Author: dhirjabhat

July 13, 2021

Om Namaha Shivaya
Aaj Ka Suvichaar 🙏🏻🙏🏻 # 1241

        Deewaanon Kee Kahaani

Suna thaa ye mehfil na chalegi zyada der takk,
Lekin dekh kar hee hua yakeen,
Na jaane kabb mehfil ka rangg pheeka padd gaya,
Aur mamla honei lagg gaya sangeen.

Char din kee chehel pehel thee,
Phir aayi khaamoshi kee raat,
Mehfil ke deewane huey niraash,
Aur malte reh gaye ve haath.

Guzar raha thaa vahaan se ek musaafir,
Bilkul mastaane andaaz mein,
Dekhkar in deewanon ko usne,
Shaamil kiya unhe ek raaz mein.

Raaze hakeekat jo kee musaafir ne bayaan,
Toh mehfil ke deewanon mein aayi thodi jaan,
Maano unka raasta badal gaya jaise,
Na jaane ye sab uss raaz se hua kaise.

Musaafir ne raaz bataane ke baad,
Naye raahiyon ko kiya ravaana,
Khud bhi veh vahaan par pahunchaa,
Bin banaaye koi bahaana.

Dekh kar vahaan ke mahaul ko,
Kumm honei lagi deewaanon kee pareshaani,
Satsang ho raha thaa Guruji ka,
Aur koi sangat suna rahi thi apni zubaani.

Sunkar uss zubaani ko,
Deewaanon ne joda uss se apni zindagaani ko,
Aur vaheen par baith kar sun-ne lagey,
Bin palkein jhapke aur bin thakey.

Sangat ne sunaaya kaise uskee zindagi badal gayi,
Kaise Guruji kee sharan mein aane se uskee har buri aadat sanvar gayi,
In mehfil ke deewaanon ko aaya samajh,
Ki vahaan pahunchne se unkee uljhanein gayin sulajh.

Jo khushi ve baahar dhoondh rahe thei,
Veh milee unhe vahaan par,
Dekha unhonei Guruji ke swaroop ko,
Darbar sajaa thaa jahaan par.

Aakarshan kuch aisa thaa,
Ki unka dil nahin kiya vahaan se jaane ka,
Unhonei musaafir ka shukrana kiya,
Jisne koi ehsaan na jataaya unhe vahaan pahunchaane ka.

Darbar mein sees jhukaa kar,
Parivartan hua musaafir ke roop mein,
Aur dekhte dekhte musaafir maano,
Samaa gaya usee Swaroop mein.

Deewanon ko hui bahut hairaani,
Samajh aaya ki Guruji thei aaye,
Aur unhe sudharne ka raasta dikhakar,
Ve Apne swaroop mein ja samaaye.

Kuch deewane toh ronei lagey,
Kuch deewaane lagey muskuraane,
Guruji ko Bhagwaan maankar,
Bhaav vibhor huey ve saare deewaane.

Mehfil ke deewaane mehfil ke bajaaye,
Abb ho gaye Guruji ke deewaane,
Guruji kee leela aur mehar se,
Guruji ke bhajan lagey ve gaane.

Mehfil mein phir bhi jaate thei,
Aish karne aur rangg jamaane,
Lekin taur tareeke sudhar gaye thei unke,
Kyunki abb ve thei Guruji ke deewaane.

Buree aadatein gayin chhoot,
Ahankar unka gaya toot,
Jagriti aane lagi antar-mann mein,
Leen hotey gaye ve simran mein.

Waqt ke saath saath Unka safar,
Hota gaya aur bhi ruhaani,
Unhe apni yeh nayee dagar,
Lagti rahi bahut suhaani.

Mushkilein bhi huin kayee,
Kuch puraani kuch nayee,
Lekin abb ve thei Guruji kee sharan mein,
Toh Guruji ka haath thaa unke har sankat ke haran mein.

Yoon hee beet gaya samay,
Sewa, Satsang, simran ke sangg,
In deewaanon ke jeevan par chadh gaya,
Guruji ke prati bhakti ka gehra rangg.

Buss, phir toh ve saare gaye tarr,
Kyunki mila thaa Unhe Guruji ka dar,
Guruji ke ashish ka amrit ve lagey peene,
Shukrana karte karte ve lagey jeene.

Pyaare Guruji ne nikhaar dee,
Deewaanon kee zindagi,
Safal ho gaya deewaanon ka jeevan,
Kar ke Guruji kee bandagi.

Guruji kee bandagi mein hai veh pyaar,
Jo bhakton ke jeevan par laata hai nikhaar,
Guruji Hain sabke Parwardigaar,
Unkee mahima hai aparampaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 12, 2021

Om Namaha Shivaya
Aaj Ka Suvichaar 🙏🏻🙏🏻# 1240

           Aapka Aur Mera Saath

Pyaare Guruji,

Jis bhi disha mein waqt bahe,
Jaisa bhi zindagi mein haalaat rahe,
Aapka aur mera saath rahe,
Sadaa Aapki yeh saugat rahe.

Jabb takk mujh mein shwaas ho,
Aap par mera atoot vishwaas ho,
Mera dil Aapka naam leta rahe,
Chaahe jeevan jo bhi dukh sukh deta rahe.

Jabb takk is dil mein ho dhadkan,
Aapka naam japey mera mann,
Aapka aur mera rishta ho sabse bada dhan,
Jo gehra hota rahe har janam.

Jabb takk yeh mann kar sakey vichaar,
Tabb takk na maanoon mein kabhi bhi haar,
Chaahe chunauti de yeh saara sansaar,
Meri himmat ko badhaaye Aapka pyaar.

Jabb takk rahein yeh sooraj, yeh chaand, ye taare,
Aap hee hon mujhe sabse pyaare,
Mai har kasht jhel sakoon Aapke sahaare,
Sadaa sees jhukaaoon Aapke dwaare.

Jabb takk jeevan kee in raahon mein shool hon,
Unn raahon ke aagey takk Aapki mamta ke phool hon,
Chaahe kabhi kabhi jeevan kee paristhitiyaan pratikool hoon,
Mujhe Aapke saare faisle vinamrataa se qubool hon.

Jabb takk rahe yeh sansaar aur yeh srishti,
Aapki rahe har bhakt par drishti,
Hoti rahe har jageh Aapke ashirwaad kee vrishti,
Aur jeevan mein sadaa rahe samashti aur santushti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 11, 2021

Om Namaha Shivaya
Aaj Ka Suvichaar 🙏🏻🙏🏻 # 1239

           Jisne Guruji Ko Rijhaaya

Dard toh sabka kissa hai,
Sabki zindagi ka hissa hai,
Kisee ko dil mein, kisee ko shareer mein,
Dard likha hai sabki taqdeer mein.

Davaa bhi raas aati nahin,
Yeh peeda baaz aati nahin,
Bataayein bhi toh kisey,
Sabhi iske taley hain pisey.

Buss ek hee upaay hai,
Jahaan raahat samaaye hai,
Vo hai pyaare Guruji ka dwaar,
Vahaan dard bhi maan leta hai haar.

Ek aisa hunar bakhsha hai Guruji ne,
Apne divya dwaar ko,
Jo pyaar kaheen aur milta nahin,
Har koi yahaan paata hai uss pyaar ko.

Yahaan aushadhi miltee hai dard ko,
Chai prasad aur langar prasad ke dwaara,
Aur Guruji ke simran aur Satsang se,
Milta hai bhakton ko har tarehn ka sahaara.

Chaahe dukh dard phir bhi aate hain,
Dard ka kissa nahin rehta zindagi ka hissa,
Aur Guruji ke dwaar par bhakt ke aane se,
Ho jaati hai har beemari aur har laachaari kee chikitsa.

Nazariya yoon sanvar jaata hai,
Ki vahee dukh bhi pehle se kumm sataata hai,
Jo Guruji ke dwaar par aata hai,
Uskee kismat ka lekha badal jaata hai.

Tamanna hai ki Guruji Apne dwaar par sabko bulaayein,
Tamanna hai ki hum sab pyaare Guruji ko rijhaayein,
Duniya ko rijhaaya toh kya rijhaaya,
Jisne Guruji ko rijhaaya, usne toh anmol khazaana paaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 10, 2021

Om Namaha Shivaya
Aaj Ka Suvichaar 🙏🏻🙏🏻 # 1238

                  Aapka Saath

Guruji, jabb se mila hai Aapka saath,
Aapse hoti rehti hai baat,
Aap hee se hoti hai mere har din kee shuruaat,
Aap hee kee kripa se chayyn se beet jaati hai raat.

Aapka saath hai, isliye nahin hota akelapann,
Aapse vaartaalaap karta rehta hai mann,
Aapki mehar se beet jaata har kshan,
Har kshan ko milta hai Aapki daya ka dhan.

Swaroop se baat karke bhi Aapko saath paati hoon,
Swaroop na ho toh apne mann ke mandir mein chali jaati hoon,
Jahaan hotey Hain Aapke manohar darshan,
Aur harsh se prafullit ho jaata hai mann.

Dukhde bhi Aapko sunaati hoon,
Aapke pyaar mein geet gungunaati hoon,
Aapke saath se phooli nahin samaati hoon,
Aap sab jaante Hain, phir bhi mai naadaan Aapko sab kuch bataati hoon.

Aapke saath mein anokha jazbaat hai,
Isse hua mere jeevan mein suprabhat hai,
Yeh saath Aapki hee dee hui daat hai,
Varna meri toh nahin koi aukat hai.

Aapse dua hai meri, mere daata,
Samay ke saath saath gehra ho yeh naata,
Abb toh Aap hee Hain naath, aur Aap hee Hain meri mata,
Aap hee meet, bhraata, aur Aap hee Hain Vidhaata.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 9, 2021

Om Namaha Shivaya
Aaj Ka Suvichaar 🙏🏻🙏🏻 # 1237

                 Karuna Ka Jahaaz

Pyaare Guruji,

Dil toota bin machaaye shor,
Saath chhoota jab kamzor padd gayi doar,
Suna thaa aur maan liya ki neki kar kooen mein daal,
Aap sangg na hotey, toh bura ho jaata haal.

Duniya waalon ko na samajh aaya udaasi ka raaz,
Lekin Aapne sun lee dil tootne kee ansuni si awaaz,
Mujhe sunaana na padaa Aapko apne dukh bhare nagme ka saaz,
Jahaan Aapne baithaaya, veh hai karuna ka jahaaz.

Aapka banaaya hua yeh jahaaz kitna viraat hai,
Yahaan haunsle ke saath jazbaat ko miley Aapki mamta,
Yeh jahaaz badhaa deta hai,
Dukh sehne kee bhi kshamtaa.

Is jahaaz mein jab se hui hoon savaar,
Dukh ko udaa deti hai bandagi kee bahaar,
Is bahaar mein khushboo hai Aapke pyaar kee,
Is bahaar mein ruhaaniyat hai Aapke deedar kee.

Is bandagi kee bahaar par Aapki nadar hai,
Tabhi toh ismein basee hai simran kee dhun,
Is bahaar par mann mein basey bhaav ka asar hai,
Isey sajaata hai Guru shishya ke prem ka gunn.

Aapne Apna naam dekar jeene ka jo andaaz hai bakhsha,
Kripa kar mujhe jeene dena usee andaaz mein,
Jismein prem hai, meharbaani hai Aapki,
Kripa kar mujhe rehne dena uss jahaaz mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 8, 2021

Om Namaha Shivaya
Aaj Ka Suvichaar 🙏🏻🙏🏻 # 1236

              Guruji Kee Mehar Se

Guruji kee mehar se sadaa hamaara,
Dharam rahey insaaniyat ka,
Jeevan rahey ruhaaniyat ka,
Nek charitra rahey neeyat ka,
Koi avsar na dhoondein hum shikaayat ka.

Guruji kee mehar se hum apanaayein,
Raasta saralta ka,
Vyavhaar taralta ka,
Vichaar nirmaltaa ka,
Bhaav komalta ka.

Guruji kee mehar se karte chalein hum,
Simran Guruji ka,
Shravan Guruji ka,
Gungaan Guruji ka,
Sammaan Guruji ka.

Guruji kee mehar se,
Mann mein aaye shuddhi,
Shubh ho hamaari buddhi,
Rangg laaye subuddhi,
Gyaan mein aaye vriddhi.

Guruji kee mehar se ho hamaare mann mein,
Jazbaat paawan pyaar ka,
Imaan ke ikraar ka,
Dhyan Parwardigaar ka,
Shukrana Taaranhaar ka.

Hamaara sachcha iraada,
Aur is iraade par Guruji kee mehar,
In sabse nishchitt hee phalega,
Har gali, har gaaon, har shehar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 7, 2021

Om Namaha Shivaya
Aaj Ka Suvichaar 🙏🏻🙏🏻 #
1235

          Guruji Ka Bulaava Aaya

Guruji ka bulaava aaya,
Guruji ka bulaava aaya,
Paigaam pyaar ka laaya,
Guruji ka bulaava aaya.

Hum dekhein jidhar jidhar,
Guruji hee dikhte Hain,
Hum bhaagan wale hain,
Hamein darshan milte hai,
Poora sansaar hai aaya,
Guruji ka bulaava aaya.

Satsang mein aane se,
Hamein lagta achchaa hai,
Sewa aur simran ka,
Anand bhi sachcha hai,
Tyohaar hai aaj aaya,
Guruji ka bulaava aaya.

Paani ko bhi Guruji,
Amrit Hain banaa dete,
Beghar bechaaron ko,
Jholi mein panaah dete,
Adhikaar sabhi ko dilaaya,
Guruji ka bulaava aaya.

Ye jeevan sanvar gaya,
Unkee vadiyaayee se,
Abb darr hee nahin lagta,
Yahaan se vidaayee se,
Vyarth hai ye moh maya,
Guruji ka bulaava aaya.

Yahaan apna koi nahin,
Laukik ye naate hain,
Logon ka kya kehna,
Yoon aate jaate hain,
Sansaar toh hua paraaya,
Guruji ka bulaava aaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 6, 2021

Om Namaha Shivaya
Aaj Ka Suvichaar 🙏🏻🙏🏻 # 1234

                Yeh Shubh Tithi

Itnee shubh tithi hai saat July,
Saari sangat is din ko manaaye,
Pyaare Guruji ne liya roop bashar ka,
Sangat ko mila daan Unke dar ka.

Kitnee dhanya thein Mataji,
Jinhonei janam diya Guruji ko,
Kitne dhanya hain Bapuji pyaare,
Jinhonei bada kiya Guruji ko.

Bashar ka avatar lekar aaye,
Guruji yahaan hamaare liye,
Kitne asahaay bhakton ko Unhonei,
Anek prakaar ke sahaare diye.

Bachpan mein bhi Unkee leela,
Zyaada der na chhup paayi,
Unkee mehar se sangat kee bhalaayee,
Kabhi bhi na ruk paayi.

Aish bhi khoob karaayi bhakton ko,
Aur saath saath hee Unhe taara,
Tabb bhi aur abb bhi Unkee sangat ka,
Unke ashirwaad ke bin nahin guzaara.

Deen aur nirdhan sangat ke ghar,
Ve swayam hee chale jaate,
Aur Apni hee marzi se Ve,
Sangat ko Apne dar par bulaate.

Dugri, Chandigarh, Jalandhar, Delhi,
Har jageh par Unhe sangat milee,
Sangat badhti chali gayi duniya ke konei konei mein,
Tanik bhi vilamb nahin hota bhakton ka kalyaan honei mein.

Chai prasad pilaana Guruji ne,
Phir langar prasad chhakaana,
Poora ashirwaad dekar bhakton ko,
Phir karte Ve unhe ravaana.

Kisee kisee ko Ve Shiv roop mein dein darshan,
Kisee kisee ko dikhein Ve sapne mein,
Har devi aur devtaa ko,
Ve samaate Hain aaj bhi Apne mein.

“Pehle vi mai, aaj vi mai, aggey vi mai,
Aithe koi gaddi nahin chaldi,” Guruji ne samjhaaya,
Aur Apni guruyaayee ke har pal mein,
Unhonei Apni vadiyaayee se avagat karaaya.

Bahut khushakismat hain hum sab,
Ki hum hain aise Guru kee sharan mein,
Jo kabhi koi kasar nahin chodte Hain,
Hamaare kashton ke haran mein.

Guruji kee mehar se,
Unkee mahima ka karte rahein hum gungaan,
Hamein toh Guruji ke roop mein,
Miley Hain MahaShiv Bhagwaan.

Guruji ke satsang suno aur sunaao,
Naacho, gaao, aur mauj manaao,
Bade bhaag hamaare ki yeh shubh din hai aaya,
Maalik aaj ke din swayam hee dharti par aaya.

Yeh shubh tithi apne saath,
Kitnee khushiyan hai laayee,
Guruji ke avatar divas ke shubh avsar par,
Saari sangat ko bahut bahut badhaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 5, 2021

Om Namaha Shivaya
Aaj Ka Suvichaar 🙏🏻🙏🏻 # 1233

             Sampoorna Sahaara

Jab se mila Aapka saath Guruvar,
Zindagi kuch aisee sanvar gayi,
Ki Aapke saath ke sangg,
Har duvidha mein bhi banti gayi dagar nayi.

Aapke paas hee upaay hai hamaari har mushkil ka,
Aapke paas hee naksha aur niyantran hai hamaari manzil ka,
Aap toh hum sabke liye Yamraj se bhi ladte Hain,
Kuch hee kasht hain jo hamein khud bhugatne padte hain.

Usmein bhi hamaari jaan nikal see jaati hai,
Mann kee sthiti kitnee bigad see jaati hai,
Sochne kee himmat bhi nahin padti ki Aapke bina hum kya karte,
Marte marte jeete aur har chunauti se darte.

Aapke prem ke bin hum nikhar na paayenge,
Aapke anushaasan ke bin hum sudhar na paayenge,
Aapke maargdarshan ke bin hum kahaan jaayenge?
Aap jahaan raah dikhaayenge hum toh vahaan jaayenge.

Phir jaisi bhi hon ve raahein,
Aapne thaami hongi hamaari baahein,
Isliye koi bhi gumm na hoga,
Kyunki Aapka ashish kabhi kumm na hoga.

Duvidha duur ho jaayegi, suvidha kee subah aayegi,
Uljhan tik na paayegi, suljhan hamein galey lagaayegi,
Aapki mehar, Aapki mamta, Aapki mahima se,
Zindagi saralta kee oar le jaayegi.

Agyani hain, naadaan hain hum, galatiyan karte hain dobaara dobaara,
Phir bhi Aap hamaare liye khula rakhte Hain Apna dwaara.
Maargdarshan kripa kar karte rehna hamaara,
Apne har bhakt ke liye Aap hee Hain sampoorna sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 4, 2021

Om Namaha Shivaya
Aaj Ka Suvichaar 🙏🏻🙏🏻 #
1232

       Swatantrata 

Swatantrata Diwas hai aaya yahaan par,
Lekin Jinkee hukoomat hai saare jahaan par,
Ve toh bhautik swatantrata se bhi kaheen zyaada azaadi chaahte Hain dena,
Jiske liye hamein niswaarth bhaav se Unka naam hai lena.

MahaShiv Guruji hamaare,
Pashupati Param pyaare,
Dharti par bashar bannkar Ve aaye,
Taaki Unkee sangat azaad ho paaye.

Azaad, vikaaron ke paash se,
Azaad, anyaaya aur andhvishwaas se,
Azaad, jhoothe dikhaawe se,
Azaad, dhong ke pehnaave se.

Azaad, anuchit soch aur anuchit karam se,
Azaad, baar baar ke janam aur maran se,
Taaki hum sabka ho jaaye kalyaan,
Aur mil jaaye antt mein mukti ka daan.

Guruji ne bakhshi hai daat,
Satsang, sewa, aur simran kee,
Jis se sthiti sudhar sakti hai,
Hum sabke tann mann kee.

Pavitrikaran hoga toh har vikaar chhoot-ta rahega,
Pashupati kee kripa se hamein baandhne wala paash toot-ta rahega,
Isliye kyun na hum Guruji kee mehar se,
Mulakaat karein adhyaatmik swatantrata kee sehar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja