Author: dhirjabhat

October 6, 2018

Om Namaha Shivaya
Aaj Ka Suvichaar 🙏🏻🙏🏻 # 230

Guruji, Abb Aur Hum Kya Maangein Aapse

Jabb bhi girey hum, Aapne uthaaya
Ghaav par hamaare marham lagaaya
Hum mein naya utsah jagaaya
Guruji, abb aur hum kya maangein Aapse

Jabb bhi zindagi mein milee niraasha
Aapne bandhaayi hamein nayee asha
Aur hum seh sakey duniya ka tamaasha
Guruji, abb aur hum kya maangein Aapse

Apnon ne jabb chod diya saath
Aapne hee thaama hamaara haath
Aap hee hain mata, Aap hee hain naath
Guruji, abb aur hum kya maangein Aapse

Hameshaan sunein Aap hamaari fariyaad
Chaahe hamein khud ko na rahey yaad
Har pal hamein dete hain ashirwaad
Guruji, abb aur hum kya maangein Aapse

Patit hain hum, Aapne Apna paawan naam diya
Hamaari har zaroorat ka Aapne intazaam kiya
Hamaare har sangharsh ko achchaa anjaam diya
Guruji, abb aur hum kya maangein Aapse

Hamaare roag aur kasht Aapne har liye
Jeevan ke din khushiyon se bhar diye
Hamein aagey badhne ke avsar diye
Guruji, abb aur hum kya maangein Aapse

Zindagi hamaari Aapne sanvaar dee
Buree aadatein kayion kee sudhaar dee
Khushiyaan deein hamein har prakaar kee
Guruji, abb aur hum kya maangein Aapse

Bhatkey huey thei hum Aapne raasta dikhaaya
Zindagi se haar chukey thei hum, Aapne jeena sikhaaya
Vehem aur ahem mein phanse thei, Aapne andhkaar mitaaya
Guruji, abb aur hum kya maangein Aapse

Humko sadaa ke liye sharan mein liya Aapne
Hamein niswaarth prem hai diya Aapne
Hamaare liye kya kya nahin kiya Aapne
Guruji, abb aur hum kya maangein Aapse

Jo bhi chaaha humne, uss-se kaheen zyada diya Aapne
Hamein apnaa kar hamaari raksha ka vaada kiya Aapne
Jabb dil mein tuchh khayaal aaya, nek hamaara iraada kiya Aapne
Guruji, abb aur hum kya maangein Aapse

Hameshaan hamaara itna dhyan kiya Aapne
Hamaara har dukh har dard liya Aapne
Bin maangey hee sabb de diya Aapne
Guruji, abb aur hum kya maangein Aapse

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 6, 2019

Om Namaha Shivaya
Aaj Ka Suvichaar 🙏🏻🙏🏻 # 595

                        Simran Se

Jab Guruji se ho jaaye pyaar
Aur Guru milan ka ho intazaar
Bhari bheed mein lagta nahin hai dil
Sooni lagne lagti hai har mehfil

Lekin phir Guruji yaad dilaatey Hain
Ki har lamha unka diya hua uphaar hai
Aur har pal ko achchee tarehn se jeena hai
Kyunki hum par hamaare karmon ka udhaar hai

Isliye chaahe vyast hon kisee kaam mein
Ya mehfooz hon aaraam mein
Sadaa magn rahein Guruji ke naam mein
Simran karein har subah har shaam mein

Simran har pal karne se
Guruji dil mein basey rahenge
Guruji ke angg sangg honei se
Hum har haalaat sahenge

Isliye na zaaya karein ek bhi pal
Simran hee hai vireh ka hal
Simran se Guruji kee maujoodgi ka ehsaas rahega barkaraar
Aur simran se bhari bheed mein bhi hota rahega Guruji se deedar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Simran Se (10/06/2019)

October 5, 2018

Om Namaha Shivaya
Aaj Ka Suvichaar 🙏🏻🙏🏻 # 229

             Jeev Rachna Ka Chakr

Jeev rachna ka chakr toh nirantar chalta rehta hai
Jaise prakriti ka jharna jhar jhar kar ke behta hai
Janm aur mrityu ke chakrvyu ke chakkar ko sehta hai
Aur anaadi kaal takk sanaatan kahaani yeh kehta hai

Hum sabb is jeevan chakr mein abhineta bann ke aaye hain
Kayee dikhte apne hain aur kayee dikhte paraaye hain
Sabki zindagi mein kuch khushiyan hain aur kuch gumm ke saaye hain
Lekin khush-kismati se Guruji hamaare Bhagwaan bann ke aaye hain

