Aaj Ka Suvichaar

June 15, 2022

Om Namaha Shivaya
Aaj Ka Suvichaar 🙏🏻🙏🏻 # 1578

Jeevan Kee Paribhaasha

Basaaye huey mann mein asha
Raahi dhoondhne chala jeevan kee paribhaasha
Chalte chalte raah mein mila ek bhikhaari
Jisey thi na jaane kaunsi beemaari
Chehra thaa murjhaaya sa
Jwar se peedit lagg raha thaa
Bura waqt jaise uska aaya thaa
Na jaane aur kya kya usne saha thaa.

Raahi se yoon raha na gaya
Bhikhaari se kuch kaha na gaya
Raahi ne kurte kee jeb se kuch paise nikaale
Aur dua karte huey jhuk kar bhikhaari ko de daale.

Uska dil chaaha
Ki kaash veh aur kuch kar sakta bhikhaari ke liye
Bahut nek bhaav se jalaaye vaataavaran mein
Raahi ne bhikhaari ke liye duaon ke diye.

Chala simran karte karte veh thoda aagey raah par
Ek aur bhikhaari usey aaya nazar
Paise nahin thei abb uske paas
Isliye thoda sa veh hua udaas
Phir haath jod kar pyaar se usne dee duayein
Kaha usne, “ Baba, dua karta hoon, tumhaare kasht duur ho jaayein.”

Raahi chalte chalte dooba raha jeevan kee paribhaasha ke vichaar mein
Sabhi ke liye shuddh soch liye vinamrata rakhte huey vyavhaar mein
Uskee atma ko khabar thee uske har vichaar aur ravaiye kee
Yoon hee chalti gayi nemi samay ke pahiye kee.

Karta chala Shukrana aur simran
Pashu pakshiyon ke liye paani se bharta raha chhote chhote bartan
Veh jaantaa thaa ki beshak usey koi aur dekhe na dekhe
Oopar wala sab dekhe aur jaane
Aur koi uskee neeyat se waaqif ho ya nahin
Ishwar uskee neeyat ko pehchaane.

Guruji kehte Hain, “Banda bann,”
Achanak bol pada raahi ka mann
Jeevan kee paribhaasha ka jo uske mann mein thaa sawaal
Usey lagaa ki uskee soch aur uske karma mein hee hai jawaab.

Kisee kee madad kar paao toh zaroor karo
Sabhi se anaasakt pyaar karo aur andhvishwaas se na daro
Madad na kar paao toh bhi raho neeven aur vineet
Ahankar aur tark ko tyaagkar haar mein bhi hai jeet.

Bin jataaye, bin dikhaaye karo sewa, paath, aur daan
Unhe gupt rakhne se khush hotey Hain Bhagwaan
Insaan ho, anusaran karo insaaniyat ka
Atma basee hai shareer mein, har saans ko poshan do ruhaaniyat ka.

Mitti se aayein hain hum sab, mitti mein hai mil jaana
Jab antim samay aayega, na chalega koi bahaana
Jaisa Guruji ne hai kaha, usee tareh se jeena hee hai jeevan kee paribhaasha
Isliye samarpit kar dein Guru charnon mein hee har asha aur niraasha

Yahee sochte sochte raahi pahunch gaya apne shivir par
Uske chehre ka noor bhaari padd raha thaa timir par
Guruji ka ashirwaad thaa uske sangg
Guruji kee dee deeksha se khila thaa uska rangg
Kuch kuch samajh aane lagi usey paribhaasha jeevan kee
Guruji kee mehar se badhauti hui uske adhyaatmik gyan ke dhan kee
Usne paribhaasha ko saarthakta se jeene kee koshish kee, jabb takk chalta raha uska shwaas
Antim samay mein shareer mitti hua, lekin atma ka raha Guru charnon mein nivaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 14, 2022

Om Namaha Shivaya
Aaj Ka Suvichaar 🙏🏻🙏🏻 # 1577

         Japta Chal Tu Unka Naam

Zindagi ko tu paheli maan
Ya phir ek ajab sa imtehaan
Guruji ka kehna maan
Aur japta chal tu Unka naam.

Paheli lagey ya imtehaan
Aankhon mein aansoon hon ya phir ho chehre par muskaan
Na chodna japna Guruji ka tu naam
Kyunki isee mein hai tera kalyaan.

Guruji ke naam ko jo rasna hai gaati
Ye naam banta hai uss jann ka saathi
Rasna se antarmann mein basaa le tu Guruji ke naam ko
Unke naam ke amrit se bheegne de tu apne har kaam ko.

Guruji ke naam ko kar le atmasaat
Bann jaayegi teri har bigdi baat
Aaj banegi ya kal
Ye toh Guruji hee jaanein
Tere hitt mein toh ye hai
Ki tu Unka kaha maane.

Guruji ka naam hai tere raaste ka vo anokha chirag
Jiskee roshni anginat diyon se bhi zyada hai
Sainkdon tufaan bhi is chirag ko na bujha paayenge
Is chirag kee lau se raahon mein aur kayi diye jal jaayenge.

Andhere mein bhi andhera na dass paayega tujhe
Guruji ke naam ka chirag roshan karega teri raahon ko
Tu ek pal ke liye bhi asahaay nahin hai
Kyunki Guruji ne swayam thaama hua teri baahon ko.

Zindagi kee paheli ko maan le kuch palon kee saheli
Zindagi ke imtehaan ko maan le kuch lamhon ka mehmaan
Guruji ne baahein Hain thaami, tu le yeh hakeekat jaan
Aur jo kuch bhi ho jaaye, japta chal tu Guruji ka naam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 13, 2022

Om Namaha Shivaya
Aaj Ka Suvichaar 🙏🏻🙏🏻 # 1576

Simran Karne Ka Avsar

Guruji kee mehar se mila hai simran karne ka avsar
Na jaane de in ghadiyon ko bekaar
Yeh atma-bal badhaane ke liye anivaarya hai
Taaki mann kee sthiti par na ho koi vaar.

Simran karte karte atma-bal badhta jaayega
Paristhitiyan tujhe na kar paayengi kamzor
Mann vichlit na hoga, mann rahega sthir
Tu uthne ka saahas kar paayega agar gaya tu gir.

Kyunki jabb takk zindagi hai
Aate rahenge utaar chadhaav
Simran ke prabhaav se
Mann ko na hoga shanti ka abhaav.

Simran mein mann lagey ya nahin
Simran karna hee hai sahi
Ekaagrachitt hokar kiya jaaye toh aur bhi achcha
Buss, simran karne ka prayaas ho sachcha.

Guruji kee daya se prayaas zaroor hoga safal
Simran dwaara pavitrikaran hoga toh behtar hogi karmon kee fasal
Jis bhi tareh se dekha jaaye, bhakt ka kalyaan hee hai
Guru ka hukm samjhein ya Ishwar ka, Guru mein basaa toh Bhagwaan hee hai.

Guruji kee dee hui daat hai simran
Simran hai shanti ka upaay
Simran kee daat ka tu kar sammaan
Simran hai raasta, manzil hai kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 12, 2022

Om Namaha Shivaya
Aaj Ka Suvichaar 🙏🏻🙏🏻 # 1575

                   Guruji Kee Mehar

Guruji kee mehar
Laati hai har roz kee sehar
Guruji kee hee hai daat
Har roz aane wali raat.

Guruji ka prasad
Deta hai ashirwaad
Guruji ke naam ka amrit
Sada karta hai bhakton ka hitt.

Guruji kee nazar
Karti hai ruh par asar
Guruji kee nadar
Mita deti hai bhakt ka darr.

Guruji ka pyaar
Vikaaron par karta hai vaar
Guruji ka dulaar
Giraata hai sanshay kee deewar.

Guruji kee marzi
Maun kar deti hai bhakt kee arzi
Guruji ka vachan
Utsaahit karta hai mann.

Guruji ka simran
Hai bhakton ke liye dhan
Guruji kee sewa ka mauka
Deta hai sukh anokha.

Guruji ka satsang
Nikhaarta hai bhakti ka rangg
Guruji ko kiya dhanyawaad
Karta hai dil ko santosh se aabaad.

Guruji mein lagan
Kar deti hai Unkee bhakti mein magan
Guruji kee sharan
Sada sada hoti hai mangalkaran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 11, 2022

Om Namaha Shivaya
Aaj Ka Suvichaar 🙏🏻🙏🏻 # 1574

            Guruji Ka Pyaara Pehra

Baansuri kee dhvani suni
Phir chidiyon kee chehek
Achaanak ek titlee udd kar aayi
Usee pal aayi ruhaani mehek.

Gulab kee aur chandan kee
Maano hua ho mehek mein inka mishran
Jo hawaa ka jhonka ye mehek laaya
Usey usee pal kiya mainey naman.

Dhanya hai veh hawaa ka jhonka
Jo mere Guruji ka paigaam laaya
Mehek se zaahir hui maujoodagi Guruji kee
Mere mann mein khushi ka dhwaj lehraaya.

Mann kee aankhon ne dekha
Guruji ko furteeli chaal se aate huey
Noor anant thaa Unke chehre par
Neeveen nazron se mandd mandd muskuraate huey.

Tej Unke abhamandal ka
Laaya sanket mangal ka
Unke noor ko rahi thi nikhaar
Mere sangg Unhe saraahne lagi bahaar.

Shaayad farishte bhi vahaan hotey
Toh ve jaate sharmaa
Guruji ke saumya divya roop se
Yoon khil gaya samaa
Jharne ullasit hokar behne lagey
Phool khil kar Guruji ko shukrana kehne lagey.

Bargad ke thei vahaan do taruvar
Unhe mil gaya sunehra avsar
Unhonei apne beech mein ek sundar se jhoola lagaaya
Guruji ne dono kee shaakhaaon ka bhagya jagaaya.

Guruji ke pyaar mein baanvri si hokar
Mainey jhoole par phoolon ka aasan bichhaaya
Kaante na chubh jaayein Guruji ko
Isliye saavdhaani se kaanton ko hataaya.

Jabb mann hee mann mein is nacheez ne
Guruji ko namaste aur Unka abhinandan kiya
Toh pyaare Guruji ne bin dekhe bin kuch boley
Jhoole par aasan grehen kiya.

Unke sundar pitambari chole ke aanchal ne
Ek pal ke liye kiya mere haath ka sparsh
Mai bayaan nahin kar sakti ki mujhe kaise lagaa
Mujhe mil gaya anginat varshon ka harsh.

Guruji jhoole par huey virajmaan
Kya aalam thaa, kitnee sundar thi Unkee shan
Unhe dekhte huey bhi na dekh paa rahi thi mai
Kyunki Unke mastishk se maano nikal rahe thei divya shakti ke baan.

Thoda ghabraakar, ki kaheen galati na ho jaaye
Mai laayi Unke liye jal aur chai
Unhonei chakh kar veh prasad mujhe dekar ishaara kiya
Aur Unke hukm ko sir aankhon par rakhkar mainey vo prasad pee liya.

Aisee sheetalta ka anubhav hua mujhe
Ki lafzon mein bataana hai namumkin
Prasad ne mere antakaran ko yoon anugrihit kiya
Ki mainey jeevan mein pehli baar itna gehra shwaas liya.

Meri neend khul gayi lete hee shwaas gehra
Mehsoos hua ki vahaan bhi aur yahaan bhi hai Guruji ka pyaara pehra
Shukrana Guruji Aapka, ki Aapne diye itne komal swapn darshan
Aapke ashirwaad se so-un ya jaagoon, buss rahoon mai Aap mein magn.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 10, 2022

Om Namaha Shivaya
Aaj Ka Suvichaar 🙏🏻🙏🏻 # 1573

        Dikhaaya Hai Unhonei Raasta

Guruji ka Shukrana
Ki dikhaaya hai Unhonei raasta
Raasta sewa aur simran ka
Raasta satsang ke dhan ka
Raasta, jismein vehem ka sthaan nahin
Raasta, jahaan vikaaron ka maan nahin.

Raasta, saadagi hai jiske har kadam par
Raasta, jahaan Guruji ke naam ka marham lagta hai har gumm par
Raasta, jahaan bhaav kee hai ahamiyat
Raasta, jahaan barasti hai Guruji kee rehmat.

Yeh raasta hai chhal-kapat se bahut duur
Yeh raasta ahankar ko karta hai chuur chuur
Yeh raasta hai saralta aur taralta kee oar jaane ka
Yeh raasta hai komalta aur nirmalta apnaane ka.

Yeh raasta hai dhyan ka
Yeh raasta hai kalyaan ka
Yeh raasta hai bhog bhogne ka bin aasakti ke
Yeh raasta hai aatmabal badhaane ka, Guruji dwaara dee gayi shakti se.

Yeh raasta hai niswaarth preet ka
Yeh raasta hai preet kee jeet ka
Yeh raasta hai preet mein haar ka
Yeh raasta hai swayam mein sudhaar ka.

Yeh raasta hai jaagriti ka
Yeh raasta hai adbhut aakriti ka
Yahaan kaante chubhne se bhi hota hai bhalaa
Yahaan phool khilne kee ruhaani hai kala.

Yahaan Khuda ko paane ke liye khud ko padta hai khona
Yahaan ruhaani prem mein bhool jaata hai jaagna aur sona
Yahaan ullas aur malang ka shor bhi hai
Yahaan vichaarmagn rehne ka moad bhi hai.

Yahaan niraasha kee raat mein bhi yoon jalte hai bhakti ke diye
Maano Guruji ne raasta roshan kiya hai hamaare liye
Yahaan ashirwaad milta hai chehre par kaanti aane ka
Yahaan nirantar mauka milta hai mann mein shanti aane ka.

Yahaan andhvishwaas ko aane kee hai manaahi
Yahaan Guruji ke suraksha kavach se surakshit hai har raahi
Yahaan Guruji swayan lekha dobara likhte Hain Apne kalam kee siyahi se
Yahaan koi vadiyaayee vaddi nahin hai Guruji kee vadiyaayee se.

Yeh raasta manzil takk lekar jaata hai
Yahaan har bhakt Guruji ko humsafar ke roop mein paata hai
Yahaan Guru aur bhakt ka rishta nikharta jaata hai
Yahaan raahi ruhaaniyat kee oonchaayee ko chhoo paata hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 9, 2022

Om Namaha Shivaya
Aaj Ka Suvichaar 🙏🏻🙏🏻 # 1572

        Musaafir, Tu Chalta Chal

Musaafir, tu chalta chal
Darr ko peechhe chod kar
Musaafir, tu chalta chal
Har baadha ko toad kar.

Jhaank tu apne bheetar
Guruji Hain vahaan
Ve angg sangg hongei
Tu jaayega jahaan.

Guruji karte rahenge tera maargdarshan
Tu buss juda reh Unse seedhi taar se
Vaise bhi ye sab maya hai
Tujhe kya lena hai sansaar se.

Baahar ho ya na ho roshan
Tu bheetar ka karta chal poshan
Vaheen hai tera antakaran
Jiska Guruji kar rahe Hain pavitrikaran.

Guruji ne tujhe Apni goad mein hua hai uthaaya
Jabb bhi zaroorat hogi, Unka aanchal deta rahega tujhe chhaaya
Itminaan se sambhaal jo sewa simran ka dhan toone hai paaya
Bahut pachhtaayega agar isey toone ganvaaya.

Kyunki is dhan mein samaayi hai tere liye adhyaatmik oorja
Is dhan se susajjit hoti hai, jo bhi karta hai tu pooja
Yeh dhan de nahin sakta Guru ke siwaay koi dooja
Jaan le tu agar abb takk tujhe ye nahin soojha.

Tere bheetar Guruji ka raaj hai
Aur baahar maya laailaaj hai
Kal beet gaya, lekin tere paas aaj hai
Tera har shwaas Guruji kee mehar ka mohtaaj hai.

Isliye, musaafir, tu chalta chal
Hokar saavdhaan, lekin befikr
Musaafir, tu chalta chal
Har pal karte huey Guruji ka shukr.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 8, 2022

Om Namaha Shivaya
Aaj Ka Suvichaar 🙏🏻🙏🏻 # 1571

        Har Pal Tera Imtehaan Hai

Har pal tera imtehaan hai
Guruji ke darbar mein
Laparwahi matt kar lena ismein
Phans kar moh maya ke pyaar mein.

Ye imtehaan chal raha hai har pal
Bin computer ya kaagaz kalam ke
Kyunki Guruji tera niroopan kar rahe Hain
Tere safar mein tere har kadam pe.

Teri kriya, teri pratikriya, teri bhawna
Teri neeyat, teri kaamna
Tera vichaar
Tera vyavhaar
Sab kuch azmaa rahe Hain Guru Parwardigaar.

Chhipa le yahaan tu sabse beshak
Ya kar le agar anuchit iraade se kisee kee nakal
Banaa lega tu bewakoof saare jahaan ko
Lekin na dhokha de paayega tu Guru meharbaan ko.

Ho sakta hai ki baadhaayein tujhe gher lein har oar se
Aur har seedhi jo tu chadhe, toh imtehaan hota jaaye mushkil
Phir bhi tu Guruji ko sab arpan kar ke apna karma karna
Apne zameer kee awaaz sunte rehna, taaki jurmaana na pade bharna.

Karega imtehaan kee har seedhi ka tu jo saamna
Bina buri neeyat aur bin swaarth aur bin bhautik kaamna
Toh agar poora sansaar bhi na jaan paayega
Tu Guruji kee nazron mein safal kehlaayega.

Faisla tujhpar hee hai nirbhar
Ki Guruji ke hukm par katvaa sakta hai kya tu apna sir
Ya phir imtehaan ke mahatva se vikarshit hokar
Tu duniya ko khush karne mein vyateet karna chaahta hai yeh safar.

Buss, yeh rakhna tu yaad
Ki imtehaan ka jo bhi ho parinaam
Teri neeyat aur tere tareeke se Guruji nahin Hain anjaan
Aur Unhe hai har pal tere pal pal kee soch ka gyan.

Guruji mein shraddha kendrit karte huey
Tu shuddh bhaav se de le imtehaan
Guruji teri neeyat aur mehnat dekhkar nyaaya karenge
Aur tere hee hitt mein hoga parinaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 7, 2022

Om Namaha Shivaya
Aaj Ka Suvichaar 🙏🏻🙏🏻 # 1570

            Guruji Ke Sangg Doar

Bandh gayi jiskee Guruji ke sangg doar
Usey kyun phir chahiye kuch bhi aur
Uskee har zaroorat aur chaahat ka Guruji rakhein khayaal
Chaahe usey Unse judey huey hua ho ek din ya phir kayi saal.

Guruji kee leela hee aisee hai
Ki Ve Apne har bhakt se karte Hain behad pyaar
Ve Apne maanav roop mein nahin Hain yahaan
Lekin Unkee maujoodagi se kaun kar sakta hai inkaar.

Ruhaani khushboo Unkee
Swapn mein Unke darshan
Satsang ke divya anubhav
Gurbani ke simran se tarta jeevan.

Unkee bakhshi hui sewa kee daat
Unkee mehar se hota hai jo paath
Unke charan jo dete Hain hamein sharan
Unka dhyan jo karta hai hamaare mann ka pavitrikaran.

Jeevan daan dene kee karte Hain kripa Ve aksar
Swaasthya ko banaate Hain behtar
Bhautik padaarth dena toh Unke liye itna aasaan hai
Unka toh har ashirwaad hee mahaan hai.

Bin maange hee Guruji karte Hain har bhakt ka kalyaan
Phir kyun Unse maang kar karein Unhe pareshaan
Hum toh hain picchle karmon se aur bhavishya ke maamle mein anjaan
Kitne bhagyashali hain hum ki Jinhonei hamein sharan dee hai, Ve Guruji Hain karuna kee khan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 6, 2022

Om Namaha Shivaya
Aaj Ka Suvichaar 🙏🏻🙏🏻 # 1569

       Apne Muqaddar Se Keh Do

Apne muqaddar se keh do
Guruji Hain tumhaare maargdarshak aur humsafar
Aur muqaddar ne jo kuch socha hai tumhaare liye
Guruji kee hai uspar har pal nazar.

Beshak tumhaare hee karmon ke hisaab se
Tumhaare liye naksha tayaar kar raha hai muqaddar
Lekin tum bhoolo na ki Guruji ka haath hai tumhaare sir par
Ve lekha dobaara likh dein, ho sakta hai ki tumhe mil jaaye aisa avsar.

Muqaddar par nazar rakh rahe Hain Guruji
Tum apna farz adaa karo beparwahi se
Tumhaare vichaar aur vyavhaar ko bhi dekh rahe Hain Guruji
Isliye duur rehna tum vikaar, paap, aur laparwahi se.

Muqaddar karega apna kaam
Tum karte raho kaam apna
Guruji ka naam lete raho
Chod do idhar udhar bhatakna.

Muqaddar kee andheri raat ko
Guruji sajaa denge ummeed ke sitaaron se
Guruji kee agya se muqaddar kee subah ka sooraj
Tumhara jeevan ujjwal karega apni kirnon se.

Niraasha ka sanket laayega jabb jabb muqaddar
Tum na badal lena apni dagar
Tum chalte jaana Guruji ke sahaare
Bin ghabraaye, bin himmat haare.

Asha aur ummeed ya jeet laayega jabb muqaddar
Toh bhi rehna sanyam mein
Asha aur niraasha ek hee sikke ke do pehlu hain
Is baat ko yaad rakhna mann mein.

Muqaddar ko bura na kehna
Usne hai sangg rehna
Pehene rahego jo Guruji ke naam ka gehna
Toh aasaan ho jaayega samjhauta sehna.

Jaise jaise chalega tumhaare jeevan ka safar
Guruji kee rehanumaayi mein rahega muqaddar
Karunamayi hai Guruji kee mehar-e-nazar
Unka Shukrana karte huey karo tum har kadam par Unkee is nazar kee kadar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja