Month: November 2021

November 20, 2021

Om Namaha Shivaya
Aaj Ka Suvichaar 🙏🏻🙏🏻# 1371

Siddhaanton Ka Anusaran

Guru Nanak Dev ji ka Prakash Purab
Saari sangat ne manaaya bahut pyaar se
Prakash Purab ka divas beet gaya
Lekin Unke siddhant na mitaana yaadgaar se.

Khud Nirankaar ne is sansaar mein
Teen siddhaanton ka mahatva bataaya
Aur in siddhaanton ke dwaara
Unhonei jeene ka raasta dikhaaya.

Ek siddhaant hai Vandd chakho
Arjit vastuyon ko saajhaa karo doojon ke saath
Jo anand ann aur dhan ko samudaay mein baantne ka hai
Usey akele bhogne mein nahin hai vo baat.

Ek aur siddhaant hai Naam Japo, arthaat kar lo simran
Isee se toh taregi atma aur tarega mann
Ye upaay hai dhyan mein jaane ka
Ye saadhan hai swayam mein sudhaar laane ka.

Keerat karo, ye hai Guru Nanak Dev dwaara diya gaya siddhaant roopi updesh
Imaandaari aur shishtachaari se rehne ka ka hai ismein sandesh
Shaareerik aur maansik parishram dwaara jeevan mein badhe aadhyatmikta ka samaavesh
Aadar poorvak prem karo Guru se kyunki Unmein baste Hain Sarvesh.

Param poojya Guruji hamaare
Gurbani ka shravan aur manan karne ka dete Hain aadesh
Guru Granth Sahib ji ka har shabd Prabhu ka vachan hai
Aur Unka paalan karna bhakt ka dharam hai.

Beshak Guru Nanak Dev ji ke Prakash Purab ka beet gaya tyohaar
Lekin har pooran Guru ka har vachan hai bhakt ke liye aadesh ke sangg uphaar
Isliye aayiye karein in siddhaanton ka anusaran
Aur safal kar lein hum apna janam aur manan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 19, 2021

Om Namaha Shivaya
Aaj Ka Suvichaar 🙏🏻🙏🏻 # 1370

    Kartik Poornima

Kartik maas kee poornima hai aayi
Tabhi yeh tithi Kartik Poornima hai kehlaayee
Dev Deepawali aur Tripurari Poornima bhi isey hain kehte bhakt jann
Tripurantak Tripurari Shivji ko hai ye tyohaar arpan.

Taarakaasur ke putron ko diya Shivji ne mrityu daan
Aur poora kiya Devon ka nirbhay honei ka armaan
Devon ne diyon aur prakash se manaaya vijay ka yeh vaar
Aur tabb se yeh kehlaaya Dev Deepawali ka tyohaar.

Tulsi maa, jo Vrinda huin, Unka vivah hua Vishnuji ke saath
Aur Kartikeya ka praadurbhaav hua Kartik Poornima wali raat
Vishnuji ke Matsya avatar ka bhi hua janam
Aur Krishnaji ne Radha ke sangg ras leela kar phir kiya Unka vandan.

Prabodhini Ekadashi ke saath hai Kartik Poornima ka sambandh
Chaturmaas ka isee din par hota hai antt
Vishnuji yoganidra ko tyaag dete Hain
Aur Vaikunth mein phir Apna sthaan lete Hain.

Shubh sandesh laata hai Kartik Poornima ka tyohaar
Guru Nanak Dev ji ka Prakash Purab bhi hai yeh vaar
Guru Nanak ji Hain taaranhaar, Ve hee Hain nirankaar
Unkee mahima hai aparampaar.

Itne saare divya tyohaar is ek vaar ko hain nikhaarte
Kartik Poornima ke din bhakt khushiyaan hain manaate
Hamaare Maha Shiv Guruji bhi Om aur Ek Onkar ka mahatva Hain samjhaate
Aur jis bhi roop mein ya naam se bhakt Unhe poojein
Ve sabki praarthna ko Hain sunn paate.

Guruji kahein ki ujjwal aur shubh hai har sitaara
Jo bhi Unkee sharan mein aaya, Unhonei usey hai taara
Guruon ka ashirwaad hota hai itna pyaara
Ki antarmann takk saaf kar deta hai hamaara.

Saari sangat ko shubhkaamnaayein is mubarak tyohaar kee
Aayiye sabhi pooja karein Parwardigaar kee
Dua karein ki mitt jaaye vipatti is sansaar kee
Aur bhalaayee ho har jann ke ghar-parivaar kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 18, 2021

Om Namaha Shivaya
Aaj Ka Suvichaar 🙏🏻🙏🏻 # 1369

Pyaare Guruji Kee Aisee Hai Vadiyaayee

Pyaare Guruji kee aisee hai vadiyaayee
Ki veh pehchaan leti hai chanchal mann kee chaturaayee
Chaahe pehle lagey laabhkaari, yeh chaturaayee kabhi na kaam aayi
Kyunki jahaan aati hai chaturaayee, vahaan se bahut duur ho jaati hai Khudaayee.

Pyaare Guruji kee aisee hai vadiyaayee
Ki veh jaan leti hai nek mann kee sachchaayee
Is sachchaayee kee hoti hai Khuda ke darbar mein sunvaayee
Chaahe der se ho, hoti hai neki mein asal kamaayee.

Pyaare Guruji kee aisee hai vadiyaayee
Ki isey bayaan karne mein khatm ho jaaye mahasaagar roopi siyahi
Phir bhi na bayaan ho paaye uskee gehraayee
Isee vadiyaayee ne hai har doobte huey kee jaan bachaayee.

Pyaare Guruji kee aisee hai vadiyaayee
Ki iske sahaare har uss praani kee jaan hai bach paayi
Jiskee jaan pe thi bann aayi
Jabb usne karmon ke mahaasaagar mein thi dubki lagaayi.

Pyaare Guruji kee aisee hai vadiyaayee
Ki is se duur hoti hai akelepann kee tanhaayee
Kyunki mann mein nirantar hoti hai naam kee shehnaayee
Jis mein leen rehne se Yamraj ke paas kabhi na hoti ruswaai.

Pyaare Guruji kee aisee hai vadiyaayee
Ki koi aur divya shakti iska raaz na jaan paayi
Is vadiyaayee ne rogiyon par apni karuna hai barsaayee
Isee vadiyaayee ke prabhaav se hee asar kar paati hai har davaai.

Pyaare Guruji kee aisee hai vadiyaayee
Ki ye sangat ke liye sewa, simran, satsang kee daat hai laayi
Is vadiyaayee se bhakton ke jeevan mein suraksha hai aayi
Aur is vadiyaayee se hee bhakton ne Guruji kee mamta hai paayi.

Pyaare Guruji kee aisee hai vadiyaayee
Ki ismein hamaari oar se sarvsamarpan ke paigaam kee soochna hai aayi
Is vadiyaayee kee badaulat har taraf har pal Guruji kee rehematein hain chhaayi
Is vadiyaayee kee mehar ko paane ke liye saari sangat ko ho badhaai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 17, 2021

Om Namaha Shivaya
Aaj Ka Suvichaar 🙏🏻🙏🏻 # 1368

                     Santosh Ka Vaas

Guruji par bhakt ka vishwaas
Isey gehra karta hai har aane wala shwaas
Yeh basta nahin chandd lamhon ke sukh mein
Ye vo ehsaas hai jo kamzor nahin hota dukh mein
Kyunki vishwaas nahin hota sukh ya dukh ka mohtaaj
Vishwaas jo ek baar ho jaaye, toh har paristhiti par karta hai ye raaj.

Chaahe vo ho sukh ya phir dukh ka samaa
Ya yoon kaho ki ho khushi ya gumm ka pal
Guruji par jo vishwaas hai bhakt ka
Veh kabhi nahin hota kamzor ya nirbal.

Jo nirbal ho jaaye, veh vishwaas nahin hai sachcha
Guruji har bhakt ke naath Hain, aur har bhakt hai Unka bachcha
Isliye jaise bachche ka apne naath par hota hai vishwaas sampoorna aur atoot
Jaise naath bachche ko sambhaalta hai chaahe kabhi bachcha jaaye rooth
Vaise hee Guruji har pal rakhte Hain bhakton par Apni mehare nazar
Aur sachche bhakt ko sadaa hoti hai is tathya kee kadar.

Is vishwaas par vishwaas karein hum
Is vishwaas ke sahaare sach se na darein hum
Satya ka anusaran karein aur satya ka dein saath sada,
Satya hee bann jaayein aur satya se nikhaar lein jeene kee adaa.

Jitna dridh hota chalega vishwaas
Utna zyada hoga shukraguzaar honei ka ehsaas
Shukrana karte rehne se mann nahin hoga udaas
Kyunki Shukrana mein hee hai santosh ka vaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 16, 2021

Om Namaha Shivaya
Aaj Ka Suvichaar 🙏🏻🙏🏻 # 1367

Guruji Dugri Wale Ne Diya Hai Aisa Sahaara

Jabb duniya mein rehte huey duniyavee maajre na aane lagey raas
Tabb hee aa paayi mai Guruji ke paas
Uss se pehle mera waqt nahin thaa aaya
Guruji ne ye kehkar mujhe samjhaaya.

Shukr hai Guruji ka ki Unhonei mujhe kabhi bhi akela na honei diya
Har pal har paristhiti mein Unhonei mera haath thaam liya
Samjhaaya Unhonei ki zindagi toh aane jaane waalon ka mela hai
Jiske jeevan mein Guru nahin, sirf vahee shakhs akela hai.

Guruji ke diye huey protsaahan ne mujhe dee jeene kee prerna
Guruji ke ashirwaad se aur bhi utsaahit hui antarmann kee chetna
Jeene ka jaise mujhe ek naya maqsad mil gaya
Guruji ke sangg rishte ka kamal hriday mein khil gaya.

Khushi aur gumm dono rahe aate jeevan mein
Kabhi sulajh jaata mann toh kabhi hoti uljhan mann mein
Jabb jabb lagaa ki kaise hoga yeh bhav saagar paar
Guruji ne pyaar se samjhaaya mujhe har baar.

Barkaraar rakh tu apni oar se changey vichaar aur karam
Nibhaati chal tu apni oar se insaaniyat ka dharam
Teri zimmedaari hai tere karmon ke hisaab kee oar
Tu nibha apni zimmedaari aur mujhse seedhi taar joad.

Jabb takk zindagi hai, tabb takk chalta rahega yeh mela
Kisee ne khushnaseebi toh kisee ne badkismati samajhkar isey hai jhela
Jaisa bhi lagey, pichhle karmon ka hisaab toh hai chukaana
Aur aaj ke karmon se hai agley janam ka muqaddar banaana.

Shukr hai ki Guruji ne ye sabb samjhaaya
Mere dil ke dukh dard ko Unhonei Apni mamta ka marham lagaaya
Kaha Unhonei ki ye sochne mein waqt na karoon mai zaaya
Ki is jeevan mein kaun apna hai aur kaun paraaya.

Kyunki Guruji sabke apne Hain, yeh vaddi sachchaayee hai
Guruji kee sharan mein dukh milna bhi sukh kee parchhaayee hai
Guruji kee divyata ke ujaale se jabb parchhaayee gaayab ho jaati hai
Toh sukh ke zaahir honei se zindagi ujjwal ho paati hai.

Isliye aankhein bandd bhi hon
Toh bhi dekh paaoon is divya ujaale ko
Aur mann kee matvaali rasna se
Pukaaroon Guruji Dugri Wale ko.

Jabb bhi mainey pyaare Guruji ko hai pukaara
Guruji Dugri Wale ne diya hai aisa sahaara
Ki ehsaas hota hai mai apni maiya kee goad mein hoon har pal
Aur surakshit hai beete huey kal ke jaise mera aaj aur aane wala kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 15, 2021

Om Namaha Shivaya
Aaj Ka Suvichaar 🙏🏻🙏🏻 # 1366

              Aapke Charnon Mein

Pyaare Guruji,

Mujhe kisee aur hamdard kee zaroorat nahin
Mere dil kee baat mainey Aapse hai kahi
Buss, Aapke charnon mein rehne kee hai mujhe chaah
Vaheen se shuru vaheen par khatm ho mere har janam ke jeevan kee raah.

Aapke charnon ke sukoon se zyada sukoon mil nahin sakta aur kaheen
Aapke charnon ke sparsh se dhanya hoti hai ye zameen
Aapke charnon mein sir jhukaata hai akash
Aapke charnon kee toh dhool se bhi anugrihit hota hai samast srishti ka sakash.

Rehematon ka dariya Aapke charnon ko chhoo kar
Mehar se maalamaal hai ho jaata
Aur Aapki dee hui rehematon kee daulat se
Veh dariya bhakton par rehematein hai barsaata.

Kshamaasheelta ka gehra saagar
Paakar Aapke charnon ke amrit kee gaagar
Uss amrit ko kar leta hai swayam mein atmasaat
Aur pahunchaata hai bhakt janon ko Aapke diye kshamaa daan kee daat.

Ibadat aur sarv-samarpan ka sandesh
Karta hai Aapke charnon ke ashirwaad mein samaavesh
Yeh sandesh karta hai anta-karan mein pravesh
Bann kar Aap Sarvesh ka aadesh.

Aapke charnon kee vaddi hai vadiyaayee
Aapke charnon mein hoti hai sabki sunvaayee
Jabb se Aapki kripa se mai Aapke charnon mein aayi
Tabb se jeevan mein anokhi sadgati hai aayi.

Guruji, Apne charnon mein rakhna sadaa mujh nadaan ko
Aapke charnon mein rehkar japti rahoon Aapke naam ko
Sabhi devi devta Aap mein Hain samaaye, sabhi pranaam karein Aap Bhagwaan ko
Aapke charan kamal ka ashish paakar saari sangat ka kalyaan ho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 14, 2021

Om Namaha Shivaya
Aaj Ka Suvichaar 🙏🏻🙏🏻 # 1365

Yeh Mool Hai Aur Yahee Hai Aadhaar

Yeh mool hai aur yahee hai aadhaar
Yahee hai zindagi ka saar
Ki Guruji ka hai hum par upkaar
Unhe hum sabse hai beintehaa pyaar.

Kitna sundar hai Guruji ka darbar
Basaa hai is darbar mein aseem pyaar
Yeh pyaar laaye sabke jeevan mein bahaar
Yeh ardaas hai Guruji se baar baar.

Guruji sunte Hain sabki pukaar
Unkee leela hai aparampaar
Aa jaaye chaahe mushkil baar baar
Ve sambhaalte Hain dekar dulaar.

Hai hamein uss pal ka intazaar
Jabb milega sachkhand ka dwaar
Guruji ke niyantran mein hai waqt kee raftaar
Isliye intazaar ko hum rakhein barkaraar.

Isliye ho jaayein hum tayyaar
Na jaane dein is safar ko bekaar
Agar pahunchna hai uss paar
Toh baaki har tamanna ko dein hum maar.

Siwaaye apni neeyat, swatantra ichcha, aur ravaiya ke bin kuch hamaare haath mein nahin
Hum kar lein is satya ka ikraar
Sewa, simran, aur dhyan ke dwaara duur karein har manovikaar
Apni har khaami ko sweekar kar maan lein Guruji ke samaksh apni haar.

Hokar Guruji ke naam kee naav mein sawaar
Jodein rahein hum Guruji se seedhi taar
Har laukik sukh kshanabhangur hai isliye usmein aasakti hai bekaar
Aasakti rakhein Guruji mein, toh Unse milega Unke chintan ka anmol uphaar.

Is chaarul chintan se gyan hoga ki mithya hai ye sansaar
Koi bhi apna nahin chaahe aaspaas loag hon kayee hazaar
Sabse zaroori hai aur sabse sukhdaayee hai Guruji ka deedar
MahaShiv Hain Ve, Hain hum sabke param poojya paalanhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 13, 2021

Om Namaha Shivaya
Aaj Ka Suvichaar 🙏🏻🙏🏻 # 1364

                       Veer Viraaj

Kabhi toh ye hansaati hai
Kabhi bahut rulaati hai
Jo bhi kaho, bahut khoobsoorat hai
Yeh daastaan jo zindagi kehlaati hai.

Kabhi sab kuch lagta hai itna suhaana
Toh kabhi lagta hai udaasi ka afsaana
Jaisa bhi ho, bahut dilchasp hai
Is zindagi ke tamaashe ka taraana.

Kabhi is kahaani mein lagta hai har koi apna
Kabhi aisa lagta hai ki vo hai hamaari kalpana
Jaisa bhi lagey, bahut anokha hai
Yeh kahaani roopi adbhut sa sapna.

Kabhi lagta hai ki sab hai theek
Kabhi lagta hai ki qayamat hai nazdeek
Jaisa bhi lagey, bahut romaanchak hai
Yeh anubhav, jiska Guruji ke vash mein hai naseeb.

Jaisa bhi mehsoos ho is jeevan mein
Jo bhi ho mann mein iskee paribhaasha
Guruji kee nigraani mein hai jeevan ka har pal
Ve dekh rahe Hain saara tamasha.

Is satya se miltee hai itnee saantvanaa
Ki chaahe sooraj kee roshni ho ya aa jaaye baadal ghanaa
Guruji ka aanchal sadaa deta rahega hamein panaah
Srishti ka har kann hai is tathya ka gavaah.

Buss, phir toh har pal hai Guruji ke hukm ka mohtaaj
Ve Hain sabki neeyat ko parakhkar niyati ka nishchay karne wale sartaaj
Tabb bhi Unka raaj thaa, aur abb bhi hai Unhee ka raaj
Ve hee Hain mata aur pita, aur Ve hee Hain vishal Vishweshwar aur veer Viraaj.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 12, 2021

Om Namaha Shivaya
Aaj Ka Suvichaar 🙏🏻🙏🏻 # 1363

        Har Pal Guruji Ka Shukrana

Har lamha beet raha hai Guruji kee mehar se
Raat ke khatm honei par Ve hee hamaari mulaakaat karaate Hain sehar se
Arzi hai Unse ki saari sangat paati rahe Unka ashirwaad
Karein Guruji Maharaj ko har pal aur har saans ke liye dhanyawaad.

Har subah Unke naam se hoti hai shuru
Har pal yaad rakhte Hain hamein hamaare Guru
Har din ka antt Unko Shukrana karte huey ho khatm
Toh is janam ke saath saath sudharte jaayenge pehle se hee aane wale janam.

Shukrana mein basaa ho hamaare vishwaas ka ehsaas
Shukrana mein niswaarth-ta ho, bin kuch bhi maangne ka prayaas
Shukrana mein sugandh ho sarvsamarpan kee
Shukrana se dhool udd jaaye mann ke darpan kee.

Shukrana mein jhalak ho simran ke bhaav kee
Shukrana mein spasht-ta ho shikaayat ke abhaav kee
Shukrana mein ho neevanpann
Shukrana mein ho deewaanapan.

Deewaaanapan pyaare Guruji ke liye
Jinhonei ruhaani ratna hamein Hain diye
Unhonei hamein jeevan ka anand lena sikhaaya
Aur banda bann jaane ka maarg dikhaaya.

Chhota sa lafz hai Shukrana
Lekin isee mein basaa hai santusht jeevan ka taraana
Gaate huey hum Guruji kee mahima ka gaana
Karte rahein hum har pal Guruji ka Shukrana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 11, 2021

Om Namaha Shivaya
Aaj Ka Suvichaar 🙏🏻🙏🏻 # 1362

      Hum Atyant Khushnaseeb Hain 

Kitne varsh ho gaye hamein janme huey
Phir bhi hamein jeene ka saleeqa na aaya
Kitne safar kar liye humne yoon har janam mein bhatakte huey
Phir bhi sukoon paane ka tareeka na aaya.

Guruji Maharaj ne dekha aur jaana
Ki hamaari zindagi mein aise kashton ne hai aana
Jo hum na jhel paayenge Unke saath ke bina
Aur jo mushkil kar denge hamaara jeena.

Maa bannkar Guruji ne hamein Apne aanchal mein liya
Pita bannkar Unhonei hamein saahas diya
Arey, hum toh girne hee lagey thei aur Unhonei sambhaal liya hamein samay par
Jisne hamein giraana chaaha, Guruji ne vijay paayi har uss pralay par.

Hum toh jaante hee nahin hain ve andekhe kasht
Jo hamein gherne se pehle hee Guruji kee mehar se gaye tal
Jinhonei hamaara beeta hua kal sanvaara
Ve kyun nahin nikhaarenge hamaara aaj aur aane wala kal?

Isliye shraddha se kar ke Guruji ka simran aur Unkee bhakti
Unke aanchal kee narmi se paayein dheeraj aur shakti
Unke sneh aur Unkee divyata mein rakhte huey hum aasakti
Seekhte rahein Unse hum santusht rehne kee yukti.

Beshak mushkil hai ye is kalyugi daur mein
Jahaan agyan ka andhera phaila hai bhor mein
Lekin Guruji Maharaj ke paas hai veh prataap
Jis se duur ho sakta hai hamaara vilaap aur santaap.

Isliye chaahe yeh duniya bhi bann jaaye hamaara shatru
Hum ponchh kar apni aankhon ke ashru
Guruji ko kar ke sarvsamarpan
Apne changey karmon kee shradhanjali karein Unhe arpan.

Unhonei Apni sharan mein liya, Unka jitna shukrana karein hum, veh hoga kumm
Bin sunaaye, bin jataaye, Ve kumm karte rehte Hain hamaara har gumm
Hum par Unkee mehare nazar rehti hai har kshan
Buss, hamein Unse seedhi taar jod kar shant rakhna hoga apna mann.

Jitna samarpan karenge hum Guruji ko
Utna badhta jaayega Unka hum par ashirwaad
Kyunki jabb zindagi kee doar hogi Unke haath mein
Toh Ve har pal hongei bheetar aur saath mein.

Isliye ghabraane kee zaroorat hee nahin hai
Jo Guruji kar rahe Hain, vahee sahi hai
Buss, hamaari oar se rahe nek neeyat aur ruhaani ravaiya
Aur apni swatantra ichchaa mein rakhein hum niswaarth nazariya

Phir chaahe kitne bhi kathin hon is jeevan ke imtehaan
Hamein har pehar hoga yeh itminaan
Ki Guruji karaa rahe Hain hamaare karmon ka bhugtaan
Hum atyant khushnaseeb hain ki hamein Guruji ke roop mein miley Hain MahaShiv Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja