Tag: suvichaar

January 3, 2025

Om Namaha Shivaya
Aaj Ka Suvichaar 🙏🏻🙏🏻

#2511

 Tumhaare Girebaan Kee Gehraayiyan

Ek oar tumhaare girebaan kee gehraayiyan
Dooji oar Guruji Maharaj kee vadiyaayiyan
Unkee vadiyaayiyon se vadda nahin hai kuch
Har girebaan kee gehraayee bhi hai tuchh.

Tumhaare girebaan kee gehraayiyon ko cheer deti hain
Guruji Maharaj kee nigaahein
Tumhaare baare mein sabb jaante huey bhi
Tumhe sahaara deti hain Unkee baahein
Tumhaara safar sudhar jaaye
Iske liye Guruji ujjwal karte Hain tumhaari raahein
Taaki tum vaisa hee socho aur karo
Jaisa Ve tumhaare liye chaahein.

Kyunki isee mein tumhaara kalyaan hai
Aur Guruji sada rehte meharbaan Hain
Ve tumhe le kar jaana chaahte Hain ruhaani shikhar takk
Jiske liye Ve tumhe bakhshte bhi Hain athak.

In raahon par chalna na hota itna aasaan
Agar angg sangg na hotey Guruji karunanidhaan
Ye maan kar chalo
Ye jaan kar chalo
Shukrana mein yoon raho
Ki shukrana mehsoos karo aur kaho.

Koi aur darwaaza na khatkhataana
Guruji ke bataaye raaste par tum chalte jaana
Ho nahin sakta Unse bada koi shubhchintak tumhaara
Unse zyada sampoorna ho hee nahin sakta koi sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaare Girebaan Kee Gehraayiyan (01/03/2025)

December 27, 2024

Om Namaha Shivaya
Aaj Ka Suvichaar 🙏🏻🙏🏻

#2504

                    Ye Rooh Teri

Ye rooh teri
Hai bahut sundar
Daag lagey bhi hain toh koi baat nahin
Guruji kee sharan mein sabb hoga sahi.

Pichle sabb daag mitt jaayenge
Tere sabb ghaav bhar jaayenge
Waqt ko chahiye hoti hai mohalat aksar
Taaki nazaakat se mukammal ho safar
Is dauran bhi Guruji kee tu ibadat kar
Ibadat ka yakeenan hota hai asar.

Rooh ka safar hai ye, shareer ka nahin
Tabhi khatm hoga jabb sabb ho jaayega sahi
Guruji mein baste Hain tere Khuda
Ve nahin Hain tujhse juda

Tere bheetar hota rahega tera Unse deedar
Tu Unhe yaad kar aur kar Unse behad pyaar
Teri rooh par Unka noorani rangg chadhta jaayega
Tu safar mein aagey badhta jaayega.

Barasti rahegi Guruji kee meharbaani
Beet jaayegi ye zindagaani
Jo toone Guruji kee baat maani
Toh teri ruhaani yatra banti jaayegi suhaani.

Teri rooh ko Guruji kee daya yoon legi chhoo
Ki hoga tera sampoorna kalyaan
Bholenath Bhagwaan ka roop Hain Guruji mahaan
Ve denge tujhe sampoorna ruhaani satya ka gyan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Rooh Teri (12/27/2024)

December 21, 2024

Om Namaha Shivaya
Aaj Ka Suvichaar 🙏🏻🙏🏻

#2498

           Aapke Prati Mera Bhaav

Mere param poojya Guruji sarkar
Aapko shat shat namaskaar
O seenchne wale mere jeevan ke upvan ko
Apni chaahat ke mutaabik banaa deejiye mere antakaran ko
Aisa ho jaaye Aapke prati mera bhaav
Jaisa chakor ko chaand dekhne ka hota hai chaav
Soojhe hee na Aapke siwa koi aur
Aapki oar hee karoon mai gaur.

Ye nahin mumkin Aapki meher ke bin
Aapki meher miltee rahe raat aur din
Aap mein rahoon magan
Aap mein laagi rahe lagan.

Har pal hota rahe Aapki maujoodagi ka ehsaas
Kyunki ye ehsaas hai har shwaas ke liye sabse khaas
Is ehsaas ke bin mai ho jaaoon bilkul udaas
Is ehsaas ke sangg Aap sada hotey Hain mere bheetar aur aas paas.

Darasal ye kewal ehsaas nahin, yahee hai hakeekat
Itnee hai Aapke prataap kee ahamiyat
Is hakeekat ko bhool na paaoon mai
Sada Aapke prataap ke gunn gaaoon mai
Aapki mehek se mere jeevan ka upvan khilta rahe
Aapke anugraha ka amrit atma ko milta rahe
Dhul jaaye atma par se har daag
Soyi hui meri chetna jaaye jaag
Aapko bhoolne kee naadaani kabhi na karoon
Bann paaoon vaisi, jaisi Aap chaahte Hain mai banoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Prati Mera Bhaav (12/21/2024)

December 13, 2024

Om Namaha Shivaya
Aaj Ka Suvichaar 🙏🏻🙏🏻

#2490

           Kehne Ko Bahut Kuch Hai

Param poojya Guruji Maharaj,

Kehne ko bahut kuch hai
Phir lagta hai ki sab tuchh hai
Karne Aapke prataap ka bakhaan
Kyunki Aap Hain mahaanon mein sabse mahaan.

Shikaayat karne kee meri aukat nahin
Phir bhi ye gustaakhi kar baithti hoon aksar
Phir bahut sharm aa jaati hai
Apni is neech si harkat par.

Shukrana karti hoon jabb jabb
Aur bhi shukrana karne ka dil karta hai tabb tabb
Aapse dhanyawaad jabb hoon kehti
Toh gintee hee nahin rehti
Kyunki kitna bhi shukrana kar loon Aapka
Vo Aapki vadiyaayee ke samaksh hai tuchh
Phir bhi kehti rehti hoon mai
Aapse kuch kuch.

Taareef Aapki karti hoon jabb jabb
Koi na koi baat bhool jaati hoon tabb
Kyunki Aapka stavan sampoornata se karne kee
Mujh mein nahin hai kabiliyat
Aapke dar ka kookar bann paaoon
Meri toh utnee bhi nahin hai haisiyat.

Jabb jabb Aapse karti hoon baatein
Beshak beet jaayein din raatein
Baatein reh jaati hain adhoori
Kayi baar bhool jaati hoon baat zaroori
Tuchh lagta hai mujhe apni oar ka vaartaalaap
Sochti hoon jabb ki kitna aseem hai Aapka prataap.

Kitnee baar jabb karti hoon ardaas
Toh bharti hoon gehra shwaas
Jaan kar ki baitha kar Apne charnon ke paas
Aapne dee hai daat sabse khaas.

Phir kyun kee mainey ardaas kisee aur daat ke liye
Ye soch kar mai nimaani
Maafi bhi maangne lagti hoon Aapse
Ki mainey kee aisee naadaani.

Abhi toh seekhna hai itna kuch
Isliye chodni hongi aadatein tuchh
Guruji Maharaj, Aap hee raah dikhaayiye is nimaani ko
Aap hee sanvaar sakte Hain meri naadaani ko.

Aur kaheen jaane kee nahin mujhe zaroorat ya chaahat
Jaanti hoon ki Aapke kamal charan mein milegi har bhaar se raahat
Mai beshak hoon ek tuchh si Aapki deewani
Aap toh Hain Srishti ke Shehenshah ruhaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kehne Ko Bahut Kuch Hai (12/13/2024)

December 12, 2024

Om Namaha Shivaya
Aaj Ka Suvichaar 🙏🏻🙏🏻

#2489

                Uddhaar Kee Raah

Paramatama ka chhota sa ansh hai tujh mein
Atma ke niraakaar swaroop mein
Isee Ishwareeya prataap ke hetu
Sampoorna hai tu apne roop mein.

Atma hee hai asal, atma ko tu nikhaar
Shareer ka bhi dhyan rakh, vo bhi hai Guruji ka deeya uphaar
Kintu shareer ko sanvaarte sanvaarte
Bhool na jaana karna atma ka poshan
Varna ruhaani raah na ho paayegi roshan.

Shareer ne reh jaana hai yahaan
Panchbhoot main jaana hai samaa
Lekin jiskee atma ka avinashi kann
Rahega Paramatama mein magan
Aagey bhi sukhad hoga uska safar
Shraddha ke sanskaar ka hota rahega asar.

Guruji Hain Paramatama
Unmein sanlagn kar ke atma
Ho jaayega ehsaas
Ki tu Unse juda nahin
Na hee juda thaa pehle kabhi.

Isliye atma-anubhooti hai ati-aawashyak
Aur jabb Guruji swayam Hain rakshak
Toh phir kaisa sanshay?
Toh phir kyun koi bhi bhayy?

Abb vilamb ko tyaag
Baahar kee oar na aur bhaag
Atma par se mitne hongei daag
Zaroori hai ki tu jaag.

Yahee hai upaay
Ki atma Paramatama mein samaaye
Adhoorepann ka ehsaas ho jaayega duur
Na soch ki tu hai haalaat ke vash mein majboor.

Chetaavani maan isey
Ya maan isey salaah
Yahee toh hai ekmaatra
Uddhaar kee raah.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Uddhaar Kee Raah (12/12/2024)

December 11, 2024

Om Namaha Shivaya
Aaj Ka Suvichaar 🙏🏻🙏🏻

#2488

             Guruji Ke Bulaane Par

Guruji ke bulaane par
Bhakt pahunchta hai Unke dar par
Koi karmon ke bojh ka maara
Koi aata hai bilkul thakaa haara.

Koi aata hai muskuraate huey
Toh koi aansoo bahaate huey
Koi bin jaane kaaran Unke dar par aane ka
Koi utsuk hota hai jholi phailaane ka.

Aakar Guruji ke dar par
Hota hai kuch aisa asar
Ki mitne lagg jaata hai darr
Aisee kripa karte Hain Guruvar.

Jo bhi ho paristhiti
Jo bhi ho bhakt kee sthiti
Milta hai usey Guruji ka ashirwaad
Milta hai usey Guru prasad
Chaahe vo jaane ya na jaane
Chaahe vo maane ya na maane.

Ye hai Guruji kee vaddi vadiyaayee
Unhonei sada saari sangat par kripa hai barsaayee
Karte aaye Hain Ve sabka kalyaan
Aise Hain Ve karunanidhaan.

Jo bhi aaye jis bhi paristhiti ya sthiti mein
Hotey hotey hota hai uska uddhaar
Kisee ka ho jaaye ek hee pal mein
Kisee ko karna padd jaata hai intazaar.

Guruji kee rehmat se judi rahe Unke sangg preet
Koi aur nahin hai Guruji ke jaisa meet
Buss, Guruji yoon hee bulaate rahein
Sabhi par karuna barsaate rahein
Hamaare har vichaar aur karma par ho Unhee ka raaj
Toh awashya hee sanvar jaayenge hamaare saare kaaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Bulaane Par (12/11/2024)

December 10, 2024

Om Namaha Shivaya
Aaj Ka Suvichaar 🙏🏻🙏🏻

#2487

                   Satya Ke Strot

Satya ke strot
Satya ke aadhaar
Satya kee soorat
Swayam satya ke saar
Aur phir satya ke bhi paar
Hain Guruji Sarkar.

Sarkaron ke sarkar Hain Guruji
Ve hee Hain taaranhaar
Kalyuga mein aaye is paar
Bashar roop mein Shiv avatar.

Kitnon ko diya Unhonei taar
Aagey bhi aate rahenge Unke dwaar
Bhakt jann kayi hazaar
Ik baar nahin, balki baar baar.

Guruji ke liye kuch nahin namumkin
Aur asal dhan na miley pooran Guru ke bin
Jo pooran Guru ne hai sweekaara
Toh kyun na maang lein asal sukh saara?

Kshanbhangur hain duniyavi sukh
Kayi toh dene lagte hain dukh
Kyun na Guruji kee marzi ke aagey jaayein jhuk
Aakhirkaar Unkee marzi se kalyaan kee oar hoga bhaagya ka rukh.

Satya ke swami ne thaama hua hai haath hamaara
Ho hee nahin sakta hai is se zyada shaktishali sahaara
Khudayee hee satya hai, satya Hain Parwadigaar
Aur in Maalik ke roop mein hamein bakhsh rahe Hain Guru sarkar.

Jahaan nirarthak hota hai har sukh bhautik
Guruji Hain Ve satya alaukik
Hain Ve satya ke prataapi pratimaan
Guruji Hain satya swayam, Guruji Hain Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Satya Ke Strot (12/10/2024)

December 9, 2024

Om Namaha Shivaya
Aaj Ka Suvichaar 🙏🏻🙏🏻

#2486

              Halchal Mann Mein

Koi din toh chayn se beet jaata hai
Toh kisee din koi na koi maajra sataata hai
Kabhi vyakul karta hai ekant
Kabhi mann hota hai ashant.

Beshak ho halchal mann mein
Beshak hon roag tann mein
Agar koshish poori ho vandan mein
Aur sakaratmakta ho spandan mein
Toh thamm jaate hain bheetar ke tufaan ek hee kshan mein
Aisa hona yakeenan mumkin hai Guruji ke chintan mein.

Aaj ka pal ho ya phir ho kal
Guruji sangg hotey Hain har pal
Kabhi ek roop mein, kabhi roop badal
Shant karne mann kee halchal.

Kabhi Unkee awaaz aaye
Kabhi titlee mandaraaye
Kabhi panchhi kee chehek
Toh kabhi ruhaani mehek…..

Kabhi svapn darshan ka ashish paaye das
Kabhi mor ka aana banaaye drishya ko khaas
Kabhi hawaa ke jhonke mein Guruji ka ehsaas
Kabhi Unke dwaara chuney huey shabad kee baani aur saaz
Kabhi satsang sunte huey Guruji kee divyata ke raaz
Yakeenan sada Guruji ke kalyaan karne ke hotey hain adbhut andaaz.

Guruji kee leela Ve swayam hee jaanein
Hamaara kalyaan usmein ki hum Unkee maanein
Unke khayaalon kee oar mann muda rahe
Unhee se mann juda rahe
Guruji kee sharan mein hai pareshaaniyon ka hal
Unhee ke charnon mein kasht jaayenge tal
Unhee ke kadmon mein samarpit kar ke mann kee halchal
Bhakt jann sanvaar paayein apna kal, aaj, aur kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Halchal Mann Mein (12/09/2024)

December 8, 2024

Om Namaha Shivaya
Aaj Ka Suvichaar 🙏🏻🙏🏻

#2485

Kitne Neeven, Kitne Nyaare

Sabke hriday mein vaas karte Huey bhi
Sabki jholiyan bharte Huey bhi
Kitne neeven, kitne nyaare
Dayanidhi Hain Guruji pyaare.

Bannkar hamaari antaratma kee awaaz
Dekar hamein sahi aur galat ka ehsaas
Prerit karte Hain Guruji hamaara ruhaani prayaas
Besharte hamaari neeyat aur abhyaas mein ho aas
Uss raaste par chalte jaane kee
Aur manzil ko paane kee.

Dayalu Kripalu Guruji, sindhu Hain Ve mamta ke
Parmeshwar Paramatama, bhandar Hain Ve kshamta ke
Beshak lambi ho jeevan kee raat
Guruji kabhi na chodein bhakt ka saath.

Guruji toh basey Hain hriday mein
Ve toh har samay mein
Saath nibhaate Hain
Sambhaalte jaate Hain.

Samet kar bhakt ko
Aanchal mein Apne pyaar ke
Hamaare dil ke bikhre huey tukdon ko
Dekar dulaar bhare lamhe Apne deedar ke.

Namumkin ko mumkin karne wale
Karmon ko badalne wale
Karmon ko kar dein maaf bhi
Karmon ka khaata karein saaf bhi
Mahantaa mein anant hotey Huey bhi
Bholenath Bhagwant hotey Huey bhi
Kitne neeven, kitne nyaare
Dayanidhi Hain Guruji pyaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kitne Neeven, Kitne Nyaare (12/08/2024)

December 7, 2024

Om Namaha Shivaya
Aaj Ka Suvichaar 🙏🏻🙏🏻

#2484

                 Jis Pal

Guruji kee kripa se chal rahi hoon
Unkee goad mein pal rahi hoon
Kaise na rahoon muskuraati
Kaise na rahoon Unka gungaan gaati?

Jaisa bhi chal raha hai safar
Guruji kee daya ka hai asar
Apne hee jo karma aaye hain dukh bann kar
Katt rahe hain ve bhi Guruji ke dar par
Kya ho sakta hai is se behtar
Ki dukh ka upaay ho jaaye yaheen par
Sabse achchi aushadhi hai Guruji ka naam
Har dukh har kasht se raahat ka karta hai ye intazaam.

Guruji se hai vandan
Ki mere bheetar hota chale vaisa parivartan
Jaisa Guruji ko bhaaye
Jismein Unkee prerna samaaye.

Bhakti ras ka hota chale pravaah
Guruji ke maargdarshan se roshan hoti chale meri raah
Badhti rahe Unhee ko paane kee meri chaah
Duniyadaari kee chhoot-ti jaaye parwaah.

Guruji kee hee sharan mein rahoon aakhiri saans takk
Uske baad ka safar bhi guzare Unkee sharan mein
Bhaagya toh mera khil gaya thaa usee pal
Jis pal Guruji ne jageh dee thi mujhe Apne kamal charan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jis Pal (12/07/2024)