Aaj Ka Suvichaar

June 8, 2020

Om Namaha Shivaya
Aaj Ka Suvichaar 🙏🏻🙏🏻 # 841

         Guruji Ke Achche Bachche

Jabb jeevan mein saralta aayegi
Vyavhaar mein taralta aayegi
Vichaar mein nirmaltaa aayegi
Toh Guruji ko yeh unnati bahut bhaayegi

Jabb niswaarth hoga simran
Jabb divyataa par kendrit hoga manan
Jabb har pal hoga Prabhu ka smaran
Toh Guruji ko kitna uchit lagega yeh jatan

Jabb mann mein sabke liye hogi sadbhavna
Jabb niswaarth sewa karne kee hogi kaamna
Jabb sadaa satya ka saath dene kee hogi shakhsiyat aur bhavna
Tabb Guruji ke ashish se hum kar sakenge kalyuga ka saamna

Jabb apna kartavya hum nek neeyat se nibhaayenge
Jabb kusangati aur kukarmon se hum duur reh paayenge
Jabb vikaaron ko tyaag kar hum sahi raaste par kadam badhaayenge
Tabb Guruji ko hamaare jeene ke dhangg pasand aayenge

Jabb mann mein hoga Guruji par poora vishwaas
Jabb duniyavi aakarshan na aayenge hamein raas
Jabb Guruji ko paane ke alaawa na hogi aur koi bhi aas
Tabb Guruji ka pyaar prabal banaayega hamaara prayaas

Jabb aisa jeevan jeene lagenge hum
Jabb hamein ek sa lagega khushi aur gum
Jabb har shwaas ke sangg Guruji ka naam lene lagenge hum
Tabb Guruji ke achche bachche banenge hum

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 7, 2020

Om Namaha Shivaya
Aaj Ka Suvichaar 🙏🏻🙏🏻 # 840

                Mann Ka Aangan

Karmon ka anjaam hota hai bahut gehra
Kyunki Guruji ka sadaa rehta hai hum par pehra
Hamaari bhakti dekhte Hain Ve, toh hamaare karam bhi Unse chhipe nahin hai
Unhe bhi Ve dekh rahey Hain, jinke anuchit vichaar aur karam rukey nahin hai

Yeh jo hamaare mann ka aangan hai
Yeh tabb hee rahega hara bharaa
Jabb hum mein samaayega neevanpann
Jabb hamaara har vichaar hoga kharaa

Varna hamaare jaane bina hee
Janglee ghaas is aangan mein ug jaayegi
Aur samay beetne ke saath saath
Sundar phoolon kee upaj ruk jaayegi

Shaayad pehle pehle hamein fark na pade is parivartan ka
Lekin jabb hum dekhenge roop rangg apne dil ke darpan ka
Toh swayam par aayegi sharam
Ki kyun humne kiye bure karam

Kyun na achchi soch aur achche karmon kee khushboo se
Mehekaayein apne mann kee bagiya ke phool
Is bagiya kee salaamati hamaare karmon se hai
Yeh hum kabhi bhi na jaayein bhool

Kyun na mann ke is anokhe aangan mein
Vichaar roopi suman ugne dein saral pyaar ke
Jinhe prem se choomte rahein
Jhonkei khushnumaa bahaar ke

Mann mein phir hogi sheetalta
Atma mein hogi nirmaltaa
Charitra mein hogi komaltaa
Guruji ko bhaa jaayegi yeh saraltaa

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 6, 2020

Om Namaha Shivaya
Aaj Ka Suvichaar 🙏🏻🙏🏻 # 839

          Jeena Safal Ho Jaayega

Na jaane hum mein se kaun kab toad dega dumm
Prabhu ke haath mein hai doar jinkee, ve katputliyaan hain hum
Jaise atmasaat karte hain khushi, vaise hee graas kar lein gumm
Toh jeena safal ho jaayega

Apni kamzoriyon par karein kaam
Har pal karein smaran Guruji ka naam
Chaahe ho subah, chaahe ho shaam
Toh jeena safal ho jaayega

Nakaraatmak prabhaav se na bigaadein apni zindagi
Na-insaafi ke khilaaf awaaz uthaane mein na ho sharmindagi
Bharose kee buniyaad par ho apni bandagi
Toh jeena safal ho jaayega

Antarmann ko saaf rakhein
Apne zameer kee raksha karein
Zarooratmand kee madad karne se na darein
Toh jeena safal ho jaayega

Baahari cheezon aur logon se judne ke bajaaye
Bheetar kee ruhaani yaatra par gaur farmaayein
Divyataa se hee judte jaayein
Toh jeena safal ho jaayega

Hamaari ruhaani pragati ke liye jo bhi anuchit ho, usey chod dein
Saare vikaaron se bilkul muh moad lein
Sarvsamarpan kar ke chinta kee bediyaan toad dein
Toh jeena safal ho jaayega

Sewa, simran, aur satya ka sangg karein
Sachchaayee aur neki ka saath dene se na darein
Guruji ke divya gyan se atma kee tijori bharein
Toh jeena safal ho jaayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 5, 2020

Om Namaha Shivaya
Aaj Ka Suvichaar 🙏🏻🙏🏻 # 838

                   Guru Praapti

Jisey kewal Guru praapti kee hai abhilaasha
Vahee sachche Guru bhakt kee hai paribhaasha
Phir kabhi bhi na hogi niraasha
Aur Guruji ko bhi humse yahee hai asha

Guru praapti hee toh hai asal dhan
Jis se har janam ke liye tarr jaata hai mann
Guru praapti ke baad rahegi nahin aur koi bhi chaahat
Mann kee veena bajegi sunkar Guruji ke kadmon kee aahat

Kyunki Guruji hameshaan hongei angg sangg
Unkee bhakti se sajega ruhaani rangoli ka rangg
Guru praapti se saada ho jaayega jeene ka dhangg
Aur har pal dil mein hogi divyataa kee umang

Guru praapti mein Parwardigaar ka pyaar hai
Guru praapti mein bandagi kee bahaar hai
Guru praapti mein sadhna ka sansaar hai
Guru praapti sarvottam uphaar hai

Guru praapti se jeevan bann jaayega simran
Guru praapti se har pal hoga Guruji ka manan
Guru praapti se hoga MahaShiv se divya deedar
Guru praapti se tu kar lega bhavsaagar ko paar

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 4, 2020

Om Namaha Shivaya
Aaj Ka Suvichaar 🙏🏻🙏🏻 # 837

            Yeh Guruji Ka Darbar Hai

Prem ka mahasaagar hai ye
Iskee har boond mein pyaar hai
Mamta kee gaagar hai ye
Yeh Guruji ka darbar hai

Yahaan har koi hai ek samaan
Aur Guruji Hain sabke Bhagwaan
Yahaan koi khareedna bechna nahin chalta
Yahaan ummeed ka sooraj kabhi nahin dhalta

Yahaan dukh ke baadal kee bhi noorani kinaari hai
Yahaan vishwaas kee indhan par chalti sabki gaadi hai
Yahaan kuch bhi Guruji se chhupta nahin
Yahaan kisee ka kalyaan rukta nahin

Yahaan Guruji aish karaate Hain
Yahaan Ve hamein banda banaate Hain
Yahaan Guruji karam katvaate Hain
Yahaan Ve satsang karvaate Hain

Yahaan Guruji simran kee deeksha dete Hain
Sewa aur samarpan kee shiksha dete Hain
Yahaan soye bhaag jagg jaate hain
Yahaan bhoole vaapis ghar aate hain

Yahaan judti Guruji se seedhi taar hai
Yahaan anmol saugatein beshumaar hain
Yahaan goonjtaa shukrana baarambaar hai
Yeh Guruji ka darbar hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 3, 2020

Om Namaha Shivaya
Aaj Ka Suvichaar 🙏🏻🙏🏻 # 836

         Yeh Saal aur Hamaari Nazar

Yeh saal hai 2020
Nipun nazar bhi hoti hai 20/20
Kyun na Guruji kee kripa se
Apni ruhaani nazar ko kar lein nafees

Chalein hum Guruji ke dikhaaye huey raaste par
Taaki nazar ke saath saath rooh bhi tarr jaaye
Abhi toh nazar kee kshamta kamzor hai
Is raaste par chalkar veh kshamta badh jaaye

Duniya aur duniyaadaari bhi nazar aane lagey saaf saaf
Aur nazar mein karuna laakar kar dein hum doojon ko maaf
Khud bhi maafi maang lein apne gunaahon kee
Safaai kar lein zindagi kee raahon kee

Nazar ko khoobsoorat banaa lein Guruji kee sadhna se
Nazar mein aur bhi neevanpann sajaa lein Unkee aradhana se
Aankhein khuli hon toh divya roshni nazar aaye
Aur bandd aankhon mein bhi divyataa hee samaaye

Duniya ka aslee chehra saaf nazar aayega
Aur Guruji kee praapti ka raasta bhi dikh jaayega
Aagey ka faisla hamein hee lena hai
Duniyadari mein phansna hai ya har shwaas simran ko dena hai

Jitna simran karenge hum
Ruhaani nazar aur bhi paripoorna hogi
Guruji kee aseem kripa aur hamaari nek neeyat se
Guru praapti kee ichchaa poorna hogi

Har pal swayam mein koi shiksha lekar aata hai
Na seekhein tabb toh veh pal guzar jaata hai
2020 toh samay hai ek poore saal ka
Shaayad ismein ho jawaab hamaare kisee sawaal ka

Isliye 2020 ko na samjhein kewal beet jaane wala varsh
Balki is se apni nazar sarvottam kar ke anubhav kar lein harsh
Aur nipun nazar se apna drishtikoan nek kar lein
Apne ruhaani naynon mein divyataa ka nishkalank noor bhar lein

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 2, 2020

Om Namaha Shivaya
Aaj Ka Suvichaar 🙏🏻🙏🏻 # 835

  Adhyatmik Yaatra Guruji Ke Sangg

Adhyatmik yaatra hai ye Guruji ke sangg
Iska rakhein hum ruhaani rangg
Ye nahin hai bhaag daud ya kisee muqable ka safar
Iska toh hona chahiye atma par changaa asar

Sewa ho niswaarth aur nishkapat
Na jaana kisee bhi lobh mein atak
Chaahe lobh ho yash ka ya dhan ka
Uss se santulan bigataa hai mann ka

Santulan bigadne se nahin milegi shanti
Yash, dhan, bheed mil jaayegi magar na milegi atma kee kanti
Is kanti ke bina antar-mann ujjwal na ho paayega
Jis waqt mein hum simran kar sakte thei, veh waqt vyarth ho jaayega

Tyaag dein lobh, irshya, jhooth, kaam, krodh
Chod dein apne bhaley ke liye moh, ahem, aur pratishodh
Ruhaaniyat mein rooh ko rass lene dein
Divyataa ko dil mein buss lene dein

Guruji kee kripa se pahunch jaayein adhyatmik shikhar par
Baaki saare shikhar toh ek din reh jaayenge bikhar kar
Sach mein agar hamein Guruji ko paana hai
Toh saadagi aur sadaachaari ka vaada nibhaana hai

Guruji kee praapti ko kiran-kendra banaayein
Apne mann ko bhakti ke shringaar se sajaayein
Is se yaatra ka nirmal anand aayega
Aur yaatri satchittanand ko paayega

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 1, 2020

Om Namaha Shivaya
Aaj Ka Suvichaar 🙏🏻🙏🏻 # 834

                Aapse Hee

Pyaare Guruji,

Aapse hee ghar baar hamaara
Aapse hee parivaar
Aapse hee sukh chayyn hamaara
Aapse hee sansaar

Aapse hee har chehre kee muskaan
Aapse hee poore hotey hain armaan
Aapse hee hai himmat miltee
Aapse hee milta hai imaan

Aapse hee ruhaaniyat
Aapse hee insaaniyat
Aapse hee aamod ka aagaman
Aapse hee shudh aacharan

Aap hee bhakt ko ahankaar kee aag mein jalne se bachaayein
Aap hee is aag ko apne prem aur apne devatva se bujhaayein
Aapke aagey toh naman karein aandhi, tufaan, aur hawaayein
Aapke aagey saari nakaaraatmak shaktiyaan jhuk jaayein

Aapse hee bhakton ka atma-vishwaas hai
Aapse hee hamaara banda bann-ne ka prayaas hai
Aapse hee har taraf Ishwar ka ehsaas hai
Aapse hee dil mein divyataa ka vaas hai

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 31, 2020

Om Namaha Shivaya
Aaj Ka Suvichaar 🙏🏻🙏🏻 # 833

 Arpit Karein Shradhanjali

Girne lagenge hum, toh hamein uthaayenge Guruji
Roney lagenge hum, toh mukh par muskuraahat laayenge Guruji
Jab bhi hum pukaarenge, zaroor aayenge Guruji
Kyunki Guruji yaheen Hain, hamaare angg sangg

Bhatakne lagenge hum, toh raasta dikhaayenge Guruji
Kadam na badhe hamaare, toh chalna sikhaayenge Guruji
Zindagi bikhar jaaye, toh naye sire se kahaani likhwaayenge Guruji
Kyunki Guruji yaheen Hain, hamaare angg sangg

Bashar roop mein nahin Hain Guruji toh kya hua
Hum sab par har pal amrit bann kar baras rahi hai Unkee dua
Unka ashirwaad hai har rogi kee divya dawaa
Unkee maujoodagi ka sandesh deti hai ye hawaa

Unke nirankaar roop ko hum maanein
Unke niraakar roop ko hum pehchaanein
Unkee ruhaani khushboo ko mehsoos karein
Unkee kripa se apni jholi bharein

Guruji yaheen Hain, hum sabke paas
Kitna sukhdayee hai yeh ehsaas
Ve samajhte Hain hamaare dil kee baat, chaahe bolein ya na bolein hum
Ve jaante Hain hamaare mann kee dashaa, chaahe hamein khushi ho ya ho gumm

Seedhi taar judee rahei sadaa Guruji se
Yeh tamanna buss ho jaaye poori
Guruji se yeh pyaara aur anmol rishta banaa rahei
Buss, Unse kabhi bhi na ho duuri

Duniyavi manch par toh kirdaar badalte rahenge
Waqt kee behti dhaara ke sangg kuch rishte bhi bahenge
Guruji kee kripa se hum har utaar chadhaav ko sahenge
Guruji ne hee srishti banaayee aur Ve hee anant takk rahenge

MahaSamadhi lekar Guruji huey aur bhi prataapi aur shaktimaan
Devon Ke Dev Hain Ve, poori kaayinaat ke Bhagwaan
Aur koi kar nahin sakta jo hamaare Guruji kar sakte Hain
Tabhi toh bhaktjann Unkee mahima gaate nahin thakte Hain

Aaj ke din apne Guruji, apne Bhagwan ko
Aayiye arpit karein shradhanjali jhukakar apna sheesh
Guruji ke vachan bin tark vitark ke maanein
Aur shraddha se Shukrana kar ke lein hum Unka ashish

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 30, 2020

Om Namaha Shivaya
Aaj Ka Suvichaar 🙏🏻🙏🏻 # 832

         Aapki Mehar Kee Sehar

Pyaare Guruji,

Raaste ke kaante honei lagey kum
Aapki vinamr ibadat se
Khushi mein badal gaya gum
Aapki ibadat kee inaayat se

Har mushkil ka hal mil paaya
Aapke magn manan se
Dil mein bhakti ka noor khil paaya
Aapke sumangal smaran se

Bheetar ka darpan honei lagaa saaf
Aapki dee hui chetna se
Insaan insaan ko karne lagaa maaf
Aapki dee hui chetna kee prerna se

Aur bhi zyada ho jaaye hamaari bhakti
Aapke chandanmayi charan mein
Aur bhi zyada ho jaaye hamaari shakti
Aapki sheetal sharan mein

Dil se nikla dhanyawaad baarambaar
Aapki taraltaa aur nirmaltaa ke liye
Shukraguzaar hain hum Aapke
Aapki komalta aur saralta ke liye

Aapki kripa se har vehem duur ho
Aur atma-bal badh jaaye hamaara
Aapki karuna se ahem chuur ho
Aur antar-mann tarr jaaye hamaara

Raahein ujjwal hain ho gayeen
Aapki mahima aur mehar se
Abb toh roshni har taraf hai chhaa gayi
Aapki mehar kee sehar se

🌹🌹🌹🌹🌹🌹🌹

Jai Guruji 🙏🏻🙏🏻
Dhirja