Aaj Ka Suvichaar

May 19, 2020

Om Namaha Shivaya
Aaj Ka Suvichaar 🙏🏻🙏🏻 # 821

Bhakti Ke Bhed

Shiv Puran kahe bhakti bin gyan nahin
Aur gyan bina na praapt ho bhakti
Guruji MahaShiv Hain isliye
Unke paas hai inhe pradaan karne kee shakti

Apne hridaya ke niswaarth prem ko
Banaayein hum apni bhakti kee prerna
Sagun aur nirgun bhakti ke bhed kya hain
Inke baare mein jagaayein mann mein chetna

Tann mann ko ekaagrachitt kar ke
Jo sthit baithkar sunei katha Bhagwaan kee
Usey kehte hain ‘SHRAVAN’
Jis se adhyaatmik unnati hoti hai insaan kee

Jo bhakt apne dil mein Prabhu ke divya karmon ka karey chintan
Aur pyaar bhari awaaz mein karey inka ucchaaran
Isey hee kehte hain ‘KIRTAN’
Aur is se bhi shudh hota hai mann

Subah se lekar shaam takk
Indriyon se kee gayi sewa shraddha ke saath
Isey kehte hain ‘SEWAN’
Aur is se bhi prasann hotey Hain Bholenath

Jo MahaShiv Guruji ke swaroop ko sarv-vyaapak maankar
Unka hee chintan karta hai sadaa
Is bhakti ke bhed ko kehte hain ‘smaran’
Kaash har bhakt seekh jaaye yeh adaa

Shudh aur neeven bhaav se
Jo Prabhu ko yaad karey maan kar swayam ko Unka daas
Yeh ‘daasya’ ka bhed hai bhakti ka
Iska bhi bada sukhdaayee hai prayaas

‘Archan’ veh bhed hai bhakti ka
Jo istemaal karta hai dhan aur vaibhav kee shakti ka
Aur mann se dhyan lagaakar mantra kehna
Ye hai ‘vandan’ bhed bhakti ka

‘Sakhya’ bhakti ke bhed se insaan
Ishwar ke har faisle ko hitkaari maan leta hai
Aur ‘atma-samarpan’ bhed ka anusaran karne wala
Sab kuch Guru charan mein arpan kar ke Unhe sammaan deta hai

Guruji MahaShiv ka avataar Hain
Aur dete hamein bhakti ke sanskaar hain
Ye karte hain bhog aur moksh pradaan
Aur inse milta hai divyataa ka gyan

Kyun na inka anusaran kar ke
Apne sanskaaron mein inka rangg bhar ke
Hum apna uddhaar karein
Aur jeevan mein sudhaar karein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakti Ke Bhed (05/19/2020)

May 18, 2020

Om Namaha Shivaya
Aaj Ka Suvichaar 🙏🏻🙏🏻# 820

Dekho Ji Dekho Bhakton

Ashirwaad ke aasmaan ko
Kalyaan ke kandhon par uthaaye
Pita ke paawan pyaar ko
Nainon kee nirmaltaa mein basaaye
Dekho ji dekho bhakton
Pyaare Guruji Hain aaye

Mata kee mamta ko
Apne dil kee divyataa mein liye
Kshamaasheelta kee kshamta ko
Vinamrataa kee vadiyaayee mein liye
Dekho ji dekho bhakton
Guruji ne jalaaye raahon mein diye

Simran ke saagar ko
Neevenpann kee naiya mein samaakar
Anubhavon ke aseeson ko
Satsangon ke saawaan mein basaakar
Dekho ji dekho bhakton
Guruji ne diye hamein tohfe laakar

Aakarshanon ke aadambar mein
Dhyan ka teerath dham dikhaane
Kalyuga ke kohre mein
Satyuga ke satya ka paath padhaane
Dekho ji dekho bhakton
Guruji aaye Hain hamaare vikaar hataane

Gyan kee Ganga ko dhaaran kar ke
Anuchit aacharan hamaari atma ka mitaane
Andhvishwaas ke andhere ko haraakar
Ruhaaniyat ke rahasyamayee raaz bataane
Dekho ji dekho bhakton
Guruji aaye Hain hamein sachkhand le jaane

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dekho Ji Dekho Bhakton (05/18/2020)

May 17, 2020

Om Namaha Shivaya
Aaj Ka Suvichaar 🙏🏻🙏🏻 # 819

Simran Bhi Aapka, Manan Bhi Aapka

Pyaare Guruji,

Simran bhi Aapka, manan bhi Aapka
Taareef bhi Aapki, shravan bhi Aapka
Charcha bhi Aapka, smaran bhi Aapka
Kavita bhi Aapki, bhajan bhi Aapka

Sur bhi Aap Hain, geet bhi Aap
Layy bhi Aap Hain, sangeet bhi Aap
Sadaa sangg rehne waale meet bhi Aap
Raahon ko roshan karne wali ruhaani preet bhi Aap

Sir par sadaa rehne waala ashirwaad ka haath Aapka
Kabhi na chhootne waala suhaana snehmayee saath bhi Aapka
Naath bhi Aap, Trilokinath bhi Aap
Bhole Bhandari bhi Aap, Bholenath bhi Aap

Haathon kee har lakeer mein Aap
Har gareeb aur har ameer mein Aap
Raja mein Aap aur fakeer mein bhi Aap
Murshid bhi Aap aur wazeer bhi Aap

Bhaktjann kee chetna aur zameer bhi Aap
Antaratma kee divya tasveer bhi Aap
Kaayinaat ko kaayam rakhne kee nek tadbeer bhi Aap
Abb toh Apne har shaagird kee taqdeer bhi Aap

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Simran Bhi Aapka, Manan Bhi Aapka (05/17/2020)

May 16, 2020

Om Namaha Shivaya
Aaj Ka Suvichaar 🙏🏻🙏🏻 # 818

Tere Jeevan Kee Kitaab Ke Har Panne Par

Jab dil par shradha ke kalam se
Toone likh liya hai Shukrana
Toh phir jaisi bhi paristhiti ho
Tujhe nahin hai ghabraana

Guruji ka komal, taral, aur nirmal pyaar
Rakhega tere aur tere parivaar ke jeevan ko barkaraar
Tu buss Guruji ke prem kee masti mein dol
Mann chaahe toh Unse keh de, varna kuch bhi na bol

Jabb bhi tere jeevan mein hogi bhor
Unkee kripa se neeven hokar naachega tere mann ka moar
Aur jabb tere jeevan mein kabhi sooraj dhalenge
Toh Guruji naath Hain tere, Ve sab sambhaalte chalenge

Karam bhog toh karna hai
Aur maut se nahin darna hai
Jurmaana hai agar toh bharna hai
Guruji ne hee toh har dukh harna hai

Toh isliye tu buss chalta chal
Yeh kasht bhi jaayega tal
Buss Shukrana karta chal har pal
Unke haath mein hai tera kal, aaj, aur kal

Anginat bhakton ko taara hai Guruji ne
Tujhe bhi zaroor taarenge
Sainkdon ka uddhaar kiya hai Unhonei
Tere bhi kaaj sanvaarenge

Tu buss apne kalam mein niswaarth prem kee siyaahi bhar
Kasht mein bhi tu Guruji ka koti koti Shukrana kar
Tujh par har kshan Guruji kee rehmat is kadar hai
Ki tere jeevan kee kitaab ke har panne par Guruji kee nadar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tere Jeevan Kee Kitaab Ke Har Panne Par (05/16/2020)

May 15, 2020

Om Namaha Shivaya
Aaj Ka Suvichaar 🙏🏻🙏🏻 # 817

Mai Vaari Jaaoon Aap Par

Pyaare Guruji,

Aap Hain samay ke swaami
Aap hee ashirwaad kee amritvaani
Aapki mahima itnee noorani
Mai vaari jaaoon Aap par

Saari sangat hai Aapki deewaani
Aap har lete Hain har pareshaani
Aap kshamaa kar dete Hain sabki naadaani
Mai vaari jaaoon Aap par

Aapki leela par kabhi kabhi hoti hai hairaani
Kyunki Aap toh badal hee dete Hain zindagaani
Aapke apnepann ke baad abb saari duniya chaahe ho jaaye begaani
Mai vaari jaaoon Aap par

Chaahe koi kar le mere sangg beimaani
Isey sehne mein hoti hai pehle se zyada aasaani
Yeh vishwaas hai ki Aapne sadaa hai wafaa nibhaani
Mai vaari jaaoon Aap par

Isliye abb Aapke dhyan mein har dhadkan hai samaani
Isee se antarmann mein hai shanti aani
Har pal hoti rahey sansaar par Aapki meharbaani
Mai vaari jaaoon Aap par

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mai Vaari Jaaoon Aap Par (05/15/2020)

May 14, 2020

Om Namaha Shivaya
Aaj Ka Suvichaar 🙏🏻🙏🏻 # 816

Shukrana Tu Gaa Le

Bade hee pyaare Hain Guruji Dugri waale
Unke kamal charan mein tu sees jhukaa le
Guruji se apni niyati tu sanvarva le
Apna karam bhog aur kalyaan karva le

Apna ahem tu abb mitaa le
Samay simran mein tu bitaa le
Vikaaron se khud ko hataa le
Guruji ko apna dukh dard sunaa le

Unke samaksh tu apne dukh ke aansoon bahaa le
Unkee dee hui himmat se tu apna protsaahan badhaa le
Apni chetna par Guruji kee raksha ka kavach tu chadhaa le
Aur bejhijhak hokar sachchaayee ke raaste par kadam tu chalaa le

Guruji se apni galatiyon kee maafi neeven hokar maang le
Raaste mein aane waali mai kee baadha ko tu laangh le
Unhe sarvsamarpan kar ke Unse bandagi kee doar tu baandh le
Bahut seh liya toone, abb dard kee deewaar ko tu phaand le

Guruji ko apne dil kee har baat bataa le
Apne roam roam mein tu Unhe samaa le
Har din ko sewa simran mein lagaa le
Taaki tu apna jeevan kaheen vyarth na ganvaa le

Har din Unkee mehar hai, tu ye samajh paa le
Guruji ko apne mann mandir mein basaa le
Unkee karuna kee chhaaon mein tu pal pal panaah le
Har pal shradha se Guruji ka shat shat Shukrana tu gaa le

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukrana Tu Gaa Le (05/14/2020)

May 13, 2020

Om Namaha Shivaya
Aaj Ka Suvichaar 🙏🏻🙏🏻 # 815

Bhagwaan Swayam Bass Gaye Mann Mein

Uday hota hua sooraj yeh paigam laaya
Ki mere mann ke mandir mein mera Guru aaya
Khushi se khil uthee mandir kee vatika kee har kalee
Aur Guruji kee khushboo se mehekne lagee mandir kee har galee

Guruji viraajmaan huey
Mann mandir mein pyaar se
Itna anmol uphaar mila
Mujhe apne intazaar se

Ki Bhagwaan swayam buss gaye mann mein
Unhee kee chhavi dikhey mann ke darpan mein
Divya roshni se ujjwal hua antarmann
Bahut sundar lagne lagaa ye jeevan

Aankhon mein Unke mahasaagar gehra
Mastak par divya dyuthi ka sundar sehra
Hothon par liye mandd muskaan
Dekh rahe pyaar se mere Bhagwaan

Jaise basey ho aakar mann mein
Vaise hee sangg rehna sadaa jeevan mein
Aur maran ke baad har janam mein sambhaal mujhe lena
Pyaare Guruji, har pal apni mamta kee goad mein paal mujhe lena

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhagwaan Swayam Bass Gaye Mann Mein (05/13/2020)

May 12, 2020

Om Namaha Shivaya
Aaj Ka Suvichaar 🙏🏻🙏🏻 # 814

       Jaag Re Mannva, Jaag Tu

Jaag re mannva, jaag tu
Simran kar ke apni mai ko tyaag tu
Na lagne de apni atma par daag tu
Gaata chal Guru mahima ka raag tu

Kitna samay yoon hee beet gaya
Gehri nidra mein agyaan kee
Abb bhi nahin jaaga tu
Toh kaise dekhega subah gyaan kee?

Guruji ko maanta hai tu Bhagwaan
Toh phir kyun nahin Unkee tu sunta hai?
Kyun baahari aakarshanon ka jaal
Apne liye naadaani mein tu bunta hai?

Simran ka har vela
Tere liye hoga bahut hee suhela
Guruji sadaa tere sangg Hain
Tu nahin hai kabhi bhi akela

Unkee chhavi hai tere bheetar
Is baat se tu inkaar na kar
Jo dikhaawe kee dhundh tujh par chadhi hai
Usey ponchhne mein tu vilambh na kar

Jabb tera aantrik astitva hoga saaf
Toh Guruji bhi tujhe kar denge maaf
Teri sachchaayee Guruji ko lagaegi pyaari
Samjhega tu ki vyarth hai ye duniyaadaari

Bada hee sukh hai simran mein
Ye gyan bhar deta hai jeevan mein
Guruji kee kripa barsey aur tu uss gyan par karey amal
Taaki tere bheetar bhi khil jaaye kharepann aur komaltaa ka kamal

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 11, 2020

Om Namaha Shivaya
Aaj Ka Suvichaar 🙏🏻🙏🏻 # 813

    Saadho Saadho Guruji Ka Naam

Saadho saadho Guruji ka naam
Sukhdayee hai Guruji ka dhaam
Lete chaloge jo Guruji ka naam
Toh zaroor pahunchoge Guruji ke dhaam

Ye zaroori nahin ki aasaan hoga raasta
Mushkilein aane kee kaafi hai sambhaavna
Kyunki Guruji karam katvaate Hain hamaare
Isliye shradha aur saboori kee rakhein hum bhaavna

Raaste mein jo mushkilein aayengi
Guruji kee mehar se hal hoti jaayengi
Jab takk hogi dil mein bhakti aur chetna
Tabb takk Unkee har leela hogi ek prerna

Prerna vishwaas badhaane kee
Prerna chalte jaane kee
Prerna na dagmagaane kee
Prerna Guruji ko paane kee

Guruji ke ashirwaad bhare saath se
Raasta tayy hota chalega
Guruji ke naam ka amrit
Hamaare paapon ko dhota chalega

Antt mein dhaam takk pahunchne ke liye
Zaroori hain jalaane niswaarth prem ke diye
Vikaaron ko kabhi na kabhi toh tyaagna hoga
Jitnee jaldi ho sakey unse duur bhaagna hoga

Kyunki sansaar toh bewakoof bann sakta hai jhoothe dikhaawe se
Lekin Guruji har soch jaante Hain hamaari
Unke dhaam mein bholapan aur kharaapan kaam aata hai
Unkee kripa ho toh hee bhakt Unke dhaam jaa paata hai

Isliye kyun na hum koshish karein
Guruji kee chaahat anusaar swayam ko banaane kee
Aur Guruji se ardaas karein
Unke param paavan dhaam mein pravesh kee agya paane kee

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 10, 2020

Om Namaha Shivaya
Aaj Ka Suvichaar 🙏🏻🙏🏻 # 812

      Subah Se Lekar Raat Takk

Subah se lekar raat takk badalta hai prakriti ka chehra
Lekin har pal har mukaam par rehta hai Guruji ka paawan pehra
Badalte huey mausam bhi Guruji ko jhuk kar salaam karte hain
Guruji har mausam ke chitr mein prakriti ke rangg bharte Hain

Ve hee toh Hain har kann kann mein viraajmaan
Unkee hee marzi se baadalon ko sambhaalta hai aasmaan
Unke hee hukm se hawaa aandhi se thamne ko kehti kai
Unhee kee mehar se nadiya apni disha kee oar behti hai

Guruji ke prataap se hee koi cheenti takk bhookhi nahin rehti
Unhee kee nadar se mahasaagar kee atma sookhi nahin rehti
Unkee daya se har pashu pakshi ka jeevan hai
Unkee kripa se maanav jaati ka bhi poshan hai

Phir kaisi chinta, kaisa shaq ya ghabraana
Jo vipatti aayi hai, usne ek din hai jaana
Kyunki Guruji kee mehar nirantar baras rahi hai
Aayegi veh subah, jo uday honei ko taras rahi hai

Chinta nahin karo, balki Guruji ka chintan karo
Vikaaron se nahin, balki achche vichaaron se dil ko bharo
Guruji itnee mehnat karte Hain, hamein bhi apna kartavya nibhaana hai
Achche aacharan aur sadbhavna se shubh aur shudh spandan phailaana hai

Guruji ke prataap aur ashirwaad se
Hamaare yogdaan aur paawan jazbaat se
Badalte mausam ke dhangg suhaane hongei
Prakriti ke rangg ruhaani hongei

Shubh kaam mein kaisi deri
Tyaag dein hum vikaaron kee dheri
Prashaanti aur pavitrataa ko hum galey lagaayein
Guruji ke aanchal mein hum sab tarr jaayein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja