Aaj Ka Suvichaar

August 16, 2023

Om Namaha Shivaya
Aaj Ka Suvichaar 🙏🏻🙏🏻

#2005

          Aapki Praapti Ka Vardaan

Jeevatma se Paramatama bann-ne ka safar
Chalega na jaane kitne janam
Kripa keejiyega Guruji
Ki har uss janam mein miley mujhe Aapki sharan.

Baddh hai sansaar se
Abhi toh meri atma
Har paash se mukt hokar hee
Banegi yeh Paramatama.

Apni karuna yoon barsaayiye
Ki mit jaaye bheetar ka andhkaar
Roshni mein dekh paaoon apni har khaami, har dosh ko
Aapke chintan se paaoon shanti aur santosh ko.

Mere bheetar hai jo bhi daanav roopi swabhaav
Ve Aapki daya se ho jaaye duur
Vishay ka har veh nasha jo mujhe karta hai kamzor
Veh Aapke anugraha se ho jaaye chuur chuur.

Mann par rakh paaoon niyantran
Atma-neereekshan karoon har kshan
Na bhooloon kabhi bhi ki nashwar hai ye tann
Prem satkaar bhaav se japoon Aapka naam roopi dhan.

Deejiye aisa yog daan
Ki bheetar uday ho poorna gyan
Uss gyan ke bal par
Kar paaoon har adhyaatmik chunauti ka saamna
Aap mein samaane ke alaawa
Na rahe koi bhi aur kaamna
Apne dikhaaye raaste par aisee sthirta keejiye pradaan
Ki antt mein Aapki meher se miley Aapki praapti ka vardaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Praapti Ka Vardaan (08/16/2023)

August 15, 2023

Om Namaha Shivaya
Aaj Ka Suvichaar 🙏🏻🙏🏻

#2004

              Azaadi Miley Hamein

Param poojya Guruji,

Azaadi miley hamein
Hamaare ahankar ke prahaar se
Neevenpann se rahe atoot bandhan
Aisa ho jaaye jeevan.

Azaadi miley hamein
Trishna se aur krodh se
Azaadi miley hamein
Bhautikvaad ke lobh se.

Azaadi miley hamein
Moh ke bhi paash se
Jo itna bebas kar sakta hai
Ki ho jaate hain hum zinda laash se.

Azaadi miley hamein
Andhvishwaas se aur vehem se
Manobal aisa dridh ho jaaye hamaara
Ki hum inhe na sahein yoon sehem ke.

Azaadi miley hamein
Duniyadari kee gulami se
Azaadi miley hamein
Vyarth prashansa kee salaami se.

Azaadi miley mann kee asthirta se
Aur antas kee agyanta aur nirbalta se
Yaad rahe hamein ki Aap dein jo bhi sumat
Uspar anivaarya hai hamaara chalna poori dridhta se.

Aapki mehar se karte rahein Aapka vandan
Toad paayein hum har veh bandhan
Jo hamein le jaaye pashutva ya patan ke kareeb
Ya jo kisee bhi vajeh se bigaade hamaari atma ka naseeb.

Azaadi miley hamein
Har uss bhaav, har uss prabhav se
Jo Aapko nahin lagta sahi
Jaisa Aap chaahein, hum banein vahee.

Azaadi miley hamein har bhautik aasakti se
Bandhan gehra ho gyan, vairagya, aur bhakti se
Aapki kripa bin nahin hai ye mumkin
Aapki madad chahiye har pal, har din.

Bakhsh deejiye gunaahon ko
Ujjwal keejiye raahon ko
Khwaahish hai
Guzaarish hai
Aapne anginat paapiyon aur vikaariyon ka kiya hai uddhaar
Hamein bhi raah dikhaakar uspar chala kar keejiye beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Azaadi Miley Hamein (08/15/2023)

August 14, 2023

Om Namaha Shivaya
Aaj Ka Suvichaar 🙏🏻🙏🏻

#2003

            Jabb Takk

Jabb takk bajega shanka ka danka
Tabb takk kaise taaregi tujhe Guru amrit kee Ganga?
Jabb takk rahega ahankar ka bukhaar
Tabb takk tujhe kaise mehsoos hoga Guruji ka pyaar?

Jabb takk tere mann par chadhi hai mal kee dhool
Tabb takk kaise dikhega Maha Shiv roopi Guruji ka trishul?
Jabb takk bin kisee shart na hogi tere bheetar aastha
Tabb takk kaise dikhega tujhe raahat ka raasta?

Jabb takk naam kee chaadar ka karega anaadar
Tabb takk kaise kar paayega Guruji ka aadar?
Jabb takk simran ka nahin karega prayatn
Tabb takk kaise praapt hoga tujhe asal dhan?

Kar chintan, kar vichaar
Ek baar nahin, balki baar baar
Kis tareh se sudhar raha hai tera nazariya
Kis tareh se badal rahi hai teri dagariya
Yahaan takk bhi pahuncha hai jo tu
Vo mumkin hua toh Guruji ke ashirwaad se
Apne jeevan mein sukh santosh chahiye
Toh apna har din shuru aur khatm kar Unhe dhanyawaad se.

Ve taaranhaar Hain
Ve bakhshanhaar Hain
Tere ahankar ka jwar mitaayenge
Teri har shanka ko sulajhaayenge.

Apne charnon kee dhool se Ve hataayenge tere mal kee dhool
Dikhaayenge Ve tujhe raasta jahaan khilenge teri aastha ke phool
Unkee mehar se hoga tujhe naam se itna pyaar
Ki tu karega naam kee chaadar ka aseem satkaar.

Unkee hee bakhshi hui hai simran kee daat
Sewa satsang bhi hai Unkee dee bakhshish roopi saugat
In anmol ratnon se kar rahe Hain Ve tujhe sampann
Nishchay hee tu paayega asal gyan ka dhan.

Tujhe Guruji ne liya hai sweekaar
Tarr raha hai tu aur tera ghar parivaar
Khul gaye hain teri kismat ke dwaar
Guruji ko dhanyawaad karta chal tu baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jabb Takk (08/14/2023)

August 13, 2023

Om Namaha Shivaya
Aaj Ka Suvichaar 🙏🏻🙏🏻

#2002

                Isee Janam Mein

Param poojya Guruji,

Aapki sharan mein naseeb hai khila
Sundar satsang ka kila mila
Japne ke liye mila Aapka naam
Naam ne kiya hai kavach ka kaam.

Kavach pehenkar kile mein milee suraksha
Jabb se milee Aapse ye bhiksha
Simran aur sewa kee dete Hain Aap deeksha
Pal pal lete Hain Aap bhakton kee pareeksha.

Aapki leela hai adbhut
Bahut oopar hai hum bhakton kee samajh se
Yakeenan duvidha se nikal nahin sakte
Duniya ke jhamelon mein ulajh ke.

Navjaat shishu ke roop mein aaye yahaan
Yahaan se jaayenge bann kar ek laash
Isee shareer mein rehte rehte
Uddhaar ho jaaye kaash.

Mann se sir ko jhukaayein
Khade hain haath jodkar
Ashish deejiye ki Aap mein samaa jaayein
Har paash ko toadkar.

Kyunki ek bhi paash na tootega
Ek bhi vikaar na chhootega
Jabb takk na ho Aapki mehar
Jabb takk na aaye subuddhi kee seher.

Hai aisee seher ka intazaar
Hai Aapse yeh arzi baarambaar
Ki isee jeevan mein ho jaaye aisa sudhaar
Ki isee janam mein ho jaaye uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Isee Janam Mein (08/13/2023)

August 12, 2023

Om Namaha Shivaya
Aaj Ka Suvichaar 🙏🏻🙏🏻

#2001

                      Badi Inaayat

Param poojya Guruji,

Aapki hai badi inaayat
Jo Aapne liya hai sharan mein
Sweekaariye hamaari ibadat
Hamaari madad keejiyega hamaare har janam mein.

Jeene kee kala seekh na paaye
Toh kaise seekhenge chayyn se marne kee kala
Guruji, kripa kar jagaayiye hamaari soyi chetna
Kripa keejiye taaki hum chalein vahaan
Hai hamaara bhalaa jahaan.

Bhalaa, hamaari atma ka
Gyan miley hamein atma aur Paramatama ka
Ek hai dooje ka ansh
Yoon chalta hai praaniyon ka vansh.

Yaad rahe hamein har pal
Ki sada milta hai karmon ka phal
Kisee aur se sukh chheen kar
Sukhi nahin bann sakte hum
Aur niraash nahin hona hai bilkul
Agar aayein jeevan mein gumm.

Aap deejiye hamaare sapnon ko aakaar, keejiye unhe saakaar bhi
Kewal agar unmein hai hamaara sudhaar, aur uddhaar bhi
Aapko arpit ho hamaara pyaar, aur aabhaar bhi
Aap mein hee divyata ka vistaar, aur saar bhi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Badi Inaayat (08/12/2023)

August 11, 2023

Om Namaha Shivaya
Aaj Ka Suvichaar 🙏🏻🙏🏻

#2000

           Aapka Salona Aanchal

Priya Guruvar,

Aapka salona aanchal
Mujhe sambhaalta hai har pal
Is aanchal kee chhaaon mein mere kasht jaate hain tal
Koi aur sthaan nahin hai is aanchal ke jaisa nirmal.

Aisa ho raha hai asar Aapki mehar ka
Ki andheri raat mein bhi ehsaas hota hai sundar sehar ka
Anantam shukrana uss lamhe, uss ghadi, uss pehar ka
Jismein mere mann mein janam hua Guru bhakti kee leher ka.

Mai tarne lagi jabb se mere antas par Shobha chhaayi Aapke prem ke dhaage kee
Vishwaas hai mujhe ki Aap yahaan takk laayein Hain
Toh Aap hee le jaayenge mujhe aagey bhi.

Duniya ne bahut koshish kee ulajhaane kee
Lekin Aapki kripa rahi hai sada sulajhaane kee
Duniyadari ke tamaashe mein manzoor hai poori haar
Kyunki Aapne diya hai Apne naam simran ka haar
Aapke ashish se yeh haar kar raha hai mujhe tayyaar
Ki aaj nahin toh kal mai ho jaaoon bhavsaagar ke paar.

Dete rahiyega himmat, satya kee raah par chalne kee
Dete rahiyega gyan, ruhaani seedhi par chadhne kee
Dete rahiyega shuddhi, akhandata kee oar badhne kee
Dete rahiyega bakhshish, Apne salone aanchal mein palne kee.

Aapki mamta hai sachchi, Aapki kripa pakki
Bahut baareek peesti hai Aapke nyaay kee chakki
Tasalli hai ki Aapki daya se hoga meri atma ka uddhaar
Aapka salona aanchal hai ekmaatra sahaara, mere poojya Parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapka Salona Aanchal (08/11/2023)

August 10, 2023

Om Namaha Shivaya
Aaj Ka Suvichaar 🙏🏻🙏🏻

#1999

               Aapji Sada Sahaay

Param poojya Guruji,

Aap toh jaante Hain sabb
Aur ye bhi ki veh sabb kyun hai ho raha
Ye bhi maalum hai Aapko
Ki Aapki kripa bin ye nahin jaa sakta saha.

Aap hee jaanein kya hai upaay
Pyaare Guruji, Aapji sada sahaay
Abb upaay deejiye bataaye
Kyunki abb aur saha na jaaye.

Nahin bataana toh bhi hai manzoor
Bin bataaye hee mushkil kar deejiye duur
Tann, mann, aur atma ke ghaav deejiye bhar
Aapki mehar se jaayein hum tarr.

Na hai Aapke alaawa aur koi sahaara
Aapki daya bin bilkul nahin hai guzaara
Pyaare Guruji, Aapji sada sahaay
Abb deejiye rehmat barsaaye.

Mohtaaj hain hum Aapki nadar ke
Musaafir hain is safar mein
Raasta Aapse, manzil bhi Aap
Abb buss har leejiye dukh santaap
Aap hee Hain Har, Aap mein Shivaay
Pyaare Guruji, Aapji sada sahaay.

Naadaan hain hum, hain anjaan
Baahon ko jakde huey hai agyan
Sewa simran ka na jaanein dhangg
Nahin raas aate is kalyug ke ajab rangg
Gyan ka deep dikh raha nahin
Aap drishti shakti kar deejiye sahi
Aapka bhakt aur kaheen kyun jaaye
Pyaare Guruji, Aapji sada sahaay.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapji Sada Sahaay (08/10/2023)

August 9, 2023

Om Namaha Shivaya
Aaj Ka Suvichaar 🙏🏻🙏🏻

#1998

         Tere Haalaat

Tu buss Guruji ka shukr kar
Tere haalaat kee Unhe hai khabar
Unhe fakr hai tere sabr par
Ye waqt bhi jaayega guzar.

Hota nahin ek sa har pal
Ek pal mein jeevan sakta hai badal
Tere haalaat sudharenge aaj ya kal
Tu rakhta chal vishwaas atal.

Guruji ke liye kuch namumkin nahin
Unka nirnay sada hota hai sahi
Is tathya mein koi shak nahin
Unke shraddhalu bhakt jann kehte hain yahee.

Jaldi samajh aaye ya der se
Ya na bhi aaye samajh
Tu apna farz nibhaata jaa
Tark vitark mein na ulajh.

Jin Shivroopi Guruji par toone sab kuch chod diya hai
Jin pooran Guru ne sada tera bhalaa kiya hai
Unkee oar se bevajeh nahin ho sakta yeh vilamb
Tu dekhna, is vilamb ke pashchaat hoga shubh praarambh.

Niraash na ho
Santulan na kho
Bebasi mein na ro
Maayoosi mein na kho.

Tu Guruji se na bhi kar paaye baat
Toh bhi Ve jaante Hain teri haalat
Guruji ke hotey huey tujhe na chahiye kisee kee bhi vakaalat
Badi dayavaan hai Guruji kee adalat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tere Haalaat (08/09/2023)

August 8, 2023

Om Namaha Shivaya
Aaj Ka Suvichaar 🙏🏻🙏🏻

#1997

                Murshid Aur Khuda

Param poojya Guruvar,

Hamaara bhakti bhaav badhaayiye
Hamein intazaar karna sikhaayiye
Hamaari galatiyan hamein dikhaayiye
Unhe sanshodhit karne ka upaay bataayiye.

Hamein sudhaar kee oar le jaayiye
Hamein aur girne se bachaayiye
Hamaari atma par se daag mitaayiye
Hamein oordhvagati kee oar chalaayiye.

Aapke ashish se
Bheetar ke mal ka ho jaaye naash
Aapki bakhshish se
Toot jaaye har tareh ka paash.

Bin gyan toh reh jaayenge hum anjaan
Paramanand ke anubhav se
Antt aane par maafi bhi na maang paayenge
Apne bhog saadhan shareerik shav se.

Kyunki veh toh panch bhoot mein samaakar Mrityu pashchaat ho jaayega poora
Lekin jis kaarya ke liye hum aaye hain yahaan par
Veh kaarya reh jaayega adhoora.

Kaarya, atma ke Paramatama se milan ka
Jis se antt hoga janam maran ka
Uss pal Aap mein jaayenge samaa
Tabb takk dete rahiye Apne charnon mein panah.

Abb bhi aur tabb bhi
Aapse na hon kabhi bhi juda
Aap hee Hain hamaare nath, meet, aur bandhu
Aap hee Hain hamaare murshid aur Khuda.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Murshid Aur Khuda (08/08/2023)

August 7, 2023

Om Namaha Shivaya
Aaj Ka Suvichaar 🙏🏻🙏🏻

#1996

       Aapki Rahnumaayee Mein

Param poojya Guruji,

Jaise jaise sooraj jaaye dhal
Geruan aasmaan bann jaaye Aapka aanchal
Usmein jhoolne lagoon jis pal
Har thakaan ko miley aaraam roopi hal.

Jaise jaise raat aaye
Aapke swapn darshan kee ichcha badh jaaye
Jo jabb agar kabhi hon toh shukrana karoon Aapki mehar ka
Anokha saumya nazaara ho uske baad kee sehar ka.

Sooraj kee pehli kiran se bhi pehle
Jabb chidiya chehekti hai
Mauka jo mil jaaye is anubhav ka
Toh mere mann kee bagiya aksar mehekti hai
Aapki ruhaani khushboo ke ehsaas se
Kehti hui shukriya Aapke bakhshe huey mere shwaas se.

Sooraj phailaata hai akash aur dharti par apna prakash
Usey bhi maano oorja deta hai Aapka noorani sakash
Koi din na guzare Aapke simran aur chintan bin
Chaahoon bhi toh Aapki rehmatein na sakoon gin.

Har jageh har pal paaoon Aapko angg sangg
Aapki maujoodagi mein aasmaan badle apna rangg
Dopeher ka sooraj ho aakaash mein uchch shikhar par viraajmaan
Aur uske pashchaat shuru karey utarnaa dhalaan
Aapki kripa se japp paaoon Aapka naam
Aur phir aa jaaye shaam aane ka paigaam.

Har alfaaz jo boloon vo ho Aapki vadiyaayee mein
Doobti jaaoon Aapki bhakti ke mahasaagar kee gehraayee mein
Kalyaan hee kalyaan basaa hai Aapki guruyaayee mein
Jeevan ka har lamha beete Aapki rahnumaayee mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Rahnumaayee Mein (08/07/2023)