Author: dhirjabhat

December 5, 2018

Om Namaha Shivaya
Aaj Ka Suvichaar 🙏🏻🙏🏻 # 290

              Guruji Jaisa Koi Nahin

Guruji kee maujoodgee ka
Kyun dhoondhte ho saboot
Guruji Hain tabhi toh hai
Hum sabka wajood

Guruji kee kripa se hee
Har pashu pakshi ped aur paudha
Guruji kee leela se hee
Mila hamein insaan ka ohadaa

Guruji kee rachna se hee hain
Yeh chand, sooraj, aur taare
Guruji kee mahima se dikhte hain
Har mausam ke nazaare

Guruji kee karuna se hee
Rogi ko miley roag se chhutkaara
Guruji ke maargdarshan se
Milta hai doobte huey ko kinaara

Guruji ke pradaan kiye huey gyan se
Drishtikoan sanvar jaata hai
Guruji kee divya roshni se
Jeene ka raasta nazar aata hai

Guruji kee nazar se kabhi bhi
Koi ojhal nahin ho sakta
Guruji kee meher ho jaaye jispar
Uska kaam na koi rukta

Guruji ke honei se hee toh
Hai yeh dharti aur aasmaan
Guruji jaisa koi nahin
Guruji hee Hain Bhagwaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 5, 2019

Om Namaha Shivaya
Aaj Ka Suvichaar 🙏🏻🙏🏻 # 655

                        Sifaarish

Pyaare pyaare Guruji,

Yeh dil kar raha hai Aapse apne liye hee sifaarish
Kripa kar ke sweekaar leejiye yeh vinamr guzaarish
Badi ummeed aur arzoo se Aapke dar pe aaye hain
Poori karne se inkaar na karna jo tammannaa lekar aaye hain

Aisa din na kabhi bhi aaye zindagi mein
Jabb beimaani ho Aapki bandagi mein
Koi pal aisa na ho jabb apne aap ko aayine mein dekhne se katraaein
Ya phir sach sunn-ne ya kehne se ghabraayein

Aapne sach kee raah par chalne kee dee hai jo shakti
Usey aur bhi badhaa deejiye
Aapne mann mein utpann kee hai jo Apne prati bhakti
Usey aur bhi khilaa deejiye

Aapke diye huey imtehaan mein kharey utar paayein
Aisee hamein deejiye buddhi
Aapke dikhaaye huey saral niswaarth raaste par chal paayein
Aisee hamaari keejiye shuddhi

Satya swayam hee sabke samaksh aa jaaye
Aisee keejiye kripa drishti
Koi bhi jhooth aur fareb ke dhokhe mein na aaye
Aise sanvaariye srishti

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 4, 2018

Om Namaha Shivaya
Aaj Ka Suvichaar 🙏🏻🙏🏻 # 289

   Guruji Hain Vahee Divya Prakash 

Jinkee marzi se chaley srishti
Guruji Hain veh taakat
Kasht taaley jinkee divya drishti
Guruji Hain veh himmat

Vichardhaara jo badal detein hain
Guruji Hain veh paalanhaar
Galatiyon ko kshamaa jo kar dete Hain
Guruji Hain veh bakshanhaar

Zindagi ke sangeet ko layy milta hai jinse
Guruji Hain veh damroodhaari
Haalaat hamaare jo Hain sanvaarte
Guruji hee Hain veh leeladhaari

Jinkee kripa se aatmabal aata hai
Guruji Hain veh urja
Jinke dhyan mein magn rahei mann
Guruji Hain veh pooja

Jinke bharose chal rahi har saans hamaari
Guruji Hain veh vishwaas
Jinko mehsoos kar sakey antaratma hamaari
Guruji Hain veh ehsaas

Jinkee prerna se aaye jaagriti
Guruji Hain veh chaitanya
Jinkee praapti se hum hon dhanwaan
Guruji Hain veh aishwarya

Jinko paane se paas na bhatke buraayee kee parchhaayee
Guruji Hain veh poojaneeya sakaash
Poore brahmaand mein hai mashhoor jinkee vadiyaayee
Guruji Hain vahee divya prakash

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 4, 2019

Om Namaha Shivaya
Aaj Ka Suvichaar 🙏🏻🙏🏻 # 654

         Aao Bhaktjanon

Aao bhakjanon, sab aao
Simran ka mausam hai aaya
Guruji ka haath hamaare sir par hai
Simran yeh paigaam hai laaya

Sharad aur greesham ritu toh aakar chale jaayenge
Vasant aur patjhad bhi hameshaan ke liye na reh paayenge
Lekin simran ka mausam anant hai
Aur simran ka phal bhi beantt hai

Simran se mil jaayegi shakti
Simran se nikhar jaayegi bhakti
Simran se prassann rahega antarmann
Simran se milega Guru naam ka dhan

Simran se sadaa mehsoos hongei
Guruji hamein apne sangg
Simran se bhar jaayega
Zindagi mein ruhaani rangg

Is rangg kee chhavi se sajaalo
Pyaar se tum apna sansaar
Baar baar karo, simran kar lo lagaataar
Aur Guruji ka ashish paa lo baarambaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 3, 2018

Om Namaha Shivaya
Aaj Ka Suvichaar 🙏🏻🙏🏻 # 288

                   Aye Mere Dil

Aye mere dil, tu Guruji ka deewaana ho jaa
Guruji ko saump de apni doar
Buss tu Guruji mein kho jaa
Phir na tu dekh kaheen aur

Apni bhakti se tu utpann kar itnee shakti
Ki jyot kee lau bhi ksheen lagey
Itnee umang laa tu apni deewaanagi mein
Ki veh jharne se bhi tez bahey

Teri deewaanagi mein pyaar itna ho
Jitne ambar mein taare
Teri bhakti mein shradha itnee ho
Ki Guruji swayam aayein tere dwaare

Teri lagan mein ekaagrataa aisee ho
Ki tujhe sudh budh na rahei jahaan kee
Tere charitra mein sabhyataa aisee ho
Ki tujhe utsukta na ho yahaan vahaan kee

Buss tu mastt hokar karta chal
Apne Guruji se pyaar
Unke ashish se apni jholi bharta chal
Chaahe kuch bhi kahei sansaar

Niswaarth prem keval Guruji denge
Is kalyuga ke sansaar mein
Tu apna jeevan kurbaan kar de
Apne Guruji ke pyaar mein

Shaayad duniya waale aayein tere paas
Prem jataane ya phir jhagadne
Parantu antt vele keval Guru hee aayega
Teri baahen pakadne

Aye mere dil, phir tu kya soch raha hai
Apne jeevan ko sanvaar le
Tere Guruji dene ke liye baithey Hain
Unse tu pyaar beshumaar le

Aye mere dil, kehde tu Guruji se
Guruji, mujhko na kabhi thukrana
Jis haal mein Guruji tujhe rakhein
Tu karta chal Unka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 3, 2019

Om Namaha Shivaya
Aaj Ka Suvichaar 🙏🏻🙏🏻 # 653

              Pal Pal Ka Sahaara

Pal pal ka sahaara Hain Guruji
Doobtee naiya ka kinaara Hain Guruji
Sabhi bhakton ko milta pyaar Guruji ka
Sab khushkismat hain paakar dulaar Guruji ka

Raaste ka andhkaar mitaatey Hain Guruji
Raaste par chalna sikhaate Hain Guruji
Mehsoos karo, toh jaano ki Apna ehsaas dilaate Hain Guruji
Neeras zindagi mein ruhaani rangg milaate Hain Guruji

Agam agochar Hain par Hain sarv shaktimaan
Sabke dil mein kya hai, Ve lete Hain jaan
Abb bhi waqt hai, tum kar lo Guruji ka dhyan
Unkee rehmat se paa lo Unse tum divya gyan

Baatein karo tum Guruji ke saath
Sach mein Ve sunte Hain tumhaari baat
Unse taar jodna hai ilaaj har pareshaani ka
Unke vash mein hai kalyaan zindagaani ka

Din kee shuruaat karo Guruji ke naman se
Swayam ko shaktishali banaao Unke manan se
Mann ko shant rakho gurbani ke shravan se
Guruji ko sadaa angg sangg paao tum simran se

Aisa karne se tum ho jaaoge har din kee yatra ke liye tayyaar
Tumhe har mushkil ka saamna karne kee himmat dega Guruji ka pyaar
Guruji dharti par aaye bannkar Shivji ka avataar
Ve sarvgyaani Hain, Unkee leela hai aparampaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 2, 2018

Om Namaha Shivaya
Aaj Ka Suvichaar 🙏🏻🙏🏻 # 287

Jo Sukoon Hum Dhoond Rahein Hain

Jabb jabb hum sabka hua janam
Tabb tabb hua hamaara naamkaran
Hamaare naam ke bina benaam thaa hamaara shareer
Hamaare naam ke sangg jud gayee hamaari taqdeer

Apne naam ko sunn sunn kar mann mein aaya ahankaar
Isee shareer mein hua moh, aur isee se ho gaya pyaar
Bhool gaye hum sab ki shareer toh nashwar hai
Ye bhi bhool gaye ki isey banaane wala Ishwar hai

Bhool gaye ki hum yeh shareer nahin hain
Balki yeh kshanbhangur shareer hamaara hai
Sach toh hai ki hum sab atmaayein hain
Atma hee shareer ka ekmaatra sahaara hai

Atma ke bina shareer kuch bhi nahin
Yeh jaan lein hum kyunki yahee hai sahi
Shareer toh antt mein laash bannkar jalega
Lekin atma ka safar toh iske baad bhi chalega

Tabhi toh kehte Hain Guruji
Ki simran mein mann lagaayein
Aur sewa aur simran se
Apni adhyatmik shakti badhaayein

Yeh ahem, ye vehem, ye atma ke liye achche nahin hain
Yeh saansaarik bandhan mithya hain, sachche nahin hain
Satya hai toh keval Guruji ka naam
Is naam mein hon jaayein hum antardhyan

Guruji hee karenge hamaari atma ka udhdhaar
Guruji hee denge hamaari atma ko shudh sanskaar
Shareer toh waqt aane par raakh ho jaayega
Lekin mukti na milee toh janam maran ka chakr chalta jaayega

Guruji kee mahaan leela ko hum sab jaanein
Apne bheetar samaayee hui divya roshni ko pehchaanein
Guruji hee denge veh ashish aur veh shakti
Jis se milegi hamaari atma ko mukti

Jis dharti par chhayega akash
Usee dharti par bann jaayega shareer ek laash
Dar dar bhatak kar kyun karein hum talaash
Jo sukoon hum dhoondh rahein hain, veh hai sirf Guruji ke paas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 2, 2019

Om Namaha Shivaya
Aaj Ka Suvichaar 🙏🏻🙏🏻 # 652

Aapka Saath Toh Hai Bilkul Sachcha

Guruji, Apni karuna barsaayiye
Naadaan hain hum, hum par rehem farmaayiye
Apni divya drishti hum par rakh kar hamaari dashaa sanvaariye
Bhoole bhatkey huey raahi hain hum, kripa kar hamein taariye

Aisee mehar karo hum par Daata
Ki paristhiti aur mann kee sthiti mein na ho koi naata
Hum shukrguzaar rahein chaahe Aap rakhiye hamein kisee bhi haal mein
Mere sangg aisa kyun ho raha hai- na uljhein hum is sawaal mein

Kyunki sabke jeevan mein hoti hai koi na koi mushkil
Aapka ashirwaad karta hai hamaari andheri raahon ko jhilmil
Hamaari zindagi ka har lamha hai Aapki kripa ka mohtaaj
Aap hee jagat ke naath Hain, Aapka hai poore Brahmand par raj

Aapka naam lekar chalte rahein is zindagi mein
Koi kasar na chodein Aapki bandagi mein
Kyunki usee se milega hamein saahas aur utsaah
Jis se aasaan lagne lagegi hamein jeevan kee raah

Aap saath Hain toh har chunauti ka kar sakenge hum saamna
Aap sangg Hain toh poori hogi har mangalmayee manokaamna
Aapke alawa koi na jaane ki kya hai hamaare liye achchaa
Baaki sahaare vishwasneeya hon ya nahin, lekin Aapka saath toh hai bilkul sachchaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 1, 2018

Om Namaha Shivaya
Aaj Ka Suvichaar 🙏🏻🙏🏻 # 286

   Unse Unhee Ko Paane Kee Arzi

Jab nirasha tujhe ghere bann kar jeevan mein andhera
Tabb Guru naam se uday hoga asha ka sundar savera
Jabb tu chodega apni ‘mai’ aur bann jaayega ‘kuch nahin’
Toh dekhna Guruji poori kar denge teri her ruhaani kamee

Dil se sabke kalyaan ke liye tu dua kar
Mushkilon ko dekh kar udaas na hua kar
Tu sunn ne kee neeyat toh rakh, Guruji tujhse baat karenge
Aur Unse praarthana karega, toh Ve teri har baat sunenge

Teri har nirasha se badi aur behtar hai Guruji kee marzi
Buss tu kar Unse Unhee ko paane kee arzi
Ve hongei tere saath toh tujhe aur kuch na chahiye hoga
Tu bilkul bhi na tootega chaahe duniya de de tujhe dhokha

Guruji toh karuna aur mamta ke saagar Hain
Ve sach mein kripa aur gyan kee gaagar Hain
Yaad rakh, tu chod dega jab apna saara ahem
Toh neevanpan sudhaarne lagega tere karam

Zindagi mein safalta ke liye zaroori hai atma vishwaas
Veh aayega jabb Guruji ka hoga tere kann kann mein vaas
Jabb tujhe hoga Guruji kee maujoodgi ka anokha ehsaas
Toh ‘Dhan Dhan Guruji’ kahega tera har shwaas

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 1, 2019

Om Namaha Shivaya
Aaj Ka Suvichaar 🙏🏻🙏🏻 # 651

Guruji Ke Sangg Dukh Mein Bhi Sukh Hai

Raasta khud bakhud kab manzil bann gaya
Dil ko hui hee nahin khabar
Jo Guruji se kee thee mainey
Uss dua ko ho gaya asar

Dua thee ki Ve Apni sharan mein le lein
Apne dil mein mujhe chhoti si jageh de dein
Dua ne dikhaaya apna asar
Jab Satguru ne mujhe apnaaya is kadar

Pyaar se sambhaal liya Unhonei
Mata pita ka pyaar hai diya
Mujhe Unpar vishwaas ho gaya
Aur Unhonei mere vishwaas par bharosa kiya

Kalyuga kee kadak dhoop kee nakaaratmak garmi mein
Guruji dete Hain sheetal chhaaya
Guruji ke sangg dukh mein bhi sukh hai
Yeh sach samajh mein hai aaya

Buss Unkee hee kripa se
Achche se beet rahi hai zindagi
Shukrana Guruji ka hai beintehaa
Ki Unhonei karne dee hai Apni bandagi

Yeh Guru shishya ka rishta hai itna anmol
Guruji kee sharan mein aakar mainey hai jaana
Sach toh yeh hai ki Guruji hee apne Hain
Aur yeh jagg hai bilkul begaana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 30, 2018

Om Namaha Shivaya
Aaj Ka Suvichaar 🙏🏻🙏🏻 # 285

Guruji Kalyaankaari Raah Dikha Rahein Hain

Andhvishwaas ko chod do
Vehem ke bandhan toad do
Kyunki yeh sabb vyarth hai
Inka na koi arth hai

Jab humne Guruji ko Bhagwaan hai maana
Toh phir kyun na humne yeh jaana
Ki vehem aur andhvishwaas karein atma ko kamzor
Aur inka nakaaraatmak asar phailta hai chaaron oar

Guruji hamaare Hain MahaShiv ke avataar
Unhee ke haath mein hai hamaari naiyaa kee patvaar
Ve chaahein ki hum andhvishwaas ko chod dein
Ve chaahein ki hum vehem se muh moad lein

Shiv Yog kehta hai ki sabse zaroori hai bhaav
Koshish karein hum bhar sakein kisee ke dil ke ghaav
Aur agar na bhar sakein, toh kum se kum aur dard toh na pahunchaayein
Kisee tarehn kee sahaaytaa kar hum ek dooje ke kaam aayein

Jab hogi soch aur vyavhaar mein sadbhavna
Aur hogi dil mein sabke liye shubhkaamna
Toh sabke jeevan mein hongei sahaare
Aur kitne khush hongei Guruji hamaare

Saralta aur sadbhavna se bharaa jeevan
Yeh mushkil toh hai, par namumkin nahin
Guruji kalyaankari raah dikhaa rahein hain
Aye bande, tu uspar chal ke dekh toh sahi

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 30, 2019

Om Namaha Shivaya
Aaj Ka Suvichaar 🙏🏻🙏🏻 # 650

Tu Jitna Bhi Bada Bann Jaa Duniya Ke Liye

Kyun moh aur maya ke laalach mein aakar
Tu apne zameer aur apni akhandataa ko khota hai
Tu jitna bhi bada bann jaa duniya ke liye
Guruji kee nazar mein tu hameshaan hee chhota hai

Isliye itraana chod de aur neevan hokar jee
Vinamrataa aur shradha se Guru naam ka amrit pee
Teri ahem bhari soch tujhe raas na aayegi
Kewal mai ko tyaagkar hee atma mukt ho paayegi

Tere jeene ka uddeshya kya hai soch le
Aur is baat ka aaj faisla kar le tu
Apna kalyaan chaahta hai toh
Guru naam ke amrit se apni pooja ka pyaala bhar le tu

Mai ko chod de, buss Guruji ka tu ho jaa
Jagg ko bhool kar, Guruji mein tu kho jaa
Guru naam kee ganga mein apne paapon ko dho jaa
Mithya kee duniya mein jaag raha hai, Guruji kee goad mein so jaa

Uss neend se jab tu jaagega
Tere chakshu sach mein khul jaayenge
Guruji kee kripa se tera uddhaar hoga
Aur tere paap bhi dhul jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 29, 2018

Om Namaha Shivaya
Aaj Ka Suvichaar 🙏🏻🙏🏻 # 284

Guru Milan Ka Sach Kar Le Tu Sapna

Guruji ne le liya tujhe Apni sharan mein
Diya sthaan Unhonei tujhe Apne charan mein
Tere kasht apne sir par le liye Unhonei
Tujhe tere haq se zyada diya Unhonei

Sun dhyan se, bajj rahei hain tere dil ke taar
Tera zameer tujhse keh raha hai baar baar
Moh maya se toh tujhe milegi keval haar
Guru sharan mein paa lega tu saara sansaar

Abb jo Guruji ke pyaar ka ho gaya hai ehsaas
Mann mein Guru milan kee hai tamanna yeh khaas
Keval Guru naam japne se hee bujhegi yeh pyaas
Varna reh jaayegi dil mein adhoori aas

Guru naam japte japte
Guruji mein tu rumm jaayega
Kisee aur kee sudh na hogi tujhe
Ek din aisa zaroor aayega

Buss, himmat na haar
Na ho tu niraash
Guru bhakti mein leen hokar
Karde ek zameen aur akash

Guru milan ka sach kar le tu sapna
Baaki sab gair hain, ek Guru hai apna
Sab kuch chod kar jabb tu Guruji kee sharan mein aayega
Tabb Unke kamal charan mein tujhe sampoorna Brahmand mil jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 29, 2019

Om Namaha Shivaya
Aaj Ka Suvichaar 🙏🏻🙏🏻 # 649

           Har Bandhan Se Azad

Hum chaahe chadh rahei hon safaltaa kee seedhee
Ya phir asafaltaa hamein rahee ho gher
Guruji hamein sambhaal lenge
Ve na karenge ek pal kee bhi der

Phir kaahe sukh ka ahankaar
Aur phir dukh mein kaisa ghabraana
Antt vele mein toh sabne
Karmon ka bojh lekar hai jaana

Jaane wala kal toh beet gaya
Aane wala kal toh kal hee aayega
Is pal mein Guruji ke ho jaayein
Toh kal, aaj, aur kal sanvar jaayega

Kyun na anand lein is safar ka, jismein Guruji hamaare saath Hain
Anand lein is bachpan ka, jismein Guruji hamaare naath Hain
Khayaal rakhein uss tann aur mann ka, jinhe ashish dete Guruji ke haath Hain
Hum chaahe jitna bhi chhupa lein, Guruji toh jaante hamaare dil kee har baat Hain

Na zanjeerein hon moh maya kee
Na bandhein hum kisee dukh se
Na pareshaaniyon ka saaya hamein maayoos karey
Na guroor aaye hamein sukh se

Guruji hee raasta Hain, Guruji hee Hain manzil
Hamein moksh takk pahunchaane aaye Hain
Guruji hee satya Hain, Guruji hee Hain MahaShiv
Hamein har bandhan se azad karaane
aaye Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 28, 2018

Om Namaha Shivaya
Aaj Ka Suvichaar 🙏🏻🙏🏻 # 283

Shukr Hai Guruji Ne Thaam Lee Hai Kalaayee

Sab ke sab ik din maati mein mil jaayenge
Na tum rahoge, na hum
Kuch bhi mehsoos phir na kar paayenge
Na koi khushi, na koi gumm

Shareer toh khatm ho jaayega
Bann jaayega raakh kee dheri
Yeh daulat, ye zameenein kisee kaam kee nahin
Phir kya teri, aur kya meri

Keval karmon kee poonji saath mein jaayegi
Agley janam vahee kismat ke roop mein aayegi
Khushkismati ka ek toh hai saral tareeka
Ki shudh rakhein jeene ka saleeqa

Vahee sanvaar sakte hain hum jo apne vash mein hai
Baaki sab toh dil mein badi kashmkash mein hai
Shukr hai Guruji ne thaam lee Hai kalaayee
Unko sab samarpan karne mein hee hai bhalaayee

Vahee sambhaalenge sab kuch aur raasta dikhaayenge
Unkee kripa se hee hum manzil takk pahunch paayenge
Zaroori nahin ki duniya waale saath nibhaayenge
Lekin Guruji ke sangg honei se loag dil na toad paayenge

Maanav janam mila hai naseeb se
Har ek pal ko dekh lein kareeb se
Dekhte hee dekhte har pal beet jaayega
Palak jhapakte hee jaane ka pal aayega

Bhool jaayein ve udaasi ke pal puraane
Kaamna karein ki aaney waale pal hon suhaane
Guruji kee kripa se shudh karein apne vichaar
Guruji ko banaa lein apne jeene ka aadhaar

Jeevan kee yaatra ko kyun na banaa lein hum ruhaani
Har divya anubhav chodega atma par nishaani
Har din jeene ka paath padhaayegi zindagaani
Guruji kee sadaa banee rahegi meharbaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 28, 2019

Om Namaha Shivaya
Aaj Ka Suvichaar 🙏🏻🙏🏻 # 648

 Paawan Aapka Naam Hai

Pyaare Guruji,

Paawan Aapka naam hai
Paawan Aapka dhaam hai
Paawan Aapka har kaam hai
Aapko paawan pranaam hai

Aapke ujjwal noor kee mahima
Poore jagg par hai chhaayee
Aapne Apne pyaar se seenchkar
Is duniya kee bagiya hai banaayee

Is bagiya mein Aapki divya khushboo
Pavitrataa ka sandesh hai deti
Aapki ruhaaniyat se har kalee
Pyaara sa ashirwaad hai leti

Aapki kripa se bani rahey is bagiya kee sundartaa
Aapki karuna se har kalee, har phool ka saundarya rahey nikhartaa
Aapse hee sukh hai, Aapse hee mann ka chayn
Vintee hai ki sadaa hum par nazar rakhein Aapke divya nayn

Taaki hum na karein koi galat kaam
Taaki hum japte rahein Aapka naam
Taaki hum bann sakein achche insaan
Aur achchaayee hee ho hamaari pehchaan

Iske liye hamein bahut parishram karna hoga
Kyunki hum toh paapon kee dheri hain
Lekin Aapki kripa se sab mumkin hai
Sunehri subah aayegi, chaahe raatein andheri hain

Aapke paawan dham kee manzil kee oar jaayenge
Aapke paawan naam ko japte jaayenge
Paawan oorja se apne har kaam ko karte jaayenge
Aapko pranaam kar Aapka divya ashirwaad paayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 27, 2018

Om Namaha Shivaya
Aaj Ka Suvichaar 🙏🏻🙏🏻 # 282

 Guruji Dekh Rahein Hain Sab Kuch

Koi apne aramaanon kee aag mein hai jal raha
Koi itne gunaah kar ke bhi hai phal raha
Duniya ka kaam buss yoon hee hai chal raha
Insaan ka imaan hai dekho dhal raha

Sab duniya ka dekhein tamaasha
Har koi samajhtaa nahin hai pyaar kee bhaasha
Kisee ke mann mein hai ummeed aur asha
Toh kisee aur ko ghertee hai niraasha

Koi ahem kee khaatir apnon se jhagadta hai
Kisee ka santulan auron ke durvyavhaar se bigadta hai
Koi doojon ke ansoon dekh kar pighalta hai
Toh koi apne dukh ke aansoon nigalta hai

Guruji dekh rahein Hain sab kuch
Ve jaanein kiskee neeyat hai tuchh
Phir bhi Unke mann mein sab Ke liye hai preet
Aur aaj nahin toh kal, satya kee hee hoti hai jeet

Buss phir Vahee faislaa karenge
Kya galat hai aur kya sahee
Kisee bhi insaan ko
Yeh nirnaya lene ka haq nahin

Kyun na baaki sab chod kar
Apne karmon par dein hum dhyan
Jo itne pyaar se Guruji detey Hain
Paa lein Unse veh anmol gyaan

Hum sabke hain maansik sangharsh
Guruji hee hamaare iklautey madadgaar Hain
Hamaare gumm lekar jo detein Hain hamein harsh
Ve Shivavataari Guruji hamaare parwardigaar Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 27, 2019

Om Namaha Shivaya
Aaj Ka Suvichaar 🙏🏻🙏🏻 # 647

         Har Aane Waale Pal Ke Liye

Har aane waale pal ke liye
Asha ke deep jalaa le
Prem aur shradha se Guruji ko
Mann mandir mein tu basaa le

Teri andheri raat ke aasmaan ko
Ve chaand aur taaron se sajaa denge
Teri na-ummeed zindagi ko
Ve asha kee panaah denge

Guruji kee suraksha ka kavach
Tujhe har pal sambhaalega
Tere har ghaav ko tera Guru
Dayaa aur dulaar kee davaa dega

Bhaagyashaali hai tu
Ki tujhe Guruji mil gaye Hain
Tere veeraane jeevan mein
Khushkismati ke phool khil gaye hain

Unka bachcha hai tu
Na ho tu bilkul bhi niraash
Tere sukoon ke liye Guruji
Ek kar denge zameen aur akash

Phir vilambh aur vichaar kis baat ka
Antt kar tu agyaan aur niraasha kee raat ka
Guruji ka kar tu haardik abhinandan
Aur anubhav kar le sakaaratmakta ka spandan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 26, 2018

Om Namaha Shivaya
Aaj Ka Suvichaar 🙏🏻🙏🏻 # 281

       Hamaare Guruji Aaye Hain

Naacho gaao khushi manaao
Hamaare Guruji aaye Hain
Shradha se darbaar sajaao
Hamaare Guruji aaye Hain

Pyaar se karo Unka swaagat
Ve hamaare liye aaye Hain
Sachche dil se karo ibadat
Ve arzi sunn ne aaye Hain

Unke tejmayee roop ko nihaaro
Ve Shiv avataar bann kar aaye Hain
Unki kripa se jeevan ko sanvaaro
Ve kasht harne aaye Hain

Kaam, krodh, moh, lobh, ahankaar
Ve hamein inse chudaane aaye Hain
Saadaa saral jeevan hee bhalaa hai
Ve hamein sikhaane aaye Hain

Sewa, simran, aur samarpan ka
Ve mahatva bataane aaye Hain
Andhvishwaas aur saare vehem
Ve hamaare mann se hataane aaye Hain

Gupt daan aur gupt sewa ka
Paath padhaane aaye Hain
Hamaare har kadam par hamaare sangg
Ve kadam badhaane aaye Hain

Abb toh dil mein aur koi aarzoo nahin
Hamaare Bhagwaan jo aaye Hain
Jabb bhi apne dil mein hum jhaank ke dekhein
Vahee is dil mein samaaye Hain

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 26, 2019

Om Namaha Shivaya
Aaj Ka Suvichaar 🙏🏻🙏🏻 # 646

                   Guruji Ka Ganit

Raat ka ho andhera
Ya phir ho ujlaa savera
Khushi ka pal ho tera
Ya phir gumm ne ho tujhe ghera

Guruji ka haath hai tere sir par
Isliye uth jaayega tu gir kar
Chaahe maayoos ho tu museebaton se ghir kar
Tu swayam ko shaant aur sthir kar

Vaise tu ek baat toh bataa
Ki tera hai hee kya jo tu saath le jaayega?
Guruji ke alaawa
Aur koi tere kaam bhi toh nahin aayega

Phir buss sab kuch bhool kar
Vyast reh tu apne karam mein
Har pal Guruji ka simran kiye jaa
Aur rehta chal Guruji kee sharan mein

Tujh par har pal hai Unkee divya nazar
Unhonei ye saansein dee Hain toh jeevan raha hai guzar
Unhee kee kripa se sanvar rahi hai teri zindagi kee dagar
Isliye tu Unkee baat maan, aur na kar tu agar-magar

Buss, apni taraf se achche karam kar
Yaad rakh Ve tere sangg Hain har kadam par
Raasta Ve dikhaayenge, chalne kee himmat bhi denge
Na bhatak jaaye tu, Ve aisee matt bhi denge

Isliye Unke dikhaaye huey raaste par hee chalna
Taaki baad mein tujhe na padey haath malnaa
Chaahe is janam mein ho ya kisee agley janam mein
Guruji ka ganit laaghu hota hai hamaare har karam mein

Apne vishwaas ko kar le abb atoot
Chaahe duniya mein sab kuch jaaye chhoot
Abb jo bhi teri zindagi mein ho jaaye
Samajh le ki vahee Guruji ke mann ko bhaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja