Aaj Ka Suvichaar

August 14, 2022

Om Namaha Shivaya
Aaj Ka Suvichaar 🙏🏻🙏🏻 # 1638

Guruji Kee Sharan Mein Aane Ka Saubhagya Mila

Guruji kee sharan mein aane ka saubhagya mila
Zindagi badal gayi anokhe dhangg se
Pehle se bhi zyada prem ho gaya
Bhakti kee har tarang ke rangg se.

Azaadi milee mujhe
Ki kabhi bhi Guruji se kar loon mai baat
Tasalli milee mujhe
Ki Ve sada Hain mere saath.

Bheeg gaya mera aanchal
Guruji ke ashish kee vrishti se
Tarne lagi mai
Unkee drishti se.

Mushkilein aani nahin rukin
Lekin kuch is tareh se jhukin
Ki unhe paar karna ho gaya aasaan
Guruji ne kee aisee himmat pradaan.

Kayi tufaan aane se pehle hee thamm gaye hongei
Yahee kehta hai mera yakeen
Guruji kee kripa se ve tufaan chhoo bhi na paaye mujhe
Varna pairon ke neeche se khisak jaati zameen.

Na maanga koi jaadoo, kyunki Guruji nahin Hain jaadoogar
Murshid Hain, Guru Hain, nath Hain, dein uddhaar ka var
Lekin Apni leela se sikhaaya Unhonei hona befikr
Aur ye ki apne dukh dard ka Unke alawa kisee se nahin karna zikr.

Sehensheelta badhti rahi Unkee mehar se
Simran ke anginat pal miley har pehar se
Guruji ne Apne se mujhe yoon joad liya
Ki meri har shanka ko toad diya.

Abb toh Shukrana mein beetein mere din aur rayyn
Unke darshan se kritagya rehte hain mere nayyn
Unhee ke dhyan se shuru ho meri har seher
Unhee ke simran mein beetey har din ka har pehar.

Chukaana chaahoon toh bhi na chuka paaoon mai
Kabhi bhi Guruji ka ehsaan
Utnee kshamtaa ho nahin sakti mujh mein
Na hee hai mujh mein itna gyan.

Nimaani hoon, hoon naadaan
Unke hastakshep se hai mera kalyaan
Mai karmon kee maari, Ve Hain karunanidhaan
Mai hoon khushnaseeb, kyunki Ve Hain mujh par meharbaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 13, 2022

Om Namaha Shivaya
Aaj Ka Suvichaar 🙏🏻🙏🏻# 1637

       Sammaan Karein Guruji Ka

Sammaan karein Guruji ka
Karein hum Unse pyaar
Darein na Unse, lekin bhoolein na
Ki Ve hamein dekh rahe Hain lagaataar.

Adhyaapak Hain Guruji
Hum Unke vidyaarthi
Jeevan ke jis rath par hain hum savaar
Guruji Hain uss rath ke saarathi.

Hamaari har soch se waakif Hain Guruji
Hamaare har karam se Ve avagat Hain
Duniya mein jahaan bhi Unke anuyaayi hain
Ve sabhi Unkee sangat Hain.

Nirdeshak Hain Guruji
Hum rahein nirdesh ka paalan karne wale
Daata Hain Ve
Hum hain apni jholiyan bharne wale
Hum deen, Ve hamaare dukh harne wale
Ve taaranhaar, hum Unkee kripa se tarne wale.

Kshamaasheel Hain Ve, dete Hain itna pyaar
Shubhchintak Hain, Hain kalyaan ke aadhaar
Guru Hain, mitaa dete Hain bheetar ka andhkaar
Neeven Hain, aur nahin pasand Unhe ahankaar.

Hum swayam ke bheetar dekhein ya na dekhein
Guruji hamaare bheetar ka har satya jaanein
Kaun kewal kahe aur kaun sach mein Guruji ka kahaa maane
Guruji toh ek ek kee neeyat pehchaanein.

Nirmal hai Unkee nazar, noor daayak hai Unkee nadar
Sada rehte Hain Ve Apne bhakton par meharbaan
Har nakaab mein chhipe asal chehre kee hai Unhe pehchaan
Koi deewar nahin tikk sakti Unke aur bhakt ke darmiyan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 12, 2022

Om Namaha Shivaya
Aaj Ka Suvichaar 🙏🏻🙏🏻# 1636

        Ghar Jaisi Koi Jageh Nahin

‘Ghar jaisi koi jageh nahin’
Angrezi mein suna hai ye kayi baar
Ghar pahunch kar lagta hai kitna achcha
Aaj nahin toh kal ho jaata hai is baat par aitbaar.

Anek baar suna hai humne, ‘Ghar, pyaara ghar’
Ye kahaavat bhi angrezi mein hai mashhoor
Jabb kabhi hotey hain hum ghar se lambe arse ke liye duur
Toh ghar dekhte hee yahee kahaavat yaad aati hai zaroor.

Sachcha hee toh hai na, in dono ka paigaam
Panchhi bhi ghonsle ka karte hain intazaam
Taaki jabb ho jaaye shaam
Toh vahaan laut kar unhe miley aaraam.

Atma bhi chalee hai is safar par
Antt mein pahunchne vaapis apne ghar
Safar mein na jaane kitne shareeron mein karti hai vaas veh baari baari
Karte huey apne ghar pahunchne kee tayyaari.

Veh ghar, jahaan Paramatama ke sanyog mein hai atma ka basera
Veh ghar, jahaan atma ko praapt hota hai ujjwal savera.
Guruji Apni sangat ka karte Hain uddhaar
Karmon ka bhugtaan jald se jald karaate Hain Ve taaranhaar
Ve chaahein ki Unke bhakt paayein mukti
Jiske liye Ve sikhaayein simran aur dhyan kee yukti.

Hamaari deh ko dhaaran kar ke usmein bass kar
Atma deti hai hamein yeh jeevan jeene ka avsar
Sewa simran satsang dwaara kar ke atma ka poshan
Kyun na hum apni atma ko pahunchne dein uske ghar?

Ho jaayega pooran kalyaan
Jab atma pahunch jaayegi apne ghar
Guruji ke ashish se saarthak hoga ye anjaam
Kripalu Guruji ka hai dayalu dar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 11, 2022

Om Namaha Shivaya
Aaj Ka Suvichaar # 1635

              Karmon Kee Patriyaan

Karmon kee patri par chal padi haamaare jeevan kee rail gaadi
Pahadon ke beech se, surang ke bheetar se chalti hui
Chodti hui har pichhlee manzil ko peechhe
Aseem akash ke neeche
Aglee manzil kee oar
Nibhaati hui saanson kee daud.

Kayion ke sangg karma katt gaye hongei
Kayion ke sangg abhi hain baaki
Unke jeevan kee rail gaadi kee patri ko choom leti hai
Hamaare jeevan kee rail gaadi.

Jitna lekha hai aapas ke beech ke karmon ka
Utne samay ke liye patriyaan ho leti hain ek dooje ke sangg
Rail gaadiyaan ek dooje ke saath karti hain safar
Jabb takk patriyaan nahin jaati hain bichad.

Sabke jeevan kee rail gaadi ka safar
Aise hee toh chalta rehta hai
Pichhle karam kat-te jaate hain
Waqt ka jalaashay behta hai.

Waqt kee leheron ke sangg
Aur karam jaate hain bann
Patriyaan miltee aur bichadti hain
Rail gaadiyan unpar chalti hain.

Is safar ko tayy karaane mein
Guruji madad karte Hain hokar meharbaan
Beshak patriyaan maarg par kat-ti hain kayi baar
Lekin is se bhugtaan ho jaata hai pehle se aasaan.

Jaise jaise safar ke antt kee bela hai aati
Patriyaan mitti mein hain samaa jaati
Dekhte dekhte patriyaan ho jaati hain ojhal
Aur safar ka bhi antt hota hai, aaj ya kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 10, 2022

Om Namaha Shivaya
Aaj Ka Suvichaar 🙏🏻🙏🏻# 1634

          Parvat Kee Chadhaayee

Khada thaa parvataarohi chadhaayee chadhne ke liye
Uske mann mein utsah thaa aagey badhne ke liye
Kankad aur chhote chhote pathhar
Bikhre thei idhar udhar.

Dikh raha thaa duuri par usey parvat ka shikhar
Mitt gaya uske mann se niraasha ka timir
Chal raha thaa mann mein Guruji ke naam ka simran
Ardaas aur Shukrana ke sangg usne shuru kiye badhaane apne kadam.

Aasmaan ne uske sir par baandha sehra
Hawaa har kadam par de rahi thi pehra
Veh chalta chalaa lekar naam ka sahaara
Hitkar lag raha thaa usey nazaara.

Jabb pahuncha veh thodi si oonchaayee par
Toh ik alag sa nazaara aaya usey nazar
Chadhaayee honei lagi kathin
Pathhar ho gaye pehle se bhinn.

Chattaanein si dikhin usko apne saamne
Veh kass kar apne mastool (pole) ko lagaa thaamne
Mushkil thi chadhaayee
Usne naam se himmat paayi
Gati hui thodi kumm
Lekin rukey nahin uske kadam.

Jaise jaise veh chadhaa parvat kee chadhaayee
Vaise vaise hee badhti gayi oonchaayee
Aane lagi zyada kathinaayee
Lekin uske atma-vishwaas mein kamee na aayi.

Chattaanon par chadh raha thaa
Aagey veh badh raha thaa
Raaste mein thaa toh aaya bhayankar sa tufaan
Tez aandhi aur baarish ne kiya usey pareshaan.

Kuch palon ke liye veh ghabraaya
Lekin phir usne Guruji ka naam doharaya
Ek kshaitij shila par ruka tufaan ke dauraan
Prakriti kee shakti ka thaa usey anumaan.

Chadhna shuru kiya usne dobaara
Pahaadon ke tukde girne lagey par veh na haara
Usne pehena thaa kavach Guruji ke naam ka
Usey darr nahin thaa anjaam ka.

Chadhaayee ke beech gira fisal kar
Kameez ka kapda faad kar baandha usne zakhm par
Veh chadhta gaya, aagey badhta gaya
Aakhir pahunch hee gaya parvat ke shikhar par.

Adhyaatmik oonchaayee par pahunchne ke liye bhi
Kathinaaiyon ka saamna toh karna padta hai
Jo Guruji ke naam ka kavach pehen le
Veh parishram kar ke oonchaayee par chadhta hai.

Jaise jaise hum oonchaayee ke kareeb hain aate
Chunautiyaan bhi badi hoti jaati hain
Lekin simran aur dhyan se atmabal kee hoti hai jo badhauti
Uske sahaare insaan jhel paata hai har tareh kee chunauti.

Aakhir imtehaan hee toh hai yeh zindagi
Jismein safal honei ke liye aawashyak hai ruhaani bandagi
Kyunki atma kee safalta hai adhyaatamik oonchaayee mein
Aur yeh oonchaayee miltee hai adhyaatmikta kee gehraayee mein.

Guruji, deejiye tapp kee dridhta kee daat
Ki hum nirantar mann mein simran kar paayein
Guruji, kripa kar deejiye samarpan kee saugat
Taaki hum Aapke hukm par chal paayein.

Guruji, kripa kar deejiye dheeraj ka neeraj
Taaki hum chunautiyon ka saamna kar paayein
Guruji, deejiye nishtha aur neevenpann ka aisa nageena
Ki hum uss oonchaayee takk pahunch paayein.

Jahaan pahunch kar hum apne bheetar Aapko paayein
Aur is divya deedar se phir kabhi anjaan na ho paayein
Jahaan pahunch kar hum aisa nirmal anand paayein
Ki uss anand ko agley janam kee buniyaad banaayein.

Agley janam mein vahee hoga hamaara adhyaatmik starr
Jis starr par hum hongei jabb hoga is jeevan ka antt
Guruji, Aapki mehar se ooncha hota chale hamaara adhyaatmik starr
Taaki hamaare janam maran ka silsila na chale anant.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 9, 2022

Om Namaha Shivaya
Aaj Ka Suvichaar # 1633

           Krodh Kee Aag Jo Jalee

Krodh kee aag jo jalee
Dekhte dekhte ho gayi khatam
Zameen par reh gaya angaara
Diya usne maamuli sa zakhm.

Angaara shant ho gaya
Zakhm bhar gaya
Zameen ne bhula diya zakhm
Krodh bhi ho gaya khatm.

Lekin, jabb krodh kee aag jalti rahi
Toh atmik zameen ubalti rahi
Zakhm hota gaya gehra
Na bhar paaya usey marham ka pehra.

Shaareerik swaasthya par hua bura asar
Maansik sehat bhi gayi bigad
Atma par badhta gaya zakhm ka nishaan
Janam maran ke chakravyuh ke beech atma hui pareshaan.

Usey dhaaran karta hai jo bhi shareer
Veh kabb dega usey oordhvagati kee taqdeer
Is duvidha mein karti rahi vo intazaar
Ki kabb hoga uska uddhaar.

Paramatama ne dekhi atma kee neeyat
Dee usey ek insaan kee deh mein aane kee izaazat
Simran mein leen honei lagaa veh insaan
Honei lagaa uska adhyaatmik kalyaan.

Rehta thaa veh Guru kee talaash mein
Uska neevanpann badhta gaya rehte huey is aas mein
Uske mann ka bartan kaabil hua anugraha paane ke liye
Guruji ne usey apnaaya usey paar lagaane ke liye.

Guruji kee mehar se zyada hotey gaye simran ke pal
Uskee atma ka bhavishya gaya badal
Jaise jaise simran dwara Guruji karte rahe uska pavitrikaran
Atma par se daag mitne lagey, safal honei lagaa uska janam.

Guruji ne usey aish karvaayee
Simran aur dhyan ke dwara uskee aasakti chudvaayi
Duur huey uske vikaar
Shuddh huey uske vichaar
Guruji ne uskee atma ko
Moksh ke liye kiya tayyaar.

Uska mann banaa uska das
Veh pahunchta gaya manzil ke paas
Aakhir veh sundar bela aayi
Jabb atma Paramatama mein samaayee.

Sabhi kee atma
Paramatama se milne ke liye rahi hai taras
Na jaane usey shareer mein rehte rehte Beet gaye hain kitne janam aur baras.

Jitnee sheeghrataa se vikaaron ka hota hai khaatma
Utnee jald pavitra honei lagti hai atma
Koshish karein ki uspar daag na lagein
Isliye abb takk soye bhi thei toh abb toh jagein!

Krodh aadi vikaaron ko aakraman karne se roakein
Taaki aur kalankit na ho atma
Har pichhle daag ko simran aur dhyan dwaara mitaayein
Taaki prassann hon Paramatama.

Tabhi toh milegi har atma ko apni manzil
Usey Paramatama ke sangg ekta hogi haasil
Poorna ho chukey hongei sab bhog
Guruji kee kripa se praapt hoga divya sanyog.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 8, 2022

Om Namaha Shivaya
Aaj Ka Suvichaar 🙏🏻🙏🏻 # 1632

    Sunehra Savera Aayega Zaroor

Aayega, zaroor aayega veh sunehra samay
Tu Guruji par bharosa rakh, mann se mita de har sanshay
Pareshaani swaabhaavik hai jo aaya hai pralay
Samarpan kar aur ho jaa nirbhay.

Itna toh hai bilkul tayy
Ki Shivmayi hai teri layy
Guruji kee karta chal tu Jai
Duur hoga tera har bhayy.

Tu akela nahin hai
Tu Guruji ke saanidhya mein hai
Guruji kee agya ka paalan
Chhalakta tere har kartavya mein hai.

Yahaan takk laayein Hain tujhe Guruji
Aagey bhi zaroor lekar jaayenge
Tera haath Guruji ne thaama hai
Ve tujhe chod kar nahin jaayenge.

Yakeen kar
Tu bilkul na darr
Guruji ka hai sarvochch starr
Kyunki Ve Hain avatar-e-Har.

Rangoli hai ye jeevan kee
Prateek hai rangon ke mishran kee
Hokar ekaagrachitt aur kar ke abhyaas
Har rangg ka hissa aata hai raas.

Guruji mein swayam ke chitt ko kar ke kendrit
Apne har kaarya ko Unke charnon mein kar ke arpit
Pehen le Unka diya hua nirbhayta ka nageena
Jeevan ke har rangg mein rangg kar aa jaayega tujhe jeena.

Jaan jaayega tu ki har rangg par hai Guruji ka pehra
Bhakti ke rangg par chhaaye huey noor se khilega tera chehra
Har sanshay, har bhayy ho jaayega duur
Veh sunehra savera aayega zaroor.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 7, 2022

Om Namaha Shivaya
Aaj Ka Suvichaar 🙏🏻🙏🏻# 1631

                      Bhakti Ka Beej

Ek upvan thaa nadiya ke paas
Sookh chuki thi vahaan kee ghaas
Hariyali jaise ho chuki thi itihaas
Koi dikhta nahin tha upvan ke aaspaas.

Beej jo boya maali ne bhakti ka
Aur seencha usey shraddha ke jal se
Guruji ke naam ke japp ke tapp se
Paudhe ko milee mamta
Hara bhara hokar veh bada hua tabb se
Paayi usne phool phal dene kee kshamtaa.

Phal khaaye jabb gilheri ne
Toh bheetar se phir nikle beej
Ve bhi mitti mein samaaye
Aur phir aur paudhe aaye.

Poore upvan mein bhakti ka spandan
Laaya ruhaaniyat kee hariyaali
Uss spandan ko liye aanchal mein
Vahaan kee hawaa bhi hui matvaali
Ghaas ugne lagi aur khush hua vahaan ka maali
Phoolon se sajne lagi pedon kee har daali.

Bhakti ka bhaav lagaa yoon behne
Ki vahaan sundar panchhi lagey rehne
Bachche khelne lagey vahaan
Aisa sundar hua samaa.

Loag bhi karne lagey upvan mein sayyr
Aur narm ghaas ko chhoote thei unke payyr
Nirogi honei lagaa unka mann aur unkee kaaya
Maali ke parishram aur bhakti ke beej se ye sabb mumkin ho paaya.

Bhakti ka beej mann mein hai
Guruji kee meharbaani se
Hum bhi seenchein usey
Shraddha roopi paani se.

Hara bhara ho jaaye
Har jann ke mann ka upvan
Mann mein jabb karein bhraman
Toh aisa ho bhakti ka spandan
Ki har tareh ka roag ho jaaye khatam
Aur Guruji kee oar badhte rahein kadam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 6, 2022

Om Namaha Shivaya
Aaj Ka Suvichaar 🙏🏻🙏🏻# 1630

                   Guruji Jyot Hain

Guruji jyot Hain, ujjwal aur divya
Roshni hai Unkee anant
Unke ashish se hum huey hain dhanya
Ve Hain Guru ke roop mein Bhagwant.

Saari sangat aati hai Unke darbar
Kaaran hotey hain kayee hazaar
Koi maange ghar, koi maange kaarobaar
Koi maange santaan ya saathi, koi maange mehengi car.

Jaise rangon ke mishran se
Bann jaate hain rangg anginat
Kuch isee tareh se chaahaton ka mishran liye
Guruji ke paas aati hai sangat.

Guruji sab kuch dene mein samarth Hain
Phir bhi “maango nahin, maano,”Ve kahein baar baar
Kyunki Ve hamaare shubhchintak Hain
Karna chaahte Hain hum par upkaar.

Upkaar aisa, ki ho hamaara uddhaar
Aaye hamaari soch mein sudhaar
Paath aur simran karein hum baarambaar
Gupt daan aur sewa se sanvaarein hum sansaar.

Hamaare har prayaas mein Guruji Hain madadgaar
Bhakton ke liye sada khula hai Unka dwaar
Asal cheez dena chaahein Ve Parwardigaar
Taaki hamein jeena marna na bhugatna padey baar baar.

Kyun na maangein Unse Unke charnon mein sada rehne kee izaazat
Taaki hota rahe hamaara poorna kalyaan
Guruji se maangna hee hai toh maangein ‘asal dhan’ ka daan
Jabb tann se niklein praan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 5, 2022

Om Namaha Shivaya
Aaj Ka Suvichaar 🙏🏻🙏🏻# 1629

Sabb Yaheen Ka Yaheen Reh Jaana Hai

Aaj ke na jaane kitne saare pal
Kal ke baare mein sochte huey rahe hain beet
Ya veh kal jo beet gaya, ya kal jo kal hee aayega
Aise mein mann ko aaj se zyada kal se honei lagti hai preet.

Jo kal beet gaya, nahin sakte hum usey badal
Khud ko sikhaayein, ki uss kal kee galatiyon se seekh kar aagey lein hum chal
Beete kal kee madhur yaadon ko dil mein basaayein
Agar hon koi gile shikve, toh unhe jald se jald bhulaayein.

Beete kal ko aaj par na padne dein bhaari
Aaj ka sadupyog kar ke awashya karein aane wale kal kee tayyaari
Lekin aisa karte karte bhool na jaayein dena aaj ko mahatva
Ghar parivaar samaj kee oar nibhaayein aaj ka kartavya.

Achche se jeeyein aur karein parishram
Chinta ke bajaaye chintan mein bitaayein kshan
Vikaaron aur paapon ko na karne dein apne jeevan par raaj
Waqt ka sammaan karein aur neki se jee lein aaj.

Bachche sada chhote nahin rahenge
Apne pankh phailaakar kal bharenge udaan
Isliye aaj unke sangg waqt bitaayein
Dein unko aur paayein unse pyaar aur gyan.

Humsafar jeevansaathi aur parivaar ke saath
Koshish kar lein ki aaj kar lein baat
Kiske jaane ka kabb aa jaaye pal
Veh pal aaye aaj ya kal
Aisa na ho ki kal mein khokar
Aaj ke lamhon ko ganva dein
Aane wale kal ke peechhe aise daudein
Ki aaj kee khushiyan dabaa dein.

Guruji Hain MahaShiv ke avatar
Bashar bann kar aaye hamaare liye
Unhonei maanav shareer choda
Yeh bahut gehri shiksha hai hamaare liye.

Jabb swayam Prabhu ne bhi chod diya apna maanav shareer
Toh hamaare shareer kee toh insaan honei kee vajeh se honi hee hai yeh taqdeer
Isliye kal ke liye batorne mein itne bhi na ho jaayein magan
Ki aaj ko jeene mein na laagey lagan.

Sabb yaheen ka yaheen reh jaana hai
Kewal atma ne hona ravaana hai
Hamaara yeh jeevan karega atma par jo asar
Usee se tayy hoga uska aagey ka safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja