Author: dhirjabhat

September 26, 2018

Om Namaha Shivaya
Aaj Ka Suvichaar 🙏🏻🙏🏻 # 220

    Guruji Hee Sachche Meet Hain Tere

Din raat kee bhaag daud se thakey huey musaafir,
Thoda sa ruk ja, sunn apne dil kee awaaz
Divyata ka mahasaagar basaa hai tujhme
Bheetar jhaankega toh hoga tujhe ehsaas

Insaaniyat kee khushboo hogi tere karam mein
Toh Guruji rakhenge tujhe apne charan mein
Neevanpan jo chhalkega tere dharam mein
Toh Guruji sambhaalenge tujhe Apni sharan mein

Jitna tu sadbhawna se muskuraayega,
Teri zindagi hogi utnee hee ruhaani
Jitni khushi tu chaaron oar phailaayega, Tere jeevan kee yaatra hogi utnee hee suhaani

Duniya waalon ko vashibhoot kar ke tu kuch nahin paayega
Pal doh pal ke savere ke baad andhera chhaa jaayega
Sankalp kar le kee teri har saans ho Guruji kee deewaani
Unhee ko khush karne mein jee le tu yeh zindagaani

Guruji hee sachche meet hain tere
Maan le tu Unka kehna
Unka naam tu japp le har pal
Vahee hai sabse anmol gehna

Jagg waale toh chod denge tujhko
Guruji kabhi na chodenge saath
Unhee se sanchi preet nibhaa le
Keh rahee hoon badi patey kee baat

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 26, 2019

Om Namaha Shivaya
Aaj Ka Suvichaar 🙏🏻🙏🏻 # 585

              Maango Nahin, Manno 

Koi maange apna yash aur naam
Aur ye ki sab karein usey salaam
Koi maange dhan daulat aur shaan
Gaadi kapde gehne aur makaan

Koi maange ki swaasthya ho achchaa
Koi maange ghar-baar aur bachchaa
Koi chaahe ki ve jaaye videsh
Koi jaana chaahe swadesh 

Har tarehn kee arzoo, har tarehn kee chaahat 
Poori huey bina na milti bhakton ko raahat
Sewa mein bhi kaheen na kaheen meva kee hai asha 
Toh kaise poorna hogi atma kee mukti kee abhilaasha?

Guruji le jaana chaahte hain hamein moksha ke kareeb
Tabhi toh Unhonei Apne haath mein rakha hai hamaara naseeb
Ve chaahte hain ki hamaare karmon ka ho bhugtaan 
Aur hamaare toh khatm hee nahin hotei hain armaan 

Lekin jabb hum Unse baar baar maang lete hain
Toh hum Unhe hamaare uddhaar ka mauka hee nahin dete hain
Hamaari zidd ke aagey Unhe majboor hona padta hai
Aur phir hamaara hee karmic bojh badhta hai

“Maango nahin, manno,” kehte hain Guruji
Hamaare liye itna kuch sehte hain Guruji
Phir kyun hum na Unkee baat yeh maan lein
Sabr kar Unkee mahima ko jaan lein

Maangey bina miley tohfe hongei vardaan
Unhee se sach mein hoga hamaara kalyaan
Bigde kaaj sanvaarenge Guruji
Dekhna, sab sambhaalenge Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maango Nahin, Manno (09/26/2019)

September 25, 2018

Om Namaha Shivaya
Aaj Ka Suvichaar 🙏🏻🙏🏻 # 219

 Tu Apna Samay Vyarth Na Ganvaa

Jeevan ke is naatak mein hum sabb toh hain abhineta
Oopar wala kisee ko bhi ek saa kirdaar nahin deta
Tu apna samay vyarth na ganvaa
Tu sewa aur simran mein lagg jaa

Zindagi ke safar mein chaahe kasht aayein hazaar
Guruji par vishwaas kar aur tu himmat na haar
Tu apna samay vyarth na ganvaa
Tu sewa aur simran mein lag jaa

Maya toh bahut shaitaan hai
Insaan ko banaati haivaan hai
Tu apna samay vyarth na ganvaa
Tu sewa aur simran mein lagg jaa

Raaste mein jo aaye koi bhatkaane vaali moad
Toh Guruji ke naam ki chunar tu lena oad
Tu apna samay vyarth na ganvaa
Tu sewa aur simran mein lagg jaa

Apne saanson ko tu na rulne dey
Apne kiye paapon ko tu dhulne dey
Tu apna samay vyarth na ganvaa
Tu sewa aur simran mein lagg jaa

Agar sach mein karna hai Guruji ki mahima ka prachaar
Toh pehle badalne hongei tujhe tere hee vichaar
Tu apna samay vyarth na ganvaa
Tu sewa aur simran mein lagg jaa

Tu toh sach mein bhaagyawaan hai
Tere hriday mein toh bastey Bhagwaan hain
Tu apna samay vyarth na ganvaa
Tu sewa aur simran mein lagg jaa

Sansaar toh hai mithya aur mela
Har koi aata aur jaata hai akela
Tu apna samay vyarth na ganvaa
Tu sewa aur simran mein lagg jaa

Kya laaya thaa tu yahaan kya lekar jaayega
Ek Guruji ka naam hee tujhe paar lagaayega
Tu apna samay vyarth na ganvaa
Tu sewa aur simran mein lagg jaa

Bharosa nahin hai aaj ya kal ka
Bharosa nahin hai ek bhi pal ka
Tu apna samay vyarth na ganvaa
Tu sewa aur simran mein lagg jaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 25, 2019

Om Namaha Shivaya
Aaj Ka Suvichaar 🙏🏻🙏🏻 # 584

             Tum Khushnaseeb Ho

Guruji ke paas baith kar
Raaz-e-dil ko karo bayaan
Guruji zaroor sunenge tumhaari baat
Isliye na ho tum pareshaan

Haath thaamkar tumhaara
Guruji ne liya hai tumhe apni sharan mein
Tum bhi apne dil kee baat kaho bejhijhak
Aakar Unke kamal charan mein

Baaton mein kaho ya geet ya kavita mein
Ya phir pooja karte huey karo bayaan
Rona bhi aa raha hai toh ro lo
Samajhte hain Ve tumhaare aansoon kee zubaan

Ho sakta hai ki tumhe lagey
Ki arzi qubool nahin ho rahi
Lekin yakeen karo ki Ve sunn rahei hain
Aur haalaat kar denge sahi

Vilambh ho sakta hai zaroor
Lekin tum zara bhi na ghabrana
Yeh safar hai shradha aur vishwaas ka
Isliye Guruji ko kabhi na bisraana

Yahaan takk le aaye hain tumhe
Toh Guruji aagey bhi lekar jaayenge
Museebatein aayeen hain tumhaari raahon mein
Toh khushi aur safaltaa ke pal bhi aayenge

Buss, kaayam rakho tum apna bharosa
Sambhal jaao buss aur thoda sa
Maano ya na maano, tum apni manzil ke bahut kareeb ho
Guruji sangg hain tumhaare, isliye tum bahut khushnaseeb ho

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Om Namaha Shivaya
Aaj Ka Suvichaar 🙏🏻🙏🏻 # 218

             Na Rahei Koi Bhi Udhaar

Guruji ne sabko hai banaaya bina kisee mazhab ya jaat,
Hum dharam ke naam par bhed bhaav karein, hamaari kya hai aukaat?
Guruji ne kaha ki Gupt daan karo, aur karo Gupt paath,
Phir kyun hum dikhaawa karein apne aur doojon ke saath?

Guruji kee aankhon mein hum sab ek samaan hain,
Phir kyun hum mein koot koot kar bharaa hua abhimaan hai?
Jabb Guruji rakhtey hain hamaara dhyan zyada se zyada,
Phir kyun hum nibhaate nahin hain achchaa bann-ne ka vaada?

Guruji kahein, ahem aur vehem se duur bhaag,
Lekin hum lagne detein hain atma par inkey daag.
Guruji kahein, bachchon, sadaa apne se aur doosron se sach bolo,
Phir kaahe ko hamaara zameer kahey, ki baaton mein jhooth gholo.

Yoon toh bade daavey kartey hain hum Guruji ka bhakt honei ke,
Phir kyun dil paththar ke hain, jabb jee makaan sonei ke?
What’s app par sandesh toh bahut forward karte hain hum,
Par unmein se kitnon par amal karte hain hum?

Zara sochiye, har pal agar hum Guruji ko sachche mann se dhyaayein,
Aur kabhi aise karam na karein jo Guruji ko na bhaayein,
Toh Guruji ka hum karenge sammaan,
Aur Ve hum par rahenge meharbaan.

Chaahe poore jagg se chhupaa lein, Guruji se kuch bhi chhupaa nahin.
Chaahe is janam mein miley ya agley mein,
Karam ka phal milne se kabhi rukaa nahin.

Karmon ka hisaab adaa karne ke liye toh Bhagwaan ko bhi dharti par aana padaa,
Phir kyun insaan apni hee mukti ke raaste mein 
Baadha bann kar hai khadaa.

Kyun na apna hee bhalaa karein aur hum sudhar jaayein
Jo raah dikhaayein Guruji, hum bhi udhar jaayein
Apne udhdhaar ke liye itna toh hum kar sakte hain
Aur apne karmon ka hisaab chukta kar sakte hain

Shiv Yog kehta hai
Jabb jaago tabb savera
Abb jaag ja musaafir
Kar le zindagi mein savera

Chaar din kee hai zindagi hamaari
Kar lein jeevan mein sudhaar
Guruji sangg jaane ka pal jabb aaye
Tabb yahaan na rahei koi bhi udhaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 24, 2019

Om Namaha Shivaya
Aaj Ka Suvichaar 🙏🏻🙏🏻 # 583

    Tujhe Pukaar Raha Hai Yeh Aseem Aasmaan

Vikaaron ke ghonsle ko chod de
Azad gagan mein bhar le tu udaan 
Jahaan vehem nahin, jahaan ahem nahin
Prem bhaav hai chhaaya jahaan

Jahaan Guruji ke noor ka ujaala hai
Jahaan bhakti ka rangg niraala hai
Jahaan aseem pyaar hee pyaar hai
Jo Guruji ka diya hua uphaar hai

Ud rahi hain vinamrataa kee titliyaan
Chamak rahi hain utsaah kee bijliyaan 
Guruji ke is gagan ka alag hee roop hai
Prem kee chhaaon aur gyan kee dhoop hai

Yahaan barastaa hai Guruji ka ashirwaad
Yahaan bhojan ka har tukda hai prasad
Gurbani ke sur ne gagan ko sajaaya hai
Yahaan vaasiyon mein samarpan ka bhaav samaaya hai

Yahaan sewa har Guru bhakt ka dharam hai
Yahaan satya se mehektaa har karam hai
Apne pankh phailaa kar tu ud le yahaan 
Tujhe pukaar raha hai yeh aseem aasmaan 

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 23, 2018

Om Namaha Shivaya
Aaj Ka Suvichaar 🙏🏻🙏🏻 # 217

         Har Din Kee Shuruaat Aapse

Har din kee shuruaat Aapse
Dil hee dil mein baat Aapse
Har pal mulaakaat Aapse
Zindagi kee saugaat Aapse

Doobtey huey ko kinaara Aapse
Asahaay ko sahaara Aapse
Uddhaar hamaara Aapse
Sachkhand ka nazaara Aapse

Duur ho andhera Aapse
Sunehra ho savera Aapse
Sukhi baseraa Aapse
Yeh astitva hee mera Aapse

Jeevan mein prakash Aapse
Oorjaamayee sakaash Aapse
Ummeedon ka akash Aapse
Swayam par vishwaas Aapse

Guru ka divya gyan Aapse
Atmasammaan Aapse
Shiv Yog ka dhyan Aapse
Divyataa ka pramaan Aapse

Karmon ka anjaam Aapse
Har shareer mein jaan Aapse
Hamaari toh pehchaan Aapse
Hum sabke praan Aapse

Sangat kee bhakti Aapse
Nirbal kee shakti Aapse
Atma kee tripti Aapse
Hum sabki mukti Aapse

Ayodhya ke Ram Aapse
Vrindavan ke Shyam Aapse
Antar-mann ko aaraam Aapse
Safal saare kaam Aapse

Guruji, Ishwar ka naam Aapse
Saare teerath dham Aapse
Jagat ka nirmaan Aapse
Abb toh hamaara nirvaan bhi Aapse

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 23, 2019

Om Namaha Shivaya
Aaj Ka Suvichaar 🙏🏻🙏🏻 # 582

   Kar Le Guruji Se Tu Niswaarth Pyaar

Agar tere dil-o-n-dimaag mein hoga ahankaar
Toh kaise sunega tu Guruji kee pukaar
Kar le Guruji se tu niswaarth pyaar
Aur paa le Unka aseem dulaar

Tyaag de aye bande tu jhoothi shaan
Tu aakhir hai yahaan pal do pal ka mehmaan
Is ahankaar ne aana nahin hai kaam
Kaam aayega sirf Guruji ka naam

Bann jaa Guruji ke charnon kee dhool
Kabhi bhi tu apni aukat ko na bhool
Chalta chal tu chaahe aayein raaste mein shool
Teri shradha ko Guruji zaroor karenge qubool

Na jaane abb takk tujhe kyun nahin yeh soojha
Guruji hee Hain tere divya pyaar aur teri pooja
Abb Unke siwa na hai tera rakshak koi dooja
Unkee udaartaa se prerit hokar tu sabke dilon ko choo jaa

Guruji se maangne kee zaroorat nahin hai baar baar
Na hee maan-nee hain toone mannatein hazaar
Ve poori karenge teri hasratein beshumaar
Unkee kripa se sukhi ho jaayega tera ghar sansaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 22, 2018

Om Namaha Shivaya
Aaj Ka Suvichaar 🙏🏻🙏🏻 # 216

        Guruji Hamaare Baagbaan

Yeh jeevan toh jaise hai maano
Phoolon ka ek pyaara sa gulistaan
Is upvan ke phool hain hum sabb
Aur Guruji hamaare baagbaan

In phoolon kee hai bhinn bhinn jaati
Jiski vajeh se inkee sundartaa aur bhi badh jaati
Kyun hum insaan karte hain tuchh soch dhaaran?
Ki jaat ka bhed-bhaav bantaa hai viyog ka kaaran?

Gulab, chameli, motiya, aur soorajmukhi
Inkee mehek se bagiya lagti kitnee sukhi
Phir kyun hum sabki soch hai chhoti
Ki neeyat ho jaati hai khoti?

Aur bhi kayee prakaar ke phool
Kuch bin kaantey, kuch ke hain shool
Phoolon kee chaahe ho koi bhi nasal
Baagbaan sabko dey pyaar asal

Kuch hain laal, kuch peeley hain
Kuch satrangi, kuch neeley hain
Kisee phool ka roop nikhar aaya hai
Toh koi phool murjhaaya hai

Kayee phool khiley rehte hain har mausam mein
Kayee hotei hain kuch dinon ke mehmaan
Har phool kee alag hai khushboo
Maali toh bandd aankhon se leta hai pehchaan

Hum bhi Guruji kee bagiya ke hain phool
Aur Unhee ke charnon kee hain hum dhool
Guruji hain hamaare Bhagwaan
Aur is bagiya ke baagbaan

Pyaar ke amrit se seenchaa Unhonei
Har kalee har phool ko itne dhyan se
Mamta kee makhmali khaad hai daali
Aur noor mila hamein Unke gyan se

Kyun na sab phool mil kar muskuraayein
Sajaayein yeh sundar phulwaari
Shukrana Guruji ka ki Unhonei
Apne prem se nikhaaree zindagi hamaari

Guruji ke upvan ke pushp saare
Hain Unkee aankhon ke taare
Yeh arzoo hai ki har janam mein
Guruji hee banein baagbaan hamaare

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 22, 2019

Om Namaha Shivaya
Aaj Ka Suvichaar 🙏🏻🙏🏻 # 581

               Har Pal Shubh Hai

Vishwaas ko banaa kar apna kalam
Usmei bhar lee mainey pyaar kee siyahee
Guruji kee dikhaayee raah par rakha kadam
Unke vachan baney mere aadarniya sipaahee

Dil ka kora kaagaz liya aur baithi Guruji ke paas
Kalam haath mein thaama aur kee dil se mainey ardaas
Ki Guruji Apni taareef mein kuch shabd mujhse likhwaayein
Aur unn shabdon kee soch se mujhe Apne khayaalon mein le jaayein

Guruji ne kee is naacheez par nadar
Utsaah mera Unhonei badhaaya is kadar
Ki Unke ashirwaad se likhne ka silsila hua shuru
Apni mehar barsaate chale gaye mere pyaare Guru

Hum sabhi itne saubhaagyashaali hain
Ki hum sab par Guruji kee kripa hai
Unke hee upkaar se hum sabko
Unkee bhakti ka maarg dikha hai

Kisee kee bhakti mein hai shaayari
Kisee kee bhakti mein sangeet
Sabki zindagi ke safar ko
Guruji ne banaaya hai ek pyaara sa geet

Guruji ke ashish se hee hota hai
Sewa, simran, aur satsang ka chaav
Guruji kee bhakti mein sabse zaroori hai
Ki hum mein ho shudh aur saral bhaav

Kisee satahi prayatna kee nahin hai zaroorat
Koi vehem nahin aur na chaahiye koi shubh mahoorat
Buss ujjwal rakhne hain dil mein Guruji ke naam ke diye
Aur phir har pal shubh hai har shubh kaam ke liye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 21, 2018

Om Namaha Shivaya
Aaj Ka Suvichaar 🙏🏻🙏🏻 # 215

Guruji Se Milan Hee Ek Sachchaayee Hai

Guruji Hain hum sabke Bhagwaan
Unki mahima hai ati mahaan
Aao Guruji ke hukm par amal karein
Samaaj ke khokhle vehmon se na darein

Sikhaata hai hamein Guruji ka divya gyan
Ki hum karein gupt sewa, paath, aur daan
Phir kyun na hum Guruji kee baat lein maan
Unka kehna maan-ne mein hee hai hamaara kalyaan

Agar hum karte rahenge abhimaan
Toh Veh hoga Guruji ka apmaan
Phir hum kaise paayenge nirvana
Jabb is tann se niklenge praan?

Oopari dikhaawe mein rakha kuch nahin hai
Yeh sabb moh aur maya zindagi ka sach nahin hai
Guruji se milan hee ek sachchaayee hai
Jis takk pahunchne ke liye Guruji ne duniya rachaayee hai

Guruji se rakhein satat hum naata
Kyunki veh rishta Guruji ko hai bhaata
Nishkapat ho, niswaarth ho, pavitra ho
Aur hum sabka changaa charitra ho

Guruji se rakhein hum seedha sanchaar
Aur sadaa rakhein sachcha aur saral vyavhaar
Doojon ko jeene dein aur khud bhi jeeyein
Guruji ke naam ka amrit sadaa peeyein

Paramgyaani shrishti karta Hain Guruji
Sarveshvar aur paalan karta bhi Guruji Abb toh Guruji hee Hain hamaare jeevan ka aadhaar
Unhonei hee sambhaala hai yeh sampoorna sansaar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 21, 2019

Om Namaha Shivaya
Aaj Ka Suvichaar 🙏🏻🙏🏻 # 580

       Musaafir Ke Saahas Ka Raaz

Zamaane kee ahankaari aandhi ne
Bahut koshish kee ummeed ke diye ko bujhaane kee
Duniya waalon kee khokhli baaton ne
Bahut koshish kee dil ko bhatkaane kee

Aaspaas ke aakarshanon ne
Bahut koshish kee mann ko behlaane kee
Moh maya ke jaal ne
Bahut koshish kee usey phansaane kee

In sab se dhyan ko hataate huey
Musaafir chalta raha Guruji ke dikhaaye raaste par
Apne dil se apni mai ko mitaate huey
Veh himmat jutaata raha Khuda ke vaaste par

Kuch loagon ko hui hairaani
Kayee loagon ko hui pareshaani
Ki kaise yeh musaafir bilkul darta nahin
Kyun iska saahas aur vishwaas martaa nahin

Musaafir ne diya muskuraakar yeh jawaab
Mere Guruji kee leela hai lajawaab
Mere sir par sadaa mere Guruji ka haath hai
Chaahe kuch bhi ho jaaye, mera Guruvar mere saath hai

Guruji kee prerna se satya ko mainey apnaaya hai
Ek Guru hee mera Apna hai, baaki saara jagg paraaya hai
Sachchaayee kee shakti se mera atma-vishwaas hai gehra
Guruji ka hai mere jeevan ke har moad par pehra

Yeh keh kar musaafir muskuraata hua vahaan se chal diya
Loagon ko samajh aayi ki Guruji ne usey atma-bal diya
Aagey sabki marzi kidhar ve mudna chaahte hain
Dikhaawe kee oar ya sach mein Guruji se judna chaahte hain

Guru naam ke sangg pooj lo saralta aur sachchaayee ko
Saath mein apnaa lo shradha, vishwaas, aur achchaayee ko
Antt vele mein na bheed kaam aayegi na dikhaawa
Guruji usey taarenge jiskee atma par hoga satya ka pehnaava

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 20, 2018

Om Namaha Shivaya
Aaj Ka Suvichaar 🙏🏻🙏🏻 # 214

   Har Pal Guruji Karte Hain Raksha 

Registaan mein mai chal rahee thi
Chalte chalte mai thakk rahee thi
Kuch bhi nazar na aa raha thaa
Aur haunsla toota jaa raha thaa

Zoron se lag rahee thi mujhe pyaas
Paani bhi nahin thaa mere paas
Garmee mein hoth sookhe jaa rahey thei
Aur aankhon se ashru behte jaa rahe thei

Anjaan raaste par thi chal rahi
Shaam bhi abb thi dhal rahi
Ret mein mai girti jaa rahi thi
Aur bahut udaasi aa rahi thi

Andhera honei wala hee thaa
Dil ko bahut pareshaani hui
Ik tez hawaa ka jhonka aaya
Aur mujhe bahut hairaani hui

Jaise hee mainey apni aankhein keen bandd
Aayee mujhe gulab ke phoolon kee sugandh
Ek pal ke liye jaise samay ruk gaya
Aur mera sheesh naman mein jhuk gaya

Pyaar se kisi ne sir par phera haath
Jaan gayee mai ki Guruji hain mere saath
Ret kee aandhi thamney lagee
Raah thodi behtar dikhne lagee

Ek divya ujaale se nikhar gaya akash
Aur registaan mein phayl gaya prakash
Guruji ka ruhaani saath paakar mujhe ho gaya vishwaas
Ki abb poori ho jaayegi mere jeevan kee har aas

Hawaa ne rukh badal liya aur baadal lagey chhaane
Guruji apni leela ke dwara lagey mujhe bachaane
Guruji kee dhun mein mai ho gayee magan
Aagey badhne kee abb laagee mujhmein lagan

Hameshaan kee tareh Guruji kee hui meher
Thoda chalne ke baad mujhe dikh gayee ek neher
Jiske sheetal jal se mainey apni pyaas bujhaayee
Jaan meri bach gayee, yeh soch ke mai muskaayee

Kuch hee dooree par dikh gayee sadak
Aur khatam hua safar registaan ka
Guruji ke bina toh asambhav thaa safar
Aise veeran aur nirjan sthaan ka

Har pal Guruji karte hain raksha
Har pal mai Unka shukrana gaaoon
Paropkaari Guruji par mai
Sadaa hee vaari jaaoon

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 20, 2019

Om Namaha Shivaya
Aaj Ka Suvichaar 🙏🏻🙏🏻 # 579

             Safar Hai Yeh Zindagi

Safar hai yeh zindagi, koi baazi nahin hai
Kyun yeh sach maan-ne ko loag raazi nahin hain?
Guruji ne hamein neevan aur achchaa bann-ne ko kahaa hai
Phir kyun bheed mein har banda apni mai mein kho raha hai

Kalyuga kee behki hui bheed mein anek loag hain shaamil
Bin disha kee daud se kuch bhi nahin hoga haasil
Guruji ke dikhaaye huey raaste par jo chalta jaayega
Veh insaan Guruji ke bataaye taur tareeke mein dhalta jaayega

Chaahe bheed saari ek disha mein jaaye
Sachche bhakt ka dil na kabhi bhi ghabraaye
Kyunki usey toh keval Guruji ko khush rakhne kee hai abhilaasha
Aur Guruji ke sikhaaye gyan ko paane kee hai jigyaasa

Sooraj aur chaand toh sabko dete hain apna prakash
Lekin kisee virle ko hee is satya ka hota hai ehsaas
Aise hee sab par phailtaa hai Guruji ka roshan sakaash
Lekin bahut kumm bhakt samajhte hain ki yeh sakaash hai kitna khaas

Yeh khushi aur ameeri ka rishta thoda sa ajeeb hai
Jisne Guruji ke pyaar ko na samjhaa veh toh ameer hotey huey bhi gareeb hai
Guruji ke sakaash ko paakar har bhakt khushnaseeb hai
Prem aur shradha ke bal par har bhakt Guruji ke bahut kareeb hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 19, 2018

Om Namaha Shivaya
Aaj Ka Suvichaar 🙏🏻🙏🏻 # 213

. Guruji Toh Kewal Yeh Chaahte Hain

Sainkdon meel kee yaatra bhi
Hoti hai ek kadam se shuru
Manzil takk pahunchne mein
Madad karte hain hamaare Guru

Pita bhi Vahee hain, mata bhi Vahee
Bandhu bhi Vahee hain, aur bhraata bhi Vahee
Raat din Unhe rehti hai itni chinta hamaari
Unhe toh badi lagti hai hamaari choti si bhi beemaari

Har bhakt ka poora dhyan rakhtein hain, Unko toh khatam hota nahin hai kaam
Hum toh phir bhi so jaate hain, parantu Guruji na karte aaraam
Hamaari har raat kee neend ke liye Guruji sotey nahin hain
Jahaan bhi hum Unhei yaad karein, Veh hotei vaheen hain

Kuch karmon ke kaantey Veh hamein chubhne hain detey
Lekin zyadatar karam Ve Apne par lay letey
Khuda hain hamaare, isliye phir baksh detey Hain hamein
Aur changa bandaa ban-ne ki seekh detey Hain hamein

Guruji bhakton ko pehle bheetar se saaf karein
Itne dayalu hain Ve, galatiyon ke liye maaf karein
Badal detey hain Ve jeevan jeene ka nazariya
Pehle se bhi zyada adbhut ho jaati hai zindagi kee dagariya

Chaahe hum mein se kuch logon ke paas karodon ke makaan hain
Guruji ke liye hum sabb cheentee aur makodon ke samaan hain
Phir na jaane kyun hum mein hai itna ahankaar hai
Jaise jeet liya ho humne saara sansaar hai

Is ahem aur vehem ko chod dein hum
Toh yatra hamaari ho jaaye aasaan
Guruji toh kewal yeh chaahte hain
Ki hum bann jaayein achche insaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 19, 2019

Om Namaha Shivaya
Aaj Ka Suvichaar 🙏🏻🙏🏻 # 578

              Sawaalon Ke Jawaab

Muskuraahat ka kya hai mol?
Bholepan ka kya hai bol?
Kab takk rahegi yeh zindagi?
Kitnee gehri hogi bandagi?

Kyun sooraj itna shaktishaali hotey huey bhi
Raat mein chaand aur taaron ko chamakne deta hai?
Kyun saagar itna aseem honei ke baavjood
Nadiyon se paani leta hai?

Kyun baadal paani kee boondon ke bhaar se thakk kar
Unhe samay se pehle nahin deta barasne?
Kyun insaan ka chanchal mann
Usey Guruji ke liye nahin deta tarasne?

Jabb sooraj itna tejasvi hotey huey bhi
Raat ke aagey jhuk jaata hai
Toh phir kyun hamaare bheetar ka insaan
Aisa neevanpann nahin jutaa paata hai?

Aise kayee sawaalon se aksar
Dil ho jaata hai hairaan
Sawaalon ke jawaab na milein agar
Toh insaan hota hai pareshaan

Guruji Apne anokhe andaaz se
Dete Hain bhakton ke kayee sawaalon ke jawaab
Hairaani aur pareshaani halki kar dete Hain
Unke upkaar toh hain behisaab

Sawaalon ke jawaab agar nahin hain milte
Toh maan lena ki shaayad veh hamaare buss kee nahin hai baat
Aur apni kunthaa ko mitaane ke liye
Guruji ko thaamne dein apna haath

Kuch sawaalon ke jawaab milenge, kuch se hum reh jaayenge anjaan
Lekin kyunki Guruji ne thaama hoga haath, toh jeena hoga pehle se aasaan
Guruji kee kripa se hum hongey pehle se kum pareshaan
Buss yaad rakhein hameshaan ki Ve Hain Bhagwaan aur hum hain insaan

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 18, 2018

Om Namaha Shivaya
Aaj Ka Suvichaar 🙏🏻🙏🏻 # 212

Aao Sab Mil Kar Bolein, Dhan Dhan Guruji

Roam roam mein samaatey Hain Guruji
Jab bhi bulaao aatey Hain Guruji
Patit ko paawan banaate Hain Guruji
Har pal bahut yaad aatey Hain Guruji

Bhakton kee muskaan Guruji
Sarvashaktimaan Hain Guruji
Doobtey huey ka sahaara Guruji
Akash mein Dhruv ka tara Guruji

MahaShiv ka avataar Guruji
Karte Hain beda paar Guruji
Sangat ka vishwaas Guruji
Har bhakt kee aas Guruji

Pyaar ka aseem saagar Guruji
Mamta kee gehri gaagar Guruji
Hamaari taakat Hain Guruji
Hamaari Ibadat Hain Guruji

Adheer bhakt ka dheeraj Guruji
Jeevan kee jheel ka neeraj Guruji
Dikhaate Hain chamatkaar Guruji
Karte Hain hum par upkaar Guruji

Har deepak ka prakash Guruji
Sakaaraatamak sakaash Guruji
Sabko pehchaante Hain Guruji
Sab kuch jaantein Hain Guruji

Thaamtey Hain hamaara haath Guruji
Kabhi na chodein saath Guruji
Dein hamein jeevan daan Guruji
Sab shaastron ka divya gyan Guruji

Bhagwaan kee har moorti mein Guruji
Har kaaraj kee poorti mein Guruji
Mandir masjid aur ghar mein Guruji
Gurudwaare girjaghar mein Guruji

Neki ka paath sikhaate Hain Guruji
Bhooley ko raah dikhaate Hain Guruji
Taarein hamaara tann aur mann Guruji
Aao sab mil kar bolein, Dhan Dhan Guruji

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 18, 2019

Om Namaha Shivaya
Aaj Ka Suvichaar 🙏🏻🙏🏻 # 577

     Sukoon Aur Shanti Ka Raasta

Tez raftaar se badalta jaa raha hai yeh zamaana
Laukikta aur badi badi baaton ka banaa hai yeh zamaana deewaana
Na jaane kyun loagon ko sach ke badle asatya bhaaney lagaa hai
Safaltaa se neevenpann ke bajaaye insaan mein ahankaar aane lagaa hai

Agar tu bhi jhooth aur ahem ka saath de raha hai
Toh swayam ko tu apna dushman banaa raha hai
Aur phir apni atma ke uddhaar mein
Tu khud hee archan bantaa jaa raha hai

Yaad rakh ki Guruji sadaa sikhaate hain Shiv yog
Na de tu swayam ko vichlit vichaaron ka roag
Duniyadari kee vajeh se na apna dhyan kar tu bhang
Guruji kee sharan mein kar le sewa simran aur satsang

Shudh mann se Gurbani ka kar le tu shravan
Sakaaraatamak vichaaron ka kar le tu manan
Maafi maang lei Guruji se aur kar le tu Unka naman
Shradha aur prem bhaav se dil mein chhoo le tu Unke charan

Guruji se pyaar ko banaa le aantrik anubhav
Sweekaar le tu atma kee yeh chunauti
Guruji par kendrit kar tu apne dhyan ko
Taaki adhyaatmik urjaa mein ho badhauti

Badhaa le tu apni adhyaatmik shakti ko
Har pal nikhaarta chal tu apni bhakti ko
Guruji mein rakh tu atoot aseem asthaa
Yahee hai sukoon aur shanti ka raasta

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 17, 2018

Om Namaha Shivaya
Aaj Ka Suvichaar 🙏🏻🙏🏻 # 211

Kar Le Aye Bande, Tu Guruji Kee Vadiyaayi

Zindagi kisee ek pal mein seemit nahin rehti hai
Yeh toh jeevan dhaara hai, saanson ke bal par behti hai
Chaahe behte huey yeh patharon kee thokarein sehti hai
Har pal tu shukrana kar, Guruji kee shiksha yahee kehti hai

Shukr hai pehle ke kuch karam achche hain
Tabhi toh hum Guruji ke bachche hain
Unse hee hamaare jeewan mein ujaala hai
Har moad par Unhonei hamein sambhaala hai

Hum jabb bhi Unhe bulaatey hain
Guruji itne pyaar se aatey hain
Hum roothein toh Ve manaatey hain
Aur hamaare sangg muskuraate hain

Phir mann bhaavuk ho jaata hai
Nainon mein ashru bhar aatey hain
Unke pyaar mein hee ye behte hain
Unko shukrana hum kehte hain

Shukrana karte rahenge
Tabhi toh aagey badhenge
Agar shikaayat hee karenge
Toh phir jholi kaise bharenge?

Shukrana mann mein hoga jabb
Bhakti bhaav badhega tabb
Vyarth hai sach mein baaki sabb
Aye bande, tu seekhega kabb?

Kar le aye bande, tu Guruji kee vadiaayi
Isee sachchaayee mein hai teri bhalaayi
Madhur ho jaayega zindagi ka taraana
Jabb teri har saans mein hoga shukrana, shukrana, shukrana

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 17, 2019

Om Namaha Shivaya
Aaj Ka Suvichaar 🙏🏻🙏🏻 # 576

   Guruji Ke Pyaar Ka Asar Hai Aisa

Aankhein jab hon khuli
Toh Guruji hain meri aas
Aankhein jo mainey moond leen
Toh Guruji hain mera vishwaas

Saath chaahe koi na ho mere
Guruji Hain abb humsafar
Aur kisee sahaare kee zaroorat hee nahin
Guruji ne thaama hai mujhe is kadar

Chaahe har taraf sannaata ho
Mera antarmann goonjtaa hai Guruji kee awaaz se
Rooh ke katre katre ko sukoon milta hai
Gurbani ke pavitra sur aur saaz se

Jeevan kee bagiya mehek gayi hai
Guruji kee divya khushboo se
Is khushboo ke anokhe ehsaas ka
Deedar hota hai meri rooh se

Neeras nahin lagta yeh jeevan abb kabhi
Doobi rehti hoon simran ke rass mein
Guruji kee divyata aur pyaar ka asar hai aisa
Ki meri har saans hai Unke hee vash mein

Na zindagi se gila hai na hai koi shiqwa
Na hee lagta hai abb maut se darr
Guruji kee khushboo se mehek gayee hai zindagi
Unka noor chhaa gaya hai mere spandan par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja