Aaj Ka Suvichaar

March 6, 2026

Om Namaha Shivaya
Aaj Ka Suvichaar 🙏🏻🙏🏻

#2938

     Guruji Kee Hatheli Ka Sahaara

Guruji ka naam lete huey rahi thi mai chal
Unkee mehar se kitne kasht rahe thei tal
Jabb bhi girne lagi zameen par
Guruji ne Apni hatheli bichhaa kar mujhe bachaa liya
Varna shaayad adhoora hee khatam ho jaata safar
Lekin Guruji ne saanson ka daan deeya.

Apni hatheli par Guruji ne mere liye le liya zakham
Aur dayalu itne ki mujhe dekar mamta ka marham
Mera dard kar deeya itna kumm
Aur mai uth kar phir se badhaa paayi kadam.

Guruji kee hatheli hai itnee komal
Aur itnee prataapi aur nirmal
Ki Unke sparsh se kismat sakti hai badal
Unkee hatheli ka spandan hai ati-prabal.

Guruji kee hatheli ka sahaara
Iske bin mera nahin hai guzaara
Ismein nahin hai mujhe koi sanshay
Ki Guruji duur kar rahe Hain mera har bhayy.

Apni saari sangat kee raksha karte karte
Sabhi kee jholiyan bharte bharte
Guruji swayam par kitna kasht Hain lete
Aur sangat ko bharpoor ashirwaad Hain dete.

Jo bhi aata hai Guruji kee sharan mein
Usey aise anubhav aksar hotey hain jeevan mein
Aisa parivartan laate Hain Guruji sabki rooh aur tann mann mein
Ki bhakt jhuk jaata hai Unke kamal charan mein.

Unke kamal charan mein hee kalyaan hai
Unke charan kee sharan milna ati-uttam vardaan hai
Bahut khushnaseeb hai is vardaan ko paane wala
Kyunki SadaShiv roopi Guru Hai sabka rakhwala.

🌹🌹🌹🌹🌹🌹🌹

Jai Guruji 🙏🙏
Dhirja

Guruji Kee Hatheli Ka Sahaara (03/06/2026)

March 5, 2026

Om Namaha Shivaya
Aaj Ka Suvichaar 🙏🏻🙏🏻

#2937

Lambi Lagey Ya Lagey Pal Bhar Kee

Lambi lagey ya lagey pal bhar kee
Hawaa si hee hai ye zindagi
Kabhi hawaa ka halka sa jhonka
Kabhi halchal ya tufaan.

Jhonka meetha sa ho toh deta hai sukoon
Jo meetha na ho, toh nikal aata hai aksar bharey ghaav se bhi khoon
Hoti hai peeda phir
Mann hota hai asthir
Tabhi zaroori hai nirantar Guruji ka chintan
Uss se sthir reh paata hai mann.

Guruji se jo judi rahe ruhaani taar
Toh beshak teekhe jhonke ya tufaan aayein baar baar
Guruji ke sahaare ko sampoorna maankar aur jaankar
Aasaan hoga tayy karna ye safar.

Kyunki na hawaa ka jhonka apne buss mein hai
Na hee apne buss mein hai tufaan
Hum hain Guruji kee maya se bilkul anjaan
Ve har pal hamein Apne se jodey rakhein, ye hoga hamaare liye vardaan.

Kyunki hawaa toh bhinn bhinn roop leti rahegi
Tufaan bannkar kabhi, toh jhonka bannkar kabhi
Guruji ke hukm par chalenge uske roop sabhi
Aisa hee hota aaya hai pehle se, aur aisa hee hoga aagey bhi.

🌹🌹🌹🌹🌹🌹🌹

Jai Guruji 🙏🙏
Dhirja

Lambi Lagey Ya Lagey Pal Bhar Kee (03/05/2026)

March 4, 2026

Om Namaha Shivaya
Aaj Ka Suvichaar 🙏🏻🙏🏻

#2936

    Ik Dooje Ke Sangg

Aao, ik dooje ke sangg
Gehra karein praarthana ka rangg
Kaamna karte huey saare sansaar ke mangal kee
Unn Guruji ko, Jinhe khabar hai pal pal kee.

Lagaa dein Guruji kee dee hui poori shakti
Taaki gehra ho hamaara rangg-e-bhakti
Guruji se preet badhaayein
Ye sundar mauka na ganvaayein.

Har rangg hai ruhaani
Har rangg kee chhavi hai suhaani
Guruji ka hai hum par pehra
Unke prati prem ka rangg karein gehra
Nakaaratmakta se na honei dein usey dooshit
Shubh aur shuddh soch mein hai sabhi ka hitt
Bhole bhaav mein sada ke liye rangg jaaye ye chitt
Guruji ko chet kar har pratikool bhaav jaaye mitt.

Anukampa mein hriday jaaye rangg
Guruji kee yaad mein rahein malang
Ruhaani rangon se rangeen ho bandagi
Khushhal ho jaaye sabki zindagi.

🌹🌹🌹🌹🌹🌹🌹

Jai Guruji 🙏🙏
Dhirja

Ik Dooje Ke Sangg (03/04/2026)

March 3, 2026

Om Namaha Shivaya
Aaj Ka Suvichaar 🙏🏻🙏🏻

#2935

           Anta:karan Kee Aankhon se

Dekho anta:karan kee aankhon se
Guruji bilkul adrishya nahin
Pratyaksh Ve dikhenge tumhe
Tum nihaarna Unhe
Unke ruhaani roop mein
Ya Unke swaroop mein
Unke darshan anoop mein
Dhyan kee meethi dhoop mein.

Guruji ashaareerik huey Hain
Kintu Hain virajmaan, ye satya hai
Unkee maujoodagi ko sweekaarna
Unke har bhakt ka kartavya hai.

Guruji Hain roop Parameshwar ka
Avatar Hain Ve Maheshwar ka
Unka dwaar hai Sachkhand ka dwaar
Aisee hai Unkee mahima aparampaar.

Bhakt kee gati nahin Guruji kee kripa bin
Guruji sabke angg sangg Hain raat aur din
Unkee hee mehar se miley chetna aur prerna
Chahiye toh ek Unhee kee mamta aur
samvedana.

Kyunki Guruji swayam Hain Rabb
Unhee mein Hain Devi Devta sabb
Ye baat satya thi tabb bhi aur yahee satya hai abb
Abb bhi hum na samjhein toh samjhenge hum kabb?

🌹🌹🌹🌹🌹🌹🌹

Jai Guruji 🙏🙏
Dhirja

Anta:karan Kee Aankhon se (03/03/2026)

March 2, 2026

Om Namaha Shivaya
Aaj Ka Suvichaar 🙏🏻🙏🏻

#2934

         Aapke Kadmon Ke Nishaan

Param poojya Guruji Maharaj,

Na dikhey hotey Aapke kadmon ke nishaan
Toh mai hoti uddhaar ke raaste se anjaan
Abb jo Aapki daya se hui hai is raaste kee pehchaan
Kripa karte rahiyega ki Aapki marzi anusaar Aapse paaoon bhakti ka vardaan.

Khaamiyon se hoon bhari, hoon naadaan
Aapki mehar kee mohtaaj hoon, mere karunanidhaan
Kabhi raaste par bhatakne lagoon
Toh Prabhu, mujhe bhatakne se bachaana
Jo phir bhi kabhi kisee kaaran bhatak hee jaaoon
Toh kshama kar ke sahi raaste par vaapis le aana.

Aapke charnon ke taley kee dhool bann-ne kee bhi nahin hai meri aukat
Phir bhi Aapne dee hai Apni sharan kee soumya saugat
Shukr bayaan karne mein asamarth hain mere alfaaz aur meri buddhi
Bhaav se bayaan kar paaoon, deejiye mujhe aisee shuddhi.

Aapke kadmon ke nishaan dekh paane kee bakhshiyega mujhe drishti
Unka anusaran kar paaoon, keejiyega mujh par aisee sumat kee vrishti
Aapke kadmon ke nishaan le chalenge jahaan
Mai Aapke aanchal mein rehkar chal doon vahaan
Toh bhatakne aur girne se bach jaaoongi
Har pal Aapse suraksha paaoongi
Nimaani hoon, chhota muh badi baat kehti hoon
Par Aap toh jaanein ki Aapki yaad mein rehti hoon
Deejiye mujhe aisa ashirwaad
Ki na beete mera koi pal bin kiye Aapko yaad
Rahoon khushi mein ya gumm mein
Rahoon zyada mein ya kumm mein
Sada rahoon Aapki sharan mein
Aapke paawan kamal charan mein.

🌹🌹🌹🌹🌹🌹🌹

Jai Guruji 🙏🙏
Dhirja

Aapke Kadmon Ke Nishaan (03/02/2026)

March 1, 2026

Om Namaha Shivaya
Aaj Ka Suvichaar 🙏🏻🙏🏻

#2933

   Prem Ka Vo Dariya

Guruji ka prem aseemit hai
Guruji ke prem mein har bhakt ka sampoorna hitt hai
Maano toh sab kuch hai
Na maan-ne ka toh khayaal hee tuchh hai.

Ye prem ka vo dariya hai
Jismein jitne gotey khaaoge
Utna Guruji mein khotey jaaoge
Aur utna zyada anand paaoge.

Is dariya mein doob kar tarr jaana hee toh hai bandagi
Guruji ka naam har shwaas mein ho, ye hee toh hai zindagi
Varna kitne aaye aur chale gaye Guru kee sharan mein aaye bin
Jinhe milee hai Guruji kee sharan, vo kyun na tarein raat aur din?

Prem ke is dariya mein beet jaaye apni ye dastaan
Kin lafzon mein karoon apni ye khwaahish mai bayaan
Is dariya kee gehraayee mein hai prem ka jo ratna samooh
Usey hee paane ke liye abb takk taras rahi hai meri rooh.

🌹🌹🌹🌹🌹🌹🌹

Jai Guruji 🙏🙏
Dhirja

Prem Ka Vo Dariya (03/01/2026)

February 28, 2026

Om Namaha Shivaya
Aaj Ka Suvichaar 🙏🏻🙏🏻

#2932

             Sabse Shreshth Tayaari

Kal ke liye hai sabse shreshth tayaari
Ki aaj aur abhi se karo achcha
Duur karo jhooth kee beemaari
Khud ko banaa kar sachcha.

Kayion ne ye pehle se bunaa hai
Apne swabhaav aur sanskaar mein
Jinhonei aisa kiya nahin, ve bhi ye kar lein
Toh anukool parivartan hota rahe sansaar mein.

Guruji ne sabhi ko kiya hai anugrahit
Guruji kar rahe Hain sabka hitt
Phir kyun dena saath jhooth aur buraayee ka?
Kyun na anusaran karein Guruji kee vadiyaayee ka?

Achchaayee aur sachchaayee ka
Pavitrata se atoot naata hai
Insaan inhe apnaane se
Yakeenan Guru ke kareeb ho paata hai.

Sachchaayee aur achchaayee bahut duur takk le jaayegi
Ruhaani oonchaayee takk pahunchane mein hamaare hee kaam aayegi
Purusharth safal honei ke liye zaroori hai paana mukti
Guruji bhala karenge, par hamein karni hogi apni oar se yukti.

Jo aaj takk aisa karte aaye hain
Ve hain uttam udaharan aur prerna
Kyun na in sajjanon ko prerna-strot maankar
Baaki jann bhi sachchaayee aur achchaayee kee oar jagaayein apni chetna?

Apne buss mein kahaan hai
Kewal Guruji hee karaa sakte Hain ye tayyaari
Vishwaas hai ki chalte huey is safar mein
Ruhaani oonchaayee takk pahunchne kee meri bhi aayegi baari
Meri oar se koshish rahe jaari
Swayam ko dilaati rehti hoon yaad
Unke dikhaaye raaste par chal paaoon
Guruji se karti hoon fariyaad.

Aur kuch na hai chahiye zindagi mein
Guruji sangg judne ke baad bandagi mein
Mai na jaanoon ki ye pyaar hai ya hai bhakti
Par mujhe toh isee paawan judaav se miltee hai shakti
Jo nirantar bann rahi hai meri koshish kee yukti
Kyunki Guruji ke charnon mein hee mera swarg aur aakhirkaar meri mukti.

🌹🌹🌹🌹🌹🌹🌹

Jai Guruji 🙏🙏
Dhirja

Sabse Shreshth Tayaari (02/28/2026)

February 27, 2026

Om Namaha Shivaya
Aaj Ka Suvichaar 🙏🏻🙏🏻

#2931

Ye Bagiya Hai Sansaar Kee

Ye bagiya hai sansaar kee
Yahaan khilte hain bhinn bhinn tareh ke phool
Phool hongei toh zaahir hai ki aaspaas hongei shool
Sab Unhee Paramatma ke ansh hain, ye hai tathya mool.

Pashu pakshi hon ya hon insaan
Sabhi mein baste Hain Bhagwaan
Aksar bhool jaati hai asal pehchaan
Khaaskar jabb badhta hai abhimaan.

Shool hon ya phir hon phool
Sabhi hain Guruji ke charnon kee dhool
Kisee kisee insaan ka bhaav hota hai asuri
Kisee mein hotey hain devi devta ke sanskaar
Yahee bann jaata hai phool ya shool ke roop ka aadhaar
Kuch aisa hee hai charitra ka saar
Kintu Guruji toh swayam SadaShiv Hain
Sabka kalyaan karte Hain Ve Parwardigaar.

Guruji kee mahima hai aisee aparampaar
Koi sharanaarthi na vanchit rahe Unke ashirwaad se
Hum phool hon ya hon hum shool
Apne bhaav ko paripoorna rakhein Unke prati dhanyawaad se.

🌹🌹🌹🌹🌹🌹🌹

Jai Guruji 🙏🙏
Dhirja

Ye Bagiya Hai Sansaar Kee (02/27/2026)

February 26, 2026

Om Namaha Shivaya
Aaj Ka Suvichaar 🙏🏻🙏🏻

#2930

                   Koshish Karo…

Koshish karo doojon ke aur apne gumm ko kumm karne kee
Koshish karo kisee ke jeevan mein khushiyan bharne kee
Bin nijee hastakshep kiye, bin uljhey kisee ke karam mein
Doojon kee sahaayata karo is jeevan mein
Na kar sako, toh Unko na pahunchaao koi thes ya nuksaan
Yaad rakho, tumhe har pal dekh rahe Hain tumhaare Bhagwaan
Jinhe tum Guruji kehkar karte ho sambodhit
Jo sada chaahte Hain Apne bhakton ka hitt.

Guruji neeyat parakhte Hain
Bhakt ka bhaav dekhte Hain
Koshish ka iraada rakho sachcha
Mann mein sewa bhaav ho achcha.

Ummeed na karna ki loag badle mein karenge tumhaare liye kuch
Aise khayaal banaayenge tumhaari soch ko tuchh
Tum buss koshish karo ki Guruji hon tum par prasann
Unhee ko saump do apni atma sangg apna tann mann aur dhan.

Sab kuch Guruji Maharaj ka hee toh hai deeya hua
Unkee kripa ne tumhaare jeevan ke har pehlu ko hai chhua
Tum bhi aa sako kisee ke kaam
Toh ismein hoga tumhaara bhi kalyaan
Isey bhi arpit kar Guruji ke charan mein
Yogdaan do sansaar ke mangal karan mein
Kalyuga mein satyugi bhaav phailaao sansaar mein
Apne chitt ko rakho ekaagra Guruji Parwardigaar mein.

🌹🌹🌹🌹🌹🌹🌹

Jai Guruji 🙏🙏
Dhirja

Koshish Karo… (02/26/2026)

February 25, 2026

Om Namaha Shivaya
Aaj Ka Suvichaar 🙏🏻🙏🏻

#2929

                          Khaalipan

Tumhaare bheetar ka khaalipan
Duniya ya duniya wale nahin sakte mita
Isey mita sakne wale ek hee Hain
Tumhaare Guruji, tumhaare pita.

Darasal ye khaalipan hai
Guruji ko paane kee aas
Guruji se ardaas karo
Ki Ve prerit karein tumhaara prayaas.

Guruji Hain tumhaari himmat
Guruji Hain hamdard tumhaare
Isliye na dhoondho yahaan vahaan
Apne liye vishwasneeya sahaare.

Guruji ne thaama hai tumhe
Tumhe mila hai Unka ruhaani saath
Jo khaalipan mehsoos hota hai tumhe
Vo mitega Guruji kee divyata ko kar ke atmasaat
Isliye Unse jude rehne kee koshish karo
Duniyavi apnon se duur mehsoos karte ho toh na daro
Sabb ho raha hai Guruji kee nazar mein
Ye sabb hona zaroori hai is safar mein
Taaki tumhe baandhne wale paash tootein
Tumhaare bhram tootein
Aur tum azad ho paao duniyadari ke jazbaat se
Tum swayam ko sampoorna jaano Guruji ke salonei saath se
Kyunki Ve hee Hain, kewal Ve hee
Jinse poornata ko praapt hogi tumhaari zindagi
Aur jo karenge tumhaara kalyaan
Yahaan aur vahaan.

🌹🌹🌹🌹🌹🌹🌹

Jai Guruji 🙏🙏
Dhirja

Khaalipan (02/25/2026)