se bhi hum bahein
Jo bhi hum sahein
Guruji se beshak na kahein
Kintu Ve jaanein sabb
Hum kahaan hain kabb
Unka dhyan karte hain hum jabb jabb.

Karein Guruji ka shukrana har uss pathar ke liye
Jis se hum behte huey takraate hain
Kyunki ve unn karmon ke prateek hain
Jo Guruji Apni kripa se katvaate Hain.

Dekar hamein agya kinaaron par mal ko chodne kee
Dekar Apni anumati arachanon ko todne kee
Guruji dete Hain himmat aur pavitrata
Taaki hum nibhaayein prakriti se mitrataa.

Aaj takk Guruji ne hee behne ka raasta hai dikhaaya
Jaisa bhi ho mausam, Unhonei behna hai sikhaaya
Aagey bhi Guruji hee gantavya takk le jaayenge
Safar ke antt takk Ve Apni goad mein baithaayenge.

Arzi hai Unse ki Unhee mein jaayein samaa
Ve hee jaanein kabb aayega veh shubh samaa
Dhanyawaad Unka ki Ve har pal dete Hain panah
Dhanya hua mann jabb se veh Unmein hai ramaa.

Hum saritaaon ka astitva Guruji ke charnon mein qurbaan
Unmein magn rehkar behte behte chali jaaye jaan
Aakhiri saans bhi lein jabb, toh hon Guruji ke kamal charan mein
Kalyaan hee kalyaan hai Param poojya Guruvar kee sharan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Waqt Kee Vaadiyon Ke Beech (03/11/2024)

March 10, 2024

Om Namaha Shivaya
Aaj Ka Suvichaar 🙏🏻🙏🏻

#2212

Paawan Maun Ke Sundar Sindhu

Param poojya Guruji Maharaj Hain Trilokinath avatari
Unkee karuna kee mohtaaj hai Unkee sangat saari
Paawan maun ke sundar sindhu
Jinmein basey Hain Naad aur Bindu
Gehraayee ke saumya saagar
Jinhonei swayam dharti par aakar
Kiya anginat sangat ka kalyaan
Dekar Apni kripa ka daan
Aur aaj bhi mehsoos hoti hai Unkee divya shakti
Buss, chaahiye toh bhaav poorna bhakti.

Ashutosh Hain Guruji, Hain Ve Bholenath
Agam agochar hotey huey bhi Hain Ve sangat ke saath
Swayam hee swaroop Hain jo sansaar ke saar ke
Unke saare darshan Hain darshan Parwardigaar ke.

Arey, aur toh aur, Unke aadesh par prakriti badal leti hai apna rukh
Unkee mehar-e-nazar se manmukh tarr kar bann jaata hai Gurumukh
Unkee pyaar bhari baat aur daant, dono mein basaa hai bhakt ka sukh
Anivaarya hai ki hamaare antas mein Unka sthaan ho sarvpramukh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paawan Maun Ke Sundar Sindhu (03/10/2024)

March 9, 2024

Om Namaha Shivaya
Aaj Ka Suvichaar 🙏🏻🙏🏻

#2211

Tera Thaa Hee Nahin Jo

Tera thaa hee nahin jo
Agar chhoot bhi gaya vo
Toh tera kuch nahin gaya hai kho
Isliye yoon vyarth mein na tu ro.

Abb bhi sahi raah le
Guruji ko tu apna le
Ve khade Hain baahein pasaar
Ve karte Hain tujhse behad pyaar.

Khushkismat hain ve jinhe Guruji ne hai apnaaya
Tera bhi achcha waqt tabb se hai aaya
Isliye niyati kee in karvaton se na ho tu udaas
Rakh Guruji Maharaj par tu poora vishwaas.

Agar tujhe lagg raha hai ki ho gayi hai der
Toh bhi niyati kee karvaton se nazrein na pher
Beshak tujhe mayoosi ke andhere ne liya hai gher
Dekhna, tere dekhte dekhte ho jaayegi saver.

Kuch khoya hai toh tu paayega uss se behtar
Guruji, tere param shubhchintak, karte rahe Hain tujh par mehar
Unka haath ho jiske sir par
Uske imtehaan bhi hotey hain aksar.

Tera haal bahuton se achcha hai
Tera zameer sachcha hai
Tu Guruji ka bachcha hai
Uddhaar kee teri ichcha hai.

Sabr aur shukr ke sangg is waqt ko guzaar
Guruji ka chintan karta chal tu baarambaar
Teri niyati nikhaar rahe Hain Guru sarkaar
Buss, abb thoda sa hee baaki hai intazaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Thaa Hee Nahin Jo (03/09/2024)

March 8, 2024

Om Namaha Shivaya
Aaj Ka Suvichaar 🙏🏻🙏🏻

#2210

                     MahaShivratri

Aa gayi MahaShivratri kee raat
Lekar jaagriti kee saugat
Is saugat ko na jaane dena vyarth
Is saugat ka bahut goodh hai arth.

Nikhaar kar antas kee aakriti
Sajaa kar bheetar ke purush aur prakriti
Ye jaagriti sanvaar degi hamaari manovritti
Isliye bahut mahatvapoorna hai yeh shubh tithi.

Shiv satya Hain, Shiv Hain sundar
Shiv basey Hain hum sabke andar
Shivmayi hai saara sansaar
Shiv karte Hain beda paar.

Guruji Hain Shiv avatari
Unkee mamta hai bahut hee pyaari
Unmein samaayi hai Shiv Shakti kee oorja saari
Tabhi toh Unkee har leela hai itnee nyaari.

Shiv ka jyotirling mayi swaroop
Hai bheetar mere aur tumhaare
MahaShivratri ke paawan parv par
Usey pehchaan lein hum Guruji ke sahaare.

Swayam ko Guruji mein khonei dein
Simran aur dhyan karein, chetna ko na sonei
dein
Mitaa kar har bhed bhaav
Badhaayein bhakti ka chaav
Shiv mahima ke geet gaayein
Guruji ka stavan kar raat bitaayein
Nritya se Guruji ko karein prasann
Satsang mein karein Gurbani ka shravan aur kirtan
Chhakein Guruji ka langar prasad
Paayein Mahadev ka ashirwaad.

Bhool kar har chinta aur har gumm
Bhaav vibhor hokar Guruji mein jaayein yoon ramm
Ki shuddh ho jaaye manovritti
Paawan ho jaaye drishti
Shubh ho jaaye kriti
Aur badh jaaye Guruji se preeti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

MahaShivratri (03/08/2024)

March 7, 2024

Om Namaha Shivaya
Aaj Ka Suvichaar 🙏🏻🙏🏻

#2209

                 Safar Aur Raasta

Safar ka raasta ho saral aur sundar
Toh manzil ka pataa lagaana zaroor
Ye na ho ki sundar raaste se aakarshit hokar
Ho jaao tum kaheen Guruji se duur.

Guruji ko banaakar Apni manzil
Beshak chodni padey koi bhi mehfil
Beshak raasta ho jaaye mushkil
Toh bhi tum vo raasta apnaana
Agar tumhe Guruji ko hai paana.

Safar par raaste aur saathiyon ka hoga asar
Isliye satark rehna har ghadi, har peher
Jo bhi prabhaav Guruji se duur karey
Usey tyaag dena tum bin darey.

Guruji ke charnon mein milega swarg
Guruji ke charnon mein milegi mukti
Guruji mein samaane par
Sahi waqt ke aane par.

Kab hoga vo sahi samaa
Ye Guruji ke siwa koi jaane na
Isliye raaste par chalte chalo
Guruji ke naam ke saanche mein dhalo.

Guruji ke naam japp se raasta tayy kar paaoge
Guruji ka naam lete lete Unn takk pahunch paaoge
Ve hee Hain murshid, Ve hee Hain manzil
Kuch bhi matt socho, buss Unhee ko de do dil.

Guruji par kar do sab nisaar
Ho jaayega tumhaara poora uddhaar
Raaste mein beshak ho bhayankar tufaan ya varsha mooslaadhaar
Tum chalne se na karna inkaar
Karte jaana Guru prem ka tum ikraar
Guruji awashya karenge tumhaara beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safar Aur Raasta (03/07/2024)

March 6, 2024

Om Namaha Shivaya
Aaj Ka Suvichaar 🙏🏻🙏🏻

#2208

                 Mann Ka Upvan

Param poojya Guruvar,

Mann ke chhote se upvan se
Laayi hoon phool Aapke charan mein karne arpit
Karam, dharam, ghar parivaar, bhaav, aur saansein
Karna chaahti hoon Aapko samarpit.

Mera hai hee nahin kuch
Mai hoon praani tuchh
Ye toh hai Aapki vaddi vadiyaayee
Jo mujhe Aapki sharan mein laayi.

Bulaakar Apni sharan mein
Aapne kripa kee hai aparampaar
Koshish toh karti hoon
Par manobal girne lagta hai kayi baar
Baadha bann jaata hai koi na koi vikaar
Aur ekatrit hota jaata hai atma par bhaar.

Mann ke upvan ka har phool aur kali
Jaise jaise chodti chale upvan kee gali
Aur aaye Aapke kamal charan mein
Vaise vaise meri har khaami
Aur meri har naadaani
Arpit ho jaaye Aapki sharan mein.

Jaanta hai mera mann aur chitt
Ki Aapki sharan mein mera kalyaan hai nishchit
Aapki kripa se mera har sanshay jaaye mitt
Mere paap dhul jaayein jaise jaise mai peeoon Aapke naam ka amrit.

Aapki mehar se toh mann ke upvan ke kante bhi shuddh ho jaayein
Aapki karuna se kashton ke kankad hatt jaayein
Upvan par noor chhaaye Aapke tejasvi prakash ka
Aapki bhakti mein ranga hua rangg ho upvan par chhaaye akash ka
Aapki ruhaani khushboo se meheke upvan ka vayumandal
Aapki kripa se mera har vichaar ho mangal.

Har phool har kali par ho Aapka naam
Aapke charnon mein ve paa lenge teerath dham
Aapka chintan karoon chaahe ho subah ya ho shaam
Shukrana karte huey karoon Aapke charnon mein pranaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ka Upvan (03/06/2024)

March 5, 2024

Om Namaha Shivaya
Aaj Ka Suvichaar 🙏🏻🙏🏻

#2207

     Honhaar Raahi

Honhaar thaa raahi pyaara
Parishram mein beet-ta thaa uska din saara
Sab kuch chal raha thaa achcha
Uska har vichaar thaa sachcha.

Phir achanak pichhle kisee janam ka koi karam jis se vo thaa anjaan
Aaya is jeevan mein uske saamne bannkar imtehaan roopi tufaan
Uspar thaa Guruji ka ashirwaad mahaan
Apni leela se Guruji karaa rahe thei uske karmon ka bhugtaan.

Rukne si lagg gayi uskee gati
Saath jaise chodne lagi sumati
Kamzor hoti gayi uskee nirnay shakti
Madad na kar paayi vyakulta se mukt honei kee koi bhi yukti.

Na chaahte huey bhi uskee chetna sonei lagi
Mann mein asthirta aur ashanti honei lagi
Kaafi waqt aise hee gaya guzar
Thamm gaya thaa maano uske jeevan ka safar.

Lekin waqt toh nahin thaa ruka
Sahi samay par uska karam thaa katt chuka
Ye namumkin hota Guruji kee kripa ke bin
Raahi phir se utsaahit rehne lagaa raat aur din.

Guruji toh Hain Vaidyanath
Ve toh har pal rahe uss raahi ke saath
Uskee vyakulta, ashanti, asthirta par Guruji ne lagaaya viraam
Uskee nirnay shakti khilne lagi paakar Guruji ka ruhaani paigaam.

Apni sharan mein Guruji katvaate Hain Apne bhakton ke karam
Bahut shukrana Unka ki Unhonei dee hai bhakton ko Apni sharan
Karmon ka katna anivaarya hai adhyaatmik pragati ke liye
Adhyaatmik pragati anivaarya hai janmon ke safar mein sadgati ke liye.

Guruji kee vaddi hai vadiyaayee
Unkee mehar se awashya milegi adhyaatmik oonchaayee
Guruji ne Apne har bhakt par sada kripa hai barsaayee
Guruji kee leela kee gahan hai gehraayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Honhaar Raahi (03/05/2024)