Author: dhirjabhat

November 25, 2025

Om Namaha Shivaya
Aaj Ka Suvichaar 🙏🏻🙏🏻

#2837

        Guruji Dekh Rahe Hain Tumhe

Guruji dekh rahe Hain tumhe, chinta na karo
Guruji angg sangg Hain tumhaare, isliye tum na daro
Himmat na haaro
Ibadat kar ke har pal ko sanvaaro.

Gumm na karna jo na bhi laage dhyan
Koshish karte raho, bade hee anmol hain praan
Guruji ke saanidhya mein baith kar dekho
Mann se Unhe bhaavpoorna maatha teko.

Guruji tumhe dekh kar Apni ichcha se lenge joad Apne sangg
Anokhi hai Unkee leela, adbhut hain Unke dhangg
Dekhte dekhte kab jaaoge tarr, tum jaan bhi na paaoge
Guru kripa se mushkilon ke paar pahunch jaaoge.

Alag andekhe hotey hain aksar Guruji ke tareeke kalyaan ke
Tum toh charnon mein ho Guruji ke roop mein Bhagwaan ke
Jo hoga achcha tumhaare liye, Guruji karenge vahi
Tum vaise bhi kya jaano ki tumhaare liye kya hai sahi.

Tumhaari soch aur nazar jaa nahin sakti vahaan takk
Guruji kee soch aur nazar jaati hai jahaan takk
Tabhi Unke ashirwaad hotey hain sarvopari aur akath
Vahaan takk sochne ke kaabil nahin hai tumhaari matt.

Isliye Unkee sharan mein zaroori hai samarpan
Isliye chinta ke bajaaye zaroori hai Unka chintan
Sthiti aur paristhiti jaisi bhi ho, chal toh jaayega jeevan
Par Guruji ko sab saump kar jeevan kee disha aisee jaayegi bann
Ki Guruji ke haath mein hogi tumhaari naiya kee patvaar
Aur Guruji swayam lekar chalenge tumhe bhavsaagar ke paar.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Dekh Rahe Hain Tumhe (11/25/2025)

November 24, 2025

Om Namaha Shivaya
Aaj Ka Suvichaar 🙏🏻🙏🏻

#2836

        Na Ho Tamanna, Na Zaroorat

Jaan na paaoon mahasaagar kee gehraayee
Toh kaise jaan paaoon vadiyaayee uske nirmaata kee
Unn daata kee
Jo maalik Hain srishti ke
Hum ichhuk rehte hain Jinkee drishti ke.

Guruji kee vadiyaayee hai sabse vaddi
Is par hai mujhe vishwaas khaas
Yoon hee thode hee na jeevan kee gati hui anokhi
Aane par Guruji ke paas.

Guruji ne Apni sharan mein bulaaya
Toh karma bhog mein milne lagaa Unka sahaara
Varna chal hee na paata guzaara
Kuch aur hee hota zindagi ka nazaara.

Guruji ne jageh dee Apne charan mein
Har pal kee zimmedari lee kasht haran mein
Koi toh achcha karma kiya hoga is ya pichhle kisee janam mein
Jo pahunch paayi Guruji kee saumya sharan mein.

Apni khushkismati ko saraahoon tabhi toh
Guruji ne apnaaya jinhe, unn sabhi ko
Zaroor ho naaz apni kismat par
Ki ve pahunch paaye Guruji ke dar.

Jis jisne kahaa ye vo kaha bilkul sahi
Ki is dar jaisa koi aur dar nahin
Jiskee bhakti mein bhavna ho Guru mein SadaShiv ko paane kee
Usey na ho tamanna na zaroorat, yahaan se kaheen bhi aur jaane kee.

🌹🌹🌹🌹🌹🌹🌹

Jai Guruji 🙏🙏
Dhirja

Na Ho Tamanna, Na Zaroorat (11/24/2025)

November 23, 2025

Om Namaha Shivaya
Aaj Ka Suvichaar 🙏🏻🙏🏻

#2835

                         Judaav…

Param poojya Guruji Maharaj,

Ruhaani pyaar kee baatein Aapse
Divya deedar kee baatein Aapse
Aapse hee hoti rahe guftagoo
Aap mein hee rami rahe meri rooh.

Aapke sangg hee baantoon dil ka haal
Aaye jo mann mein toh Aapse hee poochhoon sawaal
Ya phir ruhaani taar se hee sawaal jawaab ka silsila chalta rahe
Aapke saanidhya mein har din ka sooraj uday ho aur dhalta rahe.

Bheetar hota rahe har pal Aapki maujoodagi ka aisa ehsaas
Ki baahari duniya ke liye kabhi na hoon udaas
Duniya mein rahoon par judoon Aapse kewal
Isee judaav par mai ekaagr rahoon har pal.

Is judaav se hee hai abb mera jeevan
Is judaav mein hee ramta rahe mera mann
Is judaav kee oar badhta rahe mera aakarashan
Is judaav se sanvar jaaye mere janam ka har kshan.

🌹🌹🌹🌹🌹🌹🌹

Jai Guruji 🙏🙏
Dhirja

Judaav… (11/23/2025)

November 22, 2025

Om Namaha Shivaya
Aaj Ka Suvichaar 🙏🏻🙏🏻

#2834

               Aakhiri Saans Takk…

Guruji Maharaj, Deenanath mere
Aapka Shukrana karoon mai shaam savere
Na miltee Aapki sharan
Toh kaise sanvarta mera ye janam
Rulti rehti dar dar
Aapne bulaaya na hota agar
Aapne thaami jo baah
Dee Apne charnon mein thaa(n)
Meri khaamiyon ke sangg mujhe sweekaara
Diya mujh nimaani nacheez ko sahaara
Shukrana se seench kar apna har shwaas
Yaad rakhoon ki mujhe milee hain niyamatein
khaas.

Koi pal aisa nahin mere jeevan mein
Jismein mehsoos na ho mujhe Aapka ashirwaad
Koi kona nahin mere antarmann mein
Jo Aapke spandan se nahin aabaad.

Har pal ka shukrana karte karte
Beet jaaye har pal
Shukrana karte karte
Beet jaaye aaj aur kal
Beete kal mein jo Shukrana na kar paayi
Uske liye mai pachhtaayi.

Guruji, deejiyega mujhe aisee sumat
Ki na ho abb mujhse kabhi aisee gaflat
Na jhel paaoongi mai is gaflat kee sharmindagi
Shukrana bin adhoori reh jaayegi bandagi.

Shukrana shukrana shukrana mere sundar swami
Shukrana shukrana shukrana mere antaryami
Har janam mein tann, mann, aur rooh samarpit rahein Aapki sharan mein
Aakhiri saans takk karti rahoon shukrana Aapka apne har janam mein.

🌹🌹🌹🌹🌹🌹🌹

Jai Guruji 🙏🙏
Dhirja

Aakhiri Saans Takk… (11/22/2025)

November 21, 2025

Om Namaha Shivaya
Aaj Ka Suvichaar 🙏🏻🙏🏻

#2833

            Aseemit Aur Sampoorna

Teri har mushkil aaj kee
Iske samaadhan kee zimmedari hai Guru sartaj kee
Aane waale kal ka tera har sankat
Vo bhi Guru kripa se jaayega katt
Isliye beshak aayein kasht
Tu ghabraana matt
Guruji bade mahaan Hain
Guruji karunanidhaan Hain.

Teri beeti hui zindagi bhi
Guruji ne sambhaali thi
Tujhe gyat na ho ye hai mumkin
Tu vaise bhi Unkee rehmatein nahin sakta gin.

Tu unn anginat bhakton mein se hai
Jinhe Guruji ne sweekaar liya
Aur phir Unhonei Apna pyaar diya
Bin jataaye sabke liye sab kuch kiya.

Guruji ko Apne sabhi bhakt lagein pyaare
Aur Unke pyaare Hain Unkee aankhon ke taare
Guruji Hain Apne bhakton ke aise sampoorna sahaare
Ki Unkee hee rehmat har bhakt ko taare.

Unkee rehmat tujhe bhi taar rahi hai
Tere bhi kaaj sanvaar rahi hai
Tasalli rakh, Shukrana kar
Guruji kee nadar kee kar kadar.

Tujhe ho ya nahin, Guruji ko hai khabar
Ve tere kalyaan mein na chodenge koi kasar
Pooran Guru Hain Guruji, samay kee seema ke paar
Aseemit aur sampoorna hota hai Unka kiya paropkaar.

🌹🌹🌹🌹🌹🌹🌹

Jai Guruji 🙏🙏
Dhirja

Aseemit Aur Sampoorna (11/21/2025)

November 20, 2025

Om Namaha Shivaya
Aaj Ka Suvichaar 🙏🏻🙏🏻

#2832

Jeevan Kee Har Subah Aur Shaam

Guruji Parwardigaar
Hain tumhaare praanon ka aadhaar
Unse hee hai saarthak tumhaara sansaar
Unse har pal jod kar rakho seedhi ruhaani taar.

Ye srishti ka bazaar
Jo tumne kiya hai sweekaar
Ye hai nashwar bahaar
Swayam ko yaad karaao baar baar.

Apne asal swaroop ko bhoolo na
Na bhoolo karna atma-saakshaatkaar
Maya roopi sapne se jaago
Guruji ko yaad karo baarambaar.

Gurbani ka kar ke shravan
Uspar karo tum manan
Sachkhand kee hai ye baani
Ispar chal kar mitaao apni naadaani.

Sewa aur sadhna ko dete chalo mahatva
Sachet raho ki tum mein hai jo Shivatva
Bahut zaroori hai tumhaara uss se deedar
Varna adhoorepann se jeevan dogei bigaad.

Guruji dikha rahe Hain raahein
Unhonei thaami Hain tumhaari baahein
Isliye chalte huey girne se daro nahin tum bilkul
Tumhaari mehnat aur Unkee rehmat se kismat ke dwaar jaayenge khul.

Guruji kee dee har bakhshish ka karo sammaan
Purusharth ke liye arth, kaam, aur dharma kee oar do dhyan
Guruji ke charnon mein ho toh moksh toh paa hee lenge praan
Tabb takk kyun na jeevanmukt hokar bitaa lo jeevan kee har subah aur shaam.

🌹🌹🌹🌹🌹🌹🌹

Jai Guruji 🙏🙏
Dhirja

Jeevan Kee Har Subah Aur Shaam (11/20/2025)

November 19, 2025

Om Namaha Shivaya
Aaj Ka Suvichaar 🙏🏻🙏🏻

#2831

              Surakshit Hai Ye Safar

Guruji kee hukoomat
Ye hai zaroorat
Ye hai chaahat
Isee mein raahat
Kyunki mujhe toh kuch aata nahin
Mai toh chaloon vaheen
Guruji chalaayein jidhar
Taaki mai jaaoon sudhar.

Doojon ko kya dekhoon
Apni khaamiyon se hee hoon mai pareshaan
Khud ke jeevan mein hain itne tufaan
Ki kaise dekhoon yahaan vahaan.

Dhundh hai bahut raahon par
Karmon ka bhaar hai kandhon aur baahon par
Guruji ke karne se hee hoga kalyaan
Mere buss mein toh nahin ye imtehaan.

Asamarth hoon, naadaan hoon
Guruji kee leela se anjaan hoon
Lekin nirbhar hoon poori tareh se Unke Ishitva pe
Jee rahi hoon Unke Prabhutva se.

Apni hukoomat Ve chalaate rahein mujh par
Bulaate rahein Ve mujhe Apne dar par
Har kadam par hai Unke ashirwaad ka asar
Ve Hain tabhi toh surakshit hai ye safar.

🌹🌹🌹🌹🌹🌹🌹

Jai Guruji 🙏🙏
Dhirja

Surakshit Hai Ye Safar (11/19/2025)

November 18,2025

Om Namaha Shivaya
Aaj Ka Suvichaar 🙏🏻🙏🏻

#2830

          Hriday Se…

Buddhi se bhaj kar nahin
Hriday se bhajo Guruji ko
Bhaav hee rahasya hai bhakti ka
Aur bhakti kee shakti ka.

Hriday se pyaar
Aur pyaar se sewa, pyaar se simran
Pyaar se satsang, pyaar se samarpan.

Hriday se Shukrana
Param poojya Guruji Maharaj ka
Hriday se saraahana
Unn sartajon ke sartaj kee
Jinke liye hriday rahe deewaana
Bheetar kee vayu ka saaz ho suhaana.

Hriday mein Shiv Shakti ka vaas
Hriday mein Guruji ka nivaas
Hriday mein Unke prati bhaav khaas
Hriday mein Unhe paane kee pyaas.

🌹🌹🌹🌹🌹🌹🌹

Jai Guruji 🙏🙏
Dhirja

Hriday Se… (11/18/2025)

November 17, 2025

Om Namaha Shivaya
Aaj Ka Suvichaar 🙏🏻🙏🏻

#2829

Tann Mann Ahem Ke Paar

Tann mann ahem ke paar
Hai raasta vahaan ka
Alaukik jahaan ka
Apne hee bheetar.

Ye jo safar hai adhyaatmik
Ye darasal hai aantarik
Gireban kee gehraayee mein jaane ka
Bheetar Paramatama ko paane ka.

Paramatama, jo Guruji ke swaroop mein aaye
Aakar Apne ashirwaad Unhonei barsaaye
Aur aaj bhi barsa rahe Hain har pal
Taaki sangat ke kasht jaayein tal.

Guruji takk pahunchne ke liye
Is safar ko karna hoga tayy
Anivaarya hai tyaagna har sanshay
Varna mumkin na hoga hona nirbhay.

Mrityu ke pashchaat nahin
Balki praapti hogi jeete jee
Guruji ka charanodak pee
Praapti hogi yaheen.

Beshak ye nahin aasaan
Par ye nahin namumkin
Haan, kintu ye nahin mumkin
Guru kripa ke bin.

Kaheen duur nahin hai jaana ghar ko chodkar
Guruji se seedhi taar jodni hai dikhaawe se muh moadkar
Bhole bhaav se kee gayi bhakti
Banegi asur se sur bann-ne kee yukti.

Isee raah par hoga aagey badhna
Apne har ayb se hoga ladna
Sajag rehna hoga apne karmon kee oar
Aur Guruji ko saump kar apne jeevan kee doar
Shraddha kee kasauti par se guzar kar
Pathar par pisne wali mehndi ke jaise nikhar kar
Pahunchna mumkin hai manzil ke kareeb
Koshish karne wala har shaks hai khushnaseeb.

🌹🌹🌹🌹🌹🌹🌹

Jai Guruji 🙏🙏
Dhirja

Tann Mann Ahem Ke Paar (11/17/2025)

November 16, 2025

Om Namaha Shivaya
Aaj Ka Suvichaar 🙏🏻🙏🏻

#2828

      Aye Mann, Abb Tu Balshaali Bann

Guruji ka naam
Bhaj le mere mann
Bhaj ke har kshan
Kar Unka chintan.

Aye mann roopi upvan
Tu hai ik darpan
Mayla hai isliye murjhaaya hai
Dhool ka tujhpar bhaari saaya hai.

Is dhool ko hatna hoga
Tere ahem ko mitna hoga
Jo hoga pavitrikaran se
Jo hoga simran se.

Tu kar Gurbani ka shravan
Tu kar shabad par manan
Guruji kee oar badhaa tu kadam
Sudhaar le tu apna jeevan.

Vahaan kaam na aayega bhautik dhan
Yahaan rehna nahin tu kar le chaahe lakh yatan
Yahaan rehte huey vahaan kee tayyaari mein ho jaa magan
Moh ke jaal se bach aur Guruji mein lagaa le lagan.

Tujhpar vikaar karenge aakraman
Taaki ve paraast kar dein tera kann kann
Apni kamzoriyon ka kar ke dahan
Aye mann, abb tu balshaali bann.

🌹🌹🌹🌹🌹🌹🌹

Jai Guruji 🙏🙏
Dhirja

Aye Mann, Abb Tu Balshaali Bann (11/16/2025)