Author: dhirjabhat

January 3, 2026

Om Namaha Shivaya
Aaj Ka Suvichaar 🙏🏻🙏🏻

#2876

     Tumhaare Uddhaar Ka Upchaar

Sooraj uday hokar laata hai savera
Phir shaam ko vo dhal jaata hai
Har roz is niyam ka paalan kar
Sooraj hamein sikhaata hai
Ki zindagi ka har lamha anmol hai
Vo laut kar nahin aata hai.

Aur bhi bahut zaroori seekh
Sooraj se hamein miltee hai
Ki niraasha kee shaam aur raat hoti hai khatm
Aur naye savere kee kalee roz khiltee hai.

Vaapis na aaye beeta kal
Par aaj ka din hai yahaan
Guruji ko yaad karne mein vilamb na karo
Beeta jaa raha hai samaa.

Kal jo yaad na kiya thaa Unhe
Aaj toh yaad kar lo
Kal jo antas Unke naam se vanchit raha
Aaj usey bhar lo.

Aaj ke din ko kar lo safal
Is se pehle ki sooraj jaaye dhal
Aur Guruji kee yaad mein rehte chalo
Jabb takk na aa jaaye kal.

Phir swaagat karna aane wale kal ke sooraj ka
Lete huey Guruji ka naam
Karte huey baaki sab kaam
Har subah har shaam.

Sooraj uday hota aur dhalta rahega
Tumhaara jeevan sangg hee chalta rahega
Tumhaare sangg Guruji ka naam yaad mein rahega
Tumhaare uddhaar ka upchaar Unke ashirwaad mein bahega.

🌹🌹🌹🌹🌹🌹🌹

Jai Guruji 🙏🙏
Dhirja

Tumhaare Uddhaar Ka Upchaar (01/03/2026)

January 2, 2026

Om Namaha Shivaya
Aaj Ka Suvichaar 🙏🏻🙏🏻

#2875

               Vo Hee Hai Swadesh 

Hamaara ateet aur vartmaan
Aur bhavishya bhi jaante Hain Bhagwaan
Jo Guruji bannkar aaye dharaa par
Bulaane hamein Apne dayalu dar par.

Har vo manushya hai kitna khushnaseeb
Jo Guru kripa se aa paaya hai Unke thoda bhi kareeb
Sach mein, ye Guruji kee kripa bin kalpana mein bhi nahin hai mumkin
Jitnee bhi koi koshish kar le, vo Guruji kee rehmatein nahin sakta gin.

Kyunki Unkee prakat rehmatein hain anginat har bhakt par
Aur Unkee adrishya rehmatein toh aati hee nahin nazar
Lekin ve hoti rehti hain hum sab par pal pal
Aur Guruji kee leela se hamaara jeevan deti hain ve badal.

Hum toh so lete hain parantu Guruji nahin Hain sotey
Ve toh har kshan hamaari raksha mein satark Hain hotey
Hum itne pyaar se pal rahe hain Guruji ke aanchal mein rehkar surakshit
Jis bhi chunauti ka hamein saamna karna padey, Guruji nisandeh karte rahenge hamaara hitt.

Hamaari chetna ke kshetra mein kar ke pravesh
Hamaara kalyaan karte Hain Guru Sarvesh
Unhe kyun dhoondhein hum jaakar kisee aur desh
Jahaan Hain Ve hamaare bheetar virajmaan, vo hee hai swadesh.

🌹🌹🌹🌹🌹🌹🌹

Jai Guruji 🙏🙏
Dhirja

Vo Hee Hai Swadesh (01/02/2026)

January 1, 2026

Om Namaha Shivaya
Aaj Ka Suvichaar 🙏🏻🙏🏻

#2874

     Har Saal Ke Jaise

Mere Guruvar deendayal,

Har saal ke jaise
Pichhle saal ke har din bhi
Apni goad mein Aapne mujhe sambhaala
Mere jeevan ko har tareh se sanvaara
Nahin kar sakti poori tareh se, chaahe jitna bhi kar loon Aapka shukrana
Arzi hai ki is saal bhi pehle kee bhanti mujhe raasta dikha kar uspar chalaana.

Aapki daya se hee mere naynon kee nazar
Aapki kripa se hee vivek aur buddhi
Aapki rehmat se hee meri mehnat ka asar
Aapki karuna se hee ho antas kee shuddhi.

Bakhshna sumat aisee mujhe is saal bhi
Ki bann sakoon pehle se behtar insaan
Aapke har hukm ka paalan karoon
Unnat hoti rahe meri ruhaani udaan.

Aapke ashirwaad se hee sab hai mumkin
Aapki bakhshish se mai tarti jaaoon raat din
Apoorna kaaraj hon Aapki meher se sampann
Aapki sewa mein leen rahe mera tann, mann, aur dhan.

Sab kuch Aapka deeya hua hai, mere daata
Aap daat dene wale, mai lene wali, aisa hai naata
Mere paapon aur kukarmon ka bojh halka hota rahe is saal
Aur Aapke liye mera bhaav badhta rahe niswaarth pyaar ka
Har tareh se is saal mai jaaoon yoon sudhar aur sanvar
Ki Aapki inaayat se ho jaaoon agrasar
Aur badhte huey uss disha mein, Aap le jaana chaahte Hain jahaan
Har kadam par karti chaloon Aapka anantam shukrana, mere maalik meharbaan.

🌹🌹🌹🌹🌹🌹🌹

Jai Guruji 🙏🙏
Dhirja

Har Saal Ke Jaise (01/01/2026)

December 31, 2025

Om Namaha Shivaya
Aaj Ka Suvichaar 🙏🏻🙏🏻

#2873

Kabhi Socha Bhi Na Thaa

Kabhi socha bhi na thaa
Ki kismat aisa lamha degi dikha
Jo hoga sabse shubh
Jo hoga aisa shuddh
Ki pooran Guru swayam bulaayenge
Apne dar par mujhe Ve laayenge.

Guruji Maharaj, Aapne kee aisee meher
Ki mere jeevan mein aaya vo peher
Jabb Aapne bulaaya mujhe Apne dwaar par
Karne mujh nimaani par nadar.

Kya hogi khushkismati is se badi
Ki mai Aapke satsang mein thi khadi
Sunte huey Aapki leela ka gungaan
Sunte huey Aapki mahima ka bakhaan.

Aapne sharan mein liya hai mujhe jabb se
Aap bulaate Hain Apne satsang mein tabb se
Chhakaate Hain Aap chai aur langar prasad
Dete Hain har tareh se Apna ashirwaad.

Bulaakar Apne mandir ke dwaar
Karvaaya Aapne Apna divya deedar
Aapki divya khushboo se kritaarth hui meri rooh
Shuddhi ke spandan ne mere roam roam ko liya chhoo.

Meri anginat khaamiyon se mai abb bhi hoon anjaan
Kintu Aap karaa rahe Hain dhyan dwaara mujhe meri kamzoriyon kee pehchaan
Pavitrikaran dwaara kar rahe Hain kalyaan
Kar rahe Hain mujh par asankhya ehsaan
Mujhe koi sanshay hee nahin ki Aap hee Hain Bhagwaan
Jo swayam dharti par aaye bannkar Guruji karunanidhaan.

🌹🌹🌹🌹🌹🌹🌹

Jai Guruji 🙏🙏
Dhirja

Kabhi Socha Bhi Na Thaa (12/31/2025)

December 30, 2025

Om Namaha Shivaya
Aaj Ka Suvichaar 🙏🏻🙏🏻

#2872

        Deh, Desh, Aur Kaal Ke Paar

Deh, desh, aur kaal ke paar
Hain mere Guruji sarkar
Ve Hain Shivatva ka saar aur vistaar
Swayam SadaShiv Hain Ve paalanhaar.

Mayapati Hain par uss se prabhavit na hotey kabhi
Unkee rachi maya ke adheen hain bhakt jann sabhi
Maya kee dhundh se saaf nahin dikhta saaf jann ko
Maya pareshaan karti hai mann ko.

Guruji ke simran aur dhyan mein hai Unkee bakhshi hui shakti
Jiske dwaara gyan se prajvalit hoti hai bhakti
Vairaagya ka bhaav bhi jaagne lagta hai safar ke dauran
Honei lagti hai swayam kee behtar pehchaan.

Atma-nireekshan, atma-saakshaatkaar
Inse dikhne lagta hai maya ke paar
Par satark rehna padta hai har kadam par
Gaur karte rehna padta hai apne har vichaar aur karam par.

Guruji hee kar sakte Hain pradaan
Vo sadasheelta, vo viveksheelta, aur vo gyan
Jiske dwaara is safar mein ho paayein hum agrasar
Aur kumm hota jaaye maya ka hum par asar.

Guruji se hee vandan
Ki aisa ho paaye Unka chintan
Ki bhed-buddhi na rahe
Har atma kee oar ek sa bhaav bahe
Ki uss ekta kee ho jaaye poorna pehchaan
Jis se hum Unkee kripa se advait ko jaayein jaan.

🌹🌹🌹🌹🌹🌹🌹

Jai Guruji 🙏🙏
Dhirja

Deh, Desh, Aur Kaal Ke Paar (12/30/2025)

December 29, 2025

Om Namaha Shivaya
Aaj Ka Suvichaar 🙏🏻🙏🏻

#2871

                   Baitho Pyaar Se…

Baitho pyaar se
Guruji ke paas
Guruji ke saath
Jodo rishta khaas.

Aakarshit karo Unhe
Apne bhole bhaav se
Pukaaro Unhe
Pyaar se paripoorna chaav se.

Janam diya duniyavi pita maat ne
Kintu Ve sada nahin rahenge saath mein
Guruji Hain Ve nath aur mata
Jinka saath bhakt sada hai paata.

Guruji ke liye har bhakt
Hai Unkee santaan
Sabke liye Guruji ka pyaar
Hota hai ek samaan.

Kintu kis bhakt mein paatrataa kitnee hai
Ismein hota hai antar
Aur kiske karma aur vichaar hain kaise
Ismein fark hota hai aksar.

Swayam ko yogya paatra banaao
Koshish karte karte thakk matt jaao
Jaari rakho Guruji ko prasann karte rehne ka prayaas
Milega sukoon itna khaas
Ki yahee karte rehne ko jee chaahega tumhaara
Is prayaas dwaara Guruji kee kripa se tumhe milega Unka sahaara.

Juda hai ye rishta
Guruji kee meher se
Tum vintee karo
Har peher se
Ki vo tumhaare sangg sajda karey Guruji ke samaksh
Beshak tumhe Guruji na dikhein pratyaksh
Tumhe Unkee maujoodagi ke sanket milenge zaroor
Tumhe na dekhna padega kaheen duur
Mann kee aankhon mein Ve samaayenge
Hriday mein nazar Ve aayenge
Rooh ko chhoo Ve jaayenge
Tumhe apna Ve banaayenge.

🌹🌹🌹🌹🌹🌹🌹

Jai Guruji 🙏🙏
Dhirja

Baitho Pyaar Se… (12/29/2025)

December 28, 2025

Om Namaha Shivaya
Aaj Ka Suvichaar 🙏🏻🙏🏻

#2870

        Paramatma Kee Divya Jyot

Paramatama kee divya jyot Hain mere Guruji
Hain Ve mere har shwaas ka aadhaar
Shukr hai Unhonei mujhe joda Apne se
Varna kaise hota mera beda paar.

Abb ummeed hee nahin
Balki vishwaas hai mera
Ki jo bhi ho jaaye jeevan mein
Mera Guru mere angg sangg hai khada.

Kitnee tasalli hai mujhe is satya se
Mai lafzon mein kar nahin sakti bayaan
Lekin Guruji Maharaj toh antaryami Hain
Jaanti hoon ki Unhonei liya hai ye bhi jaan.

Meetha lagta rahe mujhe Unka bhaana
Sada karoon Unka shukrana
Unke sangg hoti rahe mukh se aur mann se baat
Mera roam roam karey Unkee divya jyot ko yoon atmasaat
Ki har bhinnata ho jaaye duur
Reh jaaye toh buss divya noor.

Ve chalaate chalein mujhe uss disha mein
Jahaan aisa parivartan ho meri dasha mein
Aisa ho sakta hai agar Guruji chaahein
Mai toh khadi hoon pasaar kar apni baahein.

🌹🌹🌹🌹🌹🌹🌹

Jai Guruji 🙏🙏
Dhirja

Paramatma Kee Divya Jyot (12/28/2025)

December 27, 2025

Om Namaha Shivaya
Aaj Ka Suvichaar 🙏🏻🙏🏻

#2869

                      Vo Azad Akash 

Sab lagte hain begaane se
Mehfilon ke saaz lagte hain veeraane se
Dil kee ragg ragg toot-ti jaa rahi hai
Lagg raha hai moh maya sabb chhoot-ti jaa rahi hai
Guruji kee kripa hai ye sabb
Unhe gyat thaa ki ye hoga kabb
Mai hee thi anjaan hakeekat se
Abb jaan rahi hoon Guruji kee inaayat se.

Wafa ko milee bewafaai
Tabb asaliyat samajh mein aayi
Shukr hai Guruji Maharaj ka
Unhonei himmat dekar sachchaayee samjhaayee.

Moh ke bin pyaar karna nahin hai aasaan
Aur ye hai ek bahut mushkil imtehaan
Maya ka paldaa sada padd jaata hai bhaari
Mann par vijay paa lete hain vichaar vikaari.

Moh mein pyaar ke sangg hoti hai jodey rakhne kee statvaatmakta
Jo banti hai kaaran peeda aur bhayy ka aksar
Rishtey lagne lagte hain bhaari kabhi kabhi
Aur is bojh se malin honei lagte hain sabhi.

Yoon hee toh nahin moh ko vikaar hain kehte
Phir bhi anginat insaan moh mein hain behte
Sakshi bann-ne ke bajaaye bhram mein padd jaate hain
Apni atma ko nuksaan pahunchaate hain.

Guruji, Aap Prabhu Hain mere, sikhaayiye mujhe rakhna samta
Aapki bakhshish se simran aur dhyan kar paaoon, deejiye mujhe kshamta
Aapke judaav mein Aapke gungaan kee galiyon se guzarkar
Vikaaron ka aakraman na kar paaye mere mann par pratikool asar.

Galiyon se guzarte huey dagdh hotey rahein mere paap
Mitt jaaye vo peeda jis se tadpaate hain dukh santaap
Aapki dhun mein rahoon matvaali, mastt magan
Aur beshak mujh par mandaraaye duniyadari ka gagan
Mai dekh paaoon uske paar vo azad akash
Jisey ujjwal rakhta hai Aapka divya prakash.

🌹🌹🌹🌹🌹🌹🌹

Jai Guruji 🙏🙏
Dhirja

Vo Azad Akash (12/27/2025)

December 26, 2025

Om Namaha Shivaya
Aaj Ka Suvichaar 🙏🏻🙏🏻

#2868

          Meri Khushkismati Hai Apaar

Param poojya Guruji Maharaj,

Nawaaz kar Aapne Apne pyaare pyaar se
Kiya hai mujhpar atulya nitya ehsaan
Kaise na poojoon Aapko
Kaise na maanoon Aapko Apna Bhagwaan?

Mujhe toh soojhe na kisee aur kee sharan
Sukh mein, dukh mein, mujhe panaah dein Aapke charan
Aapke bharose jeeti jaa rahi hoon ye jeevan
Aapki kripa se Aapki yaad se aabaad rehta hai mann.

Aapki ek nazar kar deti hai mujh nimaani par aseem meher
Aapke noor se ujjwal rehte hain mere shaam-o-seher
Bhool jaaoon Aapko, zindagi mein na ho aisa koi pal ya peher
Aapke saanidhya mein anubhav hoti rahe har anubhav kee leher.

Aapki sharan mein hoon, ye soch kar hee miltee hai aseem prasannata aur tripti
Aapke maargdarshan par chalti rahi toh na chahiye uddhaar kee mujhe koi aur yukti
Kyunki Aap Hain sarvsampann, sarvgyani, sarvashaktimaan
Meri khushkismati hai apaar kyunki mai bhi hoon Aapki ek santaan.

🌹🌹🌹🌹🌹🌹🌹

Jai Guruji 🙏🙏
Dhirja

Meri Khushkismati Hai Apaar (12/26/2025)

December 25, 2025

Om Namaha Shivaya
Aaj Ka Suvichaar 🙏🏻🙏🏻

#2867

                Har Din Mubarak Ho

Zindagi beet rahi hai
Guruji kee soumya sharan mein
Soch kar bhi nahin jaan sakte hum
Ki kitna kalyaan ho raha hai hamaare jeevan mein.

Guruji kee mahima anant hai
Anant hain Unke liye kalyaan
Bhakt ginte ginte thakk jaaye beshak
Kalyaan karte Huey na thakein kabhi bhi Guru karunanidhaan.

Har din jo beete Guruji ke kamal charan mein
Vo mubarak din hai hota
Har vo pal hee bada mubarak hai
Jabb bhakt Guruji ke chintan mein hai khota.

Har vo ghadi mubarak
Jo Guruji ke satsang mein jaaye guzar
Har samaa hai mubarak
Jabb Guruji kee sharan mein beet raha ho safar.

Kya kehna uss khushi, uss utsah ka
Kya kehna uss mehek bhari raah ka
Jo Guruji kee daya se sangat paati hai
Aur baar baar Guruji ke dar par aa paati hai.

Guruji Hain Khuda ka noor, aur swayam hee Khuda
Uss divya jyot se hum bhi nahin hain juda
Zaroorat hai toh uss aatmabodh kee, uss ehsaas kee
Ki Guruji kee kripa hai kaaran hamaare har shwaas kee.

Shwaas shwaas mein Guruji ka simran
Shwaas shwaas mein Guruji se ardaas
Ki saari sangat ke liye har din mubarak ho
Aur har naya saal ho khaas.

🌹🌹🌹🌹🌹🌹🌹

Jai Guruji 🙏🙏
Dhirja

Har Din Mubarak Ho (12/25/2025)