Author: dhirjabhat

March 5, 2021

Om Namaha Shivaya
Aaj Ka Suvichaar 🙏🏻🙏🏻 # 1111

Paanch Tattvon Ka

Paanch tattvon ke mishran se,
MahaDev ne banaaya hai har praani,
Inhee tattvon se shuru hoti hai zindagaani,
Aur inhee mein milkar khatm hoti hai iskee kahaani.

Bhumi, Jal, Agni, Vaayu, Akash ke sammilan se banta hai,
Pashu, pakshi, ped, paudhon, aur insaan ka nirjeev shareer,
Aur shareer mein jabb atma ka pravesh hota hai,
Toh usey praapt hoti hai jeevit honei kee taqdeer.

Kisee mein ek tattva zyada hota hai,
Aur baaki tattva hotei hain kumm,
Jis tattva kee adhik matra hoti hai,
Uss mein adhik lagta hai mann.
Haathi mein mitti aur jal hota hai adhik matra mein,
Isliye vo mitti aur paani se khelta hai apne jeevan kee yatra mein.

Suna hai saamp mein agni kee sarvaadhikta se,
Saamp mein tej hota hai prabal,
Aur keedi halki aur phurteeli hai hoti kyunki,
Kumm mitti honei se zyada vazan ka hota hai hal.

Akash ke tattva ka mahatva hai hamaari vaani mein,
Yeh gati aur protsaahan deta hai zindagaani mein,
Prithvi nishchay karti hai hamaare shareer kee gandh ka,
Aur saath hee andaaza deti hai jeev ke ghamand ka.

Dekhne ka saamarthya aur urja,
Ismein agni ke alaawa na hai koi tattva dooja,
Gati aur sparsh kee shakti kee vaayu se rachna hai hoti,
Vayu ke diye vaig ke kaaran is shakti kee hoti hai badhauti.

Sheetalta aur sikuran se hai jal ke tattva ka naata,
Buddhi ka parichay aur swad ka anand bhi jal se hee hai aata.
Lal rangg hai Agni ka, vayu ka varna hai bhoora ya neela,
Jal ka safed, akash ka kaala, aur bhoomi ka varna hai peela.

Jaise har tattva ka pradarshan hota hai,
Alagg alagg rangon se,
Vaise hee tattva kee sthiti kee jaati hai,
Shareer ke bhinn bhinn angon se.

Shareer kee sthiti mein akash ko naam mila hai mastak ka,
Aur jaanghon se hoti hai Prithvi kee sthiti,
Naabhi se Vayu kee aur pait se hoti hai jal kee sthiti,
Agni ka angg hai kandha, jis se hoti is tattva kee sthiti.

Inhee tattvon se baney hain hum,
Aur inhee mein parivartit hai ho jaana,
Inhee se chalega jeevan Guruji kee mehar se,
Aur phir inhee mein hai hamein samaana.

Phir kyun hai lobh, jhooth, ahankaar?
Phir kyun mann mein hain tuchh vichaar?
Kyun hum itna itraate hain,
Kyun apni asaliyat bhool jaate hain?

Kehte rehte Hain Guruji,
Ki mann kee saadagi aur saralta hai bahut zaroori,
Har pal yaad rakhein ki kisee bhi pal mein samaa sakte hain in tattvon mein,
Taaki sachchaayee se na rahe koi bhi duuri.

Is yaad kee mohar lagaakar antar-mann mein,
Dhyan dein adhyatmik dhan mein,
Taaki antt vele jabb shareer tattvon mein ho jaaye vileen,
Tabb atma apna safar tayy kar ke Paramatama mein ho jaaye leen.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 4, 2021

Om Namaha Shivaya
Aaj Ka Suvichaar 🙏🏻🙏🏻 # 1110

       Bhaagya Ke Dwaar Khul Gaye

Pyaare Guruji,

Bhaagya ke dwaar khul gaye,
Jis pal Aap hamein mil gaye,
Aapne hamein apnaaya,
Hamaara jeena safal banaaya.

Madhur mamta ka dulaar dekar,
Pita ka paawan pyaar dekar,
Haath pakda hamaara aur hamein chalna sikhaaya,
Aur chalte chalte raaste ke kaanton se hamein bachaaya.

Kuch kuch kaante chubhne diye paaon mein
Taaki fark jaan paayein hum jeevan kee dhoop aur chhaaon mein
Hamaare har ghaav par Apni karuna ka marham Aapne lagaaya
Aur jabb bhi hamein Aapne himmat dee aur hamein uthaaya

Duniya kee kalyugi baaton se jabb hamaara mann bhar aaya
Tabb bhi Aapne har ghaav par Apne sneh ka marham lagaaya
Simran, sewa, aur satsang kee dee Aapne daat
Samarpan karna sikhaaya Aapne hamein din aur raat

Aapka Shukrana karne ke liye kaafi nahin hain koi bhi alfaaz
Aapki mahima gaane ke liye nipun nahin hai koi bhi awaaz
Kyunki Aapki mahima hai anant aur aparampaar
Aur anek seemaaon main bandhaa hai yeh sansaar

Phir bhi sachchi koshish dekhkar Aap itnee kripa karte Hain
Ki Aapke bhakt umr bhar Aapki dee daaton se jholi bharte hain
Buss, yoon hee Apni kripa sab par rakhna Aap banaaye
Taaki har jann aakhiri saans lete huey bhi Aapka gungaan karta jaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 3, 2021

Om Namaha Shivaya
Aaj Ka Suvichaar 🙏🏻🙏🏻 # 1109

   Guruji Hain Sabse Pyaare Meet

Guruji Hain sabse pyaare meet,
Ve sab bhakton ka dil lete Hain jeet,
Aayiye, Unke sangg nibhaayein sachchi preet kee reet,
Aur gaayein hum Unkee mahima ke geet.

Guruji Hain bhakton ke bhraata,
Unka sabke sangg hai nirmal naata,
Unhe bhakton ka bholapan hai bhaata,
Unka naam itna sukh hai pahunchaata.

Guruji Hain Apne bhakton ke naath,
Har pal rehte Hain Ve sabke saath,
Unke liye har bande kee ek hee hai jaat,
Unhe hum sabki asaliyat hai gyat.

Guruji Hain murshid hamaare,
Hum hain shaagird, Ve Hain peer pyaare,
Jeevan mein ujaala hai Unhee ke sahaare,
Yeh agyani mann maargdarshan ke liye Unhe pukaare.

Guruji Hain hamaare baagbaan,
Bahut hee nyaari hai Unkee muskaan,
Poora karte Hain har kalyaankaari armaan,
Sach mein Hain Ve amrit kee khan.

Guruji Hain hum sabke nigahbaan,
Hamaari raksha ka karte Hain intazaam,
Hamaari dhadkan aur hamaare praan,
Unka hee diya hua hai yeh daan.

Guruji Hain MahaShiv Bhagwaan,
Hum sab hain Unkee santaan,
Apne sab bhakton par Ve Hain sadaa meharbaan,
Sampoorna srishti mein koi bhi nahin hai Unke jaisa mahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 2, 2021

Om Namaha Shivaya
Aaj Ka Suvichaar 🙏🏻🙏🏻 # 1108

          Museebaton Ka Bhaar

Dena hee hoga Guruji ko tujhe apni museebaton ka bhaar,
Tujhse ye aur uthaaya na jaayega,
Ve toh Guruji hee kar sakte Hain,
Unhee ke ashish dwara tu raahat paayega.

Yeh bojh bahut hee bhari hai,
Aur agar karni mukti kee tayyaari hai,
Toh phir vikaaron ka karna hoga tyaag,
Taaki atma par na lagg jaayein aur daag.

Pichhle daag bhi mitaane hongei,
Isliye simran karna hai bahut zaroori,
Simran karte karte lagne lagega dhyan,
Aur tabhi praapt hoga adhyaatmik gyan.

In sabse sahaayata milegi tujhe,
Tere bhaar ko halka karne kee,
Guruji sab sambhaalenge,
Isliye zaroorat nahin hai tujhe darne kee,

Na mehsoos kar swayam ko tu majboor,
Hokar niswaarth prem se bharpoor,
Kar le tu har sanshay ko chuur,
Aur honei de andhere ko duur.

Tere karmon se bhare is safar ko,
Guruji Apni kripa se sulajhaayenge,
Tu Shukrana karta chal har pal,
Dekhna, tere kaaraj raas aayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 1, 2021

Om Namaha Shivaya
Aaj Ka Suvichaar 🙏🏻🙏🏻 # 1107

         Guruji Ke Darbaar Mein

Anjaane mein kisee ke dil ko chot jo toone pahunchaayee,
Toh tujhe maaf kar degi Guruji kee vadiyaayee,
Lekin jaan-boojhkar jo toone kisee ka dil dukhaaya,
Toh ye na sochna ki Guruji ko samajh mein nahin aaya.

Kabhi galati se tu agar kar de kisee ka apmaan,
Toh maang le kshamaa aur de de Unhe sammaan,
Agar tere mann mein rehta hai chhal-kapat ka shaitan,
Toh banaa de usey tu nek aur nish-kapat insaan.

Tere ek ek soch-vichaar ko
Jaante Hain Guruji,
Teri har neeyat ko
Pehchaante Hain Guruji.

Tu lakh chhupa le duniya se,
Guruji se kuch na chhupega,
Unke darbar mein kabhi bhi,
Tere karmon ka hisaab hona na rukega.

Aaj nahin toh kal chukaana hoga yeh hisaab,
Vahaan kaam na aayega anuchit neeyat par chadhaa hua sundar nakaab,
Guruji ke saamne toh har chehra aur har dil hai khuli kitaab,
Unkee parakh ka hunar toh hai bilkul laajawaab.

Kya soch raha hai,
Abb aur na kar tu deri,
Na mauke anant hongei,
Na hee saansein aseem hain teri.

Shareer kee pehchaan jo bhi ho,
Sabki atma usee Paramatama ka ansh hai,
Yahaan chaahe bhinn bhinn ho,
Guruji ke darbar mein sabka ek hee vansh hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 28, 2021

Om Namaha Shivaya
Aaj Ka Suvichaar 🙏🏻🙏🏻 # 1106

              Ujjwal Jeevan Kee Oar

Adhyatmik unnati ke liye anivaarya hai,
Advait avastha aur advait siddhaant,
Atma aur Paramatama ke bhed ko mitaakar,
Chitt ko karna hoga ekaagra aur shant.

Guruji ne iska saral tareeka sikhaaya hai,
Shuruaat hoti hai jiskee simran se,
Jaise jaise simran mein mann lagega,
Honei lagega divyata ka dhyan mann se.

Phir toh simran aur dhyan mein hogi aasakti,
Is aasakti se bhautikvaad se honei lagegi anaasakti,
Aisee aasakti aur aisee anaasakti hee hai yukti,
Jis se jeevan jeete huey hamein milegi mukti.

Guruji kee kripa se jabb nikhar jaayegi is tarehn se bhakti,
Yeh bhakti degi hamaari antaratama ko shakti,
Atma ko is kalyuga mein bhi mehsoos honei lagegi tripti,
Kyunki Guru naam kee akhand jyot mann mein rahegi jalti.

Mann ka har khayaal hoga nirmal,
Har anubhooti mein ehsaas hoga taral,
Jeene ka dhangg ho jaayega saral,
Aur akhand jyot se jeevan har pal rahega ujjwal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 27, 2021

Om Namaha Shivaya
Aaj Ka Suvichaar 🙏🏻🙏🏻 # 1105

     Guruji Kee Mahima Gaaye Jaa

Tu Guruji kee mahima gaaye jaa,
Jeevan mein punya kamaaye jaa,
Is se bada nahin hai koi bhi paath,
Ye paath karta chal tu din aur raat.

Guruji kee mahima ka gungaan,
Is se hoti hai Guruji kee ibadat aur Unka maan,
Aur kuch bhi nahin hai ibadat se zaroori,
Ibadat se mitt jaati hai Guruji se duuri.

Isliye tu Guruji kee mahima sun aur sunaa,
Aur Unke simran aur dhyan mein jaa tu ramtaa,
Jitna adhik dhyan lagaayega tu,
Tujhe milegi maya se duur hotey jaane kee kshamtaa.

Yeh ek baar mein nahin hoga,
Isliye karna hoga iska nirantar abhyaas,
Tera nek iraada aur sachcha prayatna hoga,
Toh Guruji safal karenge tera prayaas.

Bilkul asthaayi hai yeh jeevan aur yeh maya,
Kshanbhangur hai har shwaas,
Is satya kee poorna sweekriti tabb hee hogi,
Jabb gyan ka hoga mann mein vaas.

Guruji ke ashirwaad se agyan ka timir mitt-ta jaayega,
Unkee mahima ke gungaan se milegi ummeed aur umangg,
Is paawan paath kee sakaaraatmakta se,
Jeevan mein sadaa rahegi ruhaaniyat kee tarang.

Tu barkaraar rakh apna Guruji par vishwaas,
Ek din andhkaar ko mitaa dega gyan ka prakash,
Guruji kee kripa se teri mehnat rangg laayegi,
Aur teri atma poorna roop se Unkee bhakti mein rangg jaayegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 26, 2021

Om Namaha Shivaya
Aaj Ka Suvichaar 🙏🏻🙏🏻 # 1104

         Aakhiri Safar

Jabb teri niraasha tadpegi asha ke liye,
Jabb tera jeevan tarsega paribhaasha ke liye,
Tabb Guruji hee tujhe sambhaalenge,
Aur Guruji hee tera haath thaamenge.

Jabb kisee ko na soojhega tere roag ka ilaaj,
Jabb duniya banana chaahegi tujhe apna mohtaaj,
Tabb Guruji ka prem karega tera kalyaan,
Aur Guruji denge tujhe swasth atma ka vardaan.

Jabb kisee kee bewafaai se tera dil tootega,
Jabb tera pyaara saathi sambandhi chhootega,
Tabb Guruji teri udaasi ka hal nikaalenge,
Uss waqt bhi Ve tujhse wafa kee reet nibha lenge.

Agar safalta se aane lagega tujhe ahankaar,
Agar tera zameer teri sadaachaari ko dene lagega maar,
Tabb Guruji tere mann kee chetna ko jagaayenge,
Aur tujhe baar baar neeven bann ne ka paath padhaayenge.

Jabb tujhe na raah dikhegi, na manzil,
Jabb duvidha mein hoga tera dil,
Tabb Guruji tujhe simran mein denge suljhan,
Aur duur karenge teri har uljhan.

Jabb tere sir par khushiyon ka sehra hoga,
Ya jabb tere roam roam par gumm ka pehra hoga,
Har paristhiti mein Guruji hongei tere sangg,
Tujhe sanyam dene ke hongei Unke anokhe dhangg.

Jabb jis bhi janam mein hoga tu tayyaar,
Ki mukti dwaara tera ho jaaye Paramatama se deedar,
Tabb Guruji tujhe Apni goad mein uthaayenge,
Aur Ve tere aakhiri safar ko Apni divyata se safal banaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 25, 2021

Om Namaha Shivaya
Aaj Ka Suvichaar 🙏🏻🙏🏻 # 1103

                     Teerath Yaatra

Jeete jee mann karta hai,
Teerath yaatra par jaane ka,
Na jaayein toh aksar sahaara lete hain,
Kisee na kisee bahaane ka.

Samay toh beeta hee jaa raha hai,
Hamaari kitnee saanson ko humne alvida kaha hai,
Kisee ko maalum nahin ki kiskee kitnee saansein hain bachti,
Kya maalum niyati kaise kaise khel hai rachti.

Na jaane hum mein se,
Kal kaun yahaan hoga aur kaun nahin,
Bahut barson baad bhi lekin yaad rahega,
Kisko yaad kar ke ye aankh thi bahi.

Lagega jaise kal kee hee toh baat hai,
Ki veh shaqs is duniya mein thaa,
Yaad rahega veh chehra, veh awaaz,
Yaad rahega har wafaa aur har bewafaai ka andaaz.

Lekin karvi yaadon ko bhulaana hee hoga,
Meethi yaadon ko galey se lagaana hee hoga,
Taaki koi yaad aaye toh pyaar se,
Na ki dil mein pade daraar se.

Khush rehna seekhte rehna hoga samay ke saath saath,
Bilkul mumkin hoga ye, kyunki Guruji thaame rahenge haath,
Har moad par, har mukaam par,
Har daur par, har anjaam par.

Isliye himmat haarne se nahin koi faayda,
Maan-na hee hoga, jo bhi hai jeevan ka kaayda,
Shukrana mein jeevan basar karte huey,
Ek dooje ke jeevan mein prem bharte huey,
Chalte chalein is safar mein Guruji kee manzoori se,
Sehej se maan kar Unkee raza, na ki majboori se,
Rakshak Hain Ve hamaare,
Salaamati hee chaahte Hain hamaari,
Unhee ke naam kee aushadhi se,
Duur hogi duniyadari kee nijee beemari.

In baaton mein jo gehraayee chhupi hai,
Waqt ke haath se nikal jaane se pehle usey jaan lena hoga,
Kyunki jabb uss paar jaayenge hum,
Toh har karam ka hisaab vahaan dena hoga.

Musaafir hain yahaan hum,
Na ki is duniya ke jaagirdaar,
Waqt beet-te beet-te aisa din bhi aayega,
Jabb yahaan na rahegi hamaari koi bhi yaadgaar.

Is se pehle ki khokhli khushiyon ko zindagi kee asaliyat maan lein,
Kyun na Guruji kee sikhaayee saralta aur saadagi ka gyan lein,
Doojon ko bhi jeene dein aur khud bhi jeeyein ruhaani dhangg se,
Jeete jee swayam hee rangg jaayein mukti ke azaad rangg se.

Aisa awashya ho sakta hai Guruji kee sharan mein,
Kyunki satchittanand samaaya hai Guruji ke charan mein,
Behti hai in charnon mein ganga Guruji ke naam kee,
Yaheen hai teerath yaatra MahaShiv ke dhaam kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

February 24, 2021

Om Namaha Shivaya
Aaj Ka Suvichaar 🙏🏻🙏🏻 # 1102

                 Naam Ka Kanchan

Guruji kee bhakti mein hai jo shakti,
Yeh Kalyuga ke kaal se bhi nahin hai thakti,
Is se bhavishya mein praapt ho jaati hai mukti,
Aur yeh karmon ke chakravyuh se nikalne kee hai yukti.

Guruji ka har kshan kiya hua vandan,
Is vandan ka itnaa shubh hai spandan,
Ki ho jaata hai har nakaratmakta ka khandan,
Aur jeevan mehekne lagta hai jaise chandan.

Guruji ka shraddha kee umang se kiya satsang,
Yeh bann jaata hai bhakton ke jeene ka dhangg,
Atma par chadhta hai Gurbani ka ruhaani rangg,
Jabb bhi sangat baithti hai Guruji ke sangg.

Guruji ka sikhaaya paath, sewa, aur daan,
Isey gupt rakhne ko kehte Hain Guruji mahaan,
Isliye Guruji kee baat maan kar hum rakhein Unka maan,
Ve Hain naath hamaare aur Hum hain Unkee santaan.

Guruji kee maujoodagi ka ehsaas jabb aata hai raas,
Toh koi bhi ehsaas nahin hota hai is se zyada khaas,
Jabb se is ehsaas ne dil mein kiya hai vaas,
Tabb se Guruji ka naam japta hai har shwaas.

Guruji ke simran mein hai jo naam ka kanchan,
Yahee hai bhakt ke liye asal dhan,
Is dhan se tarr jaayega mann,
Isee dhan se safal hoga jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja