Aaj Ka Suvichaar

February 7, 2026

Om Namaha Shivaya
Aaj Ka Suvichaar 🙏🏻🙏🏻

#2911

             Guftagoo

Guruji Paramatma pyaare
Bhakt kee rooh hai Jinke sahaare
Dono huey rubaroo
Shuru hui guftagoo.

Guruji ne kiye sawaal
Rooh ne bhi sunaaya apna haal
Guruji poochhte rahe
Rooh ke bhi bhaav bahe.

Guruji ke sawaalon mein thi gehraayee
Rooh ke har bhaav mein thi sachchaayee
Kuch aisee thi Unkee baat cheet
Jisne Guruji ka dil liya jeet.

Kaun hai re tu?
Mai hoon ik rooh.
Kaisa chal raha hai safar?
Aapki intazaar mein raha hai guzar.
Jaana hai tujhe kahaan?
Aap le jaayein jahaan.

Tu kyun hai tadpi?
Kyunki Aapse bichhdi.
Kya hai tera kissa?
Mai hoon Aapka hissa.

Tera roop ya rangg dikhe nahin?
Jaise Aap rakhein vahee sahi.
Tere mere rishte ka kya hai charitra?
Ek yahee rishta toh hai pavitra.
Tu hai meri apni, o pyaari!
Haan, mai hoon Aapki raj dulaari.

Kya hai teri fariyaad?
Mujhe deh kee kaid se keejiye azad
Arey, tu nahin mujhse duur!
Mai hoon Aapka hee noor.
Phir tu kyun na muskuraaye?
Aapse bichhoda saha na jaaye.

Mai sada hoon tere saath.
Shukrana, mere nath.
Tu nahin mujhse juda.
Jaanti hoon, Khuda.
Phir kyun soche tu hai adhoori?
Aap mein samaa kar hee mai poori.
Zaroor poori hogi teri kahaani.
Paramatama, Aapki bahut meharbaani.

🌹🌹🌹🌹🌹🌹🌹

Jai Guruji 🙏🙏
Dhirja

Guftagoo (02/07/2026)

February 6, 2026

Om Namaha Shivaya
Aaj Ka Suvichaar 🙏🏻🙏🏻

#2910

              Chali Chali Mai Sakhi

Chali chali mai sakhi
Guru pritam ke paas
Tum mere liye
Na hona udaas.

Guruji ke paas
Mai khush rahoongi
Guruji ko dekh
Prem bhaav mein bahoongi.

Agar mere bin veeraan hua tumhaara mann
Toh tum meri khushi par hona prasann
Uss prasannata se tumhaara mann bhi jaayega khil
Tumhe meri khushi mein khushi jaayegi mil.

Abb jo Guruji ne mujhe liya hai pukaar
Mai hoon Unhe milne ke liye aur bhi bekaraar
Saha na jaaye abb aur intazaar
Beshak chodna hai ye sansaar.

Kyunki asal sansaar hai Guruji ke charan mein
Buss, ye astitva mera, samaa jaaye Unkee sharan mein
Mai mai na rahoon, yoon ho jaaoon Unhee kee
Meri ichcha kaafi nahin, chahiye Unkee manzoori bhi.

Sakhi, tumhaare duniyavi sangg ka dhanyawaad
Tumne diya mere ruhaani safar mein mera saath
Dil se nikal rahi hai tumhaare liye fariyaad
Ki Guruji kee kripa se ho tumhaara ghar parivaar aabaad.

🌹🌹🌹🌹🌹🌹🌹

Jai Guruji 🙏🙏
Dhirja

Chali Chali Mai Sakhi (02/06/2026)

February 5, 2026

Om Namaha Shivaya
Aaj Ka Suvichaar 🙏🏻🙏🏻

#2909

         Tumhaare Chehre Ka Rangg

Kehta hai tumhaare chehre ka rangg
Ki Guruji Hain tumhaare angg sangg
Bataa raha hai tumhaara noor
Ki Guruji se tum nahin ho duur.

Sandesh de rahi hai tumhaari muskuraahat
Ki tum sunn paa rahe ho Guruji ke kadmon kee aahat
Ailaan kar rahi hai tumhaare shareer kee kampan
Ki tumhe mehsoos ho raha hai Guruji ka divya spandan.

Bayaan kar rahi hai tumhaari uttam oorja
Ki tumhe raas aa rahi hai Guruji kee pooja
Dikh rahi hai tumhaari aankhon mein vo bhavna
Ki tumhe Guruji ko paane kee hai kaamna.

Dheere se gungunaa rahe ho tum jo dhun
Usmein paigaam hai tum Guruji mein ho gumm
Tumhaare hriday mein jo divya jyot ka deeya hai
Vo bol raha hai ki tumne Guruji ke naam ka amrit piya hai.

Zaahir kar rahe hain naman mein judey huey tumhaare haath
Ki tum maang rahe ho Guruji ka satat saath
Khushi se gaa raha hai tumhaara kann kann
Ki tum Guruji ko kar chukey ho sarvsamarpan.

Anmol hai tumhaare naynon kee bhaasha
Jismein basee hai Guruji mein samaane kee abhilaasha
Poochh rahi hai shaayad tumhaari rooh kee pyaas
Ki kabb bulaayenge tumhe Prabhu Apne paas.

🌹🌹🌹🌹🌹🌹🌹

Jai Guruji 🙏🙏
Dhirja

Tumhaare Chehre Ka Rangg (02/05/2026)

February 4, 2026

Om Namaha Shivaya
Aaj Ka Suvichaar 🙏🏻🙏🏻

#2908

Maang Lein Kshama

Shukrana karne ke saath saath
Guruji se maang lein kshama
Na jaane phir mauka miley ya nahin
Tez raftaar se beeta jaa raha hai samaa.

Mann, shareer, ya vaani se
Jaane anjaane mein har din
Kitne dosh ho jaate hongei
Ye kaun sakta hai gin?

In doshon se mil sakey mukti
Kshama yachna hai iskee yukti
Aur kshama maang kar baar baar
Kumm hota jaayega ahankar.

Guruji Hain paatra kripa ke, insaan paatra bhool ka
Itna nimaana ki insaan se ooncha ohda hai dhool ka
Guruji kee kripa se kshama paa le das
Toh ye swayam mein hee ashirwaad hai bahut khaas.

Kshama yachna se Guruji ko sarvsamarpan karne mein miley madad
Isliye bhi kshama maangni zaroori hai satat
Ye hai Unkee sharan mein rehne kee ichcha ka prateek
Ye laata hai bhakt ko Guruji ke aur bhi kareeb.

Kshama maangne mein koi haani nahin
Balki ismein laabh hai das ka sada
Apne hee kalyaan ke liye
Kyun na seekh lein kshama maangne kee ada.

Pooja mein, aur pooja ke pehle aur baad
Guruji se karein fariyaad
Ki Ve hamein kshama karte chalein
Aur Apni kripa se sabki jholi bharein.

🌹🌹🌹🌹🌹🌹🌹

Jai Guruji 🙏🙏
Dhirja

Maang Lein Kshama (02/04/2026)

February 3, 2026

Om Namaha Shivaya
Aaj Ka Suvichaar 🙏🏻🙏🏻

#2907

             Saralmati Ik Daasi Thi

Saralmati ik daasi thi
Sachche pyaar kee vo pyaasi thi
Daasi thi anjaan
Uska dil naadaan
Na paayi vo jaan
Ki ye jahaan
Na hai asal aashiyan
Ki adhoori hai dastaan
Bin pahunche vahaan
Jahaan hai gireban
Kyunki Guru Govind Hain vahaan
Sambhaale huey uskee jaan
Dikhaate huey usey Apne kadmon ke nishan
Taaki vo bhi chale vahaan
Guruji le jaana chaahte Hain jahaan
Hokar uspar meharbaan.

Guruji kee hui daasi par meher
Uske jeevan mein aayi subuddhi kee seher
Aur jabb usey aayi samajh
Har duvidha gayi sulajh
‘Guruji Guruji’ karti hui
Pyaase pyaale mein Unka amrit bharti hui
Daasi hui Guruji kee hee deewani
Vo jo thi naadaan nimaani
Vo bann gayi sayaani
Chod kar har reet puraani.

Nayi soch se isee janam mein
Shuru hua maano naya jeevan
Har pal ujjwal
Har pal taral.

Saara samaa
Guruji mein ramaa
Guzarta gaya
Paakar Unkee daya.

🌹🌹🌹🌹🌹🌹🌹

Jai Guruji 🙏🙏
Dhirja

Saralmati Ik Daasi Thi (02/03/2026)

February 1, 2026

Om Namaha Shivaya
Aaj Ka Suvichaar 🙏🏻🙏🏻

#2905

                  Bhakt Kee Baatein

Bhakti kee baatein
Bhakt aur Guruji hee jaanein
Guruji antaryami Hain
Har bhakt kee bhakti pehchaanein.

Unse kuch bhi chhipa nahin
Unke samaksh koi raaz nahin
Bhakt bhi ho jis bhaav se anjaan
Guruji toh vo bhaav bhi lete Hain jaan.

Bhakt jis bhaav ko na kar paaye bayaan
Guruji ko toh ho jaata hai uska bhi gyan
Aakhirkaar Ve swayam Hain Bhagwaan
Jo dharti par aaye karne kalyaan
Poore jahaan ka
Lekar roop insaan ka.

Guruji kee leela bhakton kee samajh ke paar hai
Aur Guruji ko Apne har bhakt se behad pyaar hai
Bhakt apni pyaar bhari bholi bhakti ke siwa Guruji ko kuch dene ke kaabil nahin.

Guruji Brahmand ke raja Hain
Aur jo bhakt bann paaye Unka das
Unke charnon mein uss das kee
Poori hogi asal sukh kee aas.

🌹🌹🌹🌹🌹🌹🌹

Jai Guruji 🙏🙏
Dhirja

Bhakt Kee Baatein (02/01/2026)

January 31, 2026

Om Namaha Shivaya
Aaj Ka Suvichaar 🙏🏻🙏🏻

#2904

    Shant Honei Do…

Shhhh… shant honei do shor bheetar ka
Ye bhi ek kadam hai tumhaari atma ke safar ka
Zaroori hai lena ye kadam
Agar sanvaarna hai janam maran
Iske liye SadaShiv ne dee hai tumhe Apni sharan
Tum abb na ganvaao ek bhi aur kshan.

Na jaane kabb se ashant hai mann
Kintu abb jo Guruji ne tumhe bakhsha hai simran
Tum simran ke saagar mein doob kar gehra honei do manan
Sudhaarte chalo jeevan kar ke Guruji ka chintan.

Badhta chalega inse tumhaara manobal
Pehle pehle mann shant honei lagega kuch hee pal
Aise pal badhte jaayenge jaise jaise aayega kal
Aur mann zyada shant rehne mein honei lagega safal.

Shant aur sthir mann
Ye hai vo dhan
Jo tumhe sehejta se rehna sikhaayega
Aur ruhaani safar mein aagey le jaayega.

Guruji kee kripa se ye hai bilkul mumkin
Isliye Unse ardaas karo tum raat aur din
Ve hee karte Hain har bhakt ke mann ke bartan ko tayyaar
Unkee daya se hee bhakt kar paata hai parivartan ko sweekaar.

Ye toh hai nishchit
Ki uss parivartan mein hai hitt
Jo hota hai Guruji kee marzi aur agya se
Aise Guru milte Hain bade bhaagya se.

Tum koshish karo apni oar se
Guruji dekh rahe Hain tumhe gaur se
Guruji se karte chalo har pal ardaas
Ki safal ho Unse judey rehne ka tumhaara prayaas.

Tumhaara shant aur sthir mann
Bann jaayega aisa upvan
Jismein vaas karega Guruji ka ruhaani spandan
Aur dhanya ho jaayega tumhaara jeevan.

🌹🌹🌹🌹🌹🌹🌹

Jai Guruji 🙏🙏
Dhirja

Shant Honei Do… (01/31/2026)

January 30, 2026

Om Namaha Shivaya
Aaj Ka Suvichaar 🙏🏻🙏🏻

#2903

                  Divya Ashirwaad

Guruji ke naam ka amrit chakh le
Guruji ka langar prasad chhak le
Har boond, har nivaale ke sangg
Nikharta jaayega teri rooh ka rangg.

Ye nahin hain mehez jal aur bhojan
Ye karte hain rooh ka poshan
Besharte unhe tu kar shraddha bhaav se grahan
Bin laaye mann mein koi ahem ya vehem.

Guruji ke amrit aur langar prasad kee shakti hai mahaan
Guruji ke kripa se ye de sakte hain jeevan daan
Bakhsh kar grahan karne wale ko
Guruji karte hain tann, mann, aur rooh ka kalyaan.

Na karna is amrit ya langar prasad ka apmaan
Inko apne liye aushadhi tu jaan aur maan
Inhe grahan karte samay Guruji ko karta chal yaad
Guruji pirote Hain inmein tere liye Apna divya ashirwaad.

🌹🌹🌹🌹🌹🌹🌹

Jai Guruji 🙏🙏
Dhirja

Divya Ashirwaad (01/30/2026)

January 29, 2026

Om Namaha Shivaya
Aaj Ka Suvichaar 🙏🏻🙏🏻

#2902

Raasta Tujhe Raha Hai Pukaar

Raasta tujhe raha hai pukaar
Manzil kar rahi hai tera intazaar
Tere maargdarshak Hain swayam Guruji kirpadhaar
Tu chal toh sahi, Ve denge tujhe taar.

Raaste mein kaante aur phool dono ke honei kee sambhaavana hai
Par Guruji angg sangg hongei, ye sabse badi saantvanaa hai
Bin Guru ke raaste mein savera hotey huey bhi hai andhera
Kintu Guruji angg sangg hon, toh andhere mein bhi tere liye hoga savera.

Savera, chetna ka
Savera, prerna ka
Sabr ka savera
Santosh ka savera
Duur hoga har andhera
Kalyaan hoga tera.

Sooraj ko agley savere ke liye aaj dhalna hoga
Tujhe kalyaan ke savere ke liye aagey chalna hoga
Raasta Guruji ne dikhaaya hai, Ve hee karaayenge tayy
Tu Unhe sarvsamarpan kar ke tyaag de har bhayy.

Raasta tayy hoga zaroor
Chalta chal, tu chalta chal
Tu manzil takk pahunchega
Awashya aayega vo kal.

🌹🌹🌹🌹🌹🌹🌹

Jai Guruji 🙏🙏
Dhirja

Raasta Tujhe Raha Hai Pukaar (01/29/2026)