Jeevan ka naatak jabb shuru hua, toh satyuga ka sukh thaa chhaaya
Har insaan ke dil mein keval pyaar hee pyaar thaa samaaya
Iske baad tretayuga saasaarik aakarshan le kar aaya
Dwaaparyuga mein toh insaan ne apna imaan takk ganvaaya

Phir aaya kalyuga ka samay, jo abb bhi jaari hai
Buree aur anuchit soch kee phayl rahee beemaari hai
Hum bhagyashaali hain ki Guruji ne baah thaami hamaari hai
MahaShiv Guruji kee leela sach mein bahut hee nyaari hai

Vahee toh taarenge hum sabko aur karenge beda paar
Unhonei hee toh kasht hamaare taale hain baar baar
Antaryaami hain Guruji aur Unkee Mahima hai aprampaar
Hum sab hain Unke bachche aur Ve hamaare paalanhaar

Pehle Ve zindagi bakshein phir karein nirogi kaaya
Ehsaas dilaate hain Ve ki bekaar hai yeh moh maya
Unkee kripa se na daraa sakega hamein pareshaaniyon ka saaya
Vahee hamaare sab kuch hain, Unhonei yeh ehsaas hamein dilaaya

Guruji kee sharan mein hain hum kyun na Unkee baat lein maan
Na dhoondhein oopari dikhaawe aur fareb mein hum apni shaan
Guruji ne diya hai hamein bhakti aur adhyaatmik shakti ka gyan
Badi achchee kismat hai hamaari, jo humne paaya hai Unse yeh Vardaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 5, 2019

Om Namaha Shivaya
Aaj Ka Suvichaar 🙏🏻🙏🏻 # 594

     Guruji Tere Saath Hain Har Ghadi

Guruji se kalam ko chheen-ne kee koshish na kar
Guruji teri zindagi kee kahaani har pal likh rahei Hain
Raaste mein aane wali mushkilon se na dar
Guruji sab jaante Hain, chaahe Ve khaamosh dikh rahei Hain

Kshanbhangur hai har museebat
Chaahe aisa lagta nahin hai
Uss dauraan bhi Guruji ke hukm se
Jo ho raha hai vahee sahi hai

Tujhe toh shaayad yaad hee nahin
Tere pichhle karmon kee kahaani
In karmon ka bhi bhugtaan karaa rahein hain Guruji
Sanvaar rahein hain teri zindagaani

Agar tujhe lagta hai kisee bhi kaaran se
Ki Guruji na dekhein tere santaap ko
Toh dekh le unhei jo tujhse zyada dukhi hain
Aur samjhaa le tu apne aap ko

Guruji ko tere har kasht ka gyan hai
Chaahe veh bada ho ya chhota
Guruji kee sharan mein na hota tu
Toh tera haal aur bhi bura hota

Isliye dil mein jalaaye rakh vishwaas ka deep
Yakeen kar ki Guruji hain tere bilkul sameep
Aur Unke ashirwaad se museebat ka kar le tu saamna
Kyunki Unhonei hee tujhe har pal hai sambhaalna

Zaroori hai Guruji par bharosa aur Unse niswaarth prem karna
Na duniya waalon ke peechche bhaag aur chod de ab tu darna
Teri antaratma mein Guruji kee shakti hai bhari
Aur Parwardigaar Guruji tere saath hain har ghadi

Mamta kee siyaahi bhar kar Apne divya kalam mein
Guruji atma-vishwaas daal denge tere har kadam mein
Taaki tu zindagi kee kahaani mein changaa kirdaar nibhaayega
Aur phir tera Guru tujhe sachkhand ka dwaar dikhaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2018

Om Namaha Shivaya
Aaj Ka Suvichaar 🙏🏻🙏🏻 # 228

        Guruji Ko Hum Par Garv Ho

Chaahe kabhi kabhi yeh yaatra lagtee hai dukhdaayee
Phir samajh mein aata hai ki asal mein hai yeh sukhdaayee
Kyunki jo hamein lagta hai nuksaan
Veh asal mein hota hai hamaara imtehaan

Guruji hee hamein sambhaaltey hain
Bhakton kee buree aadatein sudhaarte hain
Hamaara bhavishya sanvaarte hain
Aur har pal hamein Ve taarte hain

Unhonei agar haath na thaama hota hamaara
Toh is jagg mein hamaara nahin thaa guzaara
Guruji ne jo banaaya hamein Apni aankhon ka taara
Toh humne saump diya Unko yeh jeevan saara

Raah mein jo aayein kasht, toh Guruji dete hain hamein himmat
Museebaton se ladne kee Guruji hamein dete hain taakat
Jo karne kee hamaari aukat nahin, uss kaam ke liye dete hain kaabiliyat
Aur anaaya ke khilaaf awaaz uthaane kee Veh dete hain ijaazat

Aur kisee se nahin, keval Guruji se darein hum
Kyun irshya, jhooth, aur paakhand kee aag mein jalein hum?
Jis kaam se Guruji khush na hongei, ve kabhi bhi na karein hum
Guruji kee dikhaayee raah par chalein, aur sadaa Unse prem karein hum

Kyun na hum apne taur tareeke badal paayein?
Saral rakhein jeevan, kyun isey uljhaayein?
Pehle kya kamm hain, jo aur vikarma badhaayein
Guruji kee kripa se kyun na apne ko adhogati se bachaayein

Aadatein sudhaarenge, tabhi toh hogi hamaari adhyaatmik unnati
Guruji ke bataaye maarg par chalne se hee hogi pragati
Phir kyun vilambh mein samay ko vyarth ganvaayein
Guruji ko hum par garv ho, kyun na hum aise bann jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 4, 2019

Om Namaha Shivaya
Aaj Ka Suvichaar 🙏🏻🙏🏻 # 593

               Srishti Mein Aman

Jo hum har kisee ko de sakte hain
Kya hai veh anmol uphaar?
Na zaroorat hai kisee mauke kee
Aur chaahe na ho koi tyohaar?

Na kharch hoga koi laukik dhan
Na udaas hoga jis-se apna mann
Dooje ka bhi sanvar jaayega jeevan
Aur hamaara na vyarth hoga ek bhi kshan

Na hai veh tohfa paisa
Na hai veh paise ke jaisa
Na hai veh anmol ratan
Jiske liye karna padey koi jatan

Guruji bhi humse prasann hongei
Agar hum denge kisee ko veh uphaar
Guruji phir hum par barsaayenge
Apna dhed saara ashirwaad aur pyaar

Yeh tohfa hai shubhkaamna ka
Jo hum yakeenan sabko de sakte hain
Yeh tohfa itna haseen hai
Isey dekar hum bhi bheetar se jagte hain

Jab hum doojon ke liye chaahenge achchaa
Aur hamaara iraada hoga nek aur sachchaa
Toh Guruji hamaara bhi bhalaa karenge zaroor
Chaahe hum hon jitne bhi bebas aur majboor

Hum doojon ko denge jab shubhkaamnayein
Toh Guruji hamein denge dugna ashirwaad
Yahee hamaare jeevan ko sanvaarega
Bannkar bahumoolya prasad

Doojey ka bhi bhalaa ho jaayega
Hamaara bhi uddhaar ho paayega
Yeh sakaaraatamak vichaar aur vyavhaar
Srishti mein aman phailaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2018

Om Namaha Shivaya
Aaj Ka Suvichaar 🙏🏻🙏🏻 # 227

            Tu Pareshaan Na Ho

Guruji ne thaama hai tera haath
Guruji hain har kadam par tere saath
Isliye tu pareshaan na ho

Ghabraane kee nahin hai koi bhi baat
Purnima bann jaayegi amaavas kee raat
Aye bande, tu pareshaan na ho

Guruji denge tujhe suraksha aur sahara
Veh aate hain jabb bhi tooney hai Unhe pukaara
Buss phir, tu pareshaan na ho

Guruji tere achche bure ko jaanein
Guruji tere dil ke pyaar ko pehchaanein
Isliye tu pareshaan na ho

Duniya waalon ne dhokha diya toh kya hua
Tu phir bhi unhe apne dil se dete jaa dua
Buss tu pareshaan na ho

Tere apne bann gaye jo loag tere sukh mein
Vahee muh moad lenge tujhse tere dukh mein
Par tu pareshaan na ho

Sabko apni karni ka phal milta hai zaroor
Na jaane kyun duniya waalon mein aa jaata hai guroor
Lekin tu pareshaan na ho

Dheeraj dhar, rakh tu utsah aur vishwaas
Samay ke saath saath Guruji poori karenge teri aas
Isliye tu pareshaan na ho

Neembu kee tarehn Veh tujhe nichodenge
Par kabhi bhi tujhse muh na modenge
Buss tu pareshaan na ho

Aatmik bal badhaa tu kar ke sewa aur simran
Sarvasamarpan kar ke tu har pal paa le Unke darshan
Taaki phir tu kabhi bhi pareshaan na ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 3, 2019

Om Namaha Shivaya
Aaj Ka Suvichaar 🙏🏻🙏🏻 # 592

               Aye Mere Mannva

Aye mere mannva vahee karna jo Guru tujhe bataay
Chaahe jo bhi ho jaaye Guruji sadaa tero sahaay
Koi bhi na kar sakey Guruji karein vo upaay
Buss, tu sadaa japte hee rahiyo Om Namaha Shivaya

Guruji ke hotei huey koi tero baal na baanka kar paaye
Tere oopar barasti museebat kee varsha bhi amrit bann jaaye
Tere dil kee pukaar Guruji takk zaroor pahunch jaaye
Teri har ek soch ka tere Guruji ko gyan ho jaaye

Guruji par bharosa karne se tero har sankat tal jaaye
Guruji kee jyotirmayee kanti se tohe bhi bal aaye
Guruji kee kripa se nakaaraatamakta khud hee jal jaaye
Zindagi mein khushi aaj nahin toh kal zaroor aaye

Guru chaahe hamein vilambh ka kaaran nahin bataay
Phir bhi kabhi bhi na hamein chodein asahaay
Guruji haath thaamein tera beech majdhaar chodne ke bajaay
Antt mein Guru hee achche se beda paar karaaye

Jo tu har pal Guruji kee mahima ko gaaye
Aur sadaa Unko apna dukh dard bataay
Guru teri har museebat ko bhagaay
Aur hameshaan teri raksha ke liye aaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2018

Om Namaha Shivaya
Aaj Ka Suvichaar 🙏🏻🙏🏻 # 226

       Mera Guru Mujhe Sambhaale

Guru naam ke bina meri koi shwaas na ho
Mann ko mai kahoon ki veh udaas na ho
Aisa koi pal nahin jabb Guruji mere paas na hon
Mere jeevan mein Unse zyada koi bhi aur khaas na ho

Shukrana karte huey shuru hota hai mera toh har savera
Guruji ka naam lete huey beet jaata hai din mera
Jabb bhi pareshaani daalne lagti hai dil mein dera
Toh keh deti hoon usey ki yahaan koi kaam nahin hai tera

Sandhya ke akash par jabb chhaati hai divya laali
Pancchhee ghonsle mein aakar jhukaatey hain ped kee daali
Din ka shukrana karte huey mehsoos karti hoon mai khush-haali
Sajaati hoon phir bahut pyaar se pooja kee mai thaali

Jyot jalaati hoon pyaare Guruji ke naam kee
Mann hee mann nihaarti hoon chhavi apne Bhagwaan kee
Unse baatein karti hoon apne har armaan kee
Jaantee hoon ki Unhe bahut parvaah hai meri jaan kee

Guruji ke mandir mein baith kar shabad kee sunti vaani
Dil ko bahut shanti milti sunkar yeh gurbani
Guruji ne bhakton kee toh badal hee dee hai zindagaani
Bhakton ke liye Unhonei dee hogi kitni baar qurbaani

Abb jo kar dee hai mainey apni zindagi Guruji ke havaale
Toh chalchitr ki tarhen lagte hain jeevan ke khel niraale
Chaahe taqdeer mujhe kitni bhi baar aazmaale
Mera Guru bahut prem se har pal mujhe sambhaale

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 2, 2019

Om Namaha Shivaya
Aaj Ka Suvichaar 🙏🏻🙏🏻 # 591

             Is Daas Ka Shukrana

Pyaare Guruji,

Zindagi jeena sikhaane ka shukrana
Duniya kee asliyat dikhaane ka shukrana
Khushi dekar gumm ko mitaane ka shukrana
Hum par beintehaa pyaar lutaane ka shukrana

Is dil aur jaan ka shukrana
Aapke diye huey gyan ka shukrana
Is bhakti ke daan ka shukrana
Aapki sharan ke vardaan ka shukrana

Hamein kabhi na thukraane ka shukrana
Hamein kabhi na bisraane ka shukrana
Raaste ko hee manzil banaane ka shukrana
Mann ko mandir banaane ka shukrana

Jo bhi Aapne diya ya nahin, uska shukrana
Zyada aur kumm ka shukrana
Jiskee vajeh se hum karein ardaas
Aapko uss gumm ka shukrana

Din raat ke har pal ka shukrana
Kal, aaj, aur kal ka shukrana
Har tarehn kee halchal ka shukrana
Atma-vishwaas aur atma-bal ka shukrana

Is shukrana bharey shwaas ka shukrana
Aapko paane kee aas ka shukrana
Aapki maujoodgi ke ehsaas ka shukrana
Aapke charnon mein Aapke is daas ka shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 1, 2018

Om Namaha Shivaya
Aaj Ka Suvichaar 🙏🏻🙏🏻 # 225

         Bulaa Rahein Hain Guruji

Guruji ke prem kee sunehri kirnein
Dastak de raheen hain teri chetna ke dwaar par
Abb bhi jaagrit ho jaa aye bande
Bulaa rahein hain Guruji, aa tu sabb kuch haar kar

Jitna tu hoga bebas aur kamzor
Utna hee shant aur namr hoga Unka pyaar
Unko thamaa de tu jeevan kee dor
Aur rakh Unpar apne vishwaas ko barkaraar

Har pal Unko hai fikr teri
Har pal hai Unkee tujhpar nazar
Ek pal bhi na karein Ve deri
Dekhta jaa tu Unkee karuna ka asar

Denge har pal tujhe Ve shakti
Buss tu karta jaa Unkee bhakti
Teri bholi bhavna Unko hai dikhti
Unke ashish se hee milegi mukti

Dekhna teri yaatra hogi badi ruhaani
Kuch nayee yaadein banengi, kuch baatein bhoolengi puraani
Chod de jhooth aur fareb, na kar tu beimaani
Moh maya mein phans kar na kar tu naadaani

Sadaa rahegi tujhpar Guruji kee meher
Buss, tu na ghol apne karmon mein zeher
Umadtee rahegi tere dil mein umang kee leher
Guruji dikhaayenge tujhe ummeed kee seher

Guruji kee sadaa tujh par banee rahegi meharbaani
Guruji kee kripa se safal hogi teri zindagaani
Apni karuna ke kalam se Ve likhenge teri komal kahaani
Unka har pal shukrana karegi tere dil kee dhadkan deewaani

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

October 1, 2019

Om Namaha Shivaya
Aaj Ka Suvichaar 🙏🏻🙏🏻 # 590

                     Guruji Ka Pyaar

Guruji ke paawan pyaar ka
Shukriya har pal adaa karein
Unka pyaar toh mahasaagar hai
Is se jeevan kee gaagar bharte chalein

Guruji ka pyaar ek marham hai
Jo har ghaav ko bhar deta hai
Guruji ka pyaar veh ashirwaad hai
Jo saare kasht har leta hai

Guruji ka pyaar ek vriksha hai
Hum sabko deta hai sheetal chhaaon
Guruji ka pyaar veh khushboo hai
Jo mehkaa deta hai har gali aur gaaon

Guruji ka pyaar toh anmol vardaan hai
Jo bakshta bhakton kee jaan hai
Guruji ka pyaar toh anmol moti hai
Jiske saamne har ratna kee aukat chhoti hai

Guruji ka pyaar sarvsoumya muskaan hai
Jis se milta har bhakt ko maansik aaraam hai
Guruji ka pyaar bilkul niswaarth aur pavitra hai
Jo sanvaarta sachche bhakton ka charitra hai

Guruji ka pyaar ek sureela nagma hai
Jiske sur se sajaa hai hamaara jeevan
Is sur kee layy ke sangg hum gaayein
Toh phir sadaa shant rahega mann

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 30, 2018

Om Namaha Shivaya
Aaj Ka Suvichaar 🙏🏻🙏🏻 # 224

                     Sunehra Sach

Jab Guruji dikhaatey hain kinaara
Toh hum kyun nahin lete hain sahara?
Jabb Ve karte hain maargdarshan
Hum kyun nahin karte hain atma-samarpan?

Hamaare karmon ko sudhaarne ke liye
Ve toh jalaate hain maarg mein gyan ke diye
Lekin jabb Ve dikhaatey hain lakshman rekha
Hum kyun usey karte hain andekha?

Jabb bhi bulaate hain hum Guruji ko
Ve suntey hain hamaari pukaar
Phir kyun Unke sikhaane par bhi
Hum badalte nahin hain apne vichaar?

Guruji kahein ki atma-sammaan karna achchaa hai
Buss dhyan rahey ki veh hamaara ahankaar na bann jaaye
Neeven bann kar chalein aur sach bolein
Taaki ghamand aur jhooth hamaara sanskaar na bann jaaye

Ek jhooth ko chhupaane ke liye
Kehne padte hain jhooth anek
Sach toh sthir hai, avinaashi hai
Sachchaayee mein hai asal vivek

Jhooth se badhta hai atma par bojh
Jo kayee janmon takk saath na chhodta
Jhooth hee jhootha sahaara bann jaata hai
Jo hamaare maansik santulan ko hai todta

Guruji ke rangg mein rangg jaayein hum
Hum sabke bheetar Unhee ka vaas hai
Hum sabb Unkee aankhon ke taare hain
Yeh sunehra sach toh sach mein khaas hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 30, 2019

Om Namaha Shivaya
Aaj Ka Suvichaar 🙏🏻🙏🏻 # 589

        Eho Ardaas Hamaari Guruji

Eho ardaas hamaari Guruji
Ki hamein Aapko paane kee ho aas
Aapne hamaari zindagi hai sanvaari
Buss, sadaa rehna hamaare paas

Aapki divya kaanti ke aagey
Har roshni dheemi laagey
Aapki sowmya muskaan ke sangg
Baandhein hum bhakti ke dhaagey

Aapke pyaar ka pavitra bandhan toh
Laagey moksh se bhi adhik manohar
Sabr, vishwaas, aur shradha kee
Aapsey mil jaaye dharohar

Har pal ko banaa lein haseen mauka
Swayam ko sudhaarney ka
Kewal Aapko hee hai haq
Hamaare jeevan ko sanvaarney ka

Chaahe pyaar se, chaahe dhutkaar kar
Hamein sahi raah par chalaana
Kadam agar dagmagaaye hamaare
Haath thaamkar hamein chalna sikhaana

Karte rahein sadaa Aapse baatein
Din ho ya raat, sadaa Aapko saadhein
Shukrana mein guzaar lein jeevan hum apna
Sach ho jaaye Aapse milan ka sapna

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 29, 2018

Om Namaha Shivaya
Aaj Ka Suvichaar 🙏🏻🙏🏻 # 223

                  Achchee Fasal

Jhooth aur fareb ka nakaab
Ek din utar hee jaata hai
Jabb chehra hota hai benakaab
Sach zaroor saamne aata hai

Kyun hum logon ko karein
Vehem aur jhooth se daraakar kaaboo
Aao, sabka dil jeetein chalaakar
Unpar niswaarth pyaar ka jaadoo

Aur kisee se chaahe chhupa lo
Guruji toh satya ko jaanein
Duniya ko chikni-chupdi baaton se rijhaa lo
Par Guruji toh asliyat pehchaanein

Humse galatiyan ho jaati hain
Aakhir hum naadaan insaan hain
Guruji se maafi maang lo dil se
Guruji toh swayam Bhagwaan hain

Maafi maangne ke pashchyaat
Koshish karna vahee galati na dohraana
Koi faayda na hoga sach mein
Aur oopar se padega pachhtaana

Kyun apne aap ko aise vikarmon mein uljhaayein
Kyun na sach par amal kar ke jeevan ko saral banaayein
Guruji toh hamein Apna ashirwaad dete huey kabhi nahin thakte hain
Guruji ke pyaare bachche hain agar toh itna toh hum bhi kar sakte hain

Vikarmon ka vinaash hoga tabb hee jeevan hoga safal
Nishkapat khayaalat hongei hamaare toh muqaddar jaayega badal
Paap ka bojh kumm ho jaayega aur jeevan hoga saral
Achche beej boyenge, tab hee toh achchee hogi fasal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 29, 2019

Om Namaha Shivaya
Aaj Ka Suvichaar 🙏🏻🙏🏻 # 588

            Saagar Kee Aseemtaa

Saagar kee lehron ke dil mein
Umad raha toofaan
Bechayni see chhayi hai itnee
Shanti paane ka hai armaan

Kinaare ke sangg takraate takraate
Thakk see gayi hai har leher
Kinaare par aakar tabb ruk kar chayn milega
Jabb hogi Guruji kee mehar

Yahee soch kar lehron ne
Guruji ko dil se pukaara
Guruji toh kinaare par khadey hee thei Bannkar Unka sahaara

Bade pyaar se Apni goad mein Unhonei
Har lehar ko laad se bithaaya
Pyaar se thap-thapaakar lehron ko
Unke dil ko shant karaaya

Lehron ne apni har uljhan
Guruji ko samarpan kar dee
Guruji ne phir lehron kee jholi
Sukh aur chayn se bhar dee

Guruji ko shukrana kar ke
Lehron ne Unke charnon mein sees jhukaaya
Guruji ne Unhe ashirwaad dekar
Saagar kee aseemta se milvaaya

Guruji ke ashirwaad se hee shant hoga
Hamaare bheetar kee ashanti ka toofaan
Aao, hum Guruji ko sarv-samarpan kar dein
Kyunki Ve hee Hain hamaare Bhagwaan

Guruji hee Hain jinkey paawan pyaar se
Hum apne karmon ka bhugtaan kar paayenge
Divyata ke saagar kee aseemta mein
Guru kripa dwaara hum samaa jaayenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 28, 2018

Om Namaha Shivaya
Aaj Ka Suvichaar 🙏🏻🙏🏻 # 222

                 Guruji Ka Satsang

Duniya ke konei konei mein
Guruji ke satsang hain hotey
Jahaan shradhalu bhakt aakar
Apne aap ko simran mein khotey

Sajta hai MahaShiv Guruji ka darbar
Shobhit hotey hain Om Ek Omkar
Chhalaktaa hai Guruji ka nirmal pyaar
Darbar dekhne ko jee chahta hai baar baar

Guruji ke kamal charnon mein
Bhakt jann pushp hain chadhaate
Bade prem ke bhaav se
Apna sheesh jhukaate

Kisee ko aati mehek phool kee
Kisee par kripa hoti trishul kee
Koi darshan paata Guruji ke swaroop mein
Toh koi Unhe dekhta Om Omkar ke roop mein

Guruji ka abhinandan kar ke satsang shuru ho jaata
Gurbani ke divya rass mein har koi kho jaata
Koi bhakt bhavishya ke liye sandesh hai paata
Toh kisee ko koi shabad beeti yaad dilaata

Lekin sabse khaas baat hai
Ki uss pal mein sabb ramm jaate hain
Jaise zindagi ke anjaan safar mein
Hazaaron deep jal jaatey hain

Shabad ke baad ek hee sur mein
Satsangi mantra jaap hain karte
Guruji ko beintehaa shukrana kar ke
Apni jholi Unke ashish se bharte

Guruji ke samaksh sevak jann
Nishtha se jyot hain jalaate
Jyot ke divya prakash se
Gumm ke andhere ko mitaatey

Shiv avtaari Guruji kee arti se
Khil uthtaa hai vaataavaran
Guruji ke darshan hotei hain
Sankat haran mangal karan

Chai prasad aur kadha prasad
Sabb jann badi shradha se lete
Aur Guruji langar prasad mein bhi
Apna ashirwaad hamein hain dete

Satsang mein aaye huey sab jann
Langar khaate bina kisee vehem ke
Langar ke divya swaad ka anand
Lete bina kisee ahem ke

Bhakt Guruji se judey huey anubhav
Sangat ko hain sachchaayi se sunaatey
Yeh dekh kar Guruji prasann hotei
Aur mann hee mann muskuraate

Sun-ne vaale aur sunaane waale ko
Dono ko milta Guruji ka ashirwaad
Sach maaniye toh yeh ashish hee hai
Hamaare liye sabse anmol prasad

Dar-asal satya ka paawan sangg hee
Satsang hai kehlaata
Guruji se judne ka yeh sunehra mauka
Hamaari antaratma ko jagaata

Satsang se milta hai sandesh
Ki ahem, vehem, paakhand ko chodo Sadaa satya kee raah par chalkar
Swayam ko Guruji se jodo

Guruji mein niswaarth aur nirbhay bhakti
Pradaan karti hai bhakt ko susheel shakti
Jeene kee raah aur manzil dikhti
Milti hai atma ko mukti

Kyun na zindagi ke har lamhe ko
Satya ke sangg se sajaayein hum
Guruji kee dikhaayee hui raah par chalkar
Unko sadaa rijhaayeyin hum

Sach bolenge, changey karam karenge
Toh hee hai satsang ka faayda
Karmon ka phal toh bhogna hee padega
Yahee hai niyati ka kaayda

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 28, 2019

Om Namaha Shivaya
Aaj Ka Suvichaar 🙏🏻🙏🏻 # 587

  Guruji Ka Ashirwaad Baarambaar

Raat ke gambhir andhere ne musaafir se kaha
Ki kuch bhi dekhe bina veh kaise hai chal raha
Musaafir ne dee mandd see muskaan
Aur is saahas ka raaz kiya bayaan

Kaha usne andhere se datt kar
Mere Guruji hain sabse hatt kar
Unke protsaahan se milee hai mujhe nidartaa
Unke prem se mera jeevan hai sanvartaa

Musaafir kee aankhon mein thi aisi noorani chamak
Jaise sainkdon sitaaron kee roshni samaayi ho unmein
Veh Guruji kee mahima gaata hua
Chalta chala Guruji kee dhun mein

Guruji ke satsang sunaata hua
Divya gurbani ko gaata hua
Sewa ka mahatva bataata hua
Masti mein muskuraata hua

Taareef kee usne Guruji kee saralta kee
Prashansa kee Guruji kee taralta kee
Sunaayi mahima Guruji kee komaltaa kee
Aur gaayi gatha Guruji kee nirmaltaa kee

Dooba thaa veh Guruji ke pyaar mein
Vaheen baith gaya na jaane kis intazaar mein
Maun hua aur ekagrachit hua uska dhyan
Guruji kee sadhna mein leen huey uske praan

Tapasya ke unn sunehre palon mein hua uska Guruji se deedar
Sangat bhaav-vibhor ho gayi dekhkar uska Guruji ke liye pyaar
Guruji kee divya mehek laayi vaataavaran mein khushboo kee bahaar
Sabko mila dayalu Guruji ka ashirwaad baarambaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 27, 2018

Om Namaha Shivaya
Aaj Ka Suvichaar 🙏🏻🙏🏻 # 221

                   Pal Pal Har Pal

Phoolon kee mehek mein Guruji
Chidiyon kee chehek mein Guruji
Aangan kee sundartaa mein Guruji
Jheel kee sheetalta mein Guruji

Akash ke divya anant mein Guruji
Hemant, Shishir, Vasant mein Guruji
Grishm, Varsha, Sharad mein Guruji
Gurbani ke har shabad mein Guruji

Karuna kee drishti hain Guruji
Sukh kee srishti hain Guruji
Mann kee shanti hain Guruji
Jyot kee kaanti hain Guruji

Sooraj se khila hua prabhaat hain Guruji
Chaand taaron se roshan raat hain Guruji
Bhatke musaafir ka manzil aur raasta hain Guruji
Parwardigaar Khuda ka vaasta hain Guruji

Masti mein dooba hua geet Guruji
Pyaar nibhaane kee reet Guruji
Har haalaat mein sachche meet Guruji
Har bhakt kee divya preet Guruji

Atma ka param dhaam Guruji
Sampoorntaa ka naam Guruji
Parampriya Paramanand Guruji
Shaant satchittanand Guruji

Bhakton ka sammaan Guruji
Devon ka gungaan Guruji
Sangat kee toh jaan Guruji
MahaShiv Bhagwaan Guruji

Har praani ka vaas Guruji
Pooran karein sabki aas Guruji
Antar mann kee pyaas Guruji
Har dil ka vishwaas Guruji

Rehte hain sadaa komal taral Guruji
Kalyuga mein bhi sadaa saral Guruji
Andhere mein bhi sadaa ujjwal Guruji
Pal pal har pal nishchhal nirmal Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 27, 2019

Om Namaha Shivaya
Aaj Ka Suvichaar 🙏🏻🙏🏻 # 586

        Aao, Guruji Ko Yaad Karein

Aao, Guruji ko yaad karein
Dil se Unhe fariyaad karein
Ki Ve buss jaayein hum mein
Har khushi mein har gumm mein

Ek bhi pal aisa na ho
Jabb Unki hum par nazar na ho
Duniya kee baatein jaisi bhi hon
Unn baaton ka hum par asar na ho

Hum buss Guruji mein leen rahein
Aur ek pal bhi na ksheen rahein
Guruji ke prem se paayein hum shakti
Har kshan gehri karein hum apni bhakti

Koi moad jo aaye aisa ki doley hamaara vishwaas
Toh aur bhi zyada karein Guruji se judne ka prayaas
Baatein karein Guruji ke sangg
Na karein apne santulan ko bhangg

Apni taraf se koshish karte rahenge
Har mushkil ko Guruji ke bharose sahenge
Toh sadaa Guruji ke bhakti bhaav mein bahenge
Aur har saans mein ‘Shukrana Guruji’ kahenge

🌹🌹🌹🌹🌹🌹🌹

Jai Guruji 🙏🏻🙏🏻
Dhirja