Author: dhirjabhat

December 15, 2018

Om Namaha Shivaya
Aaj Ka Suvichaar 🙏🏻🙏🏻 # 300

      Guruji Hamaare Dugri Waale

Sanvaarein sangat ke saare kaam
Guruji hamaare Dugri waale
Poori duniya mein roshan hai Unka naam
Guruji hamaare Dugri waale

Har bhakt ko apna bachcha kehte
Guruji hamaare Dugri waale
Har bhakt ke dil mein sadaa hee rehte
Guruji hamaare Dugri waale

Niswaarth sewa ka paath padhaate
Guruji hamaare Dugri waale
Simran hamein karna sikhaate
Guruji hamaare Dugri waale

Har satsang mein aatey Hain
Guruji hamaare Dugri waale
Kayee divya roop dikhaatey Hain
Guruji hamaare Dugri waale

Andhvishwaas se duur le jaate Hain
Guruji hamaare Dugri waale
Sachchaayee ke kareeb hamein laate Hain
Guruji hamaare Dugri waale

Bhooley ko raah dikhaate Hain
Guruji hamaare Dugri waale
Dukh ka timir mitaatey Hain
Guruji hamaare Dugri waale

Hamaari kamiyaan hamein bataate Hain
Guruji hamaare Dugri waale
Shishyon kee uljhan ko sulajhaate Hain
Guruji hamaare Dugri waale

Bujhe huey dil mein asha kee jyot jalaate Hain
Guruji hamaare Dugri waale
Hamein banda bann na sikhaate Hain
Guruji hamaare Dugri waale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 15, 2019

Om Namaha Shivaya
Aaj Ka Suvichaar 🙏🏻🙏🏻 # 665

  Jabb Kabhi Aisa Lagey

Jab kabhi aisa lagey ki Guruji se ho gaye ho duur
Toh mann kee aankhon se dekh lo Unka noor
Pyaar bhare vishwaas se le lo mann mein Unka naam
Unn takk tumhara sandesh pahuncha degi yeh dhalti hui shaam

Jabb tum pyaar se karoge Guruji ko yaad
Toh Ve yakeenan sunenge tumhari fariyaad
Unhe masoom dhvani lagegi tumhaari pukaar
Aur meetha anjaam layega tumhaara intazaar

Guruji tumhaare angg sangg Hain
Aur bastey Hain dil mein tumhaare
Ve bhakt se kabhi duur nahin ho sakte Hain
Unhe apne sab bhakt lagte hain pyaare

Jo raasta Guruji ne chuna hai tumhaare chalne ke liye
Uss raaste par jalaayein Hain Unhonei Apni divyataa ke diye
Ve sangg Hain tumhaare har kadam par
Taaki tumhe ek pal ke liye bhi na laagey darr

Dene ko toh Ve ek pal mein tumhe saari khushiyaan de dein
Lekin tumhaare karam bhi toh Unhonei katvaane Hain
Chaahe raaste mein mushkilon ke pahaad aayein
Ve bhi Unhonei hee apni shakti se hataane Hain

Isliye tum buss dheeraj rakh kar aagey badhte chalo
Unhonei haath thaama hai tumhaara, tum surakshit ho har kadam par, har moad par
Duniya ke bandhan chaahe tumhe aagey badhne se rokna chaahein
Guruji tumhe aagey badhaayenge har bandhan toad kar

Dekhte hee dekhte tumhaare karam kat-te jaayenge
Guruji kee sadhna karne se tumhaare paap dhultey jaayenge
Guruji ek din tumhe adhyatmik manzil par pahunchaayenge
Jidhar ruhaaniyat ke saumya sitaare jagmagaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 14, 2018

Om Namaha Shivaya
Aaj Ka Suvichaar 🙏🏻🙏🏻 # 299

         Guruji Ke Naam Ka Gehna

Guruji ke naam ka jo pehna mainey gehna
Abb Unke naam bina nahin rehna
Unhee ke naam se shuru hota hai din
Ek saans bhi nahin hai Unkee kripa ke bin

Pyaar Guruji ka komal itna
Ki antaratma sheetal ho jaati hai
Unhee ka naam le leti hoon
Koi mushkil paas jo aati hai

Guruji hee rakhte Hain dhyan
Har zaroorat aur har chaahat ka
Guruji hee sankat mein aate Hain
Intazaar rehta hai Unkee aahat ka

Mai toh phir bhi kabhi bhool jaati hoon
Magar Guruji ko har pal hai mera dhyan
Jab uljhan aati hai jeevan mein
Toh Guruji karte Hain uska samaadhaan

Guruji hee raah dikhlaatey Hain
Mai toh sirf uspar chal deti hoon
Khushi se mai phooli nahin samaati
Ki mai Apne Guruji kee beti hoon

Unse juda hokar toh astitva hee nahin hai mera
Unhonei hee Apne gyan se kiya hai mere jeevan mein savera
Unhee kee kripa se katega yeh janam maran ka phera
Unhee ke charnon mein hai abb hai mera baseraa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 14, 2019

Om Namaha Shivaya
Aaj Ka Suvichaar 🙏🏻🙏🏻 # 664

    Achche Bhavishya Ka Nirmaan

Guruji ke naam ka kar tu shravan
Guruji kee mahima ka kar tu gungaan
Guruji ke naam ke manan mein lagaa de
Tu apni bhakti aur jaan

Guruji se preet badhaa le
Unhe apna meet banaa le
Har pal Unhe apne saath paa
Kaisi bhi paristhiti ho, tu na ghabraa

Yaad rakh ki Guruji ke har vachan ko
Nibhaana hee hai param dharam
Isliye Unke vachan ka anusaran kar ke
Sudhaar le tu apne karam

Guruji Hain sampoorna siddhaanton ke gyaata
Guruji Hain poori srishti ke daata
Guruji ka hai har praani se naata
Guruji ko apna har bachcha hai bhaata

Guruji ke gyan ke paalan se
Hoti hai atma kee shuddhi
Niswaarth bhaav se Guruji se judne se
Praapt hoti hai ruhaani buddhi

Guruji ka kehna maan kar
Bann jaa tu banda, aye insaan
Kyun na apne hee bhaley ke liye kar le
Achche bhavishya ka nirmaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 13, 2018

Om Namaha Shivaya
Aaj Ka Suvichaar 🙏🏻🙏🏻 # 298

           Guruji Kee Sharan Mein

Guruji kee sharan mein aate hee
Jeevan badal sa jaata hai
Jo atma vishwaas kho gaya thaa kaheen
Veh laut ke vaapis aata hai

Aur kaheen veh chayn nahin
Jo milta hai Guruji kee sharan mein
Aur kaheen veh amrit nahin
Jo behta hai Guruji ke charan mein

Jab tu anubhav karega
Unki ruhaani chhavi ko swayam
Toh dekhna bhaav vibhor hokar
Bhar aayenge tere bhi nayan

Bheetar kee ruhaani dhwani dil ko behlaayegi
Kisee bhi laukik vastu se veh masti nahin aayegi
Dil kee bechayni toh itihaas bann ke reh jaayegi
Jab atma sadhna mein leen hokar anand paayegi

Kasht toh zindagi mein phir bhi aayenge
Lekin Guruji kee kripa se adhiktar kasht tull jaayenge
Tu taqleefon se guzrega Guruji ke diye haunsle ke saath
Har pal Guruji teri raksha karenge kyunki Ve Hain tere Bholenath

Guru naam ke divya amrit se dil mastt ho jaayega
Guru naam ko japne se nirmal anand aayega
Guru naam ke jaadu se khatm hogi niraasha kee nisha
Guru naam ke tapp se milegi divyataa kee disha

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 13, 2019

Om Namaha Shivaya
Aaj Ka Suvichaar 🙏🏻🙏🏻 # 663

       Dekh Lo Azmaakar

Dekh lo azmaakar
Ki jabb bhi Guruji ko dhyan mein rakhoge
Toh soch hogi sakaaratmak
Aur yaatra banegi adhyatmik

Bhavishya kee fikr mein ulajhnaa nahin
Varna utkanthaa se ho jaaoge bechayn
Guruji kee paawan divytaa kee khoobsoorati se
Tum seench lo apne mann ke nayn

Guruji ka pyaar hai hee itna pyaara
Ki is pyaar ne jeet liya hai jagg saara
Veh shaqs phirtaa hai dar dar maara maara
Jisne liya nahin Guruji ke pyaar ka sahaara

Guruji ke pyaar ke liye bheed kee zaroorat nahin
Guruji ke pyaar jitna kuch bhi khoobsoorat nahin
Yeh veh divya junoon hai jo seedhi taar jodne se mehsoos ho jaata hai
Yeh veh kashish hai jismein bhakt chaahte huey hee kho jaata hai

Guruji ka pyaar mamta bhari jholi hai
Guruji ke pyaar kee badi meethi boli hai
Jo maun mein itne sneh ka ehsaas karaati hai
Aur pareshaani ke samay dheeraj bandhaati hai

Guruji se zyada sachcha aur achcha meet nahin
Guruji ke prem se badhkar koi preet nahin
Guruji kee baani se madhur koi sangeet nahin
Aur Guruji ka anusaran karne se badi koi reet nahin

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 12, 2018

Om Namaha Shivaya
Aaj Ka Suvichaar 🙏🏻🙏🏻 # 297

      Hamaari Chetna Kee Awaaz

Hum sab hain ajeeb insaan
Sochte hain apne aap ko mahaan
Kitni kshanbhangur hai hamaari jaan
Yeh bhool jaatey hain hum naadaan

Apni ‘mai’ mein mehfooz hokar
Sochte hain ki duniya par hamaari hukoomat hai
Ek pal ka bharosa bhi nahin hai
Phir bhi bhool jaate hain, ki hamein Guruji kee zaroorat hai

Waqt ke mahatv ko jaanei na hum
Guruji kee baatein maanei na hum
Maut har pal sir par mandaraa rahi hai
Aakhiri ghadi har din paas aa rahi hai

Phir bhi, ahem kee tedhi seedi hum chadhey jaa rahey hain
Apne ahankar kee zidd par adhey jaa rahey hain
Vehemon ke bann rahey hain hum gulaam
Andhvishwaas kee pakadte hain hum lagaam

In sabse toh atma hoti chali jaayegi kamzor
Is timir ko duur karein, aur laayein jaagriti kee bhor
Shaktishaali banaayein apni antaratma ko
Poojein Guruji ko, hamaare Paramatma Hain jo

Guruji kee dikhaayee raah par chalna hee Unkee sachchi pooja hai
Guruji ke siva na koi maargdarshak dooja hai
Swayam MahaShiv ke avataar Hain Guruji
Hamaare Dev, hamaare paalanhaar Hain Guruji

Maafi maange Unse apne burey karmon kee
Ahemiyat samjhein hum jeevan ke lamhon kee
Neevanpan aur saralta laayein apne taur tareekon mein
Kya rakha hai dikhaavey aur burey saleeqon mein

Sewa aur Simran mein dhyan lagaayein
Apne Guruji ka maan badhaayein
Satsang mein baithein aur Unkee mahima suney aur sunaayein
Har insaan ke bhaley kee hum karein duaayein

Hamaari rooh kee chetna hamein har pal pukaare
Hamaara uddhaar ho sakta hai keval Guruji ke sahaare
Sab kuch chod kar aa jaayein hum Guruji ke dwaare
Baksh denge hamein Guruji, bakshanhaar Hain Ve hamaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 12, 2019

Om Namaha Shivaya
Aaj Ka Suvichaar 🙏🏻🙏🏻 # 662

Bhakti Vishwaas Samarpan

Bhakti vishwaas samarpan
Inke arth ko tum jaano
Inko jeevan mein apnaa lo
Yeh kehna Guruji ka maano

Bhakti se milegi shakti
Jis se sukh dukh ko dekh paaoge ek samaan
Vishwaas se milega veh santulan
Jis se har lamha lagega vardaan

Samarpan ka darja toh hai itna ooncha
Ki saari chinta duur ho jaayegi
Mastt hokar Guruji ke chintan mein jiyoge
Koi bhi fikr na tumhe sataayegi

Bhakti vishwaas samarpan teenon ka
Zindagi par padta hai prabhaav
Jeevan mein agar koi laukik kamee ho
Toh mehsoos nahin hota hai abhaav

Kyunki in ratnon kee chamak se
Jagmagaati hai yeh zindagi
Jis haal mein bhi Guruji rakhtei Hain
Nirmal Anand deti hai Unkee bandagi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 11, 2018

Om Namaha Shivaya
Aaj Ka Suvichaar 🙏🏻🙏🏻 # 296

          Guruji Ka Pyaart Sabse Pyaara

Maane ya na maane tu
Guruji tere mann mein Hain
Jaane ya na jaane tu
Ve tere kann kann mein Hain

Chaahe tujhe yaad ho ya nahin
Unse tera rishta hai kayee janmon ka
Jaise bhi haalaat hain hamaare
Veh hisaab hai hamaare karmon ka

Is duniya ke mele mein sab kuch badalta rehta hai
Hamaara kamzor dil kitne sadme sehta hai
Buss, tu apne karam par dhyan de, Guru humse kehta hai
Baat maanein Guru ki, toh Unka pyaar hamaare jeevan mein behta hai

Isee pyaar se milti hai hamein shakti
Aur phir aur bhi gehri hoti hai bhakti
Guruji bhakton par Apni karuna ka aanchal phailaatey Hain
Aur bade pyaar se Ve Apni goad mein sehlaatey Hain

Guruji kee sharan mein kayee paap dhul jaatey hain
Unhe bhi raah milti hai jo raasta bhool jaatey hain
Guruji kee mamta mein bhakt jann itna sukoon paatey hain
Guruji bhakton ke jeevan mein achchaa badlaav laatey Hain

Guruji ke pyaar se pyaara kuch nahin
Tu khud hee azmaa kar dekh ley
Guruji ke divya darbar mein aakar
Tu shradha se maatha tek ley

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 11, 2019

Om Namaha Shivaya
Aaj Ka Suvichaar 🙏🏻🙏🏻 # 661

              Jeene Ke Saleequey

Mayle kapde dho liye
Bartan bhi kar liye saaf
Lekin dil abhi bhi dooshit hai
Toh Guruji kaise karenge maaf?

Satsang mein bhi baith gaye
Dhyan lagaa kar kiya simran
Lekin anuchit vichaardhara hui
Toh kaise tarega yeh mann?

Duniya ke saamne kee itnee sewa
Lekin usmein chhupa hai koi swaarth
Toh Guruji samajh jaayenge sewak kee ichchaa
Chaahe ho veh yash, paarivaarik sukh, ya koi padaarth

Keh liya swayam ko aur sabko
Ki kar diya hai Guruji ko sab samarpan
Lekin har pal chinta karte rahe
Toh kaise karoge Unka chintan?

Apne bheetar satya dhoondhne kee koshish karo
Baaki sab kuch bhoolne kee koshish karo
Guruji ko pasand hai mann kee swachhtaa aur sachchaayee
Guruji ko bhaati hai pavitrataa aur achchaayee

Swayam hee nishchay karna hoga tumhe
Ki tum neevenpann ko apnaana chaahte ho ya ahankar ko
Khud hee faisla karna padega tumhe
Ki tum Guruji ko prabhaavit karna chaahte ho ya sansaar ko

Jeene ke ye saleequey hain
Jaise hain zameen aur aasmaan
Vaise toh nirnaya lena hai aasaan
Ek taraf hai shaitaan aur doosri taraf hai Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 10, 2018

Om Namaha Shivaya
Aaj Ka Suvichaar 🙏🏻🙏🏻 # 295

  GURU BIN ZINDAGI ADHOORI HAI

Aye bande, gumsum kyun baitha hai
Kyun himmat raha hai tu haar
Aye bande, kar le Guruji se pyaar
Ek Vahee dil se sunenge tere dil kee pukaar

Zaroori toh nahin ki jo tu soch raha hai
Vahee tere liye ho sahi
Guruji tere dil kee baatein jaante Hain
Chaahe ve hon ankahi

Tu sirf apna kartavya nibha
Guruji ko tu apni zindagi ke faisley lene de
Jo Ve tere liye uchit samjhein
Unhe sahi samay par veh dene de

Yeh toh bilkul nishchit hai
Ki Guruji sochenge tere kalyaan ka
Isliye tu changey karam karne kee koshish kar
Aur na soch tu anjaam ka

Tere karmon ko dekh kar
Guruji teri kismat likhenge
Tere hit mein huey agar tere khwaab
Toh Guru kripa se ve poore hotei dikhenge

Jitna tu Guruji se naata jodega
Jitna laukik laalach ko chodega
Utna mehsoos karega apne ko Guruji ke kareeb
Utna hee apne aap ko paayega tu khushnaseeb

Abb bhi der nahin hui hai
Kar le Guruji ka deedaar
Guru bin zindagi adhoori hai
Yahee hai jeevan ka saar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 10, 2019

Om Namaha Shivaya
Aaj Ka Suvichaar 🙏🏻🙏🏻 # 660

   Hamaara Sadaa Atoot    Vishwaas Rahe

Na jaane yeh raasta kahaan kahaan se lekar jaayega
Na jaane kab Guruji ka dwaar aayega
Lekin yeh toh hakeekat hai ki Ve har pal saath Hain
Hamaare haathon ko thaamey huey Unke haath Hain

Sabse zaroori hai Guruji ka simran
Taaki aa jaaye jo koi archan
Toh bhi banaa rahey maansik santulan
Aur kar sakein Unhe hum sarvsamarpan

Simran aur sarvsamarpan se badhta rahega vishwaas
Is vishwaas ke bharose satsang mann ko aayega raas
Guru shishya ka naata hai hee itna khaas
Ki is se pavitra na hai koi bhi ehsaas

Aapki nadar se daata
Jeena sambhav ho jaayega
Varna dil is kalyuga ke mele mein
Niraash hokar kaheen kho jaayega

Yahee sab dhyan mein rakhte huey
Chalte jaayein jeevan kee dagar par
Hamaara sadaa atoot vishwaas rahe
Aapki mehre nazar par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 9, 2018

Om Namaha Shivaya
Aaj Ka Suvichaar 🙏🏻🙏🏻 # 294

  HAMAARE MEHARBAAN GURUJI

Toh kya hua agar raasta hai anjaan
Guruji hamaare Hain bahut meharbaan
Har samay rehta hai Unhe dhyan hamaara
Kalyuga mein Vahee Hain ekmaatra sahaara

Pal pal kee Unko hai khabar
Vahee dikhaatey Hain jeene kee dagar
Ve na haath thaamein agar
Toh nahin katt sakey zindagi ka safar

Manzil ka bhi Unhee ko hai gyan
Kyun na Unkee baat lein hum maan
Marte huey ko bhi de sakein Ve jeevan daan
Unhee ke ashish se hai har praani mein jaan

Kehne ko Guruji abb Hain agochar
Lekin bhakton ko Ve kayee roop mein nazar aate Hain
Unkee leela toh itni pyaari hai
Ki Ve hamaari bandd aankhon mein bhi samaate Hain

Guruji Hain hamaare zameer kee chetna
Guruji Hain hamaare jeevan kee prerna Guruji sulajhaayein har maajra
Guruji har saans ka Hain aasra

Buss phir Unko shukrana karte karte
Aao, yeh jeevan hum jeetey jaayein
Kalyaankaari hai Unke charnon ka amrit
Uss amrit ko hum shradha se peetey jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 9, 2019

Om Namaha Shivaya
Aaj Ka Suvichaar 🙏🏻🙏🏻 # 659

     Tann Se Jabb Niklein Praan

Guruji, Aapki sharan mein aakar
Bahut achche aur burey anubhav huey anokhe
Karmon ke is chakravyu mein
Khaaye bahut se dhokhe

Aapka haath jo sir par raha hameshaan
Toh aagey chalne ka saahas mila
Jabb bhi nirasha aur udaasi ne ghera
Nayee ummeed ka phool khila

Ullaas ke prafullit lamhon mein bhi Aap sangg Hain khade
Jeevan kee raahon par kadam Aapki hee kripa se badhe
Jabb kabhi kalyugi sansaar ne sabak naya sikhaaya
Har mushkil kee ghadi mein Aapko apne saath paaya

Guruvar mere, sadaa aise hee angg sangg rehna
Galatiyaan karne se bachaa lena, chaahe uske liye dukh kyun na padey sehna
Aapki sharan mein beet jaayegi jo yeh zindagi
Toh antaratma bhi santusht rahegi kar ke Aapki bandagi

Tann se jabb niklein praan
Guruji, Apni goad mein sonei dena
Agar kabhi phir se janam liya
Toh Aap hee sharan mein lena

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 8, 2018

Om Namaha Shivaya
Aaj Ka Suvichaar 🙏🏻🙏🏻 # 293

     HUM BACHCHE GURUJI KE

Apne har bachche ko itne pyaar se Guruji
Apni ruhaani goad mein Hain khilaatey
Apni neend kee qurbaani dekar
Hamein sukh chayn ke pal hain dilaate

Hamaari har zaroorat ka dhyan Ve rakhein
Phir bhi hum aur maangte hee rehte hain
Hamaari khushiyon ke liye
Kya kya dukh Veh sehte Hain

Hamaari achchee sehat ke liye
Kitni beemaariyan Apne par lete Hain
Khud itne saare kasht seh kar
Hamaare kasht duur kar dete Hain

Dua karein Guruji se ki Ve kripa karein hum par
Hamaare antarmann ko saaf kar nikhaar dein hamein
Hamein taarne aur sanvaarne ke liye
Hamaare har janam mein Apni sharan mein lein hamein

Guruji ne hamein diya hai yeh jeevan
Bahut pyaara hai Unka aur bhakt ka bandhan
Hum apne karam karein, baaki Guruji par chod dein
Guruji ke naam kee chunar hum odh lein

Bahut sukhdayee hoti hai bhakt kee apne Guru se preet
Kyun na wafa se nibhaayein hum Guru-shishya ke prem kee reet
Guruji hee mata pita Hain hamaare, Guruji hee Hain meet
Unko sarvsamarpan kar ke zindagi kee baaazi lein hum jeet

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 8, 2019

Om Namaha Shivaya
Aaj Ka Suvichaar 🙏🏻🙏🏻 # 658

                 Ruhaani Raasta

Ruhaani raaste par chalne kee koi umr nahin
Yeh toh banaa hai har kisee ke liye
Jitnee jaldi is raaste par chalna shuru karenge
Utnee jaldi hum dekhenge divya gyan ke diye

Guruji kehte Hain saraltaa rakhein hum jeene ke dhangg mein
Guruji chaahte Hain hum rangg jaayein Unke rangg mein
MahaShiv ne liya hai hamein Apni sharan mein
Devi Devta bhi naman karte Hain Unke kamal charan mein

Guruji ke banaaye huey ruhaani raaste par taraltaa hai
Guruji ke banaaye is raaste par komaltaa hai
Lekin mandd hawaa ke jhonkon ke sangg aandhi toofaan bhi aayenge
Jo har chalne wale bhakt ke liye imtehaan bann jaayenge

Guruji hee denge imtehaan mein utteerna honei kee kshamtaa
Guruji hee pradaan karenge sehensheelta aur himmat
Raaste mein badhaayein aayengi zaroor
Guruji denge unhe jhelne kee taakat

Jin jin loagon ke saath karmon ka khaata chalta aa raha hai
Guruji bhinn bhinn tarehn se unn sabse milvaayenge
Apna kirdaar humne achche se nibhaaya agar
Toh Guruji unn karmon ka bhugtaan karaayenge

Aish bhi khoob karaayenge Guruji
Karenge hum bhakton ka kalyaan
Sansaarik chakravyu se nikaalenge Guruji
Jab imtehaan mein safal hoga insaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 7, 2018

Om Namaha Shivaya
Aaj Ka Suvichaar 🙏🏻🙏🏻 # 292

        Hamaare Margdarshak Guruji

Paani kee tarehn behti hai yeh zindagi
Raasta hameshaan seedha toh nahin hota
Agar raahi himmat se kaam le
Toh phir veh beech raaste mein nahin khota

Apne karmon par dhyan dein hum
Aur soch ko rakhein achchaa
Toh Guruji raah dikhaayenge
Banaa kar hamein Apna bachchaa

Unpar vishwaas kar ke hum
Agar kardein Unhe poorna samarpan
Toh nishchint ho jaayenge hum
Aur shaant rahega hamaara mann

Hona toh vahi hai jo hai Guruji kee marzi
Hum toh buss karein Unse yahee arzi
Ki Ve hamein subuddhi karein pradaan
Taaki hum sahi aur galat ko lein pehchaan

Aisey pal agar kabhi jeevan mein aayein
Jab hum apne ko dharam sankat mein paayein
Tab bhi Guruji uljhan ko sulajhaayein
Aur hamaari duvidha duur bhagaayein

Zindagi toh paani kee tarehn behti rahegi
Waqt kee har nishaani humse kehti rahegi
Ki hum apni galatiyon ko lein sudhaar
Aur karein hum apna udhdhaar

Janm janmaantar se judein hain Guruji se hum
Unkee dee hui himmat se seh paaye hain har gumm
Har pal hum sabki niyati par karte hain Ve kaam
Phir kyun na hum simrein har pal Unka naam?

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 7, 2019

Om Namaha Shivaya
Aaj Ka Suvichaar 🙏🏻🙏🏻 # 657

         Guruji Ka Bhaana

Khuskismati kee hai ye baat
Ki milee hai hamein Guruji ke bhaane kee daat
Is daat se dhanya hua hai jeevan
Is daat ko paakar shant ho jaa aye mann

Jaisa bhi ho qubool karein sir aankhon par
Kyunki Guruji ka bhaana toh daat hai
Sachche bhakt ko bhaana meetha laagey
Kyunki veh Guruji kee dee hui saugat hai

Is bhaane mein hai raaz karmon ko kaatne ka
Isliye ismein sukh ke saath saath dukh bhi aate hain
Is bhaane ko neeven hokar sweekaarne se
Hum Guruji ke aur bhi kareeb ho paate hain

Is bhaane mein hai hamaara kalyaan
Is bhaane ka karna hai sammaan
Is bhaane kee divya shakti se hain hum anjaan
Is bhaane se hoga hamaari mukti ka intazaam

‘Jai Guruji’ kehte kehte Guruji ka anusaran karte chalein
‘Shukrana Guruji’ kehte kehte apni jholi bhaane kee daat se bharte chalein
Shukraguzaar hokar jo Guruji ke bhaane ko sweekaarega
Guruji ka ashirwaad uss bhakt ko ek din awashya taarega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 6, 2018

Om Namaha Shivaya
Aaj Ka Suvichaar 🙏🏻🙏🏻 # 291

Guruji Kee Mahima Aparampaar

Nainon mein karuna ka sukhmayee saagar
Chehre par chhaaya hai divya prakash
Muskaan mein mamta kee gehri gaagar
Roop itna viraat, ki chhoo le akash

Charan hain Unke komal kamal
Aashirwaad Unka hai sukhdayee
Unkee leela dekh kar sabne
Pehchaan lee Unkee khudaayee

Duniya ke har koney mein
Guruji ke bhakt hain rehte
‘Dhan Guruji’, ‘Jai Guruji’
Pyaar se sab hain kehte

Har bachche, har bade kee fikr
Guruji ko rehti hai har pal
Sabka kalyaan Ve karte Hain
Kabhi aaj, toh kabhi kal

Guruji kee mahima gaate gaate
Khushi se aankh bhar aayee
Aansoon mere dhanya huey
Yeh hai Guruji kee vadiyaayee

Jis haal mein rakhein hamein Guruji
Kyun na usee mein kar lein jeevan basar
Khushkismat hai veh shaqs
Jis par daalein Guruji apni nazar

Jinki leela kee koi seema nahin
Guruji Hain Ve anant
Jinke bina hum hain hee nahin
Guruji Hain Vahee Bhagwant

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 6, 2019

Om Namaha Shivaya
Aaj Ka Suvichaar 🙏🏻🙏🏻 # 656

Har Bhakt Ke Sangg Guruji Ka Rishtaa

Raaste kee talaash mein tu yoon hee bhatak raha hai
Dhyan se dekh, tere saamne toh teri manzil hai
Ekaant mein baithney kee jageh tu yoon hee dhoond raha hai
Tere mann mein toh Guruji ka mandir hai

Isliye chaahe akela ho tu, ya ho mehfil mein
Swayam ko kar le antardhyan
Dhyan mein hee tu paa lega
Apna Guru, apna Bhagwaan

Guruji tere mann mein rehte Hain
Guruji tere bhale kee baat kehte Hain
Buss tu Unpar vishwaas kar
Unke naam ka shwaas bhar

Usne aise kyun kiya, usne yeh kya kiya
Koshish kar ye sab baatein chodne kee
Toone Guruji se hai pyaar kiya
Koshish kar is satya kee oar dhyan moadne kee

Isee dhyan mein hai tera sukh
Yahee dhyan khatm karega tere dukh
Havaayein chaahe badal lein apna rukh
Tu Guruji ke naam se meetha rakh apna mukh

Apne mann ke divya mandir mein
Basaa le Guruji ko sadaa ke liye
Guruji tujhe shabashi denge
Teri is adaa ke liye

Guruji aur tera naata paawan aur seedha hai
Iske beech kisee aur ko na tu laana
Kisee sandeshvaahak ka beech mein hona toh dhokha hai
Kyunki har bhakt ke sangg Guruji ka rishta adviteeya aur anokha hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja