Aaj Ka Suvichaar

September 15, 2023

Om Namaha Shivaya
Aaj Ka Suvichaar 🙏🏻🙏🏻

#2035

      Samay Aur Sthaan Se Parey

Samay aur sthaan se parey
Srishti mein sabse badey
Jinkee mehar se bhakt adhyaatmik raaste par badhe
Jinkee sharan mein aane se bhakt kisee vipda se na darey
Jo sabb bhakton ke sangg rehte Hain khadey
Jinhe kisee ke samaksh jhukne kee zaroorat na padey
Phir bhi itne vinamr aur komal
Itne saral, taral, aur nirmal
Hain param poojya Guruji pyaare
Jo bhakton ko yaheen dikha dete Hain sachkhand ke nazaare
Jinkee kripa Unkee saari sangat ko taare
Jo Apne noor se andheron ko banaayein din ujiyaare.

Lee hai Unhonei Apne bhakton ke har janam kee zimmedari
Sabse shubh pal hota hai jabb aati hai Unke sangg judne kee baari
Unkee izaazat ke bin koi na pahunch paaye Unke darbar
Har bhakt hai Unke liye ek jaisa aur dein Ve sabhi ko pyaar
Koi seema nahin Unke bhakton kee khushnaseebi kee
Unse judi seedhi taar hai dagar Unse kareebi kee
Unkee vadiyaayee mein basee hai jo Khudaayee
Kisee kee sakshamta nahin ki kar paaye uskee poori badhaayi
Kyunki Unkee divya leela hai anant aur anoop
Ve swayam Hain Ishwar ka roop.

Guruji sanvaarte Hain sabki taqdeer
Chaahe veh raaja ho ya ho fakeer
Unke saamne har koi hai bhikhari
Unkee deewani hai Unkee sangat saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Samay Aur Sthaan Se Parey (09/15/2023)

September 14, 2023

Om Namaha Shivaya
Aaj Ka Suvichaar 🙏🏻🙏🏻

#2034

              Bheetari Ruhaaniyat

Har waqt bolne kee pratikriya uchit nahin
Chup rehna aksar hota hai sahi
Guruji kee nazar se kabhi kuch chhipa nahin
Phir chaahe koi karey kuch galat ya sahi
Guruji kee jo raza hai hota hai vahi
Pathar kee lakeer hoti hai baat Unkee kahi.

Jabb takk na seekha jaaye maun mukh ka
Tabb takk shaayad na ho anubhav mann ke sukh ka
Maun mann ke liye pehle mukh maun rakhna seekhna hai achcha
Kyunki paripakvata na aayegi jabb takk mann rahega naadaan bachcha.

Saath hee koshish karni hai tann ko sthir kar ke baith paane kee
Aur tann ko vash mein karna hai mann dwaara
Koshish karni hai tann aur mann mein sanyam laane kee
Aur mann ko karna hai niyantran mein tann dwaara.

Bhakt kee koshish se Guruji hongei prasann
Unkee mehar se nikharta jaayega dhyan aur simran
Atma aagey badhne ke liye ho paayegi tayaar
Ho paayega Guruji se paawan ananya pyaar.

Guruji dekh rahe Hain bhakton kee neeyat
Rangg laayegi bhakt kee shuddh ibadat
Koshish karne wale par yakeenan barsegi Guruji kee inaayat
Guruji kee kripa se jaag uthegi uskee bheetari ruhaaniyat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheetari Ruhaaniyat (09/14/2023)

September 13, 2023

Om Namaha Shivaya
Aaj Ka Suvichaar 🙏🏻🙏🏻

#2033

Guruji Kee Goad Mein Basera

Ek kalaa chaand kee dikhee gagan mein
Uske kareeb dikha ik taara
Lagaa taara prasann ho raha ho
Jaisa paa liya ho jahaan saara.

Apne mann kee aankhon se dekha
Toh chaand kee kalaa lagi anmol aanchal
Jismein maano taara mamta se raha ho pal
Aur taare ka janam hua ho safal.

Chaand kee mamta mein Guruji ka aanshik roop
Ansh bahut hee chhota kyunki Guru mamta toh hai anoop
Taare ke bholepan mein Guruji ka aanshik spandan
Ansh bahut hee alp matra ka kyunki anupam hai Guruji ka spandan.

Guruji Hain roop Maha Dev ke
Jinhe bhakt sada karna chaahein prasann
Maha Dev kee hee kripa se
Aseemta paaye prataapi gagan
Jismein chamkein chaand aur taare
Bannkar ratna bahumoolya aur pyaare.

Aasmaan se lekar zameen takk
Har disha mein Guruji ka prataap aata hai nazar
Chaand taare hon ya ho sooraj kee kiran noorani
Sabhi mein hai Guruji ka saanidhya ruhaani
Har drishya mein hai Guruji ka ehsaas
Har kann mein hai Unkee divyata ka vaas
Guruji kee mahima se andhera bhi laaye savera
Dhanya ho har praani paakar Guruji kee goad mein basera.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Goad Mein Basera (09/13/2023)

September 12, 2023

Om Namaha Shivaya
Aaj Ka Suvichaar 🙏🏻🙏🏻

#2032

          Aap Hee Sambhaalenge

Param poojya Guruji,

Aap swayam Mahadev, Aapki rehmaton mein koi kamee nahin
Yakeenan kamee hogi meri bhakti mein hee
Aapne sikhaane mein koi kasar na chodi
Mainey hee samajhne mein galati hogi kee.

Har khushi har gumm mein sarvapratham Aapka dhanyawaad
Kyunki har anubhav mein hai Aapki dee shiksha aur Aapka ashirwaad
Khushi meri yogyata se zyaada dete Hain Aap
Aur Aapki mehar se mere kiye paapon ke saamne bahut kumm hain mere gumm.

Koi toh achcha kaam kiya hoga mainey apne kisee janam mein
Jo Aapne mujh nacheez par daya kar ke bulaaya Apne dar
Aapke charnon ke taley kee dhool jitnee bhi nahin hai meri aukat
Usee dhool mein samaa jaaoon toh hogi meri khushkismati, mere Guruvar.

Jaisi bhi hoon, Aapki bachchi hoon, banaa kar rakhiyega Apna kinkar
Pal pal Aapse maangoon maafi, jaise jaise samay raha hai guzar
Kyunki jitnee bhi satark rehne ka prayatna karti rahoon
Chanchal mann achet na ho jaaye, ye soch ke mai daroon.

Putali hoon mai toh khataaon kee
Ichchuk hoon Aapke aanchal kee chhaaon kee
Is aanchal mein dete rahiyega mujhe sharan har janam
Taaki mai apni kamzoriyon kee khaamosh agni mein na ho jaaoon bhasma.

Mai shaayad is kaabil nahin lekin phir bhi kar rahi hoon guzaarish
Mujhe vaisa banaa deejiye jaisi ho Aapki khwaahish
Mere antas mein Aapke naam ke amrit kee hoti rahe aisee baarish
Ki dhulta jaaye mere kiye sabhi kukarmon ka vish.

Hoon aur rahoon Aapki mehar kee mohtaaj
Shukr hai Aapki nigaraani mein hotey rahenge mere aane wale kal ke kaaj
Sada sumat bakhshte rahiyega, mere sartaaj
Mera kal bhi Aapne hee thaa sambhaala, aur Aap hee sambhaalenge mera aaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Hee Sambhaalenge (09/12/2023)

September 11, 2023

Om Namaha Shivaya
Aaj Ka Suvichaar 🙏🏻🙏🏻

#2031

     Unkee Mehar Rangg Laayegi

Tu itna na gumaan kar
Guruji ka tu maan kar
Neevanpann tu seekh le
Rehmaton kee bakhshish le
Kuch bhi nahin hai tera yahaan
Guruji hee jaanein tu kal hoga kahaan
Tujhe toh agley pal kee bhi nahin khabar
Tu itna na gumaan kar.

Jo bhi hai tere aaspaas
Vo sab bhi ho jaayega khatam
Kalyaan chaahta hai jo tu
Toh maanta chal Guruji ka hukam.

Guruji se tu ardaas kar
Ki vinamrata mein jhuke tera mann aur sir
Unhonei bulaaya hai tujhe Apne dar
Unkee rehmat ka zaroor hoga asar.

Khatm hoti hai teri soch jahaan
Guruji kee soch shuru hoti hai vahaan
Waakif Hain Ve tere har vichaar se
Isliye socha kar tu pavitra pyaar se.

Tyaag de gumaan ko
Kintu sambhaal atma-sammaan ko
Praathamikta de dhyan aur gyan ko
Dil kee baat bataa Guru meharbaan ko.

Satya ko galey se lagaa le tu
Guru chintan mein waqt bita le tu
Har farz ko nibha le tu
Guruji ko rijhaa le tu.

Guruji de rahe Hain aisee panah
Jaisee kabhi na kee hogi toone kalpana
Lamhe anmol hain, unhe na ganvaa
Bhakti ke saadhan ko le apnaa.

Guru bhakti tujhe paar lagaayegi
Guruji kee kripa raah dikhaayegi
Tu maan jaa Guruji kee raza
Dekhna, Unkee mehar rangg laayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unkee Mehar Rangg Laayegi (09/11/2023)

September 10, 2023

Om Namaha Shivaya
Aaj Ka Suvichaar 🙏🏻🙏🏻

#2030

                   Unka Har Hukm

Is jagg ke kann kann mein
Aur is jagg ke uss paar bhi
Jisne racha hai sabb baahar
Aur tere bheetar ka sansaar bhi,
Vo sabhi ko dekhta rehta hai
Sun-na seekh lo toh bahut kuch kehta hai
Beshak nahin Apni sthool vaani dwaara
Kintu Guru roopi Gurbani dwaara.

Vo Hai Parampita Parameshwar, Jinke roop ko tu ‘Gurujī’ keh kar hai pukaarta
Jinka ashirwaad tera har lamha hai sanvaarta
Tere jeevan kee har subah aur shaam
Unhonei Apne vash mein lee hai thaam
Teri swatantra ichcha aur neeyat ke alaawa
Tere jeevan mein baaki sab ho raha Unke hukm se
Isliye tu ubhar kar zaroor niklega
Apne har maansik zakhm se.

Tere deen anubhav tujhe kuch na kuch awashya sikhaate rahenge
Tere Guruji simran bakhsh kar teri chetna ko sada jagaate rahenge
Isliye apni chetna kee awaaz ko na karna tu nazar-andaaz
Kyunki Guruji kee mehar se tu samajh paayega Unkee ankahi awaaz.

Tu badi achchi kismat wala hai
Jo tujhe Guruji ne sambhaala hai
Swayam Hain jo Maha Shiv ka roop
Unkee leela toh yakeenan hai anoop
Shukr hai bulaaya Unhonei Apne dar par
Unka har hukm sada sir aankhon par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unka Har Hukm (09/10/2023)

September 9, 2023

Om Namaha Shivaya
Aaj Ka Suvichaar 🙏🏻🙏🏻

#2029

                Indhan Bhakti Ka

Indhan bhakti ka
Banega strot teri shakti ka
Chandan Guru vandan ka
Banega hissa tere spandan ka
Bandhan Guruji kee oar samarpan ka
Roop nikhaarega tere kiye tere Aradhya ke abhinandan ka.

Kyunki samarpan bin shaayad poorti nahin vishwaas kee
Samarpan aur vishwaas ka rishta kar bejod
Jo bhi ho jaaye Guru bhakti se muh na moad
Kyunki jo bhi ho jaaye Guruji na denge tujhe kabhi chod.

Guruji kee prerna se
Bhakti ke indhan se chalegi jo tere jeevan kee gadi
Toh durdasha aur bhayy se bachaa rahega
Beshak ho paristhiti maadi.

Tu buss nibhaata jaa apne kartavya
Guruji dikhaayenge tujhe tera gantavya
Samarpan ke bal par
Gaadi chalegi vaise aur vahaan
Guruji chaahenge jaise aur jahaan.

Shukrana kar bhakti ke ruhaani indhan ka
Har pal ko banaa avsar Guruji ke chintan ka
Jo bhi kar raha ho, liv judi ho Guruji sangg teri sada
Guruji kitne prasann hongei dekh kar teri ye ada.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Indhan Bhakti Ka (09/09/2023)

September 8, 2023

Om Namaha Shivaya
Aaj Ka Suvichaar 🙏🏻🙏🏻

#2028

Jahaan Jaayein Aapke Kadam

Aye chetna meri
Sarvasva kar de Guruji ko arpit
Ekaagra reh tu Guruji ke chintan mein
Aisee kripa kar, aye mere chitt.

Aye gyan, jabb jabb aana
Neevanpann atmasaat kar ke aana
Aye ahankar, sookshma ya sthool rehkar
Chod de meri atma ko sataana.

Aye neki, mera antas rangg dena apne rangg mein
Aye sachchaayee, sada rehna mere sangg mein
Aye shuddhi, dho dena mere har paap ko
Aye buddhi, mitaana agyan ke santaap ko.

Aye samarpan, na badha mujhse duuri
Balki mujhe Guruji ka bhakt kehlaane ke yogya de tu banaa
Shraddha ke sangg mujh mein basee rehna, o saboori
Tumhaare sangg honei se safar asaan hoga, beshak jungle ho ghanaa.

Jungle, mushkilon ka
Jungle, vikaaron ka
Jungle, duvidhaaon ka
Jungle, uljhanon ka.

Aye bhakti, kripa kar mujhe dete rehna aisee shakti
Ki koi bhi jungle na baney mujhe daraane kee yukti
Balki veh de mujhe aur bhi adhik utsaah
Ki mai chaloon Guruji kee dikhaayee raah.

Aye vishwaas, tu apne pankh phailaakar
Yoon udte rehna akash ke anant kee oar
Ki koi bhi vikarshan na bann paaye kaaran
Jo tujhe giraaye ya tera raasta de moad.

Aye mann, ek pal bhi aisa na aane dena apni zindagi mein
Jabb tu Guruji ke samaksh na jhuke shukrana aur bandagi mein
Aye pyaar, tu moh ke changul se baahar nikal kar ho azad
Aur Guruji ke pyaar mein reh tu aabaad.

Guruji, beshak ye koshishein hon raat din
Aapki mehar bin ye sab nahin hai mumkin
Aapse hee veh prerna jo Aapke dikhaaye path par mujhe lekar jaayegi
Aapse hee veh samvedana jo mujhe sambhaalkar dheeraj bandhaayegi.

Aapki sharan mein sehna pade jo bhi sitam
Aapke kamal charan mein safal hai janam maran
Har saans Aapse hee, kyun jaaoon mai aur kaheen
Jahaan jaayein Aapke kadam, kripa kar mujhe chalaayiyega vaheen.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jahaan Jaayein Aapke Kadam (09/08/2023)

September 7, 2023

Om Namaha Shivaya
Aaj Ka Suvichaar 🙏🏻🙏🏻

#2027

                       Divyata Ek

Bandhan tann ka ho ya mann ka
Bandhan umr bhar ka ho ya kshan ka
Bandhan ek janma ka ho ya janma anek ka
Atmik drishtikon upaay hai har ek ka.

Uss param jyot ka ansh hai sabke bheetar
Atma ke sundar roop mein viraajmaan
Phir bhi deh ke paar na dekha jaaye
Aise naadaan hain hum insaan.

Vishnu ji ne liya Shri Krishna ka avatar
Gita gyan se aaj takk kar rahe Hain uddhaar
Aaye Guruji Shiv avatari
Taarne aaye Ve sangat saari.

Divyata ek, sandesh bhi ek
Beshak hum poojein Devi Devta anek
Shuddh bhaav hai anivaarya
Jabb bhi karein hum koi bhi kaarya.

Dikhaawa hai nirarthak
Abhimaan hai haanikaarak
Vinamrata hai gehna
Tarr gaya jisne ye pehna.

Bheetar hee hai safar asal
Na dene do vikarshanon ko ismein dakhal
Zaroori hai kendrit rakhna dhyan
Taaki duur ho agyan.

Guru Govind kee mehar se toote bhautik bandhan
Guru Govind kee kripa se ho paaye vinamr vandan
Guru Govind kee karuna se vikaar aur vikarshanon ka ho khandan
Guru Govind kee mahima se mehsoos ho bheetar kee divyata ka spandan.

Anant ka karna hai anubhav
Ek mein
Aur veh anant basaa hai
Pratyek mein
Kyunki pratyek mein hai vo Ek
Jisey kehte Hain Parameshwar.

Unhee Parmeshwar ke hee toh Guru Govind Hain roop
Jis bhi roop mein poojo, Ve Hain divya jyoti swaroop
Naam anek hain kintu divya jyoti ek
Jo dekhe bhakt ka bhaav ho nek.

Guruji shuddh aur nek bhaav ko dete Hain mahatva
Unka kaha maan-na hai har bhakt ka kartavya
Shri Krishna ko poojein ya Hanuman ji ko
Pooj rahe hain hum Guruji mein basey Bhagwaan ji ko
Jo Maha Shiv Hain, Sarveshwar Hain,
Param prataapi poojya Parameshwar Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Divyata Ek (09/07/2023)

September 6, 2023

Om Namaha Shivaya
Aaj Ka Suvichaar 🙏🏻🙏🏻

#2026

      Behti Dhaara Hai Ye Zindagi

Behti dhaara hai ye zindagi
Har boond hai anubhav ka moti anmol
Guruji kee karta chal tu bandagi
Naam ka japp tere uddhaar ka dwaar dega khol.

Seekhta chal zindagi kee dhaara ke bahaav se
Guruji kee bandagi karta chal tu shuddh bhaav se
Guruji Hain bhakt vatsal
Unkee karuna barasti hai har pal.

Ho sakta hai ki tujhe Unkee karuna ka aaj na ho ehsaas
Lekin kal tujhe zaroor gyat hoga ki Unkee karuna mein hai ashish khaas
Isliye tu himmat na haar
Na ho tu bekaraar.

Apne mann ko tu samjha
Simran dwaara har uljhan suljha
Mann karey jo manmaani
Toh tu uskee sunn-ne kee na karna naadaani
Tu bann jaa mann ka swami
Taaki vo na pahunchaaye tujhe koi haani.

Tu koshish kar, baaki Guruji par chod de
Tu buss Unke naam kee chunar odh le
Tera har anubhav ho jaayega ruhaani
Teri zindagi kee behti dhaara prateet hogi deewani….

…..deewani, Guruji ke naam kee
Jismein bahegi kaamna Unke dhaam kee
Phir tujhe sudh budh na rahegi subah aur shaam kee
Kyunki teri har saans mein mehek hogi divyata ke paigaam kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Behti Dhaara Hai Ye Zindagi (09/06/2023)