Aaj Ka Suvichaar

September 5, 2023

Om Namaha Shivaya
Aaj Ka Suvichaar 🙏🏻🙏🏻

#2025

        Mere Maan-neeya Murshid

Murshid mere, shukrana Aapka baarambaar
Aapne sweekaara mujhe aur diya hai itna pyaar
Shiv avatari Guruji shikshak ke swaroop mein mujhe mil gaye
Meri khushnaseebi ke toh dwaar hee khul gaye.

Pyaare Guruji, Aap aayojit karte Hain satsang kee paathshaala
Aapki anumati se hee aata har chhatr vahaan
Gurbani aur Aapki mahima ke gungaan dwaara
Miltee hai sabhi ko shiksha vahaan.

Bin pravachan ke Aapne jeene ka raasta hai dikhaaya
Duniya ke mele mein mujhe mera kartavya samjhaaya
Aradhana mein bhakti bhaav ka mahatva sikhaaya
Aur har din ye sab yaad dilaaya.

Itne prem se simran aur dhyan dwaara
Aap dete Hain shiksha aur prerna
Seedhi taar judi rehti hai Aapse
Jis se Aapke chintan mein magn rehti hai chetna.

Sewa bakhsh kar mauka dete Hain Aap paap dhonei ka
Mantra dwaara avsar dete Hain Aap mein khonei ka
Ruhaani rahnuma kahoon ya adhyaapak adhyaatmik
Aapki daya se jeevan banaa hai sakaaraatmak.

Shiv Puran ka paath padhaaya Aapne
Jismein Apne Shiv Swaroop ka ehsaas dilaaya Aapne
Aapke har satsang mein milta hai gyan aur ashirwaad
Jis se is shishya ka antas hota hai aabaad.

Aapki sharan mein aakar mila Aapka maargdarshan
Saboori aur shraddha badhi, saaf honei lagaa mann ka darpan
Apni khaamiyon aur naadaaniyon kee oar badhne lagi jaagriti
Paripakva honei lagi duniya aur swayam ko dekhne ke nazariye kee aakriti.

Aap nirantar sikhaate Hain insaan bann-ne ka hunar
Bataate Hain ki ibadat ke bin adhoora hai ye safar
Abhi toh anekon paashon mein bandhi hoon
Aap hee kripa kar keejiyega unse azad
Galatiyan bhi hoti rehti hain mujhse yakeenan
Kshama karte rahiyega, hai meri Aapse fariyaad.

Abhi toh bahut kuch seekhna baaki hai, jaanti hoon
Kayi janam bhi lagg sakte hain, ye bhi maanti hoon
Aapki mehar se chalti jaaoon sahi disha mein
Aapke gyan ka noor mujhe savera dikhaaye agyan kee nisha mein.

Aap toh Hain gyan ka mahasaagar
Jiskee ek boond se hee mai tarr jaaoon
Aisa hai prataap Aapka, Guruvar
Shukrana ki Aapne bakhsha hai gyan ka ye safar.

Is shishya ko dete rahiyega daasi baney rehne ka avsar
Mamta bhaav se ‘bachchi’ kehkar bulaate rahiyega Apne dar par
Nimaani hoon, naadaan hoon
Goodh gyan na aaye, anjaan hoon
Jaanti hoon buss itna ki Aap mein ramna chaahoon
Maanti hoon ki jo karna chaahoon, vo aksar na kar paaoon.

Deejiye kaabiliyat
Deejiye himmat
Deejiye shakti aur gyan
Deejiye bhakti ka daan.

Shikshak Divas ke utsav par Aapko shat shat naman
Aapke gyan bhavan mein meri saari matt hai arpan
Vahee sochoon aur vahee karoon, jo aur jaisa Aap chaahein
Mere maan-neeya murshid, kripa kar thaame rehna is cheli kee baahein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mere Maan-neeya Murshid (09/05/2023)

September 4, 2023

Om Namaha Shivaya
Aaj Ka Suvichaar 🙏🏻🙏🏻

#2023

                   Sukh Ka Dhaam

Leta chal tu Guruji ka naam
Mil jaayega bheetar hee sukh ka dhaam
Jahaan Guruji swayam rahenge viraajmaan
Aur karte rahenge tera kalyaan.

Guruji ke naam mein hai tera hitt
Shant hota jaayega chitt
Aisee spashtata aur shuddhi aayegi
Ki tera har sanshay jaayega mitt.

Guruji ka naam dega tujhe shakti
Nikhaarega teri bhakti
Banega teri santushti kee yukti
Teri taakat banegi tripti.

Guruji ka naam roshan karta rahega tera raasta
Is naam ke sahaare akhand ho jaayegi teri Guruji mein aastha
Teri ye aastha tujhe Guru kripa se bahut aagey takk le jaayegi
Teri yaatra aur teri manzil mein chaar chaand lagaayegi.

Tere bheetar buss jaayega sukh ka dhaam
Veh hoga nirantar simran aur dhyan ka sthaan
Jahaan har pal goonjega Guruji ka naam
Jismein ramm kar tarr jaayenge tere praan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sukh Ka Dhaam (09/04/2023)

September 3, 2023

Om Namaha Shivaya
Aaj Ka Suvichaar 🙏🏻🙏🏻

#2023

               Antas Kee Rasna

Jabb raaste mein mai gir jaati hoon
Jabb niraasha se mai ghir jaati hoon
Mere Guruji pyaare mujhe uthaate Hain
Asha ka deep dikhaate Hain.

Jabb aankhein gumm se hoti hain numm
Jabb tootne lagta hai mann ka sanyam
Guruji mujhe dheeraj bandhaate Hain
Aankhon se muskuraana sikhaate Hain.

Jabb sulajhti nahin mujhse uljhan
Jabb dhundhla lagta hai dukh sukh ka sangam
Guruji jeevan kee nashwarta yaad dilaate Hain
Har haalaat mein chalna sikhaate Hain.

Jabb mushkil lagta hai simran
Jabb dhyan nahin kar paata mann
Guruji prerit kar kendrit karaate Hain
Prayaas ko sweekar kar ashish barsaate Hain.

Jabb baith-ti hoon Guruji ke charnon mein
Jabb Unse baat karti hoon unn lamhon mein
Guruji Apni mamta kee chaadar bichhaate Hain
Baaton baaton mein itna kuch samjhaate Hain.

Jabb jabb karti hoon Guruji ka dhanyawaad
Jabb bhi chhakti hoon Unka diya langar prasad
Badhti jaati hai Guruji se meri preet
Mere antas kee rasna gaati hai Guru stavan ke geet.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Antas Kee Rasna (09/03/2023)

September 2, 2023

Om Namaha Shivaya
Aaj Ka Suvichaar 🙏🏻🙏🏻

#2022

                  Bijlee Aur Barsaat

Dekho dekho bijlee chamak rahi hai
Barsaat ke aane kee khabar isne kahi hai
Is barsaat mein hai amrit Guruji kee mehar ka
Ye barsaat intazaar na karegi aane wale pehar ka
Bijlee kee chamak mein hai Guruji ka noor, pyaare
Is se mit jaayenge gumm ke andhere saare.

Guruji kee mehar nahin hoti maamooli daat
Har bhakt ke liye hai veh sabse badi baat
Isliye bijlee ko na samjho kewal vidyut kee dhaara
Unkee mehar har bhakt ka hai sampoorna sahaara.

Is mehar kee barsaat ke bhinn bhinn hain roop
Kabhi ye laaye chhaaon kabhi kadak dhoop
Kabhi lagey ho jaaye ek pal mein
Kabhi chhipi ho vilamb roopi aane wale kal mein.

Beshak kaheen lagey kumm, kaheen ho moosalaadhaar
Is baarish kee har boond karegi bhakton ka uddhaar
Bijlee aur baarish se dhanya hoga sabhi bhakton ka ghar parivaar
Is bijlee aur baarish mein samaaya hai Guruji ka aseem pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bijlee Aur Barsaat (09/02/2023)

September 1, 2023

Om Namaha Shivaya
Aaj Ka Suvichaar 🙏🏻🙏🏻

#2021

  Jabb Se Guruji Ne Hai Sweekaara

Komal pyaar mila
Baarambaar mila
Bhole bhandari Guruji se
Daya bhara deedar mila
Parwardigaar mila
Shiv avatari Guruji mein.

Honei lagaa kamzoriyon ka ehsaas
Simran mein ramne lagaa shwaas
Guruji ne liya jabb se sharan mein
Roam roam bann gaya Guru ka das
Antas mein hua Guruji ka vaas
Guruji ne sweekaara jo Apne charan mein.

Andhera mitne lagaa
Prakash dikhne lagaa
Jabb bheetar jyot jali Guruji ke naam kee
Jaise jaise uljhanein gayin sulajh
Kuch kuch aane lagaa samajh
Jabb atma ko raah milee Guruji ke dhaam kee.

Hota raha uddhaar
Anugrahit hua ghar parivaar
Guruji ke langar prasad se
Utarne lagaa karmon ka bhaar
Khulta gaya ruhaaniyat ka dwaar
Guruji ke ashirwaad se.

Shant hua mann
Dhanya hua har veh kshan
Jabb Guruji ko yaad kiya aur pukaara
Tarne laga hai antarmann
Sanvarne lagaa hai jeevan
Jabb se Guruji ne hai sweekaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jabb Se Guruji Ne Hai Sweekaara (09/01/2023)

August 31, 2023

Om Namaha Shivaya
Aaj Ka Suvichaar 🙏🏻🙏🏻

#2020

         Nagar Ka Ek Niwaasi Thaa

Nagar ka ek niwaasi thaa
Anya kayi niwaasiyon jaisa
Masroof rehta thaa kaarobaar mein
Vyast rehta thaa ghar parivaar mein.

Thaa safal, thaa honhaar
Nek thei uske vichaar
Phir bhi usey mehsoos honei lagi koi kamee
Ye baat uskee chinta ka kaaran banee.

Padh likh ke veh na seekh paaya vo
Jis vidya kee thee usey ichcha
Phir jaana usne ki vidya miltee hai apne bheetar
Jabb daya karte Hain Guruvar.

Karta rehta thaa pooja paath
Lekin mil nahin rahi thi maano usey rahnumaayee
Suna thaa Guru milte Hain kismat se
Aur Guru kee vaddi hoti hai vadiyaayee.

Kaise milenge Guru, usey na aa raha thaa samajh
Kahaan dhoondhe,kya karey, is duvidha mein raha thaa ulajh
Uske pichhle achche karmon ka mila usey parinaam
Guruji ne aakar liya uska haath thaam.

Utaar chadhaav toh aate rahe
Guruji usey raah dikhaate rahe
Veh Guruji ka simran aur chintan karta rehta Rakh kar mann mein poora vishwaas
Aur Guruji ke ashirwaad se
Uske bheetar vidya ka honei lagaa vaas.

Guruji mein rahnuma paakar sunehri hui uskee raahein
Guruji ne har pal pyaar se thaami uskee baahein
Jabb aaya kuch varsh pashchaat uska antim samaa
Tabb bhi Guruji ne usey Apne charnon mein dee panah.

Guruji ke dikhaaye raaste par veh pada thaa chal
Guruji kee kripa se utar chuka thaa uske mann ka mal
Guruji ke banaaye saanche mein veh poori tareh se gaya thaa dhal
Guruji kee kripa se uska jeena marna ho gaya safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nagar Ka Ek Niwaasi Thaa (08/31/2023)

August 30, 2023

Om Namaha Shivaya
Aaj Ka Suvichaar 🙏🏻🙏🏻

#2019

           Bandagi Ka Bandhan

Guruji ke sangg juda jabb se
Bandagi ka bandhan
Dil aabaad hua yoon tabb se
Maano utsaah se bhara upvan.

Na zaroorat kisee dhaage ya kisee doar kee
Na akeli lagi yaatra kisee sadak ya moad kee
Andhvishwaas aur vehem kee baadha mainey toad dee
Jabb se Guruji se preet mainey joad lee.

Yeh bandhan mere liye hai sarvashreshth vardaan
Is bandhan mein bandh kar milta rahega mujhe ek nayi azaadi ka daan
Guruji kar rahe Hain aur karte rahenge kalyaan
Unhonei is pavitra bandhan mein baandha hai, Ve Hain bahut meharbaan.

Ye bandhan hai raksha ka
Ye bandhan hai deeksha ka
Ye bandhan hai shiksha ka
Ye bandhan hai pareeksha ka.

Is bandhan kee shuddhi ko mera naman
Is bandhan kee nirmalta ko mera pranaam
Yeh bandhan hai sabse paawan aur pyaara
Yeh bandhan hai mera ekmaatra sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bandagi Ka Bandhan (08/30/2023)

August 29, 2023

Om Namaha Shivaya
Aaj Ka Suvichaar 🙏🏻🙏🏻

#2018

     Guruji Ke Kookar

Maalik aur paalatu kookar ke rishte mein
Vishwaas aur samarpan kitna zaroori hai
Kookar ke paas aur koi vikalp bhi kahaan
Maalik ka hukm maan lena uskee majboori hai.

Kyunki kookar toh hai apne maalik par nirbhar
Uske liye aisa ghar hai apne maalik ka dar
Jahaan miltee hai usey suraksha aur sharan
Tabhi toh veh choomta hai maalik ke charan.

Hum bhi toh hain Guruji ke kookar
Guruji par hain hum poori tareh se nirbhar
Guruji na apnaate hamein, toh hum phirte idhar udhar
Bin sahaare hum bhatakte rehte dar dar.

Kookar hain toh wafa nibhaani hogi
Samarpan kee bhavna bhi laani hogi
Raazi rehna hoga jo ho Guruji kee raza
Chaahe aaye ya na aaye maza.

Deen bhaav se kar sakte hain hum ardaas
Hum kookar ke roop mein kinkar
Hamein Guru amrit kee hai pyaas
Hamaare liye hamaare Maalik Hain sabse khaas.

Hamaare Maalik Guruji, deen dayal Hain
Unhe sada hamaara khayaal hai
Na jaane hum kabhi bhi kaise chukaayenge Unke ehsaanon ka karz
Kumm se kumm itna toh kar lein
Ki nibha lein Unkee oar apna farz.

Guruji ko khush rakhein dekar bharpoor pyaar
Unka hukm maanein sir jhukaakar har baar
Shukrguzaar rahein ki Guruji ne khola hai hamaare liye apna dwaar
Guruji aur Unkee rehmat se awashya hoga hamaara uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Kookar (08/29/2023)

August 28, 2023

Om Namaha Shivaya
Aaj Ka Suvichaar 🙏🏻🙏🏻

#2017

             Safal Hogi Teri Udaan

Guruji kee shakti se
Tu aaj bhar raha hai udaan
Har pal Guruji tere angg sangg Hain
Kar rahe Hain tera kalyaan.

Udaan mein bilkul na haarna tu himmat
Na chodna tu karna ibadat
Oopar jaate huey bhi mann se jhuke rehna
Guruji karte rahenge tujh par inaayat.

Aasmaan aseem hai lekin tu bilkul matt ghabraana
Kyunki uss se bhi anant aur prataapi hai Guruji ka gharaana
Jahaan ka tu hai bachcha pyaara
Guru kee goad mein khelta dulaara.

Tujhe milee hai Shivroopi Guru ke ashirwaad kee poonji
Yaad rakh, teri manzil hai bhautik gyan praapti se bhi oonchi
Prerit kar rahi hai tujhe divyata kee vadiyaayee
Ki tu chhoo le ruhaaniyat kee oonchaayee
Taaki tujhe praapt ho sthool aur sookshma gyan
Aur divya anugraha se safal ho teri udaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safal Hogi Teri Udaan (08/28/2023)

August 27, 2023

Om Namaha Shivaya
Aaj Ka Suvichaar 🙏🏻🙏🏻

#2016

   Guruji Kee Tasveer

Guruji kee photo nahin hai mehez ek tasveer
Vo toh hai Guruji ke divya anugraha se paripoorna ruhaani shareer
Uss tasveer mein Guruji nissandeh maujood rehte Hain
Bhakton kee sunte Hain aur bhakton se kehte Hain
Hum beshak Unhe chhoo na sakein tasveer mein
Lekin hamein praapt hota hai Unka sparsh aur ashirwaad
Aur Guruji daalte Hain hum par Apni mehar-e-nazar
Jo karti hai hamein agyan se azad.

Jabb se bhakt ko dekh leti hai Guruji kee tasveer
Tabb se toh badal hee jaati hai bhakt kee taqdeer
Sankat bhi bann jaata hai jeevan sudhaar ka mauka
Jeevan ka raasta bann jaata hai anokha.

Guruji saakshaat baste Hain Apni har tasveer mein
Tabhi toh tasveer le aati hai parivartan taqdeer mein
Na karo tasveer mein Guruji se kewal kashton ka bayaan
Unke samaksh karo Unkee mahima ka gungaan.

Kuch na bhi keh sako toh Unhe dekho prem satkaar se
Ve toh waakif Hain tumhaare har vichaar se
Agar kabhi tum itne pareshaan ho ki kar hee nahin sakte Unse baat
Toh bhi Ve Apni tasveer se tumhe har tareh kee sahaanubhooti kee denge daat.

Ve Guru Govind Hain, aur nath bhi
Ve agochar bhi Hain, aur saakshaat aur saath bhi
Ve daant bhi dete Hain, aur dete Hain mamta aur laad bhi
Ve imtehaan bhi lete Hain, aur dete Hain ashirwaad bhi.

Guruji se seedhi taar jod kar
Apne mann ko baaki sab se moad kar
Apne kar shraddha se jod kar
Unhee par sab kuch chod kar….

Apna pyaar dikhaao
Unhe dil kee har baat bataao
Unhe geet sunaao
Unhee mein kho jaao.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Tasveer (08/27/2023)