Author: dhirjabhat

April 14, 2021

Om Namaha Shivaya
Aaj Ka Suvichaar 🙏🏻🙏🏻 # 1151

Guruji Sangg Hain Tere

Chaahe sapne toot jaayein,
Chaahe apne rooth jaayein,
Chaahe duniya wale chhoot jaayein,
Guruji sangg Hain tere.

Chaahe tufaani raat ho,
Chaahe moosalaadhaar barsaat ho,
Chaahe kitnee bhi bigdi baat ho,
Guruji sangg Hain tere.

Chaahe raahon mein shool ho,
Chaahe aankhon mein dhool ho,
Chaahe tujhse hui badi bhool ho,
Guruji sangg Hain tere.

Chaahe zamaane ka badalta rangg ho,
Chaahe dhyan kisee kaaranvash bhangg ho,
Chaahe tere dil aur dimaag mein jangg ho,
Guruji sangg Hain tere.

Chaahe safar mein tu uss paar ho,
Chaahe safar mein tu is paar ho,
Chaahe safar mein tu jis paar ho,
Guruji sangg Hain tere.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 13, 2021

Om Namaha Shivaya
Aaj Ka Suvichaar 🙏🏻🙏🏻 # 1150

                 Aa Gayi Baisakhi 

Aa gayi Baisakhi,
Lekar nutan varsh,
Guruji kee kripa se sabke mann mein,
Upje prem aur harsh.

Nayee fasal ke saath saath,
Aaya hai saal naya,
Pehle se bhi zyada barse,
Sab par Guruji kee daya.

1699 mein isee taareekh par,
Khalsa panth banaa Guru Gobind Singh ji ke shaasan mein,
Utsaah aur atma-bal bhi chhalak raha thaa,
Har khalsa mein aur unke anushaasan mein.

Is varsh mein toh Baisakhi ke din par,
Navratre bhi huey hain aarambh,
Shiv aur Shakti dono ne milkar,
Kiya Ardhnaareeshwar roop ka praarambh.

Vriddhi hui thi tabb srishti kee,
Jispar boondein padeen divya ashirwaad kee vrishti kee,
Guruji kee kripa se is vrishti se srishti roopi khet hain lehlahaaye,
Aur jaise beej boye jaayein, vaisi fasal har saal aaye.

Kheton mein kisaan beej boyein kitne dhyan se,
Taaki achchi ho aane waali fasal,
Yoon hee hum karmon ke beej boyein sammaan se,
Taaki achche karmon se jeevan ho jaaye safal.

Karmon kee bhoomi hai yeh sansaar,
Kewal Guruji sakte Hain hamein taar,
Kyun na manaayein hum Baisakhi ka tyohaar,
Kar ke Guruji ka Shukrana baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2021

Om Namaha Shivaya
Aaj Ka Suvichaar 🙏🏻🙏🏻 # 1149

   Dulaare Deewaane

Na tu jaane khud ko,
Na ye duniya tujhe jaane,
Chaahe tu maane ya na maane,
Kewal tere Guruji tujhe pehchaanein.

Samay ke saath badalte rahenge tere afsaane,
Koi dega tujhe prem, toh koi dega tujhe taane.
Jitne bhi hain tere jeevan ke afsaane,
Ve toone Guruji ko hain sunaane.

Tu yahaan aaya hai karmon ka karz chukaane,
Aur apne insaaniyat ke farz ko nibhaane,
Na ki apne guroor se auron ko dabaane,
Ya phir apni jhoothi taakat dikhaane.

Guruji ke sab bhakt Unse judkar ho jaate hain mastaane,
Jodte hain Unse seedhi taar Unhe dil ka haal sunaane,
Sabhi Unke dar par aate hain khud ko bakhshaane,
Aur Unke kamal charnon mein sees jhukaane.

Isliye na dhoondh tu koi bhi bahaane,
Jamaa karta chal tu sewa simran ke khazaane,
Bann ne de apne nagmon ko nazraane,
Bhakti ko de apna antar-mann sajaane.

Teri zindagi ke pal chaahe lagein ya na lagein suhaane,
Tu phir bhi gaata chal Shukrana ke gaane,
Shukrana mein tu apne dukhon ko bhi de samaane,
Kisee bhi niraasha ko na de shraddha ka deep bujhaane.

Shaayad tu pehle se ye sabb jaane,
Lekin abb waqt aa gaya hai ki tu ye sab maane,
Guruji Apne pyaar se taral banaate Hain sab bhakton ke taraane,
Yoon hee nahin Guruji ke bhakt hotey Hain Guruji ke dulaare deewane.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2021

Om Namaha Shivaya
Aaj Ka Suvichaar 🙏🏻🙏🏻 # 1148

      Mann Ka Ujaala

Chhaaya thaa maayusi ka andhera,
Lekin mann mein basaa kar ummeed ka savera,
Raahi chalta gaya vishwaas ke sangg,
Nihaarte huey prakriti ke ruhaani rangg.

Maanas jaap veh kar raha thaa,
Andhere se nahin darr raha thaa,
Simran se mil rahi thi usey shakti,
Anand de rahi thi usey yeh bhakti.

Raahi toh thaa Guruji kee sharan mein,
Isliye usne dhyan lagaaya Guruji ke kamal charan mein,
Raat khatm hogi aur din aayega zaroor,
Jaanta thaa ki yahee hai zindagi ka dastoor.

Guruji kee divya khushboo aa rahi thi usey,
Isliye seema hee nahin thi uskee prasannataa kee,
Maalum thaa usey ki usey ghabraane kee koi baat nahin,
Guruji jiska antt na karenge, aisee koi raat nahin.

Din aur raat, sukh aur dukh,
Ye toh hain jeevan ke badalte rukh,
Ye toh aate jaate rahenge, hum chaahein ya na chaahein,
Inse ujjwal ya phir andheri hoti rahengi hamaari raahein.

Lekin, jabb takk mann mein basaa hai Guruji ka noor,
Tabb takk mann ka ujaala kabhi na hoga duur,
Chaahe jeevan ke rukh badalte rahenge baar baar,
Guruji kee kripa se veh ujaala rahega barkaraar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 10, 2021

Om Namaha Shivaya
Aaj Ka Suvichaar 🙏🏻🙏🏻 # 1147

          Guruji Kee Rehamatein

Jisne bhi liya Guruji ke naam ka sahaara,
Uska jeevan Guruji ne hai sanvaara,
Yeh naam toh ek divya aushadhi hai,
Jis se hoti jeevan kee shuddhi hai.

Jo Guruji ko samarpan karta hai apni bhakti,
Uss bhakt ko Guruji dete Hain bahut shakti.
Is shakti se bhakt mein jaagrit rehta hai vishwaas,
Aur uske mann mein rehta hai shraddha ka vaas.

Jo har saans ko maanta hai Guruji ka diya hua uphaar,
Guruji kabhi nahin bhoolte Hain uska ghar parivaar,
Unke nirnay mein beshaq kabhi kabhi vilamb hota hai,
Lekin usee mein kalyaan ka aarambh hota hai.

Jo Guruji ko maanta hai apne jeevan kee naiya ka khewaiya,
Guruji dheere dheere badal dete Hain uska ravaiya,
Naiya ko kinaare takk pahunchaate Hain Guruji,
Aur safar ke dauraan Apni rehamatein barsaate Hain Guruji.

Itnee Hain Guruji kee rehamatein,
Ki sabse varnanaatmak shabd bhi unn rehmaton ke liye pheeka laagey,
Srishti ke sabb baadal bhi ek sath baras jaayein,
Toh ve boondein kumm hongi Guruji ke ashirwaad ke amrit kee boondon ke aagey.

Guruji kee rehamaton ka kaise karoon bakhaan,
Itnee mehar barsaate Hain har pal karuna nidhaan,
Koi ho hee nahin sakta Guruji jaisa meharbaan,
Unhee mein baste Hain MahaShiv Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 9, 2021

Om Namaha Shivaya
Aaj Ka Suvichaar 🙏🏻🙏🏻 # 1146

             Ashirwaad Ka Tilak

Duniya ek laukik tamasha hai,
Yahaan asha aur niraasha hai,
Har pal koi nayee abhilaasha hai,
Yahaan sukh kee ajab paribhaasha hai.

Hum toh yahaan raahgeer hain,
Hum mein se koi gareeb toh koi ameer hain,
Lekin ameeri gareebi kee paribhaasha bhi hai is lok kee,
Isliye bilkul zaroorat nahin hai shok kee.

Kyunki sabb reh jaana hai yahaan ka yahaan,
Kuch bhi laukik na kaam aana hai vahaan,
Lekin abhilaasha se hogi agar aasakti,
Toh yeh paribhaasha ksheen karegi bhakti kee shakti.

Aasaan nahin hai laukik ichchaaon ko chodna,
Lekin chodna hoga inmein aasakti ko,
Tabhi toh antt mein mukti ka prasad milega,
Hamaari shraddha aur bhakti ko.

Guruji se jitna adhik hum judte jaayenge,
Utna zyaada anaasakti ke sangg jeevan jee paayenge,
Rakhte huey sakaaratmak nazariya,
Paripoorna hogi jeevan kee dagariya.

Is santushti se laukik abhilashaayein kumm hoti jaayengi,
Aur phir niraashaayein bhi kumm sataayengi,
Kyunki mann mein hogi shanti aur tripti,
Jis se milegi bhakti ko aur bhi shakti.

Ek pal ya ek din mein yeh ho nahin sakta,
Lekin jo bhakt koshish karte nahin thakta,
Guruji uskee neeyat par Apne ashirwaad ka tilak lagaate Hain,
Ve bade pyaar se usey sukh kee ruhaani paribhaasha se avagat karaate Hain.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 8, 2021

Om Namaha Shivaya
Aaj Ka Suvichaar 🙏🏻🙏🏻 # 1145

Naseeb Achche Hain Hamaare

Pyaare Guruji,

Ye toh naseeb achche hain hamaare
Ki hamein mil gaye Aap
Varna kaise hum jhelte,
Is yug ke dukh santaap?

Itnee baar girne se Aapne hamein bachaaya,
Aur jabb kabhi girey toh Aapne hee uthaaya.
Jabb dhokha de gaya apna hee saaya,
Tabb bhi Aapne hamein galey se lagaaya.

Hum toh Aapki kripa ke laayak nahin hain,
Kyunki hum hain chhoti soch waale tuchh praani,
Yeh toh Aapki rehmat hai ki chaahe hum karein naadaani,
Phir bhi Aap ashirwaad dekar sanvaarte Hain hamaari zindagaani.

Aapse padh kar kalyuga mein satyuga ka paath,
Karein har din ka praarambh aur antt,
Aapke ashish, Aapke ruhaani sangg ke saath,
Hamaare liye patjhad bhi bann jaata hai basant.

Kabhi durmati mein na doobein, aisee bakshiye hamein buddhi,
Kabhi anuchit na sochein na karein, aisee deejiye hamein shuddhi,
Kabhi ahankaar se andhey na hon, aisee deejiye hamein drishti,
Kabhi Aapke naam ke amrit se na hon vanchit, aisee keejiye hum par vrishti.

Aap hee Hain dayalu Deenanath,
Aap hee Hain bhalaa karne waale Bholenaath.
Aap hee Hain karunamayee Kailashnath,
Aap hee Hain nadar karne waale naathon ke bhi naath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 7, 2021

Om Namaha Shivaya
Aaj Ka Suvichaar 🙏🏻🙏🏻 # 1144

Mati Kee Disha Aur Dashaa

Jaise hoti hai vaayu kee gati,
Vaise hee hai insaan kee mati,
Kabhi ek disha mein, kabhi dooji disha mein,
Aksar nahin hai behti sthirta kee dashaa mein.

Jaise vaayu baadalon ko apne sangg tehlaati hai,
Vaise hee mati khayaalon ko sehlaati hai,
Kabhi soche ek baat, kabhi dooji soch laaye mann mein,
Isliye halchal machi rehti hai har pal dhadkan mein.

Kyun na simran se sthir karein mann aur mati ko,
Simran se mann mein ghar banaane dein sumati ko,
Simran se mati roopi vaayu ko honei dein hum shaant,
Aur simran se aabaad karein apna ekaant.

Na karein Guruji ko bhoolne kee naadaani,
Unke naam se mann kee vaayu ko banaayein suhaani,
Guruji ka naam lekar simran mein,
Unka aashish paayein jeevan mein.

Mati kee disha jabb simran kee oar lekar jaayegi,
Toh mann kee vaayu shaant aur dheer ho jaayegi,
Phir uskee sthirtaa kee dashaa se sukhad ho jaayega spandan,
Jis se prafullit hokar khil uthega mann ka upvan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 6, 2021

Om Namaha Shivaya
Aaj Ka Suvichaar 🙏🏻🙏🏻 # 1143

Sadaa Apna Vaada Nibhaayenge Guruji

Jabb jabb dil mein jaaga koi armaan,
Tabb tabb Guruji ne diya paigaam,
Ki Ve Apne hee tareeke se kar rahe Hain kalyaan,
Isliye mai bilkul na honei doon khud ko pareshaan.

Guruji yaad dilaate Hain ki meri soch,
Bahut chhoti hai aur tuchh bhi,
Aur yeh ki Ve sabb jaante Hain,
Aur mai nahin jaanti kuch bhi.

Isliye Unhee par chod deti hoon nirnay,
Bina mann mein laaye koi bhi sanshay.
Baadal ko jabb uchit lagta hai tabb veh paani barsaata hai,
Phir uss paani se anaavrishti se peedit khet raahat paata hai.

Jiske paas itne pyaare Guruji hon,
Usey zaroorat hee nahin tarasne kee,
Usey toh prateeksha nahin karni padti hai,
Ashirwaad ke baadal ke barasne kee.
‘Jo garajte hain, ve baraste nahin,’ Muhaavara yeh farmaata hai,
Isliye Guru toh bin kuch boley hee,
Apna ashirwaad barsaata Hai.

Itna kalyaan kar jaate Hain Guruji, bin jataaye,
Itna uddhaar kar jaate Hain Guruji, bin bataaye,
Karmon ka bhugtaan karaate Hain, bin haath chode,
Manzil takk pahunchaate Hain, bin saath chode.

Jinse mai har pal aseesein paaoon,
Aise Guruvar par toh mai vaari jaaoon,
Unke baare mein soch kar muskuraaoon,
Unke hotey huey mai kyun ghabraaoon.

Pathreelee raahon ko samatal banaayenge mere Guruji,
Mai jahaan bhi jaaoongi, mere sangg aayenge mere Guruji,
Hameshaan ashirwaad barsaayenge Guruji,
Sadaa Apna vaada nibhaayenge Guruji.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 5, 2021

Om Namaha Shivaya
Aaj Ka Suvichaar 🙏🏻🙏🏻 # 1142

  Guruji Kee Vadiyaayee Ka Vaasta

Guru aur bhakt ke pyaar mein koi kintu parantu nahin,
Ahem kee bhi jageh nahin hai pyaar mein,
Ye toh ek aisa jazbaat hai,
Jo bayaan ho buss bhaav ke ikraar mein.

Na Guruji kuch kahein na hum,
Phir bhi ho jaati hai sunvaayee,
Fark nahin padta ki kisne pehle yaad kiya,
Ya phir kisne aane mein der lagaayee.

Sabb Guruji kee leela hai,
MahaShiv Hain Ve, Hain leela dhaari,
Sharan mein lete Hain har jann ko,
Jabb aati hai jiskee baari.

Na Ve karein naap toal, na koi sauda,
Na Ve dekhein jaat paat, aur na dekhein Ve hamaara ohada,
Chaahe jo bhi ho yahaan hamaara khitaab,
Guruji ke saamne hum sabb Hain khuli kitaab.

Jis pyaar ke liye jagg taras raha hai,
Veh pyaar toh Unka baras raha hai,
Changey karam kar ke is pyaar kee karni hogi kadar,
Kyunki har pal hum sab par hai Guruji kee nadar.

Isliye kintu-parantu ko chod kar,
Ahem se muh moad kar,
Guruji ke pyaar ka vinimay karein pyaar se,
Tarr jaayein Unke ruhaani deedar se.

Na swaarth ho is pyaar mein,
Na ho koi shart ya milaavat,
Is pyaar mein koi muqaabla nahin,
Aut na hee hai dhokha ya bagaavat.

Yeh pyaar hee bhakti ka shringaar hai,
Is pyaar se hee bhakti par nikhaar hai,
Is pyaar se sadaa sajaayein apne antar-mann ka raasta,
Hamein toh hai Guruji kee vadiyaayee ka vaasta.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